ᐃᓯᐦᒋᑫᐃᐧᓂᐋᐧᐊᐧ 18

1ᐅᐦᐃ ᒫᑲ ᑳ ᐸᐳᓂᐸᔨᑭ ᑭ ᓯᐯᐧᑌᐤ ᐋᑎᐣᐢ ᐅᐦᒋ, ᒥᓇ ᑭ ᑕᑯᓯᐣ ᐊᓂᑕ ᑳᕒᐃᐣᐟ, 2ᑭ ᒥᐢᑲᐁᐧᐤ ᒫᑲ. ᐯᔭᐠ ᒍᐊᐧ ᐊᑭᐧᓬᐊ ᐁ ᐃᓯᔨᐦᑳᓱᔨᐟ, ᐹᐣᑕᐢ ᐁ ᐅᑕᐢᑳᓀᓯᐟ ᓈᐯᐤ, ᐊᓄᒋᑫ ᐃᑕᓬᐃ ᐁ ᐅᑐᑌᐟ, ᐊᓯᒋ ᐃᐧᐊᐧ ᐸᕒᐃᓯᓬᐊ, ᒋᑫᒫ ᑲᓬᐋᑎᔭᐢ ᐁ ᑭ ᐃᑕᓱᐋᐧᑖᐟ ᑲᐦᑭᔭᐤ ᒍᐊᐧ ᑭᑕ ᓯᐯᐧᑌᔨᐟ ᕒᐅᒼ ᐅᐦᒋ: ᑭ ᓈᑌᐤ ᒫᑲ; 3ᐁᑯᓯ ᒋᑫᒫ ᑖᐱᐢᑯᐨ ᐁ ᐃᑕᑐᐢᑫᒋᐠ, ᑭ ᐃᐧᒋ ᐊᔮᒣᐤ, ᒥᓇ ᑭ ᐊᑐᐢᑫᐊᐧᐠ; ᐃᐧᔭ ᐅᐟ ᐊᑐᐢᑫᐃᐧᓂᐋᐧᐤ ᐁᐊᐧᑫᐧᔨᐤ ᐁ ᒥᑭᐋᐧᐱᑫᒋᐠ. 4ᑭ ᐊᐧᐃᐧᑕᒫᑫᐤ ᒫᑲ ᐊᔭᒥᐦᐁᐃᐧᑲᒥᑯᕽ ᑕᐦᑐ ᐊᔭᒥᐦᐁᑭᓯᑲᐤ, ᒥᓇ ᑭ ᑖᐯᐧᑕᒧᐁᐤ ᒍᐊᐧ ᒥᓇ ᑲᕒᐃᑲ.

5ᒫᑲ ᐃᐢᐱ ᓴᐃᓬᐊᐢ ᒥᓇ ᑎᒪᑏ ᑌᑯᓯᑭᐠ ᒫᓯᑖᓂᔭᐃᕽ ᐅᐦᒋ, ᐹᓬ ᑭ ᒪᐢᑲᐃᐧ ᓯᑭᐢᑳᐠ ᐃᑌᐧᐃᐧᐣ, ᐁ ᐋᒋᒧᐢᑕᐋᐧᐟ ᒍᐊᐧ ᒋᓴᐢ ᐁᐊᐧᑯ ᙭. 6ᐃᐢᐱ ᒫᑲ ᐃᔮᓀᐧᑕᑭᐠ, ᒥᓇ ᐁ ᐸᐢᑖᒧᐃᐧ ᐱᑭᐢᑫᐧᒋᐠ, ᑭ ᐸᐸᐃᐧᐸᔨᑖᐤ ᐅᐢᑯᑖᑲᐩ, ᒥᓇ ᑭ ᐃᑌᐤ, ᑭ ᒥᐦᑯᐋᐧᐤ ᑫᐦᒋᐋᐧᐠ ᑭᔭᐋᐧᐤ ᑭᐢᑎᑳᐧᓂᐋᐧᕽ ᑭᑕ ᐊᔮᐤ; ᓂᔭ ᐃᐧᔭ ᓂ ᐯᑭᓯᐣ: ᐊᓄᐦᐨ ᐅᐦᒋ ᒉᐣᑕᐃᓬᐊᐠ ᐁᑲᐧ ᓂ ᑲ ᓈᑖᐊᐧᐠ. 7ᑭ ᓯᐯᐧᑌᐤ ᒫᑲ ᐁᑯᑕ ᐅᐦᒋ, ᒥᓇ ᑭ ᐱᐦᑐᑫᐤ ᐅ ᐋᐧᐢᑳᐦᐃᑲᓂᔨᕽ ᐯᔭᐠ ᓈᐯᐊᐧ ᑕᐃᑕᐢ ᒐᐢᑕᐢ ᐁ ᐃᓯᔨᐦᑳᓱᔨᐟ, ᑐᐊᐧ ᑳ ᐊᔭᒥᐦᐁᐢᑕᐋᐧᐟ ᑭᓭᒪᓂᑐᐊᐧ, ᐅ ᐋᐧᐢᑳᐦᐃᑲᐣ ᒥᑐᓂ ᑭᓯᐋᐧᐠ ᐊᔭᒥᐦᐁᐃᐧᑲᒥᑯᕽ ᐁ ᐊᔮᔨᐠ. 8ᑲᕒᐃᐢᐸᐢ ᒫᑲ, ᑳ ᑎᐯᔨᑕᕽ ᐊᔭᒥᐦᐁᐃᐧᑲᒥᐠ, ᑭ ᑖᐯᐧᔦᔨᒣᐤ ᑳ ᑎᐯᔨᐦᒋᑫᔨᐟ ᑭᑭ ᑲᐦᑭᔭᐤ ᐃᐧᑭᕽ ᑳ ᐊᔮᔨᐟ; ᒥᐦᒉᐟ ᒫᑲ ᑲᕒᐃᐣᑎᔮᓇᐠ ᐁ ᐯᐦᑕᐦᑭᐠ ᑭ ᑖᐯᐧᑕᒪᐧᐠ, ᐁᑯᓯ ᑭ ᐹᑊᑖᐃᓯᐃᐧᐋᐊᐧᐠ. 9ᑳ ᑎᐯᔨᐦᒋᑫᐟ ᒫᑲ ᑭ ᐃᑌᐤ ᐹᓬᐊ ᓂᐹᑎᐱᐢᐠ ᐃᓯᓇᒧᐃᐧᓂᕽ, ᐁᑳᐃᐧᔭ ᑫᑲᐧᐩ ᑯᐢᑕ, ᒫᑲ ᐱᑭᐢᑫᐧ, ᒥᓇ ᐁᑳᐃᐧᔭ ᑭᐱᑐᐁᐧ: 10ᒋᑫᒫ ᓂᔭ ᑭ ᐃᐧᒉᐃᐧᑎᐣ, ᒥᓇ ᓇᒪᐃᐧᔭ ᐊᐃᐧᔭᐠ ᐊᔨᓯᔨᓂᐤ ᑭ ᑲ ᒧᐢᑭᐢᑖᐠ ᓈᐣᑕᐤ ᑭᑕ ᐃᓯ ᒫᔨᑐᑖᐢᐠ: ᒋᑫᒫ ᒥᐦᒉᐟ ᐊᔨᓯᔨᓂᐊᐧᐠ ᓂᐟ ᐊᔮᐋᐧᐊᐧᐠ ᐅᑕ ᐅᒪ ᐅᑌᓈᕽ. 11ᐁᑯᑕ ᒫᑲ ᑭ ᐊᔮᐤ ᐯᔭᐠ ᐊᐢᑭ ᒥᓇ ᓂᑯᑖᐧᓱ ᐱᓯᒼ ᐁ ᑭᐢᑭᓄᐦᐊᒫᑫᐟ ᑭᓭᒪᓂᑐ ᐅᐟ ᐃᑌᐧᐃᐧᐣ ᒣᑳᐧ ᐁᐊᐧᑯᓂ.

12ᒫᑲ ᐃᐢᐱ ᑳᓬᐃᔪ ᐁ ᐅᔭᓱᐁᐧᐃᐧᑭᒫᐃᐧᐟ ᐁᑳᔭᐃᕽ, ᒍᐊᐧᐠ ᒫᒪᐃᐧ ᑭ ᐸᓯᑯᐢᑕᐁᐧᐊᐧᐠ ᐹᓬᐊ, ᒥᓇ ᑭ ᐃᑐᐦᑕᐦᐁᐊᐧᐠ ᐅᔭᓱᐁᐧᐊᐧᐱᐃᐧᓂᕽ, 13ᐁ ᐃᑌᐧᒋᐠ, ᐊᐊᐧ ᓈᐯᐤ ᓵᑯᒋᒣᐤ ᐊᔨᓯᔨᓂᐊᐧ ᑭᑕ ᐊᔭᒥᐦᐁᐢᑕᐋᐧᔨᐟ ᑭᓭᒪᓂᑐᐊᐧ ᓇᐢᐹᐨ ᐁ ᐃᑕᐢᑌᐠ ᐅᔭᓱᐁᐧᐃᐧᐣ. 14ᒫᑲ ᒣᐧᐦᒋ ᐹᓬ ᐁ ᐃᐧ ᐊᑎ ᐱᑭᐢᑫᐧᐟ, ᑳᓬᐃᔪ ᑭ ᐃᑌᐤ ᒍᐊᐧ, ᑭᐢᐱᐣ ᑖᐯᐧ ᓈᐣᑕᐤ ᐊᐧᓂᑐᑕᒧᐃᐧᐣ ᐊᐦᐳ ᒪᒋ ᐃᓯᐦᒋᑫᐃᐧᐣ, ᑭᔭᐋᐧᐤ ᑳ ᒍᐃᐧᔦᐠ, ᑭᑕ ᐃᑕᐢᑌᐤ ᑭᑕ ᓇᑐᑖᑕᑯᐠ; 15ᒫᑲ ᑭᐢᐱᐣ ᑲᑫᐧᒋᑐᐃᐧᐣ ᐃᑌᐧᐃᐧᓇ ᐅᐦᒋ ᒥᓇ ᐃᐧᔪᐃᐧᓇ ᒥᓇ ᑭᔭᐋᐧᐤ ᑯᔭᓱᐁᐧᐃᐧᓂᐋᐧᐤ, ᑭᔭᐋᐧᐤ ᐁᐊᐧᑯ ᑲᓇᐋᐧᐸᐦᑕᒧᐠ; ᓇᒪᐃᐧᔭ ᓂᐟ ᐃᑌᔨᑌᐣ ᐁᑯᑐᐊᐧ ᑭᑕ ᐅᔭᓱᐋᐧᑕᒫᐣ ᓂᔭ. 16ᐁᑯᓯ ᑭ ᓯᐯᐧᑎᓴᐁᐧᐤ ᐅᔭᓱᐁᐧᐊᐧᐱᐃᐧᓂᕽ ᐅᐦᒋ. 17ᐁᑲᐧ ᑭ ᐅᑎᐦᑎᓀᐊᐧᐠ ᓵᐢᑎᓂᓴ, ᑳ ᑎᐯᔨᑕᒥᔨᐟ ᐊᔭᒥᐦᐁᐃᐧᑲᒥᐠ, ᒥᓇ ᑭ ᐹᐸᑲᒪᐁᐧᐊᐧᐠ ᒧᓯᐢ ᐁᑯᑕ ᐅᔭᓱᐁᐧᐊᐧᐱᐃᐧᓂᕽ. ᒫᑲ ᑳᓬᐃᔪ ᓇᒪᐃᐧᔭ ᐱᓯᐢᑫᔨᑕᒼ ᐁᐊᐧᑯᓂ.

18 # ᓇᒼᐸᕒᐢ 6:18 ᐹᓬ ᒫᑲ, ᑫᔮᐱᐨ ᐁᑯᑕ ᒥᐦᒉᐟ ᑭᓯᑳᐤ ᐁ ᑭ ᐊᔮᐟ, ᑭ ᐊᔭᑕᒥᐢᑲᐁᐧᐤ ᐁᑲᐧ ᐅᒋᐋᐧᒥᒫᐊᐧ, ᒥᓇ ᑭ ᐃᑖᓯᐤ ᐁᑯᑕ ᐅᐦᒋ ᓯᕒᐃᔭᐃᕽ, ᐁ ᐃᐧᒉᐃᐧᑯᐟ ᐸᕒᐃᓯᓬᐊ ᒥᓇ ᐊᑭᐧᓬᐊ; ᐁ ᑭ ᐸᐢᑯᐊᒫᐟ ᐊᓂᑕ ᓭᐣᑲᕒᐃᔭᐃᕽ: ᒋᑫᒫ ᑭᐦᒋ ᐃᑌᐧᐃᐧᐣ ᑭ ᐊᔮᐤ. 19ᑭ ᑕᑯᓯᓇᐧᐠ ᒫᑲ ᐁᐱᓴᓯᕽ, ᐁᑯᓯ ᐁᑯᑕ ᑭ ᓇᑲᑌᐤ: ᒫᑲ ᐃᐧᔭ ᑭ ᐱᐦᑐᑫᐤ ᐊᔭᒥᐦᐁᐃᐧᑲᒥᑯᕽ, ᒥᓇ ᑭ ᑲᑫᐢᑭᒣᐤ ᒍᐊᐧ. 20ᐃᐢᐱ ᒫᑲ ᐁ ᑲᑫᐧᒋᒥᑯᐟ ᐁᑯᑕ ᑫᔮᐱᐨ ᑭᓀᐧᓯᐢ ᑭᑕ ᐊᔮᐟ, ᓇᒪᐃᐧᔭ ᑭ ᓇᐢᑯᒧ; 21ᒫᑲ ᐁ ᐊᔭᑕᒥᐢᑲᐋᐧᐟ ᒥᓇ ᐁ ᐃᑌᐧᐟ, ᑳᐃᐧ ᒥᓇ ᑭ ᑲ ᐯ ᓇᑕᐋᐧᐸᒥᑎᓈᐋᐧᐤ, ᑭᐢᐱᐣ ᐃᑌᔨᑕᑫ ᑭᓭᒪᓂᑐ, ᑭ ᓯᐯᐧᔮᓯᐤ ᐁᐱᓴᓯᕽ ᐅᐦᒋ. 22ᐃᐢᐱ ᒫᑲ ᑳ ᑲᐹᐟ ᓯᓴᕒᐃᔭᐃᕽ, ᑭ ᑯᐢᐱᐤ ᒥᓇ ᑭ ᐊᔭᑕᒥᐢᑲᐁᐧᐤ ᐅᑕᔭᒥᐦᐋᐊᐧ, ᐁᑲᐧ ᑭ ᐃᑐᐦᑌᐤ ᐊᓂᑕ ᐋᐣᑎᔮᐠ. 23ᐁᑯᑕ ᒫᑲ ᑭᓀᐧᓯᐢ ᑳ ᐊᔮᐟ, ᑭ ᓯᐯᐧᑌᐤ, ᒥᓇ ᑭ ᐊᑭᓀ ᐊᔨᑐᑌᐤ ᑲᓬᐁᓯᔭ ᒥᓇ ᐸᕒᐃᒋᔭ ᐊᐢᑭᕽ, ᐁ ᒪᐢᑭᐃᐧᓯᐋᐟ ᑲᐦᑭᔭᐤ ᑭᐢᑭᓄᐦᐊᒪᐋᐧᑲᓇ.

24ᐯᔭᐠ ᒫᑲ ᒍᐤ, ᐊᐹᓬᐊᐢ ᐁ ᐃᓯᔨᐦᑳᓱᐟ, ᐋᓬᐃᐠᓵᐣᑕᕒᐃᔭ ᐁ ᐅᑕᐢᑳᓀᓯᐟ, ᒥᐢᑕᐦᐃ ᑫᑲᐧᐩ ᑳ ᑭᐢᑫᔨᑕᕽ ᑐᐃᐧ ᐊᔨᓯᔨᓂᐤ, ᑭ ᑕᑯᓯᐣ ᐁᐱᓴᓯᕽ; ᑭ ᓱᑫᔨᑖᑯᓯᐤ ᒫᑲ ᑭᐦᒋ ᒪᓯᓇᐦᐃᑫᐃᐧᓂᕽ. 25ᐊᐊᐧ ᓈᐯᐤ ᑭ ᑭᐢᑭᓄᐦᐊᒪᐋᐧᐤ ᐅᐟ ᐃᓯᑖᐧᐃᐧᓂᔨᕽ ᑳ ᑎᐯᔨᐦᒋᑫᔨᐟ; ᒫᑲ ᐁ ᑭᐢᑫᔨᑕᕽ ᐱᑯ ᐅ ᐹᑊᑕᐃᓯᐃᐧᐃᐁᐧᐃᐧᓂᔨᐤ ᒑᓇ: 26ᐁᑯᓯ ᑭ ᒫᒋ ᓱᑫᔨᒧᐃᐧ ᐱᑭᐢᑫᐧᐤ ᐊᔭᒥᐦᐁᐃᐧᑲᒥᑯᕽ. ᒫᑲ ᐃᐢᐱ ᐸᕒᐃᓯᓬᐊ ᒥᓇ ᐊᑭᐧᓬᐊ ᐱᔦᑕᐋᐧᒋᐠ, ᑭ ᐅᑎᓀᐊᐧᐠ ᐃᑕ ᑳ ᐊᔮᒋᐠ, ᒥᓇ ᐊᐊᐧᓯᒣ ᐯᔭᑕᐠ ᑭ ᐋᐧᐸᐦᑕᐁᐊᐧᐠ ᐅᐟ ᐃᓯᑖᐧᐃᐧᓂᔨᐤ ᑭᓭᒪᓂᑐᐊᐧ. 27ᐃᐢᐱ ᒫᑲ ᐁᑌᔨᑕᕽ ᐁᑳᔭᐃᕽ ᑭᑕ ᐊᑎ ᐃᑐᐦᑌᐟ, ᐅᒋᐋᐧᒥᒫᐊᐧᐠ ᑭ ᓯᑭᐢᑲᐁᐧᐊᐧᐠ, ᒥᓇ ᑭ ᒪᓯᓇᐦᐊᒥᐁᐧᐊᐧᐠ ᑭᐢᑭᓄᐦᐊᒪᐋᐧᑲᓇ ᑭᑕ ᐱᑐᑲᐋᔨᐟ; ᐃᐢᐱ ᒫᑲ ᑌᑯᓯᕽ, ᑭ ᐃᐧᒋᐁᐤ ᒥᐢᑕᐦᐃ ᐊᓂᐦᐃ ᑳ ᑭ ᑖᐯᐧᑕᒥᔨᐟ ᑭᓭᐋᐧᑎᓯᐃᐧᓂᕽ ᐅᐦᒋ: 28ᒋᑫᒫ ᑭ ᒪᐢᑲᐃᐧ ᓵᑯᒋᑐᓈᒣᐤ ᒍᐊᐧ, ᒣᑳᐧ ᐃᑕ ᐁ ᒥᐦᒉᑎᓈᓂᐃᐧᐠ, ᐁ ᐋᐧᐸᐦᑕᐦᐃᐁᐧᐟ ᑭᐦᒋ ᒪᓯᓇᐦᐃᑲᓂᕽ ᐅᐦᒋ ᒋᓴᐢ ᐁᐊᐧᑯ ᙭.

Currently Selected:

ᐃᓯᐦᒋᑫᐃᐧᓂᐋᐧᐊᐧ 18: KKMs

Highlight

Copy

Compare