2 Көринтинхн 8

Иткдг улсин төлә мөңг цуглуллһн

1Ахнр-дүүнр, Македоньд бәәх Христост иткдг багмудт Бурхн ямаран хәәрлтән өгснә тускар тадниг медтхә гиҗәнәвидн. 2Тедн зовлңгар дамҗад икәр сөргдв. Дегд түрү бәәв чигн тедн мөңг өгхдән йир өгәнч болв, яһад гихлә, теднә байр аһу ик. 3Тедниг бәәснәсн өгч чадхан өгәд, нам терүнәсн давуһар өгсиг би герчлҗ чадхв. Эврәннь дурар 4Ерусалимд бәәх Бурхна улст дөң болхан тедн маднас итклтәһәр сурв. 5Теднә кеснь мана күләҗәснәс даву болв. Хамгин түрүнд тедн бийән Деед Эзнд нерәдв, дәкәд Бурхна таалар маднд дөң болв. 6Тадн дунд Титин экләд кеҗәх эн цаһан седклин кергиг күцәтхә гиҗ терүг сурвидн. 7Тадн цуг бәәсәрн байнт: иткләрн, келәрн, медрләрн, гүҗрлтәрн болн маднд өгчәх эврәннь дурарн. Бидн тадниг эн цаһан седклтә кергтән өгәнч болтн гиҗәнәвидн.

8Би таднд заквр өгчәхшв. Талдан улсин гүҗрлтин тускар келхләрн, би тадна дурна үнниг зөрҗ медхәр седләв. 9Мана Деед Эзн Исус Христосин цаһан санаг тадн меднәт. Тер байн болв чигн Эврәннь түрү бәәдләрн тадниг байҗахин төлә тадна төлә тер хоосн күн болв. 10Эн төрәр мини ухан седкл иим: давсн җил эклсн көдлмшән күцәтн. Яһад гихлә, тадн эн кергиг түрүн эклвт, нам түрүләд күцәхәр седвт. 11Эн кергән тадн тана арһла ирлцүләд күцәтн. Тадн эклсн седвәрәрн эн кергән күцәҗ чадхан үзүлтн. 12Кемр тадн дөң күргхәр седҗәхлә, тиигхлә Бурхн эн седвәриг күүнд уга юмнла биш, бәәснләнь ирлцүлҗ авна. 13Би күчр-күндиг таднд даалһад, талдан улсин бәәдл гиигрүлхәр бәәнәв гиҗ келҗәхшв. Би әдл бәәдл учртха гиләв. 14Ода деерән тадн эврәннь ик зөөрәсн теднә дутуһинь дүүргҗ чадҗанат. Дәкәд теднд зөөр хоршхла, тиигхлә тедн тана дутуг күцәх. Тиигәд аштнь әдл бәәдл учрх. 15Бурхна бичгт иигҗ бичәтәлм: «Икәр юм хураҗ авснас үлү һардго, баһар хураснас дуту болдго».

Тит болн терүнә хаалһин ханьмуд

16Намаг кеснлә әдл Бурхн Титиг таднд дөң күрх ик седклтә кеснд би Бурхнд ханлтан өргҗәнәв. 17Эн сурвриг күцәхдән зөвшәл өгсн деерән Тит дөң болхар икәр седәд, эврәннь сән дурар тадн тал йовҗана. 18Терүнлә хамдан мадн бас нег ахан илгәввидн. Терүг Сән Зәңг тархадгднь Христост иткдг цуг багмуд икәр үнлнә. 19Түүнәс даву Деед Эзнә туурмҗин төлә болн мана сән седвәр үзүлхин төлә цаһан седклин эн кергиг бидн күцәх цагт иткдг улсин багмуд терүгәр маднд хань кев. 20Элвгәр өгсн эн белгиг яһҗ авч күргснд әмтн дурго болдгоһар бидн сагар йовнавидн. 21Яһад гихлә, бидн зуг Деед Эзнә өмн биш, болв цуг әмтнә өмн чикәр кехәр седҗәнәвидн. 22Теднлә бидн эврәннь ахан илгәввидн. Бидн терүг шулун-шулун шинҗләд, терүнә дөң болхар бәәх седклинь итквидн. Ода болхла терүнә дөң болх седвәрнь улм икдв, яһад гихлә, тер таднд иткҗәнә. 23Титин тускар келхлә, тер – мини хань болн таднд церглхд нанла хамдан көдлдг күн болҗана. Талдан ахнрин тускар болхла, тедн Христосин туурмҗнь болад терүнд иткдг багмудар илгәгдв. 24Мадниг таднар йосндан буульмҗ кеҗәхиг иткдг улсин цуг багмуд үзәд меддгәр ахнр-дүүнрт дуран өгтн.

Currently Selected:

2 Көринтинхн 8: ХКО_ӘБ

Highlight

Copy