ᓬᐃᐱᑎᑲᐢ 22
22
1ᑳ ᑎᐯᔨᐦᒋᑫᐟ ᒫᑲ ᑭ ᐊᔭᒥᐦᐁᐤ ᒧᓯᓴ ᐁ ᐃᑌᐧᐟ, 2ᐃᐧᐦᑕᒪᐃᐧᐠ ᐁᕒᐊᐣ ᒥᓇ ᐅᑯᓯᓴ ᐱᐢᑭᐢ ᑭᑕ ᐊᔮᒋᐠ ᐊᓂᐦᐃ ᐅᐦᒋ ᑲᓈᒋ ᑫᑲᐧᔭ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑳ ᐸᑭᑎᓇᒪᐃᐧᒋᐠ, ᑳ ᑲᓈᒋᑕᒪᐃᐧᒋᐠ, ᐁᑳ ᒫᑲ ᑭᑕ ᐱᐁᐧᔨᑖᑯᑖᒋᐠ ᑳ ᑲᓈᑕᕽ ᓂ ᐃᐧᔪᐃᐧᐣ; ᓂᔭ ᑳ ᑎᐯᔨᐦᒋᑫᔮᐣ. 3ᐅᒥᓯ ᐃᓯᐠ, ᐱᑯ ᐊᐃᐧᔭᐠ ᑲᐦᑭᔭᐤ ᑭᐟ ᐊᐋᐧᓯᒥᓯᐋᐧᐊᐧᐠ ᐊᑎ ᐋᔮᓂᐢᑫ ᐱᒫᑎᓯᔦᑯ, ᑫ ᓈᑕᕽ ᑲᓈᒋ ᑫᑲᐧᔭ ᐊᓂᐦᐃ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑳ ᑲᓈᒋᑕᒪᐋᐧᔨᐟ ᑳ ᑎᐯᔨᐦᒋᑫᔨᐟ, ᐁ ᑭᑭᐢᑲᕽ ᒫᑲ ᐁᑳ ᐁ ᐯᑭᓯᐟ, ᐁᐊᐧᑯ ᐊᐦᒑᕽ ᑭᑕ ᑭᐢᑭᐁᐧᐸᐋᐤ ᐁᑳ ᑭᑕ ᐅᐦᑎᐢᑲᐃᐧᐢᑲᐃᐧᐟ; ᓂᔭ ᑳ ᑎᐯᔨᐦᒋᑫᔮᐣ. 4ᐱᑯ ᐊᐃᐧᔭᐠ ᐊᔨᓯᔨᓂᐤ ᐁᕒᐊᐣ ᐅᐟ ᐊᐋᐧᓯᒥᓴ ᐁ ᐅᐦᒋᐟ ᐁ ᒪᒑᐢᐱᓀᐟ ᐊᐦᐳ ᐁ ᐅᐦᒋᑲᐋᐧᐢᐱᓀᐟ; ᓇᒪᐃᐧᔭ ᑭᑕ ᒥᒋᐤ ᐊᓂᐦᐃ ᑲᓈᒋ ᑫᑲᐧᔭ ᐹᑎᒫ ᐯᑭᓯᒋ. ᐊᐃᐧᔭᐠ ᒥᓇ ᓵᒥᓇᑭ ᑫᑲᐧᐩ ᐁᑳ ᐁ ᐯᑲᓂᔨᐠ ᐅᓂᐱᐊᐧ ᐅᐦᒋ, ᐊᐦᐳ ᐊᔨᓯᔨᓂᐤ ᐅ ᓂᐦᑖᐃᐧᑭᐃᐁᐧᐃᐧᐣ ᑳ ᓇᑲᑎᑯᐟ. 5ᐊᐦᐳ ᐊᐃᐧᔭᐠ ᓵᒥᓈᒋ ᓈᐣᑕᐤ ᐊᐃᐧᔭ ᑳ ᐸᐹᒥᑖᒋᒧᔨᐟ ᐃᑕ ᑭᑕ ᐅᐦᒋ ᐁᑳ ᐯᑭᓯᐟ ᐊᐦᐳ ᐊᔨᓯᔨᓂᐊᐧ ᐃᑕ ᑭᑕ ᐅᐦᒋ ᐁᑳ ᐯᑭᓯᐟ, ᐱᑯ ᑐᐃᐧ ᐁᑳ ᐯᑭᓯᐃᐧᐣ ᐁ ᐊᔮᐟ. 6ᐊᓇ ᑯᑕᒑᑯᐟ ᑫ ᓵᒥᓇᒧᑫᐧ ᐁᑯᑐᐊᐧ, ᓇᒪᐃᐧᔭ ᑭᑕ ᐯᑭᓯᐤ ᐃᐢᑯ ᑭᑕ ᐅᑖᑯᓯᓂᔨᐠ, ᒥᓇ ᓇᒪᐃᐧᔭ ᑭᑕ ᒥᒋᐤ ᑳ ᑲᓈᑕᓂᔨᑭ, ᐱᑯ ᑭᐢᐱᐣ ᑭ ᑭᒋᐢᑖᐹᐊᐧᑖᒋ ᐃᐧᔭᐤ ᓂᐱᕽ. 7ᐃᐢᐱ ᒫᑲ ᑭ ᐸᐦᑭᓯᒧᑭ ᑭᑕ ᐯᑭᓯᐤ; ᒣᐧᐢᑕᐢ ᐃᔨᑯᕽ ᒫᑲ ᑭᑕ ᑭ ᒥᒋᐤ ᑳ ᑲᓈᑕᓂᔨᑭ, ᒋᑫᒫ ᐁᐊᐧᑯᓂ ᐅ ᒥᒋᐃᐧᐣ. 8ᐊᐃᐧᔭ ᓭᑫ ᑳ ᓂᐱᔨᐟ ᐊᐦᐳ ᐱᓯᐢᑭᐊᐧ ᑳ ᑭ ᐱᑯᐱᑖᔨᐟ ᓇᒪᐃᐧᔭ ᑭᑕ ᒧᐁᐧᐤ ᑭᑕ ᐃᐧᔨᐱᐃᓱᐟ ᐁᐊᐧᑯᓂ ᐅᐦᒋ; ᓂᔭ ᑳ ᑎᐯᔨᐦᒋᑫᔮᐣ. 9ᑭᑕ ᑲᓀᐧᔨᑕᒪᐧᐠ ᒫᑲ ᓂᐟ ᐊᔮᑳᐧᒥᒥᐁᐧᐃᐧᐣ, ᐁᑳ ᑭᑕ ᓇᔭᑕᑭᐠ ᒪᒋᐃᑎᐃᐧᐣ ᐁᑯᑕ ᐅᐦᒋ, ᐁᑯᓯ ᑭᑕ ᓂᐱᒋᐠ ᐁᑯᑕ, ᑭᐢᐱᐣ ᐱᐁᐧᔨᑖᑯᑖᑖᐧᐃᐧ; ᓂᔭ ᑳ ᑎᐯᔨᐦᒋᑫᔮᐣ ᑳ ᑲᓈᒋᐊᑭᐠ.
10ᓇᒪᐃᐧᔭ ᒫᓂᑌᐤ ᑭᑕ ᒥᒋᐤ ᑳ ᑲᓈᑕᓂᔨᐠ; ᐊᐃᐧᔭ ᐁ ᐃᐧᒋᐊᔮᒥᑯᐟ ᐊᔭᒥᐦᐁᐃᐧᔨᓂᐤ ᐊᐦᐳ ᐁ ᐊᑐᐢᑲᐋᐟ ᐊᑐᐢᑫᔮᑲᓇ ᓇᒪᐃᐧᔭ ᑭᑕ ᒥᒋᐤ ᑳ ᑲᓈᑕᓂᔨᐠ. 11ᒫᑲ ᑭᐢᐱᐣ ᐊᔭᒥᐦᐁᐃᐧᔨᓂᐤ ᐊᑖᐁᐧᒋ ᓈᐣᑕᐤ ᐊᐃᐧᔭ, ᐊᓂᐦᐃ ᑳ ᐊᑖᐁᐧᐟ ᐅ ᓱᓂᔮᒪ ᐅᐦᒋ, ᐁᐊᐧᑯ ᑭᑕ ᑭ ᒥᒋᐤ, ᒥᓇ ᐊᓂᐦᐃ ᑳ ᓂᐦᑖᐃᐧᑭᔨᐟ ᐃᐧᑭᕽ, ᐁᐊᐧᑯᓂ ᑭᑕ ᑭ ᒧᐁᐧᔨᐊᐧ ᐅ ᐸᐦᑫᐧᓯᑲᓂᒪ. 12ᑭᐢᐱᐣ ᒫᑲ ᐊᔭᒥᐦᐁᐃᐧᔨᓂᐤ ᐅᑖᓂᓴ ᐃᐧᑭᒫᔨᒋ ᒫᓂᑌᐊᐧ, ᓇᒪᐃᐧᔭ ᑭᑕ ᒥᒋᐤ ᐅᐦᐱᓈᓱᐃᐧᐣ ᐊᓂᐦᐃ ᑳ ᑲᓈᑕᑭ. 13ᒫᑲ ᑭᐢᐱᐣ ᐊᔭᒥᐦᐁᐃᐧᔨᓂᐤ ᐅᑖᓂᓴ ᓯᑳᐃᐧᐢᑫᐧᐃᐧᒋ, ᐊᐦᐳ ᐁᐧᐱᓂᐦᒋ, ᐁᑳ ᒫᑲ ᐅᐟ ᐊᐋᐧᓱᒥᓱᓯᒋ, ᐯ ᑭᐁᐧᒋ ᒫᑲ ᐅᑖᐃᐧᔭ ᐃᐧᑭᔨᕽ, ᑖᐱᐢᑯᐨ ᒣᑳᐧᐨ ᐁ ᐅᐢᑳᑎᓯᐟ ᑭᑕ ᑭ ᒧᐁᐧᐤ ᐅᑖᐃᐧᔭ ᐅ ᐸᐦᑫᐧᓯᑲᓂᒥᔨᐊᐧ; ᒫᑲ ᓇᒪᐃᐧᔭ ᒫᓂᑌᐊᐧ ᑭᑕ ᒧᐁᐧᔨᐊᐧ.
14ᑭᐢᐱᐣ ᒫᑲ ᐊᔨᓯᔨᓂᐤ ᐱᐦᒋ ᒥᒋᒋ ᑳ ᑲᓈᑕᓂᔨᐠ, ᐁᑲᐧ ᐯᔭᐠ ᐁ ᑭ ᓂᔮᓇᓄᑖᕽ ᐃᔨᑯᕽ ᑭᑕ ᑕᑯᐊᐢᑖᐤ ᑭᑕ ᒥᔦᐤ ᒫᑲ ᐊᔭᒥᐦᐁᐃᐧᔨᓂᐊᐧ ᐊᓂᒪ ᑳ ᑲᓈᑕᓂᔨᐠ. 15ᓇᒪᐃᐧᔭ ᒫᑲ ᑭᑕ ᐱᐁᐧᔨᑖᑯᑖᐊᐧᐣ ᑳ ᑲᓈᑕᓂᔨᑭ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑳ ᐸᑭᑎᓇᒪᐋᐧᒋᐠ ᑳ ᑎᐯᔨᐦᒋᑫᔨᐟ. 16ᐁᑯᓯ ᐃᓯ ᒫᑲ ᑭᑕ ᓇᔭᑕᒧᐋᒋᐠ ᐊᐧᓂᑐᑕᒧᐃᐧᐣ ᐃᑕ ᑭᑕ ᐅᐦᒋ ᐊᑖᒣᔨᑖᑯᓯᔨᐟ, ᐃᐢᐱ ᐁ ᒥᒋᒋᐠ ᑳ ᑲᓈᑕᑭ; ᒋᑫᒫ ᓂᔭ ᑳ ᑎᐯᔨᐦᒋᑫᔮᐣ ᑳ ᑲᓈᒋᐊᑭᐠ.
17ᑳ ᑎᐯᔨᐦᒋᑫᐟ ᒫᑲ ᑭ ᐊᔭᒥᐦᐁᐤ ᒧᓯᓴ, ᐁ ᐃᑌᐧᐟ, 18ᐃᐧᐦᑕᒪᐃᐧᐠ ᐁᕒᐊᐣ ᒥᓇ ᐅᑯᓯᓴ, ᒥᓇ ᑲᐦᑭᔭᐤ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᒥᓇ ᐃᓯᐠ, ᐱᑯ ᐊᐃᐧᔭᐠ ᑳ ᐊᔮᐟ ᐃᐢᕒᐁᐃᓬ ᐃᐧᑭᕽ, ᐊᐦᐳ ᒫᓂᑌᐊᐧᐠ ᐃᐢᕒᐁᐃᓬᐃᕽ ᑳ ᐊᔮᒋᐠ, ᑳ ᐸᑭᑎᓇᕽ ᐅ ᐸᑭᑎᓂᑫᐃᐧᐣ, ᑭᐢᐱᐣ ᓈᐣᑕᐤ ᐅ ᑭᐦᒋᐃᑌᐧᐃᐧᐣ, ᐊᐦᐳ ᐅ ᑌᐯᔨᒧᐃᐧ ᐸᑭᑎᓈᓱᐃᐧᓇ, ᑳ ᐸᑭᑎᓇᒪᐋᐧᒋᐠ ᑳ ᑎᐯᔨᐦᒋᑫᔨᐟ ᐁ ᒪᒍᐢᑌᐊᒪᐋᐧᒋᐠ. 19ᑭᑕ ᐅᑎᓇᒫᑲᐃᐧᔦᐠ ᑭ ᑲ ᐸᑭᑎᓈᐋᐧᐤ ᔮᐯᐊᐧᔭ ᐁᑳ ᐁ ᒫᐢᑭᓯᐟ, ᑭᐢᐱᐣ ᒧᐢᑐᓴᐧᐠ, ᐊᐦᐳ ᒫᔭᑎᐦᑲᐧᐠ, ᐊᐦᐳ ᐋᐧᐸᑎᑲᐧᐠ. 20#ᑎᔪᑕᕒᐊᓇᒥ 17:1ᒫᑲ ᐊᓇ ᐁ ᒫᐢᑭᓯᐟ ᓇᒪᐃᐧᔭ ᑭ ᑲ ᐸᑭᑎᓈᐋᐧᐤ; ᒋᑫᒫ ᓇᒪᐃᐧᔭ ᑭ ᑲ ᐅᑎᓇᒫᑲᐃᐧᓈᐋᐧᐤ. 21ᐊᐃᐧᔭᐠ ᒫᑲ ᐸᑭᑎᓇᒪᐊᐧᒋ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓇ ᑳ ᑎᐯᔨᐦᒋᑫᔨᐟ ᑭᑕ ᑎᐱᑐᑕᕽ ᑭᐦᒋ ᐃᑌᐧᐃᐧᐣ, ᐊᐦᐳ ᑌᐯᔨᒧᐃᐧ ᐸᑭᑎᓈᓱᐃᐧᐣ, ᒧᐢᑐᓴᐧ ᐅᐦᒋ ᐊᐦᐳ ᒫᔭᑎᐦᑲᐧ ᐅᐦᒋ, ᑭᑕ ᑲᐦᑭᓯᐤ ᑭᑕ ᑭ ᐅᑎᓂᐦᐟ; ᓇᒪᐃᐧᔭ ᓈᐣᑕᐤ ᐃᓯ ᑭᑕ ᒫᐢᑭᓯᐤ. 22ᐁᑳ ᐁ ᐋᐧᐱᐟ, ᐁ ᐱᑯᐸᔨᐟ, ᐁ ᐅᒋᐢᑳᐟ, ᐁ ᐊᐢᑭᓯᐟ, ᐊᐦᐳ ᐁ ᒫᔨᑭᐟ, ᐁ ᐊᐧᔪᒥᑭᐟ, ᓇᒪᐃᐧᔭ ᐁᐊᐧᑯᓂ ᑭ ᑲ ᐸᑭᑎᓇᒪᐋᐧᐋᐧᐤ ᑳ ᑎᐯᔨᐦᒋᑫᐟ, ᒥᓇ ᓇᒪᐃᐧᔭ ᑭ ᑲ ᒪᒍᐢᑌᐊᒪᐋᐧᐋᐧᐤ ᐸᑭᑎᓈᓱᐃᐧᓈᐱᐢᑯᕽ ᑳ ᑎᐯᔨᐦᒋᑫᐟ. 23ᐱᑯ ᐃᓯ ᔮᐯᒧᐢᑐᐢ ᐊᐦᐳ ᒫᔭᑎᐦᑯᓯᐢ ᐁ ᒫᔨᓈᑯᓯᐟ ᐊᐦᐳ ᓈᐣᑕᐤ ᑫᑲᐧᐩ ᐁᑳ ᐁ ᐃᐦᑕᑲᐧᓂᔨᐠ, ᐁᑯᑐᐊᐧ ᑭ ᑲ ᑭ ᐸᑭᑎᓈᐤ ᑌᐯᔨᒧᐃᐧ ᐸᑭᑎᓈᓱᐃᐧᐣ; ᒫᑲ ᑭᐦᒋᐃᑌᐧᐃᐧᐣ ᐅᐦᒋ ᓇᒪᐃᐧᔭ ᑭᑕ ᐅᑎᓇᒪᐋᐧᐤ. 24ᓇᒪᐃᐧᔭ ᑭ ᑲ ᐸᑭᑎᓇᒪᐋᐧᐤ ᑳ ᑎᐯᔨᐦᒋᑫᐟ ᐊᓂᒪ ᑳ ᒥᓵᐧᑲᓂᐊᐧᕽ, ᐁ ᒫᔭᐱᓀᐢᑲᒥᕽ, ᐁ ᐱᑯᐃᑳᑌᐠ, ᐊᐦᐳ ᐁ ᑭᐢᑲᐦᐃᑳᑌᐠ; ᐊᐦᐳ ᓇᒪᐃᐧᔭ ᐁᑯᑐᐊᐧ ᑭ ᑲ ᐸᑭᑎᓈᓱᓈᐋᐧᐤ ᑭᐟ ᐊᐢᑭᐋᐧᕽ. 25ᐊᐦᐳ ᓇᒪᐃᐧᔭ ᐅᒋᐦᒋᕽ ᐅᐦᒋ ᑳ ᐱᑐᓯᐢᑳᓀᓯᐟ ᑭ ᑲ ᐸᑭᑎᓂᒫᐊᐧ ᐅ ᐸᐦᑫᐧᓯᑲᓂᒪ ᑭ ᑭᓭᒪᓂᑐᒥᐋᐧᐤ ᓈᐣᑕᐤ ᐁᑯᑐᐊᐧ; ᒋᑫᒫ ᐅ ᓂᓯᐊᐧᓈᑎᓯᐃᐧᓂᐋᐧᐤ ᑭᑭᐢᑳᑲᐧᐠ, ᒫᐢᑭᓯᐊᐧᐠ; ᓇᒪᐃᐧᔭ ᑭ ᑲ ᐅᑎᓇᒫᑲᐃᐧᓈᐋᐧᐤ.
26ᑳ ᑎᐯᔨᐦᒋᑫᐟ ᒫᑲ ᑭ ᐊᔭᒥᐦᐁᐤ ᒧᓯᓴ, ᐅᒥᓯ ᐁ ᐃᑖᐟ, 27ᑭᐢᐱᐣ ᒧᐢᑐᓱᓯᐢ, ᐊᐦᐳ ᒫᔭᑎᐦᑯᓯᐢ, ᐊᐦᐳ ᐋᐧᐸᑎᑯᓯᐢ ᓂᔪᑯᓯᒋ, ᐁᑲᐧ ᑌᐸᑯᑊ ᑭᓯᑳᐤ ᑭᑕ ᐃᐧᒉᐁᐧᐤ ᐅᑳᐃᐧᔭ; ᐁᑯᓯ ᒫᑲ ᐁ ᐊᔨᓈᓀᐅᑭᓯᑳᔨᐠ ᐁᑯᑕ ᐅᐦᒋ ᑭᑕ ᑭ ᐅᑎᓈᐤ ᑭᑕ ᐸᑭᑎᓂᑫᕽ ᐁ ᒪᒍᐢᑌᐦᐊᒫᐦᐟ ᑳ ᑎᐯᔨᐦᒋᑫᐟ. 28ᑭᐢᐱᐣ ᒫᑲ ᓄᓭᒧᐢᑐᐢ ᐊᐦᐳ ᓄᓭᒫᔭᑎᕽ, ᓇᒪᐃᐧᔭ ᑭ ᑲ ᓂᐸᐦᐋᐋᐧᐤ ᐊᓯᒋ ᐅᐟ ᐊᔨᓯᓯᒪ ᐯᔭᑳᐧᐤ ᐁ ᑭᓯᑳᐠ. 29ᑭᐢᐱᐣ ᒫᑲ ᐋᐧ ᐸᑭᑎᓇᒪᐋᐧᔦᑯ ᓇᓈᐢᑯᒧᐃᐧ ᐸᑭᑎᓈᓱᐃᐧᐣ ᑳ ᑎᐯᔨᐦᒋᑫᐟ, ᑭ ᑲ ᐃᓯ ᐸᑭᑎᓈᓱᓈᐋᐧᐤ ᑭᑕ ᐅᑎᓇᒫᑲᐃᐧᔦᐠ. 30ᐁᐊᐧᑯ ᐁ ᑭᓯᑳᐠ ᑭᑕ ᒥᒋᓈᓂᐊᐧᐣ; ᓇᒪᐃᐧᔭ ᑫᑲᐧᐩ ᑭ ᑲ ᐃᐢᑲᐧᐢᑎᓈᐋᐧᐤ ᑫᑭᓭᐹᔮᑭ; ᓂᔭ ᑳ ᑎᐯᔨᐦᒋᑫᔮᐣ. 31ᐁᐊᐧᑯ ᐅᐦᒋ ᒫᑲ ᑭ ᑲ ᑲᓀᐧᔨᑌᓈᐋᐧᐤ ᓄᔭᓱᐁᐧᐃᐧᓇ, ᒥᓇ ᑭ ᑲ ᐃᑐᑌᓈᐋᐧᐤ; ᓂᔭ ᑳ ᑎᐯᔨᐦᒋᑫᔮᐣ. 32ᓇᒪᐃᐧᔭ ᒫᑲ ᑭ ᑲ ᐱᐁᐧᔨᑖᑯᑖᓈᐋᐧᐤ ᑳ ᑲᓈᑕᕽ ᓂ ᐃᐧᔪᐃᐧᐣ; ᒫᑲ ᐱᑯ ᑭᑕ ᑲᓈᑌᔨᒥᑲᐃᐧᔮᐣ ᒣᑳᐧ ᐃᐢᕒᐁᐃᓬ ᐅᐟ ᐊᐋᐧᓯᒥᓴ; ᓂᔭ ᑳ ᑎᐯᔨᐦᒋᑫᔮᐣ ᑳ ᑲᓈᒋᐃᑕᑯᐠ. 33ᑳ ᑭ ᐯ ᐊᐧᔭᐃᐧᑕᐦᐃᑕᑯᐠ ᐃᒋᑊᐟ ᐊᐢᑭᕽ ᐅᐦᒋ, ᓂᔭ ᑭᑕ ᐅ ᑭᓭᒪᓂᑐᒥᔦᐠ; ᓂᔭ ᑳ ᑎᐯᔨᐦᒋᑫᔮᐣ.
Currently Selected:
ᓬᐃᐱᑎᑲᐢ 22: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
