ᓃᓵᐧᐤ ᓵᒼᔪᐃᓬ 24
24
1ᒥᓇ ᒫᑲ ᑳ ᑎᐯᔨᐦᒋᑫᐟ ᑭ ᑭᓯᐢᑕᐁᐧᐤ ᐃᐢᕒᐁᐃᓬᐊ, ᑭ ᒥᑯᐢᑳᑌᔨᑕᒥᐁᐤ ᒫᑲ ᑌᐱᑕ ᑭᑕ ᐃᑌᐧᔨᐟ, ᓇᑕᐃᐧ ᐊᑭᒥᐠ ᐃᐢᕒᐁᐃᓬ ᒥᓇ ᒍᑕ. 2ᑭᐦᒋ ᐅᑭᒫᐤ ᒫᑲ ᑭ ᐃᑌᐤ ᒍᐋᐸ ᑭᐦᒋᓯᒫᑲᓂᓯᐃᐧᓂᑭᒫᐊᐧ ᑳ ᐃᐧᒋᐊᔮᒥᑯᐟ, ᒫᐦᑎ ᑳᑫᐧᑯᐢᐠ ᐃᑐᐦᑌ ᑲᐦᑭᔭᐤ ᐁ ᐃᑕᐦᑐᑌᐃᐧᓯᐟ ᐃᐢᕒᐁᐃᓬ ᑖᐣ ᐅᐦᒋ ᐱᕒᓯᐸ ᐃᐢᑯ, ᐁᑯᓯ ᐊᑭᒥᐠ ᐊᔨᔨᓂᐊᐧᐠ, ᑭᑕ ᑭᐢᑫᔨᑕᒫᐣ ᐁᑕᓯᐋᐧᑫᐧ ᐊᔨᓯᔨᓂᐊᐧᐠ. 3ᒍᐋᑊ ᒫᑲ ᑭ ᐃᑌᐤ ᑭᐦᒋ ᐅᑭᒫᐊᐧ, ᑭᔮᒼ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᑭᑕ ᐃᐧ ᑕᑯᐁᐤ ᐊᔨᓯᔨᓂᐊᐧ ᐁᐦᑕᓯᐋᐧᑫ. ᒥᑖᐦᑐᒥᑕᓇᐋᐧᐤ ᐃᔨᑯᕽ, ᒥᓇ ᐱᑕᓀ ᐅᐢᑭᓯᑯᕽ ᐅᐦᒋ ᐋᐧᐸᐦᑕᕽ ᓂᐟ ᐅᑭᒫᒼ ᑭᐦᒋ ᐅᑭᒫᐤ; ᒫᑲ ᐃᐧᔭ ᑖᓀᐦᑭ ᓂᐟ ᐅᑭᒫᒼ ᑭᐦᒋ ᐅᑭᒫᐤ ᑳ ᒥᔦᐧᔨᑕᕽ ᐅᒪ? 4ᐁᔨᐁᐧᕽ ᒫᑲ ᑭᐦᒋ ᐅᑭᒫᐊᐧ ᐅᐟ ᐃᑌᐧᐃᐧᓂᔨᐤ ᑭ ᓵᑯᒋᐦᐃᐠ ᒍᐋᑊ, ᒥᓇ ᓯᒫᑲᓂᓯᐃᐧᑭᒫᐊᐧᐠ. ᐁᑯᓯ ᒍᐋᑊ ᒥᓇ ᓯᒫᑲᓂᓯᐃᐧᑭᒫᐊᐧᐠ ᑭ ᐊᐧᔭᐃᐧᐊᐧᐠ ᐃᑕ ᐁ ᐊᔮᔨᐟ ᑭᐦᒋ ᐅᑭᒫᐊᐧ ᐅᐦᒋ, ᑭᑕ ᐊᑭᒫᒋᐠ ᐃᐢᕒᐁᐃᓬ ᐊᔨᓯᔨᓂᐊᐧ.
5ᑭ ᐋᓱᐊᐧᐊᒪᐧᐠ ᒫᑲ ᒑᕒᑕᐣ, ᒥᓇ ᑭ ᑲᐯᓯᐊᐧᐠ ᐊᓂᑕ ᐋᕒᐅᐊᕒ, ᑭᐦᒋᓂᐢᑭᕽ ᐃᑌᐦᑫ ᐊᓂᒪ ᐅᑌᓇᐤ ᑳ ᐊᔮᐠ ᑖᐋᐧᔨᕽ ᐋᐧᔮᒪᑎᓈᐤ ᑳᐟ, ᒥᓇ ᒉᓴᕒ ᐃᐢᑯ; 6ᐁᑲᐧ ᑭ ᐅᑎᐦᑕᒪᐧᐠ ᑭᓬᐃᔭᐟ, ᒥᓇ ᑖᐦᑎᒼᐦᐋᐟᓴᐩ ᐊᐢᑭ; ᐁᑯᓯ ᑭ ᐅᑎᐦᑕᒪᐧᐠ ᑖᐣᒉᐋᐣ ᒥᓇ ᐋᐧᓴᑳᒼ ᓵᐃᑕᐣ ᐃᐢᑯ; 7ᐁᑯᓯ ᑭ ᐅᑎᐦᑕᒪᐧᐠ ᓱᑳᔭᐃᐧᑲᒥᐠ ᐊᓂᑕ ᑖᔭᕒ, ᒥᓇ ᑲᐦᑭᔭᐤ ᐅᑌᓇᐃᐧᐋᐧᐊᐧ ᐦᐊᐃᐸᐃᑕᐠ, ᒥᓇ ᑫᓇᓇᐃᑕᐠ; ᑭ ᐃᑐᑎᐊᐧᐠ ᒫᑲ ᓵᐊᐧᓄᑖᕽ ᒍᑕ ᐊᓂᑕ ᐱᕒᓯᐸ. 8ᐃᐢᐱ ᒫᑲ ᑳᑫᐧᑯᐢᐠ ᑳ ᐃᑐᑌᒋᐠ ᒥᓯᐁᐧ ᐊᐢᑭ, ᑭ ᑕᑯᓯᓇᐧᐠ ᒉᕒᐅᓴᓬᐊᒥᕽ ᐁ ᐳᓂᐸᔨᑭ ᑫᑳᐟ ᒥᑖᑕᐦᐟ ᑕᐦᑐ ᐱᓯᒼ ᒥᓇ ᓂᓯᑕᓇᐤ ᑭᓯᑳᐊᐧ. 9ᒍᐋᑊ ᒫᑲ ᑭ ᒥᔦᐤ ᑭᐦᒋ ᐅᑭᒫᐊᐧ ᐁ ᐃᐦᑕᓯᒋᐠ ᐊᔨᓯᔨᓂᐊᐧᐠ ᑳ ᑭ ᐊᑭᒥᐦᒋᐠ; ᑭ ᐊᔮᐊᐧᐠ ᒫᑲ ᐃᐢᕒᐁᐃᓬᐃᕽ ᐊᔨᓈᓀᐋᐧᐤ ᒥᑖᐦᑐᒥᑕᓇᐤ ᑕᐦᑐ ᑭᐦᒋᒥᑖᐦᑐᒥᑕᓇᐤ ᐁ ᓱᑫᔨᑖᑯᓯᒋᐠ ᐊᔨᓯᔨᓂᐊᐧᐠ ᐃᓴᐁᐧᐢᐠ ᑳ ᑭᑭᒋᐠ; ᐁᑯᓯ ᒍᑕ ᐊᔨᓯᔨᓂᐊᐧᐠ ᓂᔮᓇᓈᐧᐤ ᒥᑖᐦᑐᒥᑕᓇᐤ ᑕᐦᑐ ᑭᐦᒋᒥᑖᐦᑐᒥᑕᓇᐤ ᑭ ᐃᑕᓯᐊᐧᐠ ᓈᐯᐊᐧᐠ.
10ᐁᑲᐧ ᒣᐧᐢᑕᐢ ᑌᐱᐟ ᐅᑌᐦ ᑭ ᒧᓯᑖᐤ ᐃᐢᐱ ᑳ ᐊᑭᒫᐟ ᐊᔨᓯᔨᓂᐊᐧ. ᑌᐱᐟ ᒫᑲ ᑭ ᐃᑌᐤ ᑳ ᑎᐯᔨᐦᒋᑫᔨᐟ, ᒥᐢᑕᐦᐃ ᓂ ᑭ ᐊᐧᓂᑐᑌᐣ ᐅᒪ ᑳ ᑭ ᐃᑐᑕᒫᐣ; ᒫᑲ ᐁᑲᐧ ᑌᐯᔨᐦᒋᑫᔭᐣ ᐃᑲᑌᓇᒼ ᑭ ᐸᑯᓭᔨᒥᑎᐣ ᐅ ᐊᐧᓂᑐᑕᒧᐃᐧᐣ ᑭᐟ ᐊᑐᐢᑫᔮᑲᐣ; ᒋᑫᒫ ᒥᐢᑕᐦᐃ ᓂ ᑭ ᑲᑫᐹᒐᔨᑎᐣ. 11ᐃᐢᐱ ᒫᑲ ᑌᐱᐟ ᑳ ᐊᐧᓂᐢᑳᐟ ᐃᐧᐸᐨ ᐁ ᑫᑭᓭᐹᔮᐠ, ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ ᑭ ᐅᑎᐦᑎᐠ ᐅᑭᐢᑭᐁᐧᐦᐃᑫᐤ ᑳᐟ, ᑌᐱᐟ ᐅᐋᐧᐸᒋᑫᒪ, ᐁ ᐃᑌᐧᔨᐟ, 12ᓇᑕᐃᐧ ᐃᐧᐦᑕᒪᐤ ᑌᐱᐟ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ, ᐅᐦᐃ ᓂᐢᑐ ᑭ ᐸᑭᑎᓇᒫᑎᐣ ᓇᐊᐧᓱᓇᒫᓱ ᐯᔭᐠ ᑭᑕ ᐃᑐᑖᑖᐣ. 13ᐁᑯᓯ ᒫᑲ ᑳᐟ ᑭ ᐯ ᓈᑌᐤ ᑌᐱᑕ, ᒥᓇ ᑭ ᐃᐧᑕᒪᐁᐧᐤ, ᐁᑯᓯ ᑭ ᐃᑌᐤ, ᑌᐸᑯᑊ ᐊᐢᑭ ᒋ ᓄᑌᑲᑌᐃᐧᐣ ᑭ ᑲ ᐅᑎᐦᑎᑯᐣ ᑭᐟ ᐊᐢᑭᕽ? ᐊᐦᐳ ᒋ ᓂᐢᑐ ᐱᓯᒼ ᑭ ᑲ ᑕᐸᓯᐋᐊᐧᐠ ᑭ ᓄᑎᓈᑲᓇᐠ ᐁ ᐱᒫᒧᑳᑎᐢᑭᐠ? ᐊᐦᐳ ᒋ ᓂᐢᑐ ᑭᓯᑳᐤ ᐋᔨᒫᐢᐱᓀᐃᐧᐣ ᑭᑕ ᐊᔮᐤ ᑭᐟ ᐊᐢᑭᕽ? ᑲᑫᐧ ᑭᐢᑫᔨᑕ ᒫᑲ ᒫᒥᑐᓀᔨᑕ ᒥᓇ ᑫᑲᐧᐩ ᑫ ᓇᐢᑫᐧᐊᐧᓯᒪᐠ ᐊᓇ ᑳ ᑭ ᐯ ᐃᓯᑎᓴᐦᐅᐟ. 14ᑌᐱᐟ ᒫᑲ ᑭ ᐃᑌᐤ ᑳᐟ, ᒥᐢᑕᐦᐃ ᓂ ᐊᐧᐋᐧᓀᔨᑌᐣ; ᑭᔮᒼ ᓂ ᑲ ᐸᐦᑭᓯᓂᓈᐣ ᐅᒋᐦᒋᕽ ᑳ ᑎᐯᔨᐦᒋᑫᐟ; ᒋᑫᒫ ᐅ ᑭᓭᐋᐧᑎᓯᐃᐧᓇ ᒥᓵᔨᐊᐧ; ᑭᔮᒼ ᒫᑲ ᐁᑳᐃᐧᔭ ᓂ ᑲ ᐸᐦᑭᓯᓂᓈᐣ ᐅᒋᐦᒋᕽ ᐊᔨᓯᔨᓂᐤ.
15ᐁᑯᓯ ᒫᑲ ᑳ ᑎᐯᔨᐦᒋᑫᐟ ᑭ ᐃᓯᑎᓴᐦᐊᒪᐁᐧᐤ ᐋᔨᒫᐢᐱᓀᐃᐧᐣ ᐃᐢᕒᐁᐃᓬᐊ ᐁ ᑫᑭᓭᐹᔮᐠ ᐅᐦᒋ ᐱᔨᐢ ᐃᑕ ᑳ ᑭ ᐅᔭᑭᒋᑳᑌᐠ; ᐁᑯᓯ ᑭ ᓂᐱᐊᐧᐠ ᐊᔨᓯᔨᓂᐊᐧᐠ ᑖᐣ ᐅᐦᒋ ᐱᕒᓯᐸ ᐃᐢᑯ ᑌᐸᑯᐦᐳᒥᑕᓇᐤ ᑕᐦᑐ ᑭᐦᒋᒥᑖᐦᑐᒥᑕᓇᐤ ᐊᔨᓯᔨᓂᐊᐧᐠ. 16ᐃᐢᐱ ᒫᑲ ᐊᓇ ᐅᑭᓯᑯ ᓯᔪᐃᐧᓂᐢᑫᐢᑕᕽ ᒉᕒᐅᓴᓬᐊᒼ ᑭᑕ ᓂᓯᐊᐧᓈᒋᐦᑖᐟ, ᑳ ᑎᐯᔨᐦᒋᑫᐟ ᑭ ᒥᐦᑖᑕᒼ ᐊᓂᒪ ᒪᒑᔨᐃᐧᐣ, ᐁᑯᓯ ᑭ ᐃᑌᐤ ᐊᓂᐦᐃ ᐅᑭᓯᑯᐊᐧ ᑳ ᓂᓯᐊᐧᓈᒋᐦᐋᔨᐟ ᐊᔨᓯᔨᓂᐊᐧ, ᐁᑯᔨᑯᕽ ᐊᓂ; ᑭᐱᐦᑎᓇ ᐁᑲᐧ ᑭᒋᐦᒋ. ᐅᑭᓯᑯᒪ ᒫᑲ ᑳ ᑎᐯᔨᐦᒋᑫᐟ ᑭ ᐊᔮᐤ ᑭᓯᐋᐧᐠ ᐅ ᐸᐊᐧᐃᑫᐊᐧᓈᐢᑳᓂᔨᕽ ᐋᕒᐋᓇ ᐊᓇ ᒉᑊᔪᓴᐃᐟ. 17ᑌᐱᐟ ᒫᑲ ᑭ ᐊᔭᒥᐦᐁᐤ ᑳ ᑎᐯᔨᐦᒋᑫᔨᐟ ᐃᐢᐱ ᐃᐧᔮᐸᒫᐟ ᐊᓂᐦᐃ ᐅᑭᓯᑯᐊᐧ ᑳ ᓂᓯᐊᐧᓈᒋᐦᐋᔨᐟ ᐊᔨᓯᔨᓂᐊᐧ, ᒥᓇ ᑭ ᐃᑌᐧᐤ, ᒫᑎᑲ, ᓂ ᑭ ᐊᐧᓂᑐᑌᐣ, ᒥᓇ ᓂ ᑭ ᒫᔨᓯᒋᑳᐣ; ᒫᑲ ᐃᐧᔭ ᐅᑭ ᒫᔭᑎᐦᑲᐧᐠ, ᑫᑲᐧᐩ ᑳ ᐃᑐᑕᐦᑭᐠ? ᑭᔮᒼ ᑭᒋᐦᒋ ᑭ ᐸᑯᓭᔨᒥᑎᐣ ᓂ ᑲ ᐸᑲᒥᐢᑳᑯᐣ ᓂᔭ, ᒥᓇ ᓄᑖᐃᐧ ᐅ ᐋᐧᐢᑳᐦᐃᑲᐣ.
18ᑳᐟ ᒫᑲ ᑭ ᐯ ᓈᑌᐤ ᑌᐱᑕ ᐁᐋᐧᑳᐧᓂᒪ ᐁ ᑭᓯᑳᐠ, ᒥᓇ ᑭ ᐃᑌᐤ, ᓇᑕᐃᐧ ᐅᓯᐦᑕᒪᐤ ᑳ ᑎᐯᔨᐦᒋᑫᐟ ᐸᑭᑎᓈᓱᐃᐧᓈᐱᐢᐠ ᐅ ᐸᐊᐧᐃᑫᐊᐧᓈᐢᑳᓂᔨᕽ ᐋᕒᐋᓇ ᐊᓇ ᒉᑊᔪᓴᐃᐟ. 19ᑌᐱᐟ ᒫᑲ ᑭ ᐃᑐᐦᑌᐤ ᑳ ᑭ ᐃᑌᐧᔨᐟ ᑳᐟ, ᐁ ᐃᑕᓱᐁᐧᔨᐟ ᑳ ᑎᐯᔨᐦᒋᑫᔨᐟ. 20ᐋᕒᐋᓇ ᒫᑲ ᑭ ᐃᑖᐱᐤ ᐁᑯᓯ ᐋᐧᐸᒣᐤ ᑭᐦᒋ ᐅᑭᒫᐊᐧ ᒥᓇ ᐅᐟ ᐊᑐᐢᑫᔮᑲᓂᔨᐊᐧ ᐁ ᐯ ᓈᑎᑯᐟ; ᐋᕒᐋᓇ ᒫᑲ ᑭ ᐊᐧᔭᐃᐧᐤ ᒥᓇ ᑭ ᓈᒥᐢᑫᐧᔨᐢᑕᐁᐧᐤ ᑭᐦᒋ ᐅᑭᒫᐊᐧ ᒧᐢᑕᐢᑲᒥᐠ ᐃᓯ. 21ᐋᕒᐋᓇ ᒫᑲ ᑭ ᐃᑌᐧᐤ, ᑖᓀᐦᑭ ᓂᐟ ᐅᑭᒫᒼ ᑭᐦᒋ ᐅᑭᒫᐤ ᑳ ᐯ ᓈᑖᐟ ᐅᐟ ᐊᑐᐢᑫᔮᑲᓇ? ᑌᐱᐟ ᒫᑲ ᑭ ᐃᑌᐧᐤ, ᑭᑕ ᐊᑖᒥᑖᐣ ᐸᐊᐧᐃᑫᐊᐧᓈᐢᑳᐣ, ᐁᑯᑕ ᑭᑕ ᐅᓯᐦᑕᒪᐊᐧᐠ ᐸᑭᑎᓈᓱᐃᐧᓈᐱᐢᐠ ᑳ ᑎᐯᔨᐦᒋᑫᐟ, ᐋᔨᒫᐢᐱᓀᐃᐧᐣ ᑭᑕ ᑭᐱᑎᓇᒫᐦᒋᐠ ᐊᔨᓯᔨᓂᐊᐧᐠ. 22ᐋᕒᐋᓇ ᒫᑲ ᑭ ᐃᑌᐤ ᑌᐱᑕ, ᑭᔮᒼ ᓂᐟ ᐅᑭᒫᒼ ᑭᐦᒋ ᐅᑭᒫᐤ ᑭᑕ ᐅᑎᓇᒼ ᒥᓇ ᑭᑕ ᐸᑭᑎᓇᒼ ᑫᑲᐧᐩ ᐁ ᒥᔮᐧᐱᓯᒥᑯᐟ; ᒫᑎᑲ ᐊᓂᑭ ᒧᐢᑐᓴᐧᐠ ᑭᑕ ᐃᐢᑯᑌᐃᐧ ᐸᑭᑎᓈᓱᕽ, ᒥᓇ ᐸᐊᐧᐃᑫᐃᐧ ᐋᐸᒋᐦᒋᑲᓇ ᒥᓇ ᒧᐢᑐᓱ ᐋᐸᒋᐦᒋᑲᓇ ᑭᑕ ᐅ ᒥᐦᑎᒥᕽ; 23ᑲᐦᑭᔭᐤ ᐅᐦᐃ ᑭ ᐃᑐᑕᒼ ᐋᕒᐋᓇ, ᑖᐱᐢᑯᐨ ᑭᐦᒋ ᐅᑭᒫᐤ ᑭ ᐃᓯ ᒥᔦᐤ ᑭᐦᒋ ᐅᑭᒫᐊᐧ, ᐋᕒᐋᓇ ᒫᑲ ᑭ ᐃᑌᐤ ᑭᐦᒋ ᐅᑭᒫᐊᐧ, ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᑭ ᑲ ᐃᐧ ᐅᑎᓇᒫᐠ. 24ᑭᐦᒋ ᐅᑭᒫᐤ ᒫᑲ ᑭ ᐃᑌᐤ ᐋᕒᐋᓇᐊᐧ, ᓇᒪᐃᐧᔭ; ᒫᑲ ᑫᐦᒋᓈ ᑭ ᑲ ᐊᑖᒥᑎᐣ ᐁ ᐃᑕᑭᑌᐠ; ᐊᔨᐢ ᓇᒪᐃᐧᔭ ᓂ ᑲ ᐸᑭᑎᓇᒪᐋᐧᐤ ᑳ ᑎᐯᔨᐦᒋᑫᐟ ᒪᒍᐢᑌᐦᐊᒫᑫᐃᐧᓇ ᐁᑳ ᑫᑲᐧᐩ ᐁ ᑎᐸᐦᐊᒫᐣ. ᐁᑯᓯ ᑌᐱᐟ ᑭ ᐊᑖᐁᐧᐤ ᐸᐊᐧᐃᑫᐊᐧᓈᐢᑳᓂᔨᐤ ᒥᓇ ᒧᐢᑐᓴᐧ ᓂᔮᓇᓄᒥᑕᓇᐤ ᓭᑭᓬᐊ ᐋᐧᐱᐢᑭᓱᓂᔮᐊᐧ ᐁ ᑎᐸᐁᑯᐟ. 25ᑌᐱᐟ ᒫᑲ ᐁᑯᑕ ᑭ ᐅᓯᐦᑕᒪᐁᐧᐤ ᑳ ᑎᐯᔨᐦᒋᑫᔨᐟ ᐸᑭᑎᓈᓱᐃᐧᓈᐱᐢᐠ, ᒥᓇ ᑭ ᐸᑭᑎᓈᓱ ᒪᒍᐢᑌᐦᐊᒫᑫᐃᐧᓇ ᒥᓇ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓇ. ᐁᑯᓯ ᒫᑲ ᑳ ᑎᐯᔨᐦᒋᑫᐟ ᑭ ᑳᑭᓯᒧᐢᑕᐋᐧᐤ ᐊᐢᑭ ᐅᐦᒋ, ᒥᓇ ᐋᔨᒫᐢᐱᓀᐃᐧᐣ ᑭ ᑭᐱᑎᓇᒪᐋᐧᐊᐧᐠ ᐃᐢᕒᐁᐃᓬ.
Currently Selected:
ᓃᓵᐧᐤ ᓵᒼᔪᐃᓬ 24: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
