Нүүдл 16

Манна болн бөдн шовуд

1Элимәс һарад, Израилин улсин хамцан Элимин болн Синайин хоорнд бәәршлҗәдг Син гидг көдә һазрт ирв. Эннь Египетәс һарч йовлһна хойрдгч сард, сарин арвн тавдгч өдрт болв. 2Тенд, көдә һазрт, Израилин улсин хамцас Мошед болн Ахаронд һундлан келәд бәәв.

3– Мадниг Египетд Деед Эзн алснь деер болх билә, – гиҗ Израилин улс келв. – Тенд бидн махта хәәс төгәлҗ суулавидн, мадн цадтлан иддг өдмгтә биләвидн. Тадн болхла цуг улсиг харһнулхин төлә мадниг эн көдә һазрур көтлҗ авч ирвит!

4Деед Эзн Мошед келв:

– Би таднд хур мет теңгрәс өдмг асхҗ өгнәв. Өдр болһн әмтн һарад, өдртән идх хотан цуглулх. Би болхла эдн яһҗ Мини Зака күцәҗәхинь сөрнәв. 5Долан хонгин зурһадгч өдр ирхлә, эдн эн өдрт цуглулсан белдхлә, эннь эдн йиринәс хойр холванд икәр цуглулснь медгдх.

6Моше Ахарон хойр Израилин улст келҗәнә:

– Асхн ирхлә, тадн медхит: эннь Деед Эзн тадниг Египетәс көтлҗ һарһв. 7Өрүнднь тадн Деед Эзнә туурмҗиг үзхит. Юңгад гихлә Деед Эзнд һундлан медүлҗәхитн Эн соңсв. Зуг бидн кен болҗахмб? Мадниг яһад гемшәҗәхмб?

8Моше келҗәнә:

– Асхар Деед Эзн таднд мах, өрүһәр болхла дала өдмг өгх. Эн тадн Терүнд һундлан медүлсинь соңсв. Бидн кен болҗахмб? Тадн маднд биш, зуг Деед Эзнд һундлан медүлҗәнәт!

9Моше Ахаронд келҗәнә:

– Израилин улсин хамцанд Деед Эзнә өмн һарх заквр өг, юңгад гихлә Деед Эзн теднә һундлынь соңсв.

10Ахарон эн үгмүдиг Израилин улсин хамцанд келхләнь, эдн көдә һазр тал хаҗив – тенд, үүлнд, эдн Деед Эзнә туурмҗиг үзв.

11Деед Эзн Мошед келв:

12– Би Израилин улсин һундлыг соңсув. Эднд иигҗ кел: асхарнь мах идхит, өрүнднь болхла тадн дала өдмгтә болхит. Тиигхлә тадн Би, Деед Эзн, – тана Бурхн болҗахинь медхит.

13Тиигәд асхарнь бөдн шовуд нисҗ ирәд теднә бәәриг дүүргв. Өрүһәр болхла энд эргмдән чиг буув. 14Чиг ширгҗ одхла, көдә һазр кевтән нимгн шухтнсн коруһин бәәдлтә юмар бүркгдснь үзгдв. 15Израилин улс үзчкәд, эннь юн болҗахинь медлго нег-негнәсн сурад бәәв:

– Эннь юмб?

Моше эднд келв:

– Энтн таднд Деед Эзнә өгүлҗәх өдмг болҗана. 16Деед Эзн таднд иим заквр өгв: «Күн болһн кедү энүнә бүлднь кергтәһинь цуглултха – сег дотр күн болһна төлә неҗәһәд омер#16:16 Омер – еврей келн-улсин үүрмг юм чиңнүрддг кемҗән, 2,3 л дүңгә. бәәхмн».

17Израилин улс минь тиигҗ кев. Негнь икәр цуглулхла, талдань – баһар. 18Зуг цуглулгдсиг омерәр чиңнүрдхлә, икәрнь цуглулгдснд үлү юмн уга болв, баһар цуглулгдснд болхла дуту юмн уга болв. Күн болһн кедү юм идҗ чадхан цуглулҗ авв.

19– Энүнәс маңһдурк өдрт юм бичә үлдәтн, – гиҗ Моше заквр өгв.

20Болв энүг зәрм әмтн соңссн уга: цуглулгдсна зәрм хүвинь өрүн күртл үлдәв, үлдәснь үрҗ одв. Терүнднь өтн һарв. Моше эн улст уурлв.

21Өрүнднь күн болһн кедү өрк-бүлднь кергтәһинь цуглулв. Өдртнь болхла цуг эс цуглулгдснь нарнд хәәләд бәәв. 22Долан хонгин зурһадгч өдрт эдн хойр холван икәр цуглулв – күн болһнд хошаһад омер. Хамцана һардачнрнь ирәд, энүнә тускар Мошед келхлә, 23эн хәрү өгнә:

– Деед Эзн энүнә тускар келлә. Маңһдур төвкнүн бәәлһнә өдр, Деед Эзнә әрүн бемб өдр. Болһхар седҗәхән болһтн, чанхар седҗәхән чантн, эс идсән маңһдур күртл үлдәтн.

24Әмтн Мошен закврар эс идсән дарук өдр күртл үлдәв. Эн саамд үлдәснь үрсн уга, энүнд өтн чигн уга болв.

25Моше келв:

– Эндр энүг идтн. Эндр Деед Эзнә бемб өдр, тегәд һазрт тадн юм олҗ чадшгот. 26Зурһан өдртән цуглултн, доладгч өдрнь болхла – бемб өдр#16:26 Бемб өдр – еврей улсин долан хонгин доладгч өдр бемб өдр гиҗ нерәдгднә.. Эн өдр тадн юм олшгот.

27Зәрмнь долан хонгин доладгч өдртнь чигн юм цуглулхар йовв, болв олҗ чадсн уга. 28Деед Эзн Мошед келв:

– Кедү күртлән тадн Мини өгсн закврмудыг болн закадыг эвдхмбт? 29Хәләтн: Деед Эзн таднд бемб өдриг өгв, тегәд чигн долан хонгин зурһадгч өдрт таднд хойр өдрә хотыг Тер өгүлнә. Доладгч өдрт күн болһн гертән үлдәд, альдаран чигн һарх зөв уга.

30Долан хонгин доладгч өдрт әмтн амрв.

31Израилин улс эн хотыг «манна» гиҗ нерәдв. Манна цаһан болчкад кориандрин экин бәәдлтә, амтнь болхла бал тәвәд болһсн һуйрла әдлхн. 32Моше келв:

– Деед Эзн иигҗ медүлв: «Египетәс көтлҗ һарһсн саамд Би тадниг көдә һазрт хотлсн өдмгиг күн болһн үзтхә гиһәд маннан нег омер үйәс үйд хадһлгдад бәәтхә».

33– Буһш ав, – гиҗ Моше Ахаронд келв, – энүн дотр маннан дүүрң омериг тәвәд, таднд үйәс үйд хадһлгдхин төләд Деед Эзнә өмн оркчк. 34Хөөннь Ахарон Деед Эзн Мошед заасар буһшиг хадһлхар Бооцана хавтха чолудын хаҗуд тәвв.

35Әмтн бәәдг һазрур иртлән, Израилин улс 40 җилдән маннар хот кеһәд бәәв. Канана һазрин меҗәд күртлән эдн маннар теҗәл кеһәд бәәв. 36(Омер – эннь ефән#16:36 Ефә – еврей келн-улсин үүрмг юм чиңнүрддг кемҗән, 23 л дүңгә. арвдгч хүвнь мөн.)

Currently Selected:

Нүүдл 16: ХКО_ӘБ

Highlight

Copy