Нүүдл 19
19
Израилин улс Синай уулын хаҗуд
1Египетәс Израилин улс һарч йовсна һурвдгч сарин шин сард эдн Синай көдә һазрт күрв. 2Рефидимас һарад, Израилин улс Синай көдә һазрт ирәд зогсад, уулын өөр бәәрлҗ зогсв.
3Моше Бурхн тал уулд һарв. Тендәс Деед Эзн энүг дуудв:
– Яковин тохмд кел, Израилин улст зәңгл: 4«Би Египетлә ю кесинь үзвит, Би тадниг һәрдин җивр деер яһҗ авч йовад, Бий талан авч ирсинь үзвит! 5Кемр тадн Намаг соңсад, Нанла кесн бооцанд иткхлә, тиигхлә тадн цуг улс дунд Мини хамгин үнтә улс болхит! Һазр кевтән Мини, 6тадн болхла Нанд шаҗна гелңгүдин алвт, әрүн улс болхит!» Эн үгмүдиг Израилин улст келҗ медүл.
7Моше хәрәд, келн-улсин медәтнриг цуглулад, Деед Эзнә келсәр эн үгмүдиг эднд медүлв. 8Әмтн цугтан, негн күртлән, хәрү өгв:
– Бидн Деед Эзнә келсәр һардвр кехвидн.
Моше Деед Эзнд әмтнә хәрүг зәңглв.
9Деед Эзн Мошед келв:
– Чамла Би яһҗ күүнддгинь, кезә чигн чамд оньдин иткдгинь әмтн соңстха гиһәд, Би чамур нигт үүлн мет ирнәв.
Моше Деед Эзнд әмтнә хәрүһинь зәңглхлә, 10Тер Мошед келв:
– Әмтнүр одад, эндр болн маңһдур чигн тедниг әрүсл, тедн эврә хувц-хунран уһаһад, 11нөкәдүрк өдрт белдтхә: тер өдр цуг әмтнә нүднд, Деед Эзн Синай уулд буух. 12Әмтнә төлә уулыг төгәләд меҗә һарһ, уул деер бичә һартха, терүнә девсңгиг бичә көндәтхә. Уулыг көндәсн кен-негнь үклән олх. 13Зуг һарарн энүг бичә көндәтн – терүг чолуһар цоктн эс гиҗ саадгар хаһад алтн. Мал эс гиҗ күн, йилһл уга, кемр эдн бүрә татсн әәһәр уул деер һархар седсн болхла – эдниг әмдәр үлдәҗ болшго.
14Моше уулас әмтнүр бууһад, тедниг бийән әрүслтн гив. Әмтн эврә хувцан уһав. 15Тегәд Моше келв:
– Нөкәдүрк өдрт белдтн, гергнләһән бичә ниилҗ кевттн.
16Һурвдгч өдрт өрүн эртәс авн һал цәкләд, оһтрһун дун һарв, уулыг нигт үүлн бүркв. Бүрән чаңһ ә һарв, әмтн бәәрндән үүмлдв. 17Моше әмтиг бәәрнәснь Бурхна өмнәс көтлв. Тедн уулын белд зогсв. 18Синай уул болхла утаһар дүүрв, юңгад гихлә Деед Эзн һал дотр энүнә ора деер буув. Уулас беш мет утан һарад чичрәд бәәв. 19Бүрән ә чаңһрад ирв. Мошег келәд бәәхлә, Бурхн болхла энүнд оһтрһун дууһар хәрү өгв. 20Деед Эзн Синай уулын ора деер бууһад, Мошег Бий талан, деегшән дуудв. Моше деегшән һарв.
21Деед Эзн Мошед келв:
– Бууһад әмтнд зәңгл, тедн Деед Эзиг үзхәр меҗә давҗ бичә өөрдтхә: эс гиҗ эднә икнкнь үкх. 22Деед Эзнүр өөрдхәр седҗәх шаҗна гелңгүд бас бийән әрүслх зөвтә, эс гиҗ Деед Эзн тедниг уга кех.
23– Әмтн Синай уул деер һаршго, – гиҗ Моше Деед Эзнд келв. – Та маднд урдаснь зәңглсн биләт, би болхла уулыг төгәлҗ меҗәләд, уулыг әрүслүв.
24Деед Эзн Мошед келв:
– Йов, бууһад Ахаронла хамдан нааран хәрү ир. Зуг шаҗна гелңгүд болн эгл улс Нан тал бичә һартха, эс гиҗ Би тедниг уга кехв.
25Моше әмтнүр бууһад энүг зәңглв.
Currently Selected:
Нүүдл 19: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
