ᐅᔭᓱᐁᐧᐊᐧᐠ 3
3
1ᐁᐊᐧᑯᓂ ᒫᑲ ᐅᐦᐃ ᐊᔨᓯᔨᓂᐊᐧ ᑳ ᑎᐯᔨᐦᒋᑫᐟ ᑳ ᑭ ᐃᐢᑯᐋᐟ, ᑭᑕ ᑯᑌᔨᒫᐟ ᐃᐢᕒᐁᐃᓬᐊ ᐁᐊᐧᑯᓂ ᐅᐦᒋ, ᑕᐦᑐ ᐅᑎ ᐊᓂᑭ ᐁᑳ ᑳ ᑭ ᐅᐦᒋ ᑭᐢᑫᔨᑕᐦᑭᐠ ᑲᐦᑭᔭᐤ ᓄᑎᓂᑐᐃᐧᓇ ᑫᓇᓂᕽ; 2ᐱᑯ ᐊᓂᑭ ᑳ ᐊᑎ ᐋᓂᐢᑫ ᐱᒫᑎᓯᒋᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭᑕ ᑭᐢᑫᔨᑕᐦᑭᐠ, ᑭᑕ ᑭᐢᑭᓄᐦᐊᒫᐦᒋᐠ ᓄᑎᓂᑐᐃᐧᐣ, ᐊᓂᑭ ᐅᑎ ᐁᑳ ᑲᔭᐦᑌ ᑳ ᑭ ᑭᐢᑫᔨᑕᐦᑭᐠ ᐁᐊᐧᑫᐧᔨᐤ; 3ᐁᐊᐧᑯᓂ ᐅᐦᐃ, ᐁ ᓂᔮᓇᓂᔨᐟ ᐅᑭᒫᒥᐋᐧᐊᐧ ᐱᓬᐃᐢᑎᓇᐠ, ᒥᓇ ᑲᐦᑭᔭᐤ ᑫᓇᓇᐃᑕᐠ, ᒥᓇ ᓴᐃᑕᓂᐊᓇᐠ, ᒥᓇ ᐦᐊᐃᐸᐃᑕᐠ ᓬᐁᐱᓇᐣ ᐊᐧᒋᕽ ᑳ ᐊᔮᒋᐠ, ᐯᐊᓬ ᐦᐊᕒᒪᐣ ᐊᐧᒋ ᐅᐦᒋ ᐁ ᐊᑎ ᐱᐦᑐᑫᕽ ᐦᐁᒫᐦᐟ ᐃᐢᑯ. 4ᐁᐊᐧᑯᓂᐠ ᒫᑲ ᑭᑕ ᐅᐦᒋ ᑯᒋᐃᐦᐟ ᐃᐢᕒᐁᐃᓬ ᑭᑕ ᑭᐢᑫᔨᑕᕽ ᑭᐢᐱᐣ ᐃᐧ ᓇᑐᐦᑕᒥᔨᐊᐧ ᐅᐟ ᐃᑕᓯᐁᐧᐃᐧᓇ ᑳ ᑎᐯᔨᐦᒋᑫᐟ, ᑳ ᑭ ᐃᑕᓱᐋᐧᑖᐟ ᐅᑖᐃᐧᔨᐊᐧ ᒧᓯᓴ ᐅᐦᒋ.
5ᐊᓂᑭ ᒫᑲ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᐃᐧᒋᐊᔮᒣᐊᐧᐠ ᑫᓇᓇᐃᑕ; ᐊᓂᐦᐃ ᐦᐃᑕᐃᑕ ᒥᓇ ᐋᒪᕒᐊᐃᑕ, ᒥᓇ ᐯᕒᐃᓴᐃᑕ, ᒥᓇ ᐦᐊᐃᐸᐃᑕ, ᒥᓇ ᒉᑊᔪᓴᐃᑕ: 6ᑭ ᐅᑎᓂᒣᐊᐧᐠ ᒫᑲ ᐅᑖᓂᓯᔨᐊᐧ ᑭᑕ ᐃᐧᐃᐧᒋᐠ, ᒥᓇ ᐅᑯᓯᓯᔨᐊᐧ ᑭ ᒥᔦᐋᐧᐠ ᐅᑖᓂᓯᐋᐧᐊᐧ, ᐁᑯᓯ ᑭ ᐊᑐᐢᑲᐁᐧᐊᐧ ᐅ ᒪᓂᑐᒥᔨᐊᐧ. 7ᐊᓂᑭ ᒫᑲ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᒪᒋᑐᑕᒪᐧᐠ ᐁ ᐃᓯ ᐋᐧᐸᐦᑕᒥᔨᐟ ᑳ ᑎᐯᔨᐦᒋᑫᔨᐟ, ᒥᓇ ᑭ ᐊᐧᓂᑭᐢᑭᓯᑐᑕᐁᐧᐊᐧᐠ ᑳ ᑎᐯᔨᐦᒋᑫᔨᐟ ᐅ ᑭᓭᒪᓂᑐᒥᐋᐧᐊᐧ, ᒥᓇ ᑭ ᐊᑐᐢᑲᐁᐧᐊᐧᐠ ᐊᓂᐦᐃ ᐯᐊᓬᐃᒼ ᒥᓇ ᐋᓴᕒᐋᐦᐟ.
8ᐁᐊᐧᑯ ᐅᐦᒋ ᒫᑲ ᑭ ᓴᐢᑲᐊᒪᐋᐧᐊᐧᐠ ᐃᐢᕒᐁᐃᓬ ᐅ ᑭᓯᐋᐧᓯᐃᐧᓂᔨᐤ ᑳ ᑎᐯᔨᐦᒋᑫᔨᐟ ᐁᑯᓯ ᑭ ᐸᑭᑎᓂᑲᐧᐠ ᐅᒋᐦᒋᔨᕽ ᐊᓂᐦᐃ ᑳᓵᐣᕒᐃᓵᑌᔨᒼ ᒣᓴᐳᑌᒥᔭ ᑭᐦᒋ ᐅᑭᒫᐊᐧ; ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᒫᑲ ᐊᔨᓈᓂᐤ ᑕᐦᑐ ᐊᐢᑭ ᑭ ᐊᑐᐢᑲᐁᐧᐊᐧᐠ ᐊᓂᐦᐃ ᑲᓵᐣᕒᐃᓵᑌᔨᒼ. 9ᐃᐢᐱ ᒫᑲ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᐁ ᒪᐃᐧᒧᐢᑕᐋᐧᒋᐠ ᑳ ᑎᐯᔨᐦᒋᑫᔨᐟ, ᑳ ᑎᐯᔨᐦᒋᑫᐟ ᑭ ᐸᓯᑯᓇᒪᐁᐧᐤ ᐊᓂᐦᐃ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᑳ ᐱᒫᒋᐦᐃᑯᒋᐠ, ᐊᓇ ᐅᑎ ᐋᐦᐟᓈᔨᓬ ᐅᑯᓯᓴ ᑭᓈᐢ ᑫᓬᐃᑊ ᐁ ᐅᓯᒥᒫᐃᐧᔨᐟ ᐅᒋᐋᐧᒪ. 10ᐅᐟ ᐊᐦᒑᐦᑯᔨᐊᐧ ᒫᑲ ᑳ ᑎᐯᔨᐦᒋᑫᔨᐟ ᑭ ᐅᑎᐦᑎᐠ ᐁᑯᓯ ᑭ ᐅᔭᓱᐋᐧᑌᐤ ᐃᐢᕒᐁᐃᓬᐊ; ᑭ ᓇᑕᐃᐧ ᓇᑐᐸᔨᐤ ᒫᑲ, ᐁᑯᓯ ᑳ ᑎᐯᔨᐦᒋᑫᔨᐟ ᑭ ᐸᑭᑎᓀᔨᐊᐧ ᐅᒋᐦᒋᕽ ᑲᓵᐣᕒᐃᓵᑌᔨᒼ ᒣᓴᐳᑌᒥᔭ ᑭᐦᒋ ᐅᑭᒪᐊᐧ, ᐁᑯᓯ ᑭ ᓵᑯᒋᐦᐁᐤ ᐊᓂᐦᐃ ᑲᓵᐣᕒᐃᓵᑌᔨᒼ. 11ᐊᓂᒪ ᒫᑲ ᐊᐢᑭ ᑭ ᐊᔦᐧᐱᒪᑲᐣ ᓀᒥᑕᓇᐤ ᑕᐦᑐ ᐊᐢᑭ. ᐋᐦᐟᓈᔨᓬ ᒫᑲ ᐅᑯᓯᓴ ᑭᓈᐢ ᑭ ᐳᓂ ᐱᒫᑎᓯᐤ.
12ᒥᓇ ᒫᑲ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᒪᒋᑐᑕᒪᐧᐠ ᐁ ᐃᓯ ᐋᐧᐸᐦᑕᒥᔨᐟ ᑳ ᑎᐯᔨᐦᒋᑫᔨᐟ ᐁᑯᓯ ᑳ ᑎᐯᔨᐦᒋᑫᐟ ᑭ ᒪᐢᑲᐃᐧᓯᐦᐁᐤ ᐁᑭᓬᐊᓇ ᒧᐋᑊ ᑭᐦᒋ ᐅᑭᒫᐊᐧ ᑭᑕ ᓵᑯᒋᐋᔨᐟ ᐃᐢᕒᐁᐃᓬᐊ ᒋᑫᒫ ᐁ ᒪᒋᑐᑕᒥᔨᐟ ᐁ ᐃᓯ ᐋᐧᐸᐦᑕᕽ ᑳ ᑎᐯᔨᐦᒋᑫᐟ. 13ᑭ ᒫᐊᐧᒋᐦᐁᐤ ᒫᑲ ᐅᐟ ᐊᐋᐧᓯᒥᓯᔨᐊᐧ ᐋᒪᐣ ᒥᓇ ᐋᒪᓬᐃᐠ; ᐁᑯᓯ ᐁ ᑭ ᓇᑕᐃᐧ ᓂᐸᐦᐋᐟ ᐃᐢᕒᐁᐃᓬ, ᑭ ᐅᑎᓇᒪᐧᐠ ᒫᑲ ᐅᑌᓇᐤ ᑳ ᐸᒫᑎᑯᐢᑳᐠ. 14ᐁᑯᓯ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᐊᑐᐢᑲᐁᐧᐊᐧᐠ ᐁᑭᓬᐊᐣ ᒧᐋᑊ ᑭᐦᒋ ᐅᑭᒫᐊᐧ ᒥᑖᑕᐦᐟ ᐊᔨᓈᓀᐅᓵᑊ ᑕᐦᑐ ᐊᐢᑭ.
15ᒫᑲ ᐃᐢᐱ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᐁ ᒪᐃᐧᒧᐢᑕᐋᐧᒋᐠ ᑳ ᑎᐯᔨᐦᒋᑫᔨᐟ, ᑳ ᑎᐯᔨᐦᒋᑫᐟ ᑭ ᐸᓯᑯᓇᒪᐁᐧᐤ ᐅᐸᐢᐱᐦᐃᐁᐧᐊᐧ, ᐃᐦᐊᐟ ᐅᑯᓯᓴ ᑭᕒᐊ, ᐯᐣᒋᒪᐃᐟ, ᐁ ᓇᒪᐦᒋᐟ ᓈᐯᐤ; ᐁᑯᓯ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᑕᐦᑯᓇᒧᐁᐊᐧᐠ ᒣᑭᐃᐧᐣ ᐁ ᐃᓯᑎᓴᐦᐊᒪᐋᐧᒋᐠ ᐁᑭᓬᐊᓇ ᒧᐋᑊ ᑭᐦᒋ ᐅᑭᒫᐊᐧ. 16ᐃᐦᐊᐟ ᒫᑲ ᑭ ᐅᓯᐦᑖᐧᓱ ᐃᓴᐁᐧᐢᐠ ᐁ ᐋᔨᑕᐋᐧᐱᑕᑳᔨᐠ. ᐯᔭᐠ ᑯᐱᐟ ᐁ ᐃᐢᑳᐧᐱᐢᑳᔨᐠ; ᑭ ᐸᑲᐧᑌᐦᐅᑐᑕᒼ ᒫᑲ ᐅᐹᐧᒥᕽ ᑭᐦᒋᓂᐢᑭᕽ ᐃᑌᐦᑫ ᐊᑖᒥᕽ ᐅᐢᑯᑖᑳᕽ. 17ᑭ ᒥᔦᐤ ᒫᑲ ᐊᓂᒪ ᒣᑭᐃᐧᐣ ᐁᑭᓬᐊᓇ ᒧᐋᑊ ᑭᐦᒋ ᐅᑭᒫᐊᐧ; ᒥᐢᑕᐦᐃ ᒫᑲ ᑭ ᑖᐦᒋᐳ ᐊᐊᐧ ᐁᑭᓬᐊᐣ. 18ᐃᐢᐱ ᒫᑲ ᑳ ᒥᔮᐟ ᐊᓂᒪ ᒣᑭᐃᐧᐣ, ᑭ ᓯᐯᐧᑎᓴᐁᐧᐤ ᐊᓂᐦᐃ ᐊᔨᓯᔨᓂᐊᐧ ᑳ ᑭ ᐱᒥᐃᐧᑖᔨᐟ ᐊᓂᒪ ᒣᑭᐃᐧᐣ. 19ᒫᑲ ᐃᐧᔭ ᑳᐃᐧ ᒥᓇ ᐊᓂᑕ ᒧᓇᐦᐊᓯᓈᓂᕽ ᒋᑭ ᑭᓬᑳᓬᐃᕽ ᑭ ᐅᐦᒋ ᑭᐁᐧᐤ, ᐁᑯᓯ ᑭ ᐃᑌᐧᐤ, ᓂᐟ ᐊᔮᐣ ᑭᑲᐧᐩ ᑭᒧᐨ ᑭᑕ ᐃᐧᐦᑕᒫᑖᐣ ᑭᐦᒋ ᐅᑭᒫᐤ. ᑭ ᐃᑌᐧᔨᐊᐧ ᒫᑲ, ᐁᑳᐃᐧᔭ ᓈᐣᑕᐃᑌᐧᐠ. ᑲᐦᑭᔭᐤ ᒫᑲ ᑳ ᓂᐸᐃᐧᐢᑖᑯᐟ ᑭ ᐊᐧᔭᐃᐧᔨᐊᐧ ᐁ ᑭ ᓇᑲᑎᑯᐟ. 20ᐃᐦᐊᐟ ᒫᑲ ᑭ ᐯ ᓈᑌᐤ; ᐁ ᑭ ᐯᔭᑲᐧᐱᔨᐟ ᒫᑲ ᐅ ᓂᐱᓂᑲᒥᑯᔨᕽ. ᐁᑯᓯ ᐃᐦᐊᐟ ᑭ ᐃᑌᐤ, ᑭᓭᒪᓂᑐ ᐁ ᐃᑎᐢᐠ ᑭ ᐯ ᐃᐧᐦᑕᒫᑎᐣ. ᑭ ᐸᓯᑯᔨᐊᐧ ᒫᑲ ᐅᐟ ᐊᐱᐃᐧᓂᔨᕽ ᐅᐦᒋ. 21ᐃᐦᐊᐟ ᒫᑲ ᑭ ᐃᓯᓂᐢᑫᔨᐤ ᐅ ᓇᒪᐦᑎᐣ, ᐁ ᑭ ᐅᑎᐦᑎᓇᕽ ᐃᓴᐁᐧᐢᐠ ᐅ ᑭᐦᒋᓂᐢᑭᕽ ᐃᑌᐦᑫ ᑳ ᑕᑯᐱᑌᔨᐠ, ᐁᑯᓯ ᑭ ᑕᐦᑲᒣᐤ ᐊᐧᑖᔨᕽ; 22ᐊᓂᒪ ᒫᑲ ᒥᒋᒥᓂᑲᐣ ᑭ ᐊᑎ ᑯᑕᐃᐧᐸᔨᐤ ᑭᑭ ᒧᐦᑯᒫᐣ, ᐁᑯᓯ ᐃᐧᔨᐣ ᐊᑎ ᓯᐦᐳᐸᔨᐤ ᓇᒪᐃᐧᔭ ᒫᑲ ᑫᒋᑯᐱᑕᒼ ᐃᓴᐁᐧᐢᐠ ᐊᐧᑕᔨᕽ ᐅᐦᒋ; ᐅᐢᐱᐢᑲᐧᓂᔨᕽ ᒫᑲ ᓵᑲᒧᔨᐤ. 23ᐁᑲᐧ ᐃᐦᐊᐟ ᑭ ᐊᐧᔭᐃᐧᐤ ᐱᑕᐃᐧᐢᑳᐧᑌᒥᓯᕽ, ᑭ ᑭᐸᐊᒼ ᒫᑲ ᐃᐢᑳᐧᑌᒪ ᐃᑕ ᐁ ᐊᔮᔨᐟ, ᒥᓇ ᑭ ᐋᐱᐦᑯᑲᐦᐊᒼ. 24ᐃᐢᐱ ᒫᑲ ᑳ ᐊᐧᔭᐃᐧᐟ, ᐅᐟ ᐊᑐᐢᑫᔮᑲᓂᔨᐊᐧ ᑭ ᐯ ᐃᑐᐦᑌᔨᐊᐧ; ᐁᑯᓯ ᐳᑎ ᒫᑲ, ᑭ ᐋᐱᐦᑯᑲᐦᐃᑳᑌᐊᐧ ᐃᐢᑳᐧᑌᒪ ᐋᐧᐢᑳᐦᐃᑲᓂᕽ, ᑭ ᐃᑌᐧᐊᐧᐠ ᒫᑲ, ᑫᐦᒋᓈ ᐊᑲᐧᓇᐦᐊᒧᑐᑫ ᐅᓯᑕ ᐅ ᓂᐱᓂᑲᒥᑯᕽ. 25ᑭ ᐃᑕᓯ ᐸᐯᐦᐅᐊᐧᐠ ᒫᑲ ᐱᔨᐢ ᐁ ᓀᐯᐃᐧᓯᒋᐠ; ᐁᑯᓯ ᐳᑎ ᓇᒪᐃᐧᔭ ᔪᑌᓇᒥᔨᐊᐧ ᐃᐢᑳᐧᑌᒫ ᐋᐧᐢᑳᐦᐃᑲᓂᕽ; ᐁᑯᓯ ᐱᔨᐢ ᑭ ᐅᑎᓇᒪᐧᐠ ᐋᐱᐦᑯᑲᐦᐃᑲᐣ ᒥᓇ ᑭ ᔪᑌᓇᒪᐧᐠ; ᐁᑯᓯ ᐳᑎ ᐅᐟ ᐅᑭᒫᒥᐋᐧᐊᐧ ᑭ ᐸᐦᑭᓯᓂᔨᐊᐧ ᒧᒋᕽ ᐁ ᓂᐱᔨᐟ.
26ᐃᐦᐊᐟ ᒫᑲ ᑭ ᑕᐸᓯᐤ ᒣᑳᐧᐨ ᐁ ᐃᑕᓯ ᐊᔮᔨᐟ, ᐱᔨᐢ ᐊᐊᐧᓯᑌ ᒧᓇᐦᐊᓯᓈᓂᕽ, ᒥᓇ ᓭᔭᕒᐊ ᑭ ᑕᑳᐧᒧ. 27ᑭ ᐊᔨᑭᐣ ᒫᑲ ᐃᐢᐱ ᑌᑯᓯᕽ, ᑭ ᐳᑖᑕᒼ ᐱᐱᑲᐧᐣ ᐁᑯᑕ ᐃᐸᕒᐁᐃᒼ ᐊᐧᒋᕽ, ᒥᓇ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᐊᑎ ᓂᑕᒋᐁᐧ ᐃᐧᒉᐃᐧᐠ ᐊᐧᒋᕽ ᐅᐦᒋ ᐃᐧᔭ ᒫᑲ ᐁ ᓂᑳᓄᑕᐋᐧᐟ. 28ᑭ ᐃᑌᐤ ᒫᑲ, ᐱᒥᑎᓴᐦᐅᐠ; ᒋᑫᒫ ᑳ ᑎᐯᔨᐦᒋᑫᐟ ᑭ ᐸᑭᑎᓀᐤ ᑭ ᓄᑎᓈᑲᓂᐋᐧᐊᐧ ᒧᐊᐸᐃᑕ ᑭᒋᐦᒋᐋᐧᕽ. ᑭ ᐱᒥᑎᓴᐁᐧᐊᐧᐠ ᒫᑲ, ᐁᑯᓯ ᑭ ᐅᑎᓇᒪᐧᐠ ᐋᓱᐊᐧᑳᓯᐃᐧᓇ ᒑᕒᑕᓂᕽ ᐁ ᐊᓯᐢᑯᓇᒪᐊᐧᒋᐠ ᒧᐊᐸᐃᑕ, ᓇᒪᐃᐧᔭ ᒫᑲ ᐊᐃᐧᔭ ᐃᔨᓇᒪᐁᐧᐊᐧᐠ ᑭᑕ ᐋᓱᐊᐧᑳᓯᔨᐟ. 29ᐁᑯᓯ ᑭ ᓂᐸᐁᐊᐧᐠ ᒧᐋᐸ ᐅᐦᒋ ᐁᑯᐢᐱ ᓈᐣᑕᐤ ᒥᑖᐦᑖᐧᐤ ᑭᐦᒋᒥᑖᐦᑐᒥᑕᓇᐤ ᓈᐯᐊᐧ, ᑲᐦᑭᔭᐤ ᐁ ᑲᑳᔭᐋᐧᑎᓯᔨᐟ, ᒥᓇ ᐁ ᓂᐦᑖᓄᑎᓂᑫᔨᐟ; ᓇᒪᐋᐧᐨ ᒫᑲ ᐯᔭᐠ ᓈᐯᐊᐧ ᑭ ᐸᐢᐱᔨᐊᐧ. 30ᐁᑯᓯ ᒧᐋᑊ ᑭ ᓵᑯᒋᐋᐤ ᐁᐊᐧᑳᐧᓂᒪ ᐁ ᑭᓯᑳᐠ ᐅᒋᐦᒋᔨᕽ ᐃᐢᕒᐁᐃᓬ ᐅᐟ ᐊᐋᐧᓯᒥᓴ. ᐊᐢᑭ ᒫᑲ ᑭ ᐯᔭᑕᑲᐢᑌᐤ ᐊᔨᓈᓀᒥᑕᓇᐤ ᐊᐢᑭ.
31ᒣᐧᐢᑕᐢ ᐃᔨᑯᕽ ᒫᑲ ᑭ ᐃᐦᑖᐤ ᓵᒼᑳᕒ ᐅᑯᓯᓴ ᐁᓈᐦᐟ, ᐁᐊᐧᑯ ᑭ ᓂᐸᐁᐤ ᓂᑯᑖᐧᓵᐧᐤ ᒥᑖᐦᑐᒥᑕᓇᐤ ᐱᓬᐃᐢᑎᓇ ᒧᐢᑐᓱ ᔭᑭᑎᓴᐃᑲᓈᑎᐠ ᐁ ᐋᐸᒋᐦᑖᐟ; ᐁᑯᓯ ᐃᐧᔭ ᒥᓇ ᑭ ᐸᐢᐱᐦᐁᐤ ᐃᐢᕒᐁᐃᓬᐊ.
Currently Selected:
ᐅᔭᓱᐁᐧᐊᐧᐠ 3: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
