ᐅᔭᓱᐁᐧᐊᐧᐠ 20
20
1ᐁᑲᐧ ᒫᑲ ᑲᐦᑭᔭᐤ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᐊᐧᔭᐃᐧᐊᐧᐠ, ᐁᑯᓯ ᑳ ᒫᒪᐁᐧᔭᑎᒋᐠ ᑭ ᒫᒪᐃᐧ ᒫᐊᐧᒋᐦᐃᑐᐊᐧᐠ ᑖᐱᐢᑯᐨ ᐯᔭᐠ ᐊᔨᓯᔨᓂᐤ, ᑖᐣ ᐅᐦᒋ ᐱᔨᐢ ᐱᕒᓯᐸ, ᐊᓯᒋ ᑭᓬᐃᔭᐟ ᐊᐢᑭ, ᐅᐦᑎᐢᑲᐤ ᑳ ᑎᐯᔨᐦᒋᑫᔨᐟ ᐊᓂᑕ ᒥᐢᐸ. 2ᑳ ᓂᑳᓇᑭᐦᒋᑳᓱᒋᐠ ᒫᑲ ᑲᐦᑭᔭᐤ ᐊᔨᓯᔨᓂᐊᐧᐠ, ᐊᓂᐦᐃ ᐅᑎ ᐁ ᐃᑕᐦᑐᑌᐃᐧᓯᒋᐠ ᐃᐢᕒᐁᐃᓬ, ᑭ ᓄᑯᐦᐃᓱᐊᐧᐠ ᐁᑯᑕ ᐁ ᒫᐊᐧᒋᐦᐃᑐᔨᐟ ᑭᓭᒪᓂᑐ ᐅᐟ ᐊᔨᓯᔨᓂᒪ, ᓀᐋᐧᐤ ᒥᑖᐦᑐᒥᑕᓇᐤ ᑕᐦᑐ ᑭᐦᒋᒥᑖᐦᑐᒥᑕᓇᐤ ᐅᒧᐢᑐᑌᐊᐧ ᐁ ᓯᒫᑲᓂᓯᐃᐧᒋᐠ. 3(ᓵᓴᐩ ᒫᑲ ᐯᐣᒋᒪᐣ ᐅᐟ ᐊᐋᐧᓯᒥᓴ ᑭ ᐯᐦᑕᒪᐧᐠ ᐊᓂᐦᐃ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᐁ ᐃᑐᐦᑌᔨᐟ ᒥᐢᐸᐃᕽ.) ᐁᑯᓯ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᐃᑌᐧᐊᐧᐠ, ᐃᐧᐦᑕᒪᐃᐧᓈᐣ ᑖᓂᓯ ᐅᒪ ᑳ ᐃᑐᒋᑳᑌᐠ ᐅᒪ ᑭᐦᒋ ᒪᒋᐃᑎᐃᐧᐣ? 4ᐊᓇ ᒫᑲ ᓬᐃᐸᐃᐟ, ᐅ ᓈᐯᒪ ᐊᓇ ᐃᐢᑫᐧᐤ ᑳ ᑭ ᓂᐸᐃᐦᐟ, ᑭ ᓇᐢᑫᐧᐊᐧᓯᐃᐁᐧᐤ ᒥᓇ ᑭ ᐃᑌᐧᐤ, ᓂ ᑭ ᑕᑯᓯᓂᐣ ᑭᐱᔭᐃᕽ ᑳ ᐊᔮᒋᐠ ᐯᐣᒋᒪᐣ, ᓂᔭ ᒥᓇ ᓂ ᑲᓇᐃᐧᐢᑫᐧᐋᐧᐣ, ᑭᑕ ᑲᐯᓯᔮᕽ. 5ᐊᓂᑭ ᒫᑲ ᑭᐱᔭ ᐊᔨᓯᔨᓂᐊᐧᐠ ᓂ ᑭ ᐸᓯᑯᐢᑖᑲᐧᐠ, ᐁ ᑭ ᐋᐧᐢᑲᐢᑲᐃᐧᒋᐠ ᐋᐧᐢᑳᐦᐃᑲᓂᕽ ᐁ ᒣᑳᐧ ᑎᐱᐢᑳᐠ, ᓂᔭ ᑭ ᐃᑌᔨᑕᒪᐧᐠ ᑭᑕ ᓂᐸᐃᒋᐠ, ᐁᑯᓯ ᐃᐧᔭ ᓂ ᑲᓇᐃᐧᐢᑫᐧᐋᓇ ᑭ ᐅᓴᒥᐁᐊᐧᐠ ᑳ ᑭ ᐅᐦᒋ ᓂᐱᔨᐟ. 6ᐁᑯᓯ ᓂ ᑭ ᐅᑎᓈᐤ ᐊᓇ ᓂ ᑲᓇᐃᐧᐢᑫᐧᐋᐧᐣ ᓂ ᑭ ᓇᓈᓂᐢᒋᓵᐋᐧᑖᐤ ᒥᓇ ᓂ ᑭ ᐊᐃᓯᑎᓴᐋᐧᐤ ᒥᓯᐁᐧ ᐊᐢᑭᕽ ᐃᑕ ᐁ ᐅ ᑎᐯᔨᒋᑲᓂᐟ ᐃᐢᕒᐁᐃᓬ; ᒋᑫᒫ ᑭ ᐱᓯᑳᐧᒋᑐᑕᒪᐧᐠ ᒥᓇ ᑭ ᑭᐢᑫᐧᔮᑎᓯᐊᐧᐠ ᐃᐢᕒᐁᐃᓬᐃᕽ. 7ᒫᑎᑲ, ᑭᔭᐋᐧᐤ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑲᐦᑭᔭᐤ ᐁ ᐃᑕᓯᔦᐠ, ᐅᑕ ᑲᑫᐢᑭᒥᐁᐧᐠ ᒥᓇ ᐅᔭᓱᐁᐧᐠ.
8ᑲᐦᑭᔭᐤ ᒫᑲ ᐊᔨᓯᔨᓂᐊᐧᐠ ᑭ ᐸᓯᑯᐊᐧᐠ ᑖᐱᐢᑯᐨ ᐯᔭᐠ ᐊᔨᓯᔨᓂᐤ ᐁ ᐃᑌᐧᒋᐠ, ᓇᒪᐋᐧᐨ ᐊᐃᐧᔭᐠ ᑭᑕ ᐃᑐᐦᑌᐤ ᐃᐧᑭᕽ, ᐊᐦᐳ ᓇᒪᐃᐧᔭ ᐊᐃᐧᔭᐠ ᑭᑕ ᑭᐁᐧᐤ ᐅ ᐋᐧᐢᑳᐦᐃᑲᓂᕽ. 9ᒫᑲ ᐁᐊᐧᑯ ᐅᒪ ᑫ ᐃᑐᑕᒪᕽ ᑭᐱᔭ; ᑭ ᑲ ᑎᐸᐊᑳᓈᓇᐤ ᐋᐁᐧᐸᔨᐦᒋᑫᐃᐧᐣ ᐁ ᒪᐃᐧᓀᐢᑲᒪᕽ; 10ᐁᑯᓯ ᑭ ᑲ ᐅᑎᓈᓇᐊᐧᐠ ᒥᑖᑕᐦᐟ ᓈᐯᐊᐧᐠ ᒥᑖᐦᑐᒥᑕᓇᐤ ᐅᐦᒋ ᒥᓴᑳᒣ ᑲᐦᑭᔭᐤ ᐁ ᐃᑕᐦᑐᑌᐃᐧᓯᒋᐠ ᐃᐢᕒᐁᐃᓬ, ᒥᓇ ᒥᑖᐦᑐᒥᑕᓇᐤ ᑭᐦᒋᒥᑖᐦᑐᒥᑕᓇᐤ ᐅᐦᒋ, ᒥᓇ ᑭᐦᒋᒥᑖᐦᑐᒥᑕᓇᐤ ᒥᑖᐦᑖᐧᐤ ᑭᐦᒋᒥᑕᐦᑐᒥᑕᓇᐤ ᐅᐦᒋ, ᑭᑕ ᓈᑕᐦᑭᐠ ᒥᒋᐃᐧᐣ ᐊᔨᓯᔨᓂᐊᐧ ᑭᑕ ᐋᐸᒋᐦᑖᔨᐟ, ᑭᑕ ᐃᑐᑕᐦᑭᐠ, ᐃᐢᐱ ᐅᑎᑕᑳᐧᐃᐧ ᑭᐱᔭ ᐯᐣᒋᒪᐣ ᑳ ᐊᔮᐟ, ᐁ ᐃᑕᐢᑌᐠ ᐊᓂᒪ ᑲᑫᐹᒋ ᐃᓯᐦᒋᑫᐃᐧᐣ ᑳ ᑭ ᐃᑐᒋᑲᑌᐠ ᐃᐢᕒᐁᐃᓬᐃᕽ. 11ᐁᑯᓯ ᒫᑲ ᑲᐦᑭᔭᐤ ᐃᐢᕒᐁᐃᓬ ᐊᔨᓯᔨᓂᐊᐧ ᑭ ᒫᒪᐃᐧ ᒪᐃᐧᓀᐢᑲᒫᐧᐠ ᐊᓂᒪ ᐅᑌᓇᐤ, ᒫᒪᐃᐧ ᑖᐱᐢᑯᐨ ᐯᔭᐠ ᐊᔨᓯᔨᓂᐤ.
12ᐁᑯᓯ ᑳ ᐃᑕᐦᑐᑌᐃᐧᓯᒋᐠ ᐃᐢᕒᐁᐃᓬ ᑭ ᐃᓯᑎᓴᐦᐅᐁᐧᐊᐧᐠ ᒥᓯᐁᐧ ᐊᓂᑕ ᑳ ᐱᐢᑭᑐᑌᐃᐧᓯᔨᐟ ᐯᐣᒋᒪᐣ ᐁ ᐃᑌᐧᒋᐠ, ᑫᑯ ᒪᒑᔨᐃᐧᐣ ᐅᒪ ᑳ ᐃᑐᒋᑲᑌᐠ ᐃᑕ ᑳ ᐊᔮᔦᐠ? 13ᐁᑲᐧ ᒫᑲ ᐸᑭᑎᓂᑯᐠ ᐊᓂᑭ ᐊᔨᓯᔨᓂᐊᐧᐠ, ᐅᑯᓯᓴ ᐱᓬᐃᔭᓬ, ᑭᐱᔭᐃᕽ ᑳ ᐊᔮᒋᐠ ᑭᑕ ᓂᐸᐦᐋᔮᑭᐠ, ᐁᑯᓯ ᑭᑕ ᐃᑲᑌᓇᒪᕽ ᒪᒑᔨᐃᐧᐣ ᐃᐢᕒᐁᐃᓬ ᐅᐦᒋ. ᒫᑲ ᐯᐣᒋᒪᐣ ᓇᒪᐃᐧᔭ ᐃᐧ ᓇᑐᐦᑕᐁᐧᐊᐧᐠ ᑳ ᐃᑌᐧᔨᐟ ᐅᒋᐋᒥᐋᐧᐊᐧ ᐃᐢᕒᐁᐃᓬ ᐅᐟ ᐊᐋᐧᓯᒥᓴ. 14ᐯᐣᒋᒪᐣ ᒫᑲ ᐅᐟ ᐊᐋᐧᓯᒥᓴ ᑭ ᒫᐊᐧᒋᐦᐃᑐᐊᐧᐠ ᑲᐦᑭᔭᐤ ᐅᑌᓈᕽ ᐅᐦᒋ ᐊᓂᑕ ᑭᐱᔭᐃᕽ, ᑭᑕ ᓇᑕᐃᐧ ᓄᑎᓈᒋᐠ ᐋᓂᐃ ᐃᐢᕒᐁᐃᓬ ᐅᐟ ᐊᐋᐧᓯᒥᓴ. 15ᐯᐣᒋᒪᐣ ᐅᐟ ᐊᐋᐧᓯᒥᓴ ᒫᑲ ᑭ ᐊᑭᒫᐊᐧᐠ ᐁᐊᐧᑳᐧᓂᒪ ᐁ ᑭᓯᑳᐠ ᐅᑌᓈᕽ ᐅᐦᒋ ᓂᓯᑕᓇᐤ ᓂᑯᑖᐧᓯᐠ ᐊᔨᐋᐧᐠ ᑕᐦᑐ ᑭᐦᒋᒥᑖᐦᑐᒥᑕᓇᐤ ᓈᐯᐊᐧᐠ ᑳ ᓯᒫᑲᓂᓯᐃᐧᒋᐠ, ᐋᑕᐃᐧᔭ ᒥᓇ ᑳ ᐅᐟ ᐃᐦᑖᐃᐧᓂᒋᐠ ᑭᐱᔭᐃᕽ, ᑳ ᑭ ᐊᑭᒥᐦᒋᐠ ᑌᐸᑯᐹᐧᐤ ᒥᑖᐦᑐᒥᑕᓇᐤ ᐁ ᓇᐊᐧᓱᓂᐦᒋᐠ ᓈᐯᐊᐧᐠ. 16ᐁᑯᓯ ᑭᔨᑲᐤ ᐅᑭ ᐊᔨᓯᔨᓂᐊᐧᐠ ᑭ ᐃᐦᑖᐊᐧᐠ ᑌᐸᑯᐹᐧᐤ ᒥᑖᐦᑐᒥᑕᓇᐤ ᐁ ᓈᐊᐧᓱᓂᐦᒋᐠ ᓈᐯᐊᐧᐠ ᐁ ᓇᒪᐦᒋᒋᐠ; ᑲᐦᑭᔭᐤ ᐁᐊᐧᑯᓂᐠ ᑲᐢᑭᑖᐊᐧᐠ ᑭᑕ ᐱᒧᓯᓀᒋᐠ ᐁᐧᐱᓇᓯᓈᐣ ᐁ ᐋᐸᒋᐦᑖᒋᐠ ᐁᑯᓯ ᓇᒪᐋᐧᐨ ᑭᑕ ᐸᑕᐃᑫᒋᐠ ᐯᔭᐠ ᒣᐢᑕᑲᐩ ᐃᔨᑯᕽ.
17ᐊᓂᑭ ᒫᑲ ᐃᐢᕒᐁᐃᓬ ᐊᔨᓯᔨᓂᐊᐧᐠ, ᐁᑳ ᐯᐣᒋᒪᐣ ᐁ ᐊᑭᒥᐦᐟ, ᓀᐋᐧᐤ ᒥᑖᐦᑐᒥᑕᓇᐤ ᑕᐦᑐ ᑭᐦᒋᒥᑖᐦᑐᒥᑕᓇᐤ ᑭ ᐊᑭᒫᐊᐧᐠ ᑳ ᓯᒫᑲᓂᓯᐃᐧᒋᐠ; ᑲᐦᑭᔭᐤ ᐅᑭ ᐅᓇᑐᐸᔨᐊᐧᐠ.
18ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᒫᑲ ᑭ ᐸᓯᑯᐊᐧᐠ, ᐁᑯᓯ ᑭ ᐃᑐᐦᑌᐊᐧᐠ ᐯᐦᑎᓬᐃᕽ, ᑭ ᑲᑫᐧᒋᑫᒧᐊᐧᐠ ᒫᑲ ᑭᑕ ᑲᑫᐢᑭᒥᑯᒋᐠ ᑭᓭᒪᓂᑐᐊᐧ; ᐁᑯᓯ ᑭ ᐃᑌᐧᐊᐧᐠ, ᐊᐁᐧᓇ ᑫ ᓂᑳᓂᐢᑕᒫᑯᔮᕽ ᑭᑕ ᓄᑎᓈᔮᑭᐠ ᐯᐣᒋᒪᐣ ᐅᐟ ᐊᐋᐧᓯᒥᓴ? ᑳ ᑎᐯᔨᐦᒋᑫᐟ ᒫᑲ ᑭ ᐃᑌᐧᐤ, ᒍᑕ ᑭᑕ ᓂᑳᓂᐤ. 19ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᒫᑲ ᑭ ᐊᐧᓂᐢᑳᐊᐧᐠ ᐁ ᑫᑭᓭᐹᔮᐠ ᒥᓇ ᑭ ᑲᐯᓯᑐᑕᒪᐧᐠ ᑭᐱᔭ. 20ᐊᓂᑭ ᒫᑲ ᐃᐢᕒᐁᐃᓬ ᐊᔨᓯᔨᓂᐊᐧᐠ ᑭ ᓇᑕᐃᐧ ᓄᑎᓀᐊᐧᐠ ᐯᐣᒋᒪᓇ; ᐁᑯᓯ ᐃᐢᕒᐁᐃᓬ ᐊᔨᓯᔨᓂᐊᐧᐠ ᑭ ᐅᔨᑲᐸᐃᐧᐊᐧᐠ ᑭᑕ ᓄᑎᓈᒋᐠ ᑭᐱᔭᐃᕽ. 21ᐯᐣᒋᒪᐣ ᐅᐟ ᐊᐋᐧᓯᒥᓴ ᒫᑲ ᑭ ᐯ ᐊᐧᔭᐃᐧᐊᐧᐠ ᑭᐱᔭᐃᕽ ᐅᐦᒋ, ᐁᑯᓯ ᑭ ᑲᐊᐧᐁᐧᐊᐧᐠ ᐃᐢᕒᐁᐃᓬᐊᐃᑕ ᐁᐊᐧᑳᐧᓂᒪ ᐁ ᑭᓯᑳᐠ ᓂᓯᑕᓇᐤ ᓂᓱᓵᑊ ᑕᐦᑐ ᑭᐦᒋᒥᑖᐦᑐᒥᑕᓇᐤ ᓈᐯᐊᐧ. 22ᐊᔨᓯᔨᓂᐊᐧᐠ ᒫᑲ, ᐊᓂᑭ ᐃᐢᕒᐁᐃᓬ ᓈᐯᐊᐧᐠ ᑭ ᓯᐦᑭᐢᑳᑐᐊᐧᐠ, ᒥᓇ ᒫᑲ ᑭ ᐅᔨᑳᐸᐃᐧᐢᑕᐁᐧᐊᐧᐠ ᑭᑕ ᓄᑎᓈᒋᐠ ᐃᑕ ᐊᓂᒪ ᑳ ᑭ ᐅᔨᑳᐸᐃᐧᐢᑕᐊᐧᒋᐠ ᐊᓂᒪ ᓂᐢᑕᒼ ᐁ ᑭᓯᑳᐠ. 23(ᐃᐢᕒᐁᐃᓬ ᐅᐟ ᐊᐋᐧᓯᒥᓯᐋᐧᐊᐧ ᑭ ᓯᐯᐧᑌᐊᐧᐠ ᒥᓇ ᑭ ᒫᑐᐊᐧᐠ ᐅᐦᑎᐢᑲᐤ ᑳ ᑎᐯᔨᐦᒋᑫᔨᐟ ᐱᔨᐢ ᐁ ᐅᑖᑯᓯᓂᔨᐠ; ᐁᑯᓯ ᑭ ᑲᑫᐧᒋᒣᐊᐧᐠ ᑳ ᑎᐯᔨᐦᒋᑫᔨᐟ, ᐁ ᐃᑌᐧᒋᐠ, ᒥᓇ ᒋ ᓂ ᑲ ᓇᑐᐸᔨᐢᑕᐋᐧᐊᐧᐠ ᐅᐟ ᐊᐋᐧᓯᒥᓴ ᐯᐣᒋᒪᐣ ᓂᒋᐋᐧᒼ? ᑳ ᑎᐯᔨᐦᒋᑫᐟ ᒫᑲ ᑭ ᐃᑌᐧᐤ, ᒪᐃᐧᓀᐢᑲᐤ ᒥᓇ.)
24ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᒫᑲ ᑭᓯᐋᐧᐠ ᑭ ᓈᑌᐊᐧᐠ ᐯᐣᒋᒪᐣ ᐅ ᐊᐋᐧᓯᒥᓴ ᒥᓇ ᑭᐦᑖᐧᒼ ᐁ ᑭᓯᑳᐠ. 25ᐯᐣᒋᒪᐣ ᒫᑲ ᑭ ᓇᑕᐃᐧ ᓇᑭᐢᑲᐁᐧᐊᐧᐠ ᑭᐱᔭ ᐅᐦᒋ ᑭᐦᑖᐧᒼ ᐁ ᑭᓯᑳᐠ, ᒥᓇ ᒫᑲ ᑭ ᑲᐊᐧᐁᐧᐊᐧᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓯᔨᐊᐧ ᒥᑖᑕᐦᐟ ᐊᔨᓈᓀᐅᓵᑊ ᑕᐦᑐ ᑭᐦᒋᒥᑖᐦᑐᒥᑕᓇᐤ ᓈᐯᐊᐧ; ᑲᐦᑭᔭᐤ ᐅᑭ ᑳ ᓯᒫᑲᓂᓯᐃᐧᒋᐠ. 26ᐁᑲᐧ ᒫᑲ ᑲᐦᑭᔭᐤ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᒥᓇ ᑲᐦᑭᔭᐤ ᐊᔨᓯᔨᓂᐊᐧᐠ ᑭ ᐃᑐᐦᑌᐊᐧᐠ ᐁᑯᓯ ᑭ ᑕᑯᓯᓇᐧᐠ ᐊᓂᑕ ᐯᐦᑎᓬ, ᐁᑯᓯ ᑭ ᒫᑐᐊᐧᐠ, ᒥᓇ ᑭ ᐊᐱᐊᐧᐠ ᐁᑯᑕ ᐅᐦᑎᐢᑲᐤ ᑳ ᑎᐯᔨᐦᒋᑫᔨᐟ, ᐁᑯᓯ ᑭ ᐃᔨᐊᐧᓂᓯᐃᓱᐊᐧᐠ ᐁᐊᐧᑯ ᐁ ᑭᓯᑳᐠ ᐃᐢᑯ ᐁ ᐅᑖᑯᓯᓂᔨᐠ; ᒥᓇ ᑭ ᐸᑭᑎᓈᓱᐊᐧᐠ ᒪᒍᐢᑌᐦᐊᒫᑫᐃᐧᓇ ᒥᓇ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓇ ᐅᐦᑎᐢᑲᐤ ᑳ ᑎᐯᔨᐦᒋᑫᔨᐟ. 27ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᒫᑲ ᑭ ᑲᑫᐧᒋᒣᐊᐧᐠ ᑳ ᑎᐯᔨᐦᒋᑫᔨᐟ, (ᒋᑫᒫ ᐅ ᑭᐢᑭᓇᐊᐧᒋᐅᐃᐧᓂᐊᐧᐟ ᑳ ᑎᐯᔨᐦᒋᑫᐟ ᐁᑯᑕ ᑭ ᐊᔮᐤ ᐁᑯᐢᐱ ᐁ ᑲᑭᓯᑳᐠ, 28ᒥᓇ ᐱᓂᐋᐢ ᐅᑯᓯᓴ ᐁᓬᐃᐁᓴᕒ, ᐅᑯᓯᓴ ᐁᕒᐊᐣ, ᑭ ᐅᑎᐢᑲᐃᐧᑳᐸᐃᐧᐢᑕᒼ ᐁᑯᐢᐱ ᐁ ᑲᑭᓯᑳᐠ,) ᐁ ᐃᑌᐧᒋᐠ, ᑫᔮᐱᐨ ᒋ ᓂ ᑲ ᓇᑐᐸᔨᐢᑖᒫᐊᐧ ᐅᐟ ᐊᐋᐧᓯᒥᓴ ᐯᐣᒋᒪᐣ ᓂᒋᐋᐧᒼ, ᐊᐦᐳ ᒋ ᓂ ᑲ ᐳᔪᐣ? ᐁᑯᓯ ᑳ ᑎᐯᔨᐦᒋᑫᐟ ᑭ ᐃᑌᐧᐤ, ᐃᑐᐦᑌ, ᒋᑫᒫ ᐋᐧᐸᐦᑭ ᓂ ᑲ ᐸᑭᑎᓈᐤ ᑭᒋᐦᒋᕽ. 29ᐃᐢᕒᐁᐃᓬ ᒫᑲ ᐅᑕᐢᑲᒫᒋᑫᐊᐧ ᑭ ᐃᑕᔦᐊᐧᐠ ᑭᐱᔭᐃᕽ ᐋᐧᐢᑳ.
30ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᒫᑲ ᑭ ᒪᐃᐧᓀᐢᑲᐁᐧᐊᐧᐠ ᐯᐣᒋᒪᐣ ᐅᐟ ᐊᐋᐧᓯᒥᓴ ᐁᑲᐧ ᐁ ᓂᐢᑐᑭᓯᑳᔨᐠ, ᑭ ᐅᔨᑳᐸᐃᐧᐢᑕᒪᐧᐠ ᒫᑲ ᑭᐱᔭ ᑖᐱᐢᑯᐨ ᑲᔭᐦᑌ. 31ᐯᐣᒋᒪᐣ ᐅᐟ ᐊᐋᐧᓯᒥᓴ ᒫᑲ ᑭ ᓇᑕᐃᐧ ᓇᑭᐢᑲᐁᐧᐊᐠ ᐊᔨᓯᔨᓂᐊᐧ, ᒥᓇ ᑭ ᓯᐯᐧᐃᐧᔨᑲᐧᐠ ᐅᑌᓈᕽ ᐅᐦᒋ; ᑭ ᒫᒋ ᐸᑲᒪᐁᐧᐊᐧᐠ ᒫᑲ ᒥᓇ ᑭ ᓂᐸᐁᐊᐧᐠ ᐊᔨᓯᔨᓂᐊᐧ ᑖᐱᐢᑯᐨ ᑲᔭᐦᑌ, ᑭᐦᒋᒣᐢᑲᓈᕽ, ᐯᔭᐠ ᐯᐦᑎᓬ ᑳ ᐃᑕᒧᐠ, ᒥᓇ ᑯᑕᐠ ᑭᐱᔭᐃᕽ, ᑭᐢᑎᑳᓂᕽ, ᓇᐣᑕᐤ ᓂᐢᑐᒥᑕᓇᐤ ᐃᐢᕒᐁᐃᓬ ᐊᔨᓯᔨᓂᐊᐧ. 32ᐯᐣᒋᒪᐣ ᐅᐟ ᐊᐋᐧᓯᒥᓴ ᒫᑲ ᑭ ᐃᑌᐧᐊᐧᐠ, ᑭ ᓂᐸᐦᐋᓇᐊᐧᐠ ᐃᐧᔭ ᑖᐱᐢᑯᐨ ᑲᔭᐦᑌ. ᒫᑲ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᐃᑌᐧᐊᐧᐠ, ᑕᐸᓯᑖᐠ, ᐁᑯᓯ ᓯᐯᐧᐃᐧᔮᑖᓂᐠ ᐅᑌᓈᕽ ᐅᐦᒋ ᑭᐦᒋᒣᐢᑲᓈᕽ. 33ᑲᐦᑭᔭᐤ ᒫᑲ ᐃᐢᕒᐁᐃᓬ ᐊᔨᓯᔨᓂᐊᐧᐠ ᑭ ᐸᓯᑯᐊᐧᐠ ᐃᑕ ᑳ ᑭ ᐊᔮᒋᐠ, ᐁᑯᓯ ᑭ ᐅᔨᑳᐸᐃᐧᐊᐧᐠ ᐊᓂᑕ ᐯᐊᓬᑌᒪᕒ; ᐊᓂᑭ ᒫᑲ ᐃᐢᕒᐁᐃᓬ ᐅᑕᐢᑲᒫᒋᑫᐊᐧᐠ ᑭ ᒧᐢᑭᐢᒋᑫᐊᐧᐠ ᐃᑕ ᐊᓂᒪ ᑳ ᑭ ᐊᔮᒋᐠ ᐅᐦᒋ, ᐊᓂᑕ ᐅᑎ ᒣᐋᕒᐃᑭᐸ. 34ᑭ ᐯ ᒧᐢᑭᐢᑕᒪᐧᐠ ᒫᑲ ᑭᐱᔭ ᑭᐦᒋᒥᑖᐦᑐᒥᑕᓇᐤ ᓈᐯᐊᐧᐠ ᐁ ᑭ ᓇᐊᐧᓱᓂᐦᒋᐠ ᒥᓯᐁᐧ ᐃᐢᕒᐁᐃᓬ ᐅᐦᒋ, ᐁᑯᓯ ᓄᑎᓂᑐᐃᐧᐣ ᑭ ᐋᐦᑲᐧᐣ; ᒫᑲ ᓇᒪᐃᐧᔭ ᑭ ᑭᐢᑫᔨᑕᒪᐧᐠ ᒫᔨᐸᔨᐃᐧᐣ ᐁ ᐯᓵᐸᒥᑯᒋᐠ. 35ᑳ ᑎᐯᔨᐦᒋᑫᐟ ᒫᑲ ᑭ ᐸᑲᒪᐁᐧᐤ ᐯᐣᒋᒪᓇ ᐅ ᓂᑳᓂᒥᔨᕽ ᐃᐢᕒᐁᐃᓬᐊ; ᐁᑯᓯ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᓂᓯᐊᐧᓈᒋᐁᐊᐧᐠ ᐯᐣᒋᒪᓇ ᐁᐊᐧᑳᐧᓂᒪ ᐁ ᑭᓯᑳᐠ ᓂᓯᑕᓇᐤ ᓂᔮᓇᓄᓵᑊ ᑕᐦᑐ ᑭᐦᒋᒥᑖᐦᑐᒥᑕᓇᐤ ᒥᓇ ᒥᑖᐦᑐᒥᑕᓇᐤ ᐊᔨᐋᐧᐠ ᓈᐯᐊᐧ; ᑲᐦᑭᔭᐤ ᐅᐦᐃ ᐁ ᓯᒫᑲᓂᓯᐃᐧᔨᐟ.
36ᐁᑯᓯ ᐯᐣᒋᒪᐣ ᐅᐟ ᐊᐋᐧᓯᒥᓴ ᑭ ᐋᐧᐸᐦᑕᒪᐧᐠ ᐁ ᓂᐸᐃᐦᒋᐠ; ᒋᑫᒫ ᐃᐢᕒᐁᐃᓬ ᐊᔨᓯᔨᓂᐊᐧᐠ ᑭ ᑕᐃᐧᐢᑕᐁᐧᐊᐧᐠ ᐯᐣᒋᒪᓇ, ᐃᐧᔭ ᐁ ᒪᒥᓯᑐᑕᐋᐧᒋᐠ ᐊᓂᐦᐃ ᑳ ᐊᐢᑲᒫᒋᑫᔨᐟ ᑳ ᑭ ᐅᔭᐱᐋᒋᐠ ᑭᓯᐋᐧᐠ ᑭᐱᔭᐃᕽ. 37ᐅᑕᐢᑲᒫᒋᑫᐊᐧᐠ ᒫᑲ ᑭ ᑲᑫᐧᔮᐦᐅᐊᐧᐠ, ᐁᑯᓯ ᑭ ᒧᐢᑭᐢᑕᒪᐧᐠ ᑭᐱᔭ; ᐊᓂᑭ ᒫᑲ ᐅᑕᐢᑲᒫᒋᑫᐊᐧᐠ ᑭ ᐯ ᐊᓯᒋᐊᐧᐠ, ᒥᓇ ᑭ ᐸᑲᒪᐊᒪᐧᐠ ᒥᓯᐁᐧ ᐅᑌᓇᐤ ᐁ ᐃᓯ ᑭᓈᐠ ᐃᓴᐁᐧᐢᐠ. 38ᑭ ᑭᐢᑭᓇᐋᐧᒋ ᐃᓯᐦᒋᑫᐊᐧᐠ ᒫᑲ ᐃᐢᕒᐁᐃᓬ ᐊᔨᓯᔨᓂᐊᐧᐠ ᒥᓇ ᐅᑕᐢᑲᒫᒋᑫᐊᐧᐠ, ᑭᑕ ᑭᐦᒋ ᐅᐦᐹᐸᑌᓇᑭᐠ ᐅᑌᓈᕽ ᐅᐦᒋ. 39ᐊᓂᑭ ᒫᑲ ᐃᐢᕒᐁᐃᓬ ᐊᔨᓯᔨᓂᐊᐧᐠ ᑭ ᐋᐸᒥᐊᐧᐠ ᐁ ᓄᑎᓂᑫᒋᐠ, ᐁᑯᓯ ᐯᐣᒋᒪᐣ ᑭ ᒫᒋ ᐸᑲᒪᐁᐧᐊᐧᐠ ᑭ ᓂᐸᐁᐊᐧᐠ ᒫᑲ ᐃᐢᕒᐁᐃᓬ ᓈᐯᐊᐧ ᓈᐣᑕᐤ ᓂᐢᑐᒥᑕᓇᐤ ᐊᔨᓯᔨᓂᐊᐧ; ᒋᑫᒫ ᑭ ᐃᑌᐧᐊᐧᐠ, ᑫᐦᒋᓈ ᑭ ᓂᐸᐦᐋᓇᐊᐧᐠ ᑖᐱᐢᑯᐨ ᓂᐢᑕᒼ ᓄᑎᓂᑐᐃᐧᓂᕽ. 40ᒫᑲ ᐃᐢᐱ ᐸᐢᑌᐤ ᐁᑎ ᓴᒪᑖᐸᑌᐸᔨᐠ ᐅᑌᓈᕽ ᐅᐦᒋ, ᐊᓂᑭ ᐯᐣᒋᒪᐃᑕᐠ ᑭ ᐋᐸᓵᐱᐊᐧᐠ, ᐁᑯᓯ, ᐳᑎ, ᒥᓯᐁᐧ ᐅᑌᓇᐤ ᑭ ᐃᐢᐹᑫᔮᐸᑌᐸᔨᐤ ᑭᓯᑯᕽ ᐃᓯ. 41ᐃᐢᕒᐁᐃᓬ ᐊᔨᓯᔨᓂᐊᐧᐠ ᒫᑲ ᑭ ᐋᐸᒥᐊᐧᐠ, ᐁᑯᓯ ᐯᐣᒋᒪᐣ ᐊᔨᓯᔨᓂᐊᐧᐠ ᑭ ᓴᐢᒉᔨᑕᒪᐧᐠ; ᐃᐧᔭ ᐁ ᐋᐧᐸᐦᑕᐦᑭᐠ ᒫᔨᐸᔨᐃᐧᐣ ᐁ ᐅᑎᐦᑎᑯᒋᐠ. 42ᐁᐊᐧᑯ ᐅᐦᒋ ᑭ ᐊᑎᒥᑳᐸᐃᐧᐢᑕᐁᐧᐊᐧᐠ ᐃᐢᕒᐁᐃᓬ ᐊᔨᓯᔨᓂᐊᐧ ᐁ ᐃᑖᒧᒋᐠ ᐱᑲᐧᑕᐢᑭᕽ ᐃᓯ; ᒫᑲ ᓄᑎᓂᑫᐃᐧᐣ ᑭᓯᐋᐧᐠ ᑭ ᐊᐢᑳᐧᑲᐧᐠ; ᒥᓇ ᐊᓂᐦᐃ ᐅᑌᓈᕽ ᐁ ᐯ ᐅᐦᒋ ᐊᐧᔭᐃᐧᔨᐟ ᑭ ᓂᓯᐊᐧᓈᒋᐃᑲᐧᐠ ᐁᑯᑕ ᒣᑳᐧ ᐊᔨᕽ. 43ᑭ ᐃᐧᑫᐧᐢᑲᐁᐧᐊᐧᐠ ᐊᓂᐦᐃ ᐯᐣᒋᒪᐃᑕ, ᒥᓇ ᑭ ᓇᐊᐧᓵᐧᑌᐊᐧᐠ, ᐁᑯᓯ ᑭ ᐊᑎᒥᓀᐁᐧᐊᐧᐠ ᐃᑕ ᐁ ᐊᔦᐧᐱᔨᐟ, ᑎᐱᐢᑯᐨ ᑭᐱᔭᐃᕽ ᐁ ᓵᑳᐢᑎᐠ ᐃᑌᐦᑫ. 44ᐁᑯᑕ ᒫᑲ ᑭ ᐸᐦᑭᓯᓇᐧᐠ ᐯᐣᒋᒪᐣ ᐅᐦᒋ ᒥᑖᑕᐦᐟ ᐊᔨᓈᓀᐅᓵᑊ ᑕᐦᑐ ᑭᐦᒋᒥᑖᐦᑐᒥᑕᓇᐤ ᓈᐯᐊᐧᐠ; ᑲᐦᑭᔭᐤ ᐅᑭ ᑭᐦᒋ ᐅᓄᑎᓂᑫᐊᐧᐠ. 45ᑭ ᑫᐧᐢᑭᐊᐧᐠ ᒫᑲ ᐁ ᑭ ᐃᑖᒧᒋᐠ ᐱᑲᐧᑕᐢᑭᕽ ᕒᐃᒪᐣ ᑭᐢᑖᐱᐢᑳᕽ ᐃᓯ; ᑭ ᒧᓴᑭᓀᐊᐧᐠ ᒫᑲ ᑭᐦᒋᒣᐢᑲᓈᕽ ᓂᔮᓇᓈᐧᐤ ᑭᐦᒋᒥᑖᐦᑐᒥᑕᓇᐤ ᓈᐯᐊᐧ; ᐁᑯᓯ ᑭ ᐊᑎ ᒫᑳᐧᒧᑳᑌᐊᐧᐠ ᑭᑕᒼ ᐃᐢᑯ, ᒥᓇ ᑭ ᓂᐸᐁᐊᐧᐠ ᓂᓵᐧᐤ ᑭᐦᒋᒥᑖᐦᑐᒥᑕᓇᐤ ᓈᐯᐊᐧ. 46ᑲᐦᑭᔭᐤ ᒫᑲ ᑳ ᑭ ᐸᐦᑭᓯᐦᑭᐠ ᐁᑯᐢᐱ ᐁ ᑭᓯᑳᐠ ᐯᐣᒋᒪᐣ ᐅᐦᒋ ᓂᓯᑕᓇᐤ ᓂᔮᓇᐣ ᐊᔨᐋᐧᐠ ᑕᐦᑐ ᑭᐦᒋᒥᑖᐦᑐᒥᑕᓇᐤ ᓈᐯᐊᐧᐠ ᑳ ᓯᒫᑲᓂᓯᐃᐧᒋᐠ; ᑲᐦᑭᔭᐤ ᐅᑭ ᑭᐦᒋᐅᓇᑐᐸᔨᐊᐧᐠ. 47ᒫᑲ ᓂᑯᑖᐧᓵᐧᐤ ᒥᑖᐦᑐᒥᑕᓇᐤ ᓈᐯᐊᐧᐠ ᑭ ᐸᐢᑫᐊᐧᐠ ᒥᓇ ᑭ ᐃᑖᒧᐊᐧᐠ ᐱᑲᐧᑕᐢᑭᕽ ᐃᑌᐦᑫ ᕒᐃᒪᐣ ᑭᐢᑖᐱᐢᑳᕽ, ᐁᑯᓯ ᓀᐅᐱᓯᒼ ᑭ ᐊᔮᐊᐧᐠ ᕒᐃᒪᐣ ᑭᐢᑖᐱᐢᑳᕽ. 48ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᒫᑲ ᑳᐃᐧ ᑭ ᑭᐁᐧᑐᑕᐁᐧᐊᐧᐠ ᐯᐣᒋᒪᐣ ᐅᐟ ᐊᐋᐧᓯᒥᓴ, ᒥᓇ ᑭ ᐸᑲᒪᐁᐧᐊᐧᐠ ᐁ ᐃᓯ ᑭᓈᐠ ᐃᓴᐁᐧᐢᐠ, ᒥᓯᐁᐧ ᐁ ᐃᐢᐱᒑᐠ ᐅᑌᓇᐤ, ᒥᓇ ᐱᓯᐢᑭᐊᐧᐠ, ᒥᓇ ᑲᐦᑭᔭᐤ ᑫᑲᐧᐩ ᑳ ᒥᐢᑲᐦᑭᐠ; ᐁᑯᓯ ᒥᓇ ᑲᐦᑭᔭᐤ ᐅᑌᓇᐊᐧ ᑳ ᒥᐢᑲᐦᑭᐠ ᑭ ᓴᐢᑲᐦᐊᒪᐧᐠ.
Currently Selected:
ᐅᔭᓱᐁᐧᐊᐧᐠ 20: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
