ᑎᔪᑕᕒᐊᓇᒥ 21
21
1ᑭᐢᐱᐣ ᐊᐃᐧᔭᐠ ᒥᐢᑳᐦᒋ ᐁ ᑭ ᓂᐸᐃᐦᐟ ᐊᓂᑕ ᐊᐢᑭᕽ ᑳ ᒥᔨᐢᐠ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᑭᑕ ᑎᐯᔨᐦᑕᒪᐣ, ᐊᐧᔭᐃᐧᑎᒫᔨᕽ ᐁ ᐱᒥᓯᕽ, ᐁᑳ ᒫᑲ ᐁ ᑭᐢᑫᔨᑕᑲᐧᕽ ᐊᐁᐧᓂᐦᐃ ᑳ ᑭ ᓂᐸᐦᐃᑯᐟ; 2ᐁᑲᐧ ᑳ ᓂᑳᓀᔨᑖᑯᓯᒋᐠ ᒥᓇ ᐅᔭᓱᐁᐧᐃᐧᔨᓂᐊᐧᐠ ᑭᑕ ᐯ ᐃᑐᐦᑌᐊᐧᐠ ᑭᑕ ᑎᐸᐦᐊᐢᑳᑕᒪᐧᐠ ᒫᑲ ᐅᑌᓈᕽ ᐃᓯ ᐊᓂᐦᐃ ᐋᐧᐢᑳ ᑳ ᐊᔮᑭ ᐃᑕ ᐊᓇ ᑳ ᑭ ᓂᐸᐃᐦᐟ; 3ᑭᑕ ᐃᐦᑭᐣ ᒫᑲ ᐊᓂᒪ ᐅᑌᓇᐤ ᓇᐊᐧᐨ ᑭᓯᐋᐧᐠ ᐁ ᐊᔮᐠ ᐃᑕ ᐊᓇ ᑳ ᑭ ᓂᐸᐃᐦᐟ, ᐊᓂᑭ ᑳ ᓂᑳᓀᔨᑖᑯᓯᒋᐠ ᐁᑯᑕ ᐅᑌᓈᕽ ᑭᑕ ᐅᑎᓀᐊᐧᐠ ᐅᐢᑭ ᐅᓂᒑᓂᐤ ᒧᐢᑐᓴᐧ, ᐁᑳ ᑳ ᑭ ᐊᑐᐢᑲᐦᐃᒥᐦᐟ, ᐊᐦᐳ ᐁᑳ ᑳ ᑭ ᐅᑖᐸᐃᒥᐦᐟ; 4ᐊᓂᑭ ᒫᑲ ᑳ ᓂᑳᓀᔨᑖᑯᓯᒋᐠ ᐁᐊᐧᑯ ᐅᑌᓇᐤ ᑭᑕ ᐃᑐᐦᑕᐦᐁᐊᐧᐠ ᐊᓂᐦᐃ ᐅᓂᒑᓂᓯᓴ ᐋᐧᔮᒪᑎᓈᕽ ᐃᑕ ᐁ ᐱᒥᒋᐊᐧᕽ ᓂᐱ, ᐁᑳ ᐁᑯᑕ ᐁ ᑭ ᐅᐦᒋ ᐱᑯᐱᒋᑫᕽ ᐊᐦᐳ ᑭᐢᑎᑫᕽ, ᐁᑯᓯ ᑭᑕ ᑲᐢᑭᑫᐧᓀᐊᐧᐠ ᐊᓂᐦᐃ ᐅᓂᒑᓂᓯᓴ ᐁᑯᑕ ᐋᐧᔮᒪᑎᓈᕽ; 5ᐊᔭᒥᐦᐁᐃᐧᔨᓂᐊᐧᐠ ᒫᑲ ᐅᑯᓯᓴ ᓬᐃᐸᐩ ᑭᓯᐋᐧᐠ ᑭᑕ ᐯ ᐃᑐᐦᑌᐊᐧᐠ, ᒋᑫᒫ ᐁᐊᐧᑯᓂ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᑭ ᓇᐊᐧᓱᓀᐤ ᑭᑕ ᐊᑐᐢᑳᑯᐟ ᒥᓇ ᑭᑕ ᓴᐁᐧᔨᒥᐁᐧᔨᐟ ᐅ ᐃᐧᔪᐃᐧᓂᕽ ᑳ ᑎᐯᔨᐦᒋᑫᐟ; ᒥᓇ ᐁᐊᐧᑯᓂᐠ ᐁ ᐃᑌᐧᒋᐠ ᑲᐦᑭᔭᐤ ᐋᓀᐧᑖᑐᐃᐧᐣ ᒥᓇ ᐸᑲᒪᐦᐃᑫᐃᐧᐣ ᑭᑕ ᑲᐧᔭᐢᑲᐧᐢᑖᓂᐊᐧᐣ. 6ᑲᐦᑭᔭᐤ ᒫᑲ ᑳ ᓂᑳᓀᔨᑖᑯᓯᒋᐠ ᐁᐊᐧᑯ ᐅᑌᓇᐤ, ᐊᓂᒪ ᓇᐊᐧᐨ ᑭᓯᐋᐧᐠ ᑳ ᐊᔮᐠ ᐃᑕ ᐊᓇ ᓈᐯᐤ ᑳ ᑭ ᓂᐸᐃᐦᐟ, ᑭᑕ ᑭᒋᐢᑖᐸᐊᐧᑖᐊᐧᐠ ᐅᒋᐦᒋᐋᐧᐊᐧ ᐊᐧᐢᑭᐨ ᐊᓂᐦᐃ ᐅᓂᒑᓂᓯᓴ ᑳ ᑭ ᑲᐢᑫᑭᑫᐧᓂᒥᐦᐟ ᐋᐧᔮᒪᑎᓈᕽ; 7ᑭᑕ ᓇᐢᑫᐧᐊᐧᓯᑖᐊᐧᐠ ᒫᑲ ᒥᓇ ᑭᑕ ᐃᑌᐧᐊᐧᐠ, ᓂᔭᓈᐣ ᐃᐧᔭ ᓂᒋᐦᒋᓈᓇ ᓇᒪᐃᐧᔭ ᑭ ᐅᐦᒋ ᓯᑭᓇᒧᒪᑲᓇᐧ ᐅᒪ ᒥᐦᑯ, ᓇᒪᐃᐧᔭ ᒥᓇ ᓄᐦ ᐋᐧᐸᐦᑌᓈᐣ ᓂᐢᑭᓯᑯᓈᕽ ᐅᐦᒋ. 8ᐳᓀᔨᑕᒪᐃᐧᐠ ᑌᐯᔨᐦᒋᑫᔭᐣ ᑭᐟ ᐊᔨᓯᔨᓂᒪᐠ ᐃᐢᕒᐁᐃᓬ ᑳ ᑭ ᐸᐢᐱᐊᒋᐠ, ᐁᑳᐃᐧᔭ ᒫᑲ ᐁᑳ ᑳ ᐊᑖᒣᔨᑖᑲᐧᕽ ᒥᐦᑯ ᐃᔨᓇᒪᐋᐧᑕ ᑭᑕ ᐊᐢᑌᐠ ᒣᑳᐧᐨ ᑭᐟ ᐊᔨᓯᔨᓂᒪᐠ ᐃᐢᕒᐁᐃᓬ. ᐁᑯᓯ ᒫᑲ ᑭᑕ ᐳᓀᔨᑕᒪᐋᐧᐊᐧᐠ ᐊᓂᒪ ᒥᐦᑯ. 9ᐁᑯᓯ ᒫᑲ ᑭ ᑲ ᐃᑲᑌᓀᐣ ᐁᑳ ᑳ ᐊᑖᒣᔨᑖᑲᐧᕽ ᒥᐦᑯ ᒣᑳᐧᐨ ᐃᑕ ᑳ ᐊᔮᔭᐣ, ᑭᐢᐱᐣ ᐃᑐᑕᒪᓂ ᐊᓂᒪ ᑳ ᑲᐧᔭᐢᑲᐧᕽ ᐁ ᐃᓯ ᐋᐧᐸᐦᑕᕽ ᑳ ᑎᐯᔨᐦᒋᑫᐟ.
10ᐃᐢᐱ ᓇᑐᐸᔨᐢᑕᐊᐧᑖᐧᐃᐧ ᑭ ᓄᑎᓈᑲᓇᐠ, ᐁᑯᓯ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᐸᑭᑎᓈᒋ ᑭᒋᐦᒋᕽ, ᒥᓇ ᓯᐯᐧᑕᐊᑖᐧᐃᐧ ᑳ ᒧᐢᑎᓇᒋᐠ; 11ᐊᐧᐸᒪᒋ ᒫᑲ ᐃᑕ ᐁ ᐊᔮᒋᐠ ᒧᐢᑎᓈᑲᓇᐠ ᐁ ᑲᑕᐊᐧᓯᓯᐟ ᐃᐢᑫᐧᐤ, ᐁᑯᓯ ᒧᐢᑕᐃᐧᓇᐊᐧᒋ, ᒥᓇ ᓄᐦᑌ ᐅᑎᓇᒋ ᑭᑕ ᐃᐧᐃᐧᔭᐣ; 12ᑭ ᑲ ᑭᐁᐧᑕᐋᐤ ᑭᑭᕽ; ᑭᑕ ᑳᐢᑭᐸᑕᒼ ᒫᑲ ᐅᐢᑎᑳᐧᐣ ᒥᓇ ᑭᑕ ᒪᓂᓭᐧᐤ ᐊᐧᐢᑲᓯᔭ; 13ᑭᑕ ᑫᒋᑯᓇᒼ ᒫᑲ ᐅᐟ ᐊᐊᐧᑳᑎᑯᐃᐧ ᑭᑭᐢᑳᒋᑲᓇ, ᑭᑭᕽ ᒫᑲ ᑭᑕ ᐊᔮᐤ ᑭᑕ ᒪᐃᐧᑳᑖᐟ ᐅᑖᐃᐧᔭ ᒥᓇ ᐅᑳᐃᐧᔭ ᒥᑐᓂ ᐯᔭᐠ ᐱᓯᒼ; ᐁᑲᐧ ᒫᑲ ᒣᐧᐢᑕᐢ ᐃᔨᑯᕽ ᑭ ᑲ ᑭ ᐱᑐᑲᐋᐧᐤ, ᐁᑲᐧ ᒫᑲ ᑭᔭ ᑭᑕ ᐅ ᓈᐯᒥᐤ ᐁᑯᓯ ᐃᐧᔭ ᑭ ᑲ ᐃᐧᐃᐧᐣ. 14ᑭᑕ ᐃᐦᑭᐣ ᒫᑲ ᑭᐢᐱᐣ ᐁᑳ ᒥᔦᐧᔨᒪᒋ, ᑭ ᑲ ᐸᑭᑎᓈᐤ ᑭᑕ ᐃᑐᐦᑌᐟ ᐱᑯ ᐃᑌ ᐁ ᐃᑌᔨᑕᕽ; ᒫᑲ ᓇᒪᐃᐧᔭ ᑭ ᑲ ᐊᑖᐋᐧᑳᐣ ᓱᓂᔮᐤ ᐅᐦᒋ, ᓇᒪᐃᐧᔭ ᑭ ᑲ ᐃᑐᑕᐋᐧᐤ ᑖᐱᐢᑯᐨ ᐊᐊᐧᑳᐣ, ᒋᑫᒫ ᑭ ᑭ ᑕᐸᐦᑌᔨᑖᑯᐋᐤ.
15ᑭᐢᐱᐣ ᐊᔨᓯᔨᓂᐤ ᓂᓱᐢᑫᐧᐁᐧᒋ, ᐯᔭᐠ ᐊᓂᐦᐃ ᐁ ᓵᑭᐦᐋᐟ ᐁᑯᓯ ᐊᓂᐦᐃ ᑯᑕᑲ ᐁ ᐸᑳᐧᑖᐟ ᑖᐱᐢᑯᐨ ᒫᑲ ᑭ ᓂᐦᑖᐃᐧᑭᑕᒫᑯᒋ ᐊᐋᐧᓯᓴ, ᐊᓂᐦᐃ ᑳ ᓵᑭᐦᐋᐟ ᒥᓇ ᐊᓂᐦᐃ ᑳ ᐸᑳᐧᑖᐟ; ᑭᐢᐱᐣ ᒫᑲ ᐅ ᓂᐢᑕᒧᓵᓇ ᐅᑯᓯᓯᔨᒋ ᐊᓂᐦᐃ ᑳ ᐸᑳᐧᑖᐟ; 16ᐁᑲᐧ ᑭᑕ ᐃᐦᑭᐣ, ᐃᐢᐱ ᑎᐯᔨᐦᑕᒧᐋᒋ ᐅᑯᓯᓴ ᐊᓂᒪ ᑳ ᐃᓯ ᐊᔮᐟ, ᓇᒪᐃᐧᔭ ᑭᑕ ᓂᐢᑕᒧᓵᓂᑫᐤ ᐅᑯᓯᓯᔨᐊᐧ ᐊᓂᐦᐃ ᑳ ᓵᑭᐦᐋᐟ ᐋᓯᐢᑯᐣ ᐅᑯᓯᓯᔨᐊᐧ ᑳ ᐸᑳᐧᑖᐟ, ᐊᓂᐦᐃ ᑖᐯᐧ ᑳ ᓂᐢᑕᒧᓵᓂᐃᐧᔨᐟ; 17ᒫᑲ ᑭᑕ ᑭᐢᑫᔨᑖᑯᐁᐤ ᐅᑯᓯᓯᔨᐊᐧ ᐊᓂᐦᐃ ᑳ ᐸᑳᐧᑖᐟ ᑭᑕ ᓂᐢᑕᒧᓵᓂᐃᐧᔨᐟ, ᓂᓵᐧᐤ ᐃᔨᑯᕽ ᑭᑕ ᒥᔮᐟ ᐃᔨᑯᕽ ᑯᑕᑲ ᑳ ᐃᓯ ᒥᔮᐟ ᑲᐦᑭᔭᐤ ᐊᓂᒪ ᑳ ᐊᔮᐟ; ᒋᑫᒫ ᐁᐊᐧᑯᓂ ᐁ ᒫᒋᐸᔨᔨᐠ ᐅ ᒪᐢᑲᐃᐧᓯᐃᐧᐣ; ᐃᑕᐢᑌᐤ ᓂᐢᑕᒧᓵᓂᐃᐧᐃᐧᐣ ᑭᑕ ᐊᔮᐟ.
18ᑭᐢᐱᐣ ᐊᔨᓯᔨᓂᐤ ᐊᔮᐋᐧᒋ ᐁ ᓴᓯᐱᑖᑯᐟ ᒥᓇ ᐁ ᒫᔦᔨᒥᑯᐟ ᐅᑯᓯᓴ, ᐊᓇ ᐁᑳ ᐁ ᓇᑐᐦᑕᐋᐧᐟ ᐅᑖᐃᐧᔭ ᐊᐦᐳ ᐅᑳᐃᐧᔭ, ᒥᓇ ᐋᑕ ᐸᐸᓴᐢᑌᐋᐧᑖᐧᐃᐧ, ᐁᑳ ᐃᐧ ᓇᑐᐦᑖᑯᑖᐧᐃᐧ; 19ᐁᑲᐧ ᐅᑖᐃᐧᔭ ᒥᓇ ᐅᑳᐃᐧᔭ ᑭᑕ ᐅᑎᑎᓂᐠ ᒥᓇ ᑭᑕ ᐃᑐᑕᐃᐠ ᐃᑕ ᐁ ᐊᔮᔨᐟ ᑳ ᓂᑳᓀᔨᑖᑯᓯᔨᐟ ᐅᐟ ᐅᑌᓈᕽ, ᒥᓇ ᐁ ᑭᐦᒋᐃᐢᑳᐧᑌᒥᐊᐧᓂᔨᐠ; 20ᐁᑯᓯ ᑭᑕ ᐃᑌᐊᐧᐠ ᐊᓂᐦᐃ ᑳ ᓂᑳᓀᔨᑖᑯᓯᔨᐟ ᐅᐟ ᐅᑌᓈᕽ, ᐊᐊᐧ ᓂᑯᓯᓯᓈᐣ ᓴᓯᐱᑕᒼ ᒥᓇ ᒫᔦᔨᐦᒋᑫᐢᑭᐤ, ᓇᒪᐃᐧᔭ ᓂ ᐃᐧ ᓇᑐᐦᑖᑯᓈᐣ; ᑭᐢᑫᐧᑲᒥᑭᓯᐤ ᒥᓇ ᑭᐢᑫᐧᐯᐢᑭᐤ. 21ᑲᐦᑭᔭᐤ ᒫᑲ ᐊᔨᓯᔨᓂᐊᐧ ᐅᐟ ᐅᑌᓈᕽ ᑭᑕ ᐱᒫᐧᐱᐢᑲᐅᐠ ᐊᓯᓂᔭ ᐅᐦᒋ ᑭᑕ ᓂᐱᐟ; ᐁᑯᓯ ᒫᑲ ᑭ ᑲ ᐃᑲᑌᓇᒫᓱᓈᐋᐧᐤ ᑳ ᒪᒑᔨᐊᐧᕽ, ᐃᑕ ᐁ ᐊᔮᔦᐠ; ᑲᐦᑭᔭᐤ ᒫᑲ ᐃᐢᕒᐁᐃᓬ ᑭᑕ ᐯᐦᑕᒪᐧᐠ ᒥᓇ ᑭᑕ ᐊᐢᑖᓯᐊᐧᐠ.
22ᑭᐢᐱᐣ ᒫᑲ ᐊᔨᓯᔨᓂᐤ ᐃᑐᑕᐦᑭ ᒪᒋᐃᑎᐃᐧᐣ ᐁ ᑲᐢᑭᑕᒫᓱᐟ ᓂᐱᐃᐧᐣ, ᐁᑯᓯ ᓂᐸᐃᐦᒋ, ᐁᑯᓯ ᑭᐟ ᐊᑯᑖᐤ ᒥᐢᑎᑯᕽ; 23#ᑲᓬᐁᓯᔭᓇ 3:13ᐃᐧᔭᐤ ᓇᒪᐃᐧᔭ ᑲᐯᑎᐱᐢᐠ ᑭᑕ ᐊᑯᑌᔨᐤ ᒥᐢᑎᑯᕽ, ᒫᑲ ᑫᐦᒋᓈ ᑭ ᑲ ᓇᐃᓈᐤ ᐳᐢᑯᑭᓯᐠ; ᒋᑫᒫ ᐊᓇ ᑳ ᐊᑯᑎᐦᐟ ᓈᓂᐳᒥᐠ ᑭᓭᒪᓂᑐᐊᐧ; ᐁᑳ ᑭᑕ ᐃᐧᔨᐱᑖᔭᐣ ᑭᐟ ᐊᐢᑭ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᑳ ᒥᔨᐢᐠ ᑭᑕ ᑎᐯᔨᐦᑕᒪᐣ.
Currently Selected:
ᑎᔪᑕᕒᐊᓇᒥ 21: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
