ᐁᐠᓴᑕᐢ 24

1ᐅᒥᓯ ᒫᑲ ᑭ ᐃᑌᐤ ᒧᓯᓴ, ᐯ ᓈᑎᕽ ᑳ ᑎᐯᔨᐦᒋᑫᐟ, ᑭᔭ ᒥᓇ ᐁᕒᐊᐣ, ᓀᑖᑊ, ᒥᓇ ᐊᐸᐃᔪ, ᒥᓇ ᑌᐸᑯᑊ ᑕᐦᑐᒥᑕᓇᐤ ᑳ ᓂᑳᓀᔨᑖᑯᓯᒋᐠ ᐃᐢᕒᐁᐃᓬ, ᐋᐧᔭᐤ ᒫᑲ ᐅᐦᒋ ᐊᔭᒥᐦᐋᐠ. 2ᒧᓯᐢ ᒫᑲ ᐁ ᐯᔭᑯᐟ ᑭᓯᐋᐧᐠ ᑭᑖ ᐯ ᓈᑌᐤ ᑳ ᑎᐯᔨᐦᒋᑫᔨᐟ; ᒫᑲ ᓇᒪᐃᐧᔭ ᑭᓯᐋᐧᐠ ᐃᐧᔭᐋᐧᐤ ᑭᑕ ᐯ ᐃᑐᐦᑌᐊᐧᐠ; ᐊᐦᐳ ᓇᒪᐃᐧᔭ ᐊᔨᓯᔨᓂᐊᐧ ᑭᑕ ᐃᐧᒉᐃᐧᐠ.

3ᒧᓯᐢ ᒫᑲ ᑭ ᐯ ᒫᒪᐃᐧ ᐃᐧᐦᑕᒪᐁᐧᐤ ᐊᔨᓯᔨᓂᐊᐧ ᑲᐦᑭᔭᐤ ᐊᓂᐦᐃ ᐅᐟ ᐃᑌᐧᐃᐧᓂᔨᐊᐧ ᑳ ᑎᐯᔨᐦᒋᑫᔨᐟ, ᒥᓇ ᑲᐦᑭᔭᐤ ᐅᔭᓱᐋᐧᓯᐁᐧᐃᐧᓇ; ᑲᐦᑭᔭᐤ ᒫᑲ ᐊᔨᓯᔨᓂᐊᐧᐠ ᑭ ᒫᒪᐃᐧ ᓇᐢᑫᐧᐊᐧᓯᒣᐊᐧᐠ, ᐅᒥᓯ ᐁ ᑭ ᐃᑌᐧᒋᐠ, ᑲᐦᑭᔭᐤ ᐊᓂᐦᐃ ᐃᑌᐧᐃᐧᓇ ᑳ ᑭ ᐃᑌᐧᐟ ᑳ ᑎᐯᔨᐦᒋᑫᐟ ᓂ ᑲ ᑐᑌᓈᐣ. 4ᒧᓯᐢ ᒫᑲ ᑭ ᒪᓯᓇᐦᐊᒼ ᑲᐦᑭᔭᐤ ᐅᐟ ᐃᑌᐧᐃᐧᓂᔨᐊᐧ ᑳ ᑎᐯᔨᐦᒋᑫᔨᐟ ᐁᑯᓯ ᐃᐧᐸᐨ ᑫᑭᓭᐹ ᑭ ᐊᐧᓂᐢᑳᐤ, ᑭ ᐅᓯᐦᑖᐤ ᒫᑲ ᐸᑭᑎᓈᓱᐃᐧᓈᐱᐢᑯᔨᐤ ᓂᐦᑕᑎᐣ ᒥᓇ ᒥᑖᑕᐦᐟ ᓂᓱᓵᑊ ᒋᒪᒋᑲᓇ, ᒣᐧᐦᒋ ᒥᑖᑕᐦᐟ ᓂᓱᓵᑊ ᑳ ᐃᐦᑕᐦᑐᑌᐃᐧᓯᐟ ᐃᐢᕒᐁᐃᓬ. 5ᑭ ᐃᓯᑎᓴᐁᐧᐤ ᒫᑲ ᐅᐢᑭᓂᑭᒥᔨᐊᐧ ᐊᓂᐦᐃ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᐁᐊᐧᑯᓂᐠ ᑭ ᐸᑭᑎᓇᒪᐧᐠ ᒪᒍᐢᑌᐦᐊᒫᑫᐃᐧᓇᐧ, ᒥᓇ ᑭ ᐸᑭᑎᓈᓱᐊᐧᐠ ᐯᔭᑕᑭ ᐸᑭᑎᓈᓱᐃᐧᓇ ᒧᐢᑐᓴᐧ ᐁ ᐸᑭᑎᓇᒪᐋᐧᒋᐠ ᑳ ᑎᐯᔨᐦᒋᑫᔨᐟ. 6ᒧᓯᐢ ᒫᑲ ᑭ ᐅᑎᓇᒼ ᐋᐱᑕᐤ ᐊᓂᒪ ᒥᐦᑯ, ᐁᑯᓯ ᑭ ᐊᓯᐊᐧᑖᐤ ᐅᔮᑲᓂᕽ; ᐋᐱᑕᐤ ᒫᑲ ᒥᐦᑯ ᑭ ᐊᐧᓭᐧᐸᔨᑖᐤ ᐸᑭᑎᓈᓱᐃᐧᓈᐱᐢᑯᕽ. 7ᑭ ᐅᑎᓇᒼ ᒫᑲ ᐃᐧᒋᐦᐃᓯᒋᑫᒥᑐᐃᐧ ᒪᓯᓇᐦᐃᑲᐣ, ᐁᑯᓯ ᑭ ᐊᔭᒥᑖᐤ ᐁ ᐯᐦᑖᑯᐟ ᐊᔨᓯᔨᓂᐊᐧ; ᐅᒥᓯ ᒫᑲ ᑭ ᐃᑌᐧᐊᐧᐠ, ᑲᐦᑭᔭᐤ ᐊᓂᒪ ᑳ ᑎᐯᔨᐦᒋᑫᐟ ᑳ ᑭ ᐃᑌᐧᐟ, ᓂ ᑲ ᑐᑌᓈᐣ ᒥᓇ ᓂ ᑲ ᓇᓇᐃᑌᓈᐣ. 8#ᒫᐟᔪ 26:28; ᒫᕒᐠ 14:24; ᓬᐅᐠ 22:20; 1 ᑲᕒᐃᐣᑎᔭᓇ 11:25; ᐦᐃᐸᕒᐅᐊᐧ 10:29; ᐦᐃᐸᕒᐅᐊᐧ 9:19,20ᒧᓯᐢ ᒫᑲ ᑭ ᐅᑎᓇᒼ ᐊᓂᒪ ᒥᐦᑯ, ᐁᑯᓯ ᑭ ᐊᐧᓭᐧᐁᐧᐱᓇᒪᐁᐧᐤ ᐊᔨᓯᔨᓂᐊᐧ ᒥᓇ ᑭ ᐃᑌᐧᐤ, ᒫᑎᑲ ᐁᐊᐧᑳᐧᓂᒪ ᒥᐦᑯ ᐊᓂᒪ ᐃᐧᒋᐦᐃᓯᒋᑫᒥᑐᐃᐧᐣ ᑳ ᑎᐯᔨᐦᒋᑫᐟ ᑳ ᐃᓯ ᐃᐧᒋᐦᐃᓯᒋᑫᒥᑯᔦᐠ ᐁ ᐃᑕᐢᑌᑭ ᑲᐦᑭᔭᐤ ᐅᐦᐃ ᐃᑌᐧᐃᐧᓇ.

9ᐁᑲᐧ ᒫᑲ ᑭ ᐋᒪᒋᐁᐧᐊᐧᐠ ᒧᓯᐢ ᒥᓇ ᐁᕒᐊᐣ ᓀᑖᑊ, ᒥᓇ ᐊᐸᐃᔪ, ᒥᓇ ᑌᐸᑯᑊ ᑳ ᓂᑳᓀᔨᑖᑯᓯᒋᐠ ᐃᐢᕒᐁᐃᓬ. 10ᑭ ᐋᐧᐸᒣᐊᐧᐠ ᒫᑲ ᐅ ᑭᓭᒪᓂᑐᒪ ᐃᐢᕒᐁᐃᓬ; ᐃᑕ ᐁ ᓂᐸᐃᐧᐟ ᑭ ᐃᓯᓈᑲᐧᐣ ᑖᐱᐢᑯᐨ ᒋᐯᑕᑲᐧᓯᓂ, ᒥᓇ ᑖᐱᐢᑯᐨ ᑭᓯᐠ ᐁ ᐃᓯ ᐋᐧᓭᔮᐱᐢᑭᓯᐟ. 11ᐊᓂᐦᐃ ᒫᑲ ᐅ ᑭᐦᒋᔨᓂᒥᔨᐊᐧ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᓇᒪᐃᐧᔭ ᓵᒥᓀᐤ, ᐋᐧᐸᒣᐊᐧᐠ ᒫᑲ ᑭᓭᒪᓂᑐᐊᐧ, ᐁᑯᓯ ᑭ ᒥᒋᓱᐊᐧᐠ ᒥᓇ ᑭ ᒥᓂᐦᑫᐧᐊᐧᐠ.

12ᑳ ᑎᐯᔨᐦᒋᑫᐟ ᒫᑲ ᑭ ᐃᑌᐤ ᒧᓯᓴ, ᐯ ᓇᑕᐋᐧᐸᒥᐣ ᐅᑕ ᐊᐧᒋᕽ ᐁᑯᑕ ᒫᑲ ᐊᔮ; ᐁᑯᓯ ᒫᑲ ᑭ ᑲ ᒥᔨᑎᐣ ᐁ ᓇᐸᑳᐱᐢᑭᓯᒋᐠ ᐊᓯᓂᔭᐠ, ᒥᓇ ᐅᔭᓱᐁᐧᐃᐧᐣ ᒥᓇ ᐃᑕᓱᐁᐧᐃᐧᐣ ᑳ ᑭ ᒪᓯᓇᐦᐊᒫᐣ, ᑭᑕ ᑭᐢᑭᓄᐦᐊᒫᑫᔭᐣ. 13ᒧᓯᐢ ᒫᑲ ᑭ ᐸᓯᑯ ᒥᓇ ᒑᐢᔪᐊ ᐅᐟ ᐊᑐᐢᑫᔮᑲᓇ; ᒧᓯᐢ ᒫᑲ ᑭ ᐋᒪᒋᐁᐧᐤ ᐅ ᐊᐧᒋᒥᔨᕽ ᑭᓭᒪᓂᑐᐊᐧ. 14ᑭ ᐃᑌᐤ ᒫᑲ ᐊᓂᐦᐃ ᑳ ᓂᑳᓀᔨᑖᑯᓯᔨᐟ, ᐯᐦᐃᓈᐣ ᐅᑕ, ᐃᔨᑯᕽ ᒥᓇ ᑭᑕ ᐯ ᓈᑎᑖᕽ; ᐁᑯᓯ ᒫᑎᑲ, ᐁᕒᐊᐣ ᒥᓇ ᐦᐊᕒ ᑭ ᐃᐧᒋ ᐊᔮᒥᑯᐋᐧᐊᐧᐠ; ᐱᑯ ᐊᐃᐧᔭᐠ ᓈᐣᑕᐤ ᑫᑲᐧᐩ ᓇᑕᐁᐧᔨᑕᑭ, ᑭᔮᒼ ᐁᐊᐧᑯᓂ ᑭᑕ ᓈᑌᐊᐧᐠ. 15ᒧᓯᐢ ᒫᑲ ᑭ ᐋᒪᒋᐁᐧᐤ ᐊᐧᒋᕽ, ᐁᑯᓯ ᐊᐧᐢᑯ ᑭ ᐊᑲᐧᓂᐢᑲᒧᒪᑲᐣ ᐊᓂᒪ ᐊᐧᒋ. 16ᐅ ᒪᓂᑐᐋᐧᐢᑌᐃᐧᐣ ᒫᑲ ᑳ ᑎᐯᔨᐦᒋᑫᐟ ᑭ ᐊᔮᐤ ᐁᑯᑕ ᓴᐃᓇᐩ ᐊᐧᒋᕽ, ᐁᑯᓯ ᐊᐧᐢᑯ ᑭ ᐊᑲᐧᓂᐢᑲᒧᒪᑲᐣ ᓂᑯᑖᐧᓱ ᑭᓯᑳᐤ; ᑌᐸᑯᑊ ᒫᑲ ᐁᑎ ᑕᐦᑐ ᑭᓯᑳᔨᐠ ᑭ ᑌᐹᐧᑌᐤ ᒧᓯᓴ ᒣᑳᐧ ᐊᐧᐢᑯᕽ ᐅᐦᒋ. 17ᐊᓂᒪ ᒫᑲ ᐅ ᒪᓂᑐᐋᐧᐢᑌᐃᐧᐣ ᑳ ᑎᐯᔨᐦᒋᑫᐟ ᑭ ᐃᓯᓈᑲᐧᓂᔨᐤ ᑖᐱᐢᑯᐨ ᑳ ᒣᐢᑎᑲᓱᐁᐧᐠ ᐃᐢᑯᑌᐤ ᑖᐦᑯᑖᒪᑎᐣ ᐊᐧᒋᕽ ᐁ ᑲᓇᐋᐧᐸᐦᑕᐦᑭᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ. 18#ᑎᔪᑕᕒᐊᓇᒥ 9:9ᒧᓯᐢ ᒫᑲ ᑭ ᐊᑎ ᐃᑐᐦᑌᐤ ᒣᑳᐧ ᐊᐧᐢᑯᕽ, ᐁᑯᓯ ᐊᐧᒋᕽ ᑭ ᐊᑎ ᐋᒪᒋᐁᐧᐤ; ᒧᓯᐢ ᒫᑲ ᑭ ᐊᔮᐤ ᐊᐧᒋᕽ ᓀᒥᑕᓇᐤ ᑭᓯᑳᐤ ᒥᓇ ᓀᒥᑕᓇᐤ ᑎᐱᐢᑳᐤ.

Currently Selected:

ᐁᐠᓴᑕᐢ 24: KKMs

Highlight

Copy

Compare