ᓃᓵᐧᐤ ᓵᒼᔪᐃᓬ 23
23
1ᐁᐊᐧᑯᓂ ᒫᑲ ᐅᐦᐃ ᐃᐢᑳᐧᔮᐨ ᐅᐟ ᐃᑌᐧᐃᐧᓇ ᑌᐱᐟ. ᑌᐱᐟ ᐅᑯᓯᓴ ᒉᓯ ᐃᑌᐧᐤ, ᒥᓇ ᐊᓇ ᐊᔨᓯᔨᓂᐤ ᑳ ᑭ ᐃᐢᐹᑫᔨᐦᐟ ᐃᑌᐧᐤ, ᐅ ᑐᒥᓈᑲᓇ ᐅ ᑭᓭᒪᓂᑐᒪ ᒉᑲᑊ, ᒥᓇ ᑳ ᒥᔪᑖᑯᓯᔨᐟ ᐅᓂᑲᒧᐃᐧᓂ ᐃᐢᕒᐁᐃᓬ;
2ᐅᐟ ᐊᐦᒑᐦᑲᐧ ᑳ ᑎᐯᔨᐦᒋᑫᐟ ᑭ ᐱᑭᐢᑫᐧᐤ ᓂᔭ ᐅᐦᒋ, ᒥᓇ ᐅᐟ ᐃᑌᐧᐃᐧᐣ ᓂᑌᔭᓂᕽ ᑭ ᐊᔮᔨᐤ.
3ᐅ ᑭᓭᒪᓂᑐᒪ ᐃᐢᕒᐁᐃᓬ ᑭ ᐃᑌᐧᐤ, ᐅ ᑭᐢᑖᐱᐢᑯᒼ ᐃᐢᕒᐁᐃᓬ ᓂ ᑭ ᑭᑐᑎᑯᐋᐧᐣ; ᐊᓇ ᑳ ᐅᔭᓱᐋᐧᑖᐟ ᐊᔨᓯᔨᓂᐊᐧ ᑲᐧᔭᐢᑳᐧᑎᓯᐃᐧᓂᕽ, ᑳ ᐅᔭᓱᐁᐧᐟ ᐁ ᑯᓯᑫᐧᔨᒫᐟ ᑭᓭᒪᓂᑐᐊᐧ.
4ᑭᑕ ᐃᓯ ᐊᔮᐤ ᑖᐱᐢᑯᐨ ᐋᐧᓭᔮᐤ ᐁ ᑫᑭᓭᐹᔮᐠ, ᐃᐢᐱ ᐱᓯᒼ ᐁ ᓄᑯᓯᐟ; ᐁᑳ ᐁ ᐊᐧᐢᑯᐊᐧᕽ ᐁ ᑫᑭᓭᐹᔮᐠ; ᑖᐱᐢᑯᐨ ᐅᐢᑲᐢᑯᓯᔭ ᐁ ᓵᑲᐢᑭᑭ ᐊᐢᑭᕽ ᐅᐦᒋ, ᐁ ᐋᐧᓭᐢᑲᐧᕽ ᐁ ᑭ ᐳᓂ ᑭᒥᐊᐧᕽ.
5ᐋᑕ ᐃᐧᔭ ᓂᑭᕽ ᐁᑳ ᐁᑯᓯ ᐁ ᐃᓯ ᐃᐧᒉᐋᐧᒋᐠ ᑳ ᑎᐯᔨᐦᒋᑫᔨᐟ; ᐁᔨᐁᐧᕽ ᓂ ᑭ ᐅᓯᐦᑕᒫᐠ ᑳᑭᑫ ᐃᐧᒋᐦᐃᓯᒋᑫᒥᑐᐃᐧᐣ, ᒥᓯᐁᐧ ᐃᓯ ᐁ ᐅᔭᐢᑌᐠ ᒥᓇ ᐁ ᑫᐦᒋᓈᑕᐢᑌᐠ; ᒋᑫᒫ ᐁᐊᐧᑯ ᑲᐦᑭᔭᐤ ᓂ ᐱᒫᒋᐦᐅᐃᐧᐣ ᒥᓇ ᓂ ᒧᐢᑕᐁᐧᔨᑕᒧᐃᐧᐣ, ᐋᑕᐃᐧᔭ ᐁᑳ ᐁ ᓂᐦᑖᐃᐧᑭᑖᐟ.
6ᒫᑲ ᐁᑳ ᑳ ᒪᓂᑐᐋᐧᑎᓯᒋᐠ ᑭᑕ ᐃᓯ ᐊᔮᐊᐧᐠ ᑖᐱᐢᑯᐨ ᒥᓯᑳᐃᐧᒥᓇᑲᓯᔭᐠ ᑭᑕ ᐃᑲᑌᓂᐦᒋᐠ, ᒋᑫᒫ ᓇᒪᐃᐧᔭ ᑭᑕ ᑭ ᐅᑎᐦᑎᓈᐊᐧᐠ ᒥᒋᐦᒋᕽ;
7ᒫᑲ ᐊᓇ ᐊᔨᓯᔨᓂᐤ ᑳ ᓵᒥᓈᐟ ᐱᑯ ᑭᑕ ᑭᑭᐢᑲᕽ ᐱᐋᐧᐱᐢᐠ ᒥᓇ ᑕᐦᑲᒋᑲᓈᑎᐠ; ᐁᑯᓯ ᑭᑕ ᒣᐢᑎᑲᓵᐧᐊᐧᐠ ᐃᐢᑯᑌᐤ ᐅᐦᒋ ᐅᐟ ᐃᐦᑖᐃᐧᓂᐋᐧᕽ.
8ᐁᐊᐧᑯᓂ ᐅᐦᐃ ᐁᓯᔨᑳᓱᔨᐟ ᑭᐦᒋᐊᔨᓯᔨᓂᐊᐧ ᑌᐱᐟ ᑳ ᑭ ᐊᔮᐋᐧᐟ; ᒑᓱᐹᓯᐯᐦᐟ ᐊᓇ ᑖᐠᒪᓇᐃᐟ ᑳ ᓂᑳᓂᐟ ᓯᒫᑲᓂᓯᐃᐧᑭᒫᐊᐧ; ᐁᐊᐧᑳᐧᓇ ᐋᑎᓄ ᐊᓇ ᐁᐢᓇᐃᐠ, ᐊᓇ ᐊᔨᓈᓀᐋᐤ ᒥᑖᐦᑐᒥᑕᓇᐤ ᐯᔭᑳᐧᐤ ᑳ ᑭ ᓂᐸᐦᐋᐟ.
9ᐁ ᐊᐢᑳᐧᑯᐟ ᒫᑲ ᐁᐊᐧᑯ ᐁᓬᐃᐁᓴᕒ ᐅᑯᓯᓴ ᑖᑖ ᐅᑯᓯᓴ ᐊᓇ ᐋᐦᐅᐦᐊᐃᐟ, ᐯᔭᐠ ᐊᓂᐦᐃ ᓂᐢᑐ ᐁ ᓱᑳᔭᐃᐧᓯᔨᐟ ᐊᔨᓯᔨᓂᐊᐧ ᑳ ᐃᐧᒉᑯᐟ ᑌᐱᐟ, ᐃᐢᐱ ᑳ ᒪᐃᐧᓀᐋᐧᒋᐠ ᐱᓬᐃᐢᑎᓇ ᐁ ᒫᐊᐧᒋᐦᐃᑐᔨᐟ ᑭᑕ ᓄᑎᓂᑫᔨᐟ ᐁᑯᓯ ᐃᐢᕒᐁᐃᓬ ᐊᔨᓯᔨᓂᐊᐧᐠ ᐁ ᑭ ᓯᐯᐧᑌᒋᐠ; 10ᑭ ᐸᓯᑯ ᐁᑯᓯ ᑭ ᐸᑲᒪᐁᐧᐤ ᐱᓬᐃᐢᑎᓇ ᐱᔨᐢ ᐁ ᐊᔦᐢᑯᓂᐢᑫᐟ, ᒥᓇ ᐅᒋᐦᒋ ᐁ ᒫᑯᓂᑫᐸᔨᔨᐠ ᐅᐟ ᐃᓴᐁᐧᑯᒫᓂᕽ; ᑳ ᑎᐯᔨᐦᒋᑫᐟ ᒫᑲ ᑭ ᑭᓯᑖᐤ ᑭᐦᒋ ᓴᑯᑖᐧᐃᐧᐣ ᐁᐊᐧᑳᐧᓂᒪ ᐁ ᑭᓯᑳᐠ; ᐊᔨᓯᔨᓂᐊᐧ ᒫᑲ ᑳᐃᐧ ᑭ ᐱᒥᑎᓴᐦᐅᐠ ᐱᑯ ᑭᑕ ᒪᓂᐊᐧᑌᔨᐟ.
11ᑭ ᐊᐢᑳᐧᐠ ᒫᑲ ᓵᒪ ᐅᑯᓯᓴ ᐋᑭ ᐊᓇ ᐦᐁᕒᐊᐃᐟ. ᐱᓬᐃᐢᑎᓇ ᐁ ᒫᐊᐧᒋᐦᐃᑐᔨᐟ ᐁ ᒥᓀᔭᑎᔨᐟ ᐊᐢᑭᑳᓂᕽ ᐃᑕ ᒥᓯᐁᐧ ᒥᐦᑯᒥᓂ ᑭᐢᑎᑳᓇ ᐁ ᓂᐦᑖᐃᐧᑭᑭ; ᐁᑯᓯ ᐊᔨᓯᔨᓂᐊᐧᐠ ᑭ ᑕᐸᓯᐁᐊᐧᐠ ᐱᓬᐃᐢᑎᓇ. 12ᒫᑲ ᐃᐧᔭ ᑭ ᓂᐸᐃᐧᐤ ᑖᐋᐧᔨᕽ ᐊᓂᒪ ᐊᐢᑭᑳᐣ, ᐁ ᓄᑎᓂᑫᐢᑕᒪᐊᐧᑕᕽ, ᐁᑯᓯ ᑭ ᓂᐸᐁᐤ ᐱᓬᐃᐢᑎᓇ; ᑳ ᑎᐯᔨᐦᒋᑫᐟ ᒫᑲ ᑭ ᑭᓯᑖᐤ ᑭᐦᒋ ᓵᑯᑖᐧᐃᐧᐣ.
13ᓂᐢᑐ ᒫᑲ ᐊᓂᑭ ᓂᐢᑐᒥᑕᓇᐤ ᑳ ᓂᑳᓂᒋᐠ ᑭ ᐃᑐᐦᑌᐊᐧᐠ ᐁᑯᓯ ᑭ ᐅᑎᑌᐊᐧᐠ ᑌᐱᑕ ᒣᑳᐧᐨ ᐁ ᒪᓂᓯᑫᕽ ᐁᑯᑕ ᐊᓂᒪ ᐊᑕᓬᐊᒼ ᐋᐧᑎᕽ; ᐁ ᒥᓀᔭᑎᒋᐠ ᒫᑲ ᐱᓬᐃᐢᑎᓇᐠ ᑭ ᑲᐯᓯᐊᐧᐠ ᐊᓂᑕ ᕒᐃᐯᐃᒼ ᐋᐧᔮᒪᑎᓈᕽ. 14ᑌᐱᐟ ᒫᑲ ᐁᑯᐢᐱ ᐋᐧᑎᕽ ᑭ ᐊᔮᐤ, ᐁᑯᓯ ᐱᓬᐃᐢᑎᓇ ᐅᐟ ᐊᓱᐅᐁᐧᒥᔨᐊᐧ ᑭ ᐊᔮᐊᐧᐠ ᐯᐟᓬᐃᐊᒥᕽ. 15ᑌᐱᐟ ᒫᑲ ᑭ ᓄᐦᑌ ᒥᓂᐦᑫᐧᐤ ᐁᑯᓯ ᑭ ᐃᑌᐧᐤ, ᐱᑕᓀ ᐊᐃᐧᔭᐠ ᒥᔨᐟ ᓂᐱ ᑭᑕ ᒥᓂᐦᑫᐧᔮᐣ ᐯᐟᓬᐃᐊᒼ ᒧᓇᐃᐹᓂᕽ ᐅᐦᒋ, ᑭᓯᐋᐧᐠ ᑭᐦᒋᐃᐢᑳᐧᑌᒥᕽ ᑳ ᐊᔮᐠ! 16ᐊᓂᑭ ᒫᑲ ᓂᐢᑐ ᑳ ᓱᑳᔭᐃᐧᓯᒋᐠ ᐊᔨᓯᔨᓂᐊᐧᐠ ᑭ ᓵᐳᐢᑲᐁᐧᐊᐧᐠ ᐱᓬᐃᐢᑎᓇ ᐅᓄᑎᓂᑫᒥᔨᐊᐧ, ᐁᑯᓯ ᑭ ᑳᐧᐸᐊᒪᐧᐠ ᓂᐱ ᐯᐟᓬᐃᐊᒼ ᒧᓇᐃᐸᓂᕽ ᐅᐦᒋ ᐊᓂᒪ ᑭᐦᒋ ᐃᐢᑳᐧᑌᒥᕽ ᑳ ᐊᔮᐠ, ᐁᑯᓯ ᑭ ᐅᑎᓇᒪᐧᐠ ᒥᓇ ᑭ ᐯᑐᐁᐧᐊᐧᐠ ᑌᐱᑕ ᒫᑲ ᓇᒪᐃᐧᔭ ᐃᐧ ᒥᓂᐦᑫᐧᐤ, ᒫᑲ ᑭ ᓯᑭᓇᒪᐁᐧᐤ ᑳ ᑎᐯᔨᐦᒋᑫᔨᐟ. 17ᑭ ᐃᑌᐧᐤ ᒫᑲ, ᓂ ᑲ ᐃᐧ ᔮᐋᐧᐸᒥᑯᐣ ᑌᐯᔨᐦᒋᑫᔭᐣ ᐅᒪ ᑭᑕ ᐃᑐᑕᒫᐣ; ᓂ ᑲ ᒥᓂᐦᑫᐧᐦᐋᐧᐣ ᒋ ᐅ ᒥᐦᑯᐋᐧᐤ ᐊᓂᑭ ᐊᔨᓯᔨᓂᐊᐧᐠ ᑳ ᑭ ᐃᑐᐦᑌᒋᐠ ᐁ ᑲᑫᐧᐢᐸᓈᒋᐦᑖᒋᐠ ᐅ ᐱᒫᑎᓯᐃᐧᓂᐋᐤ? ᐁᑯᓯ ᓇᒪᐃᐧᔭ ᐃᐧ ᒥᓂᐦᑫᐧᐤ. ᐁᐊᐧᑯᓂ ᐅᐦᐃ ᑭ ᐃᑐᑕᒪᐧᐠ ᐊᓂᑭ ᓂᐢᑐ ᑳ ᓱᑳᔭᐃᐧᓯᒋᐠ ᓈᐯᐊᐧᐠ.
18ᐋᐱᓵᐩ ᒫᑲ ᐅᒋᐋᐧᒪ ᒍᐋᑊ ᐅᑯᓯᓴ ᓯᕒᔪᐋᔭ, ᐁᐊᐧᑯ ᑭ ᓂᑳᓂᐤ ᐊᓂᐦᐃ ᓂᐢᑐ. ᑭ ᐅᐦᐱᓇᒪᐁᐧᐤ ᐅ ᑕᐦᑲᒋᑲᐣ ᓂᐢᑖᐧᐤ ᒥᑖᐦᑐᒥᑕᓇᐤ ᐁᑯᓯ ᑭ ᓂᐸᐁᐤ, ᑭ ᐊᓯᒋ ᐃᐧᔮᐤ ᒫᑲ ᑳ ᓂᐢᑎᔨᐟ. 19ᓇᒪ ᒋ ᐁᐊᐧᑯ ᐊᔨᐋᐧᐠ ᑭ ᑭᐢᑌᔨᑖᑯᓯᐤ ᐁ ᐃᓯ ᓂᐢᑎᔨᐟ? ᐁᐊᐧᑯ ᐅᐦᒋ ᑭ ᐃᑕᑭᒫᐤ ᑭᑕ ᐅ ᓯᒫᑲᓂᓯᐃᐧᑭᒫᒥᔨᐟ; ᐁᔨᐁᐧᕽ ᒫᑲ ᓇᒪᐃᐧᔭ ᑭ ᑎᐱᐁᐤ ᐊᓂᐦᐃ ᓂᐢᑕᒼ ᑳ ᓂᐢᑎᔨᐟ.
20ᐱᓈᔭ ᒫᑲ ᐅᑯᓯᓴ ᒋᐦᐋᔭᑕ, ᐅᑯᓯᓴ ᐅᑭᐦᒋᐦᑖᐤ ᑳᑊᓯᓬ ᐅᐦᒋ, ᑭᐦᒋ ᐃᓯᐦᒋᑫᐃᐧᓇ ᑳ ᑭ ᐃᑐᑕᕽ, ᑭ ᓂᐸᐁᐤ ᐁ ᓂᓯᔨᐟ ᐅᑯᓯᓯᔨᐊᐧ ᐊᕒᐃᐊᓬ ᒧᐋᑊ ᐅᐦᒋ; ᑭ ᐃᑐᐦᑌᐤ ᒥᓇ ᐁᑯᓯ ᑭ ᓂᐸᐁᐤ ᒥᐢᑕᐦᑫᓯᐊᐧ ᐋᐧᑎᕽ ᐁ ᒣᑳᐧ ᑭᑳᑯᓇᑲᔨᐠ; 21ᒥᓇ ᑭ ᓂᐸᐁᐤ ᐃᒋᑊᐟ ᐊᔨᓯᔨᓂᐊᐧ, ᐁ ᒥᔮᐧᐯᐃᐧᔨᐟ; ᐊᓇ ᒫᑲ ᐃᒋᑊᐟ ᐊᔨᓯᔨᓂᐤ ᑕᐦᑲᒋᑲᐣ ᑭ ᑕᐦᑯᓇᒼ; ᒫᑲ ᐃᐧᔭ ᑭ ᓈᑌᐤ ᓴᐢᑲᐅᓇᑎᐠ ᐁ ᐊᔮᐟ, ᐁᑯᓯ ᑭ ᑫᒋᒋᐦᒉᐱᑌᐤ ᑕᐦᑲᒋᑲᐣ ᐊᓂᐦᐃ ᐃᒋᑊᐟ ᐊᔨᓯᔨᓂᐊᐧ ᒥᓇ ᑭ ᓂᐸᐁᐤ ᑫᐦᒋᐋᐧᐠ ᐅ ᑕᐦᑲᒋᑲᓂᔨᐤ ᐅᐦᒋ. 22ᐅᐦᐃ ᐱᓈᔭ ᐅᑯᓯᓴ ᒋᐦᐋᔭᑕ ᑭ ᐃᑐᑕᒼ, ᐁᑯᓯ ᑭ ᐊᓯᒋ ᐃᐧᔭᐤ ᐊᓂᐦᐃ ᓂᐢᑐ ᑳ ᓱᑳᔭᐃᐧᓯᔨᐟ ᐊᔨᓯᔨᓂᐊᐧ. 23ᐊᔨᐋᐧᐠ ᑭ ᑭᐢᑌᔨᑖᑯᓯᐤ ᐃᔨᑯᕽ ᐊᓂᐦᐃ ᓂᐢᑐᒥᑕᓇᐤ, ᒫᑲ ᓇᒪᐃᐧᔭ ᑎᐱᐁᐤ ᐊᓂᐦᐃ ᓂᐢᑕᒼ ᑳ ᓂᐢᑎᔨᐟ. ᑌᐱᐟ ᒫᑲ ᑭ ᑎᐯᔨᐦᑕᒧᐁᐤ ᐅᑲᓇᐁᐧᔨᒥᐁᐧᒪ.
24ᐊᓭᐦᐃᓬ ᐅᒋᐋᐧᒪ ᒍᐋᑊ ᐁᐊᐧᑯ ᐯᔭᐠ ᐊᓂᑭ ᓂᐢᑐᒥᑕᓇᐤ; ᐁᓬᐦᐁᓈᐣ ᐅᑯᓯᓴ ᑖᑖ ᐯᐟᓬᐃᐊᒼ ᐅᐦᒋ; 25ᓵᒪ ᐊᓇ ᐦᐋᕒᐊᑕᐃᐟ, ᐁᓬᐊᐃᑲ ᐊᓇ ᐦᐋᕒᐊᑕᐃᐟ; 26ᐦᐃᓬᐁᐢ ᐊᓇ ᐹᓬᑕᐃᐟ, ᐊᐃᕒᐊ ᐅᑯᓯᓴ ᐃᑫᐢ ᐊᓇ ᑎᑳᐊᐃᐟ; 27ᐋᐱᔨᓴᕒ ᐊᓇ ᐋᓇᑖᐦᑕᐃᐟ, ᒥᐸᓇᐩ ᐊᓇ ᐦᐊᓴᑕᐃᐟ; 28ᓵᓬᒪᐣ ᐊᓇ ᐋᐦᐅᐦᐊᐃᐟ, ᒫᐦᐋᕒᐊᐩ ᐊᓇ ᓂᑖᐦᐸᑕᐃᐟ; 29ᐦᐃᓬᐃᑊ ᐅᑯᓯᓴ ᐯᐋᓇ ᐊᓇ ᓂᑖᐦᐸᑕᐃᐟ, ᐃᑖᐩ ᐅᑯᓯᓴ ᕒᐃᐸᐩ, ᑭᐱᔭ ᐅᐦᒋ ᑳ ᐊᔮᒋᐠ ᐅᐟ ᐊᐋᐧᓯᒥᓴ ᐯᐣᒋᒪᐣ; 30ᐱᓈᔭ ᐊᓇ ᐱᕒᐋᑕᓇᐃᐟ, ᐦᐃᑕᐩ ᑫᐋᐢ ᓯᐱᓯᓴ ᐅᐦᒋ; 31ᐋᐱᐋᓬᐸᐣ ᐊᓇ ᐋᕒᐸᐦᑕᐃᐟ, ᐋᐢᒪᐯᐦᐟ ᐊᓇ ᐹᕒᐦᐊᒪᐃᐟ; 32ᐃᓬᐃᔮᐸ ᐊᓇ ᓭᐋᓬᐸᓇᐃᐟ, ᐅᑯᓯᓴ ᒑᓯᐣ, ᒑᓇᐦᑕᐣ; 33ᓵᒪ ᐊᓇ ᐦᐁᕒᐊᕒᐊᐃᐟ; 34ᐃᓬᐃᐱᓬᐁᐟ ᐅᑯᓯᓴ ᐁᐦᐋᐢᐸᐩ, ᐅᑯᓯᓴ ᐊᓇ ᒣᐋᑲᐦᑕᐃᐟ, ᐃᓬᐃᔭᒼ ᐅᑯᓯᓴ ᐊᐦᐃᑕᐯᓬ ᐊᓇ ᑲᐃᓬᐊᓇᐃᐟ; 35ᐦᐁᓴᕒᐋ ᐊᓇ ᑳᕒᒥᓬᐊᐃᐟ, ᐯᐊᕒᐊᐩ ᐊᓇ ᐋᕒᐸᐃᐟ; 36ᐃᑳᓬ ᐅᑯᓯᓴ ᓀᐦᑖᐣ ᓵᐸ ᐅᐦᒋ, ᐯᓇᐩ ᐊᓇ ᑳᑕᐃᐟ; 37ᓯᓬᐁᐠ ᐊᓇ ᐋᒪᓇᐃᐟ, ᓀᐦᐊᕒᐊᐩ ᐊᓇ ᐱᐃᕒᐋᐦᑕᐃᐟ, ᑳ ᐱᒥᐃᐧᑖᐋᐧᒋᐠ ᐅᐟ ᐊᓱᐃᐧᓂᔨᐊᐧ ᒍᐋᐸ ᐅᑯᓯᓴ ᓯᕒᔪᐋᔭ; 38ᐊᐃᕒᐊ ᐊᓇ ᐃᐦᑕᕒᐊᐃᐟ, ᑳᕒᐃᑊ ᐊᓇ ᐃᐦᑕᕒᐊᐃᐟ; 39ᔪᕒᐋᔭ ᐊᓇ ᐦᐃᑕᐃᐟ; ᓂᐢᑐᒥᑕᓇᐤ ᑌᐸᑯᑊ ᐊᔨᐋᐧᐠ ᒫᒪᐃᐧ.
Currently Selected:
ᓃᓵᐧᐤ ᓵᒼᔪᐃᓬ 23: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
