ᓃᓵᐧᐤ ᓵᒼᔪᐃᓬ 17
17
1ᒥᓇ ᒫᑲ ᐊᐦᐃᑕᐯᓬ ᑭ ᐃᑌᐤ ᐋᑊᓴᓬᐊᒪ, ᑭᔮᒼ ᐁᑲᐧ ᓂ ᑲ ᓇᐊᐧᓱᓈᐋᐧᐠ ᒥᑖᑕᐦᐟ ᓂᓱᓵᑊ ᑕᐦᑐ ᑭᐦᒋᒥᑖᐦᑐᒥᑕᓇᐤ ᓈᐯᐊᐧᐠ, ᐁᑯᓯ ᓂ ᑲ ᐸᓯᑯᐣ ᒥᓇ ᓂ ᑲ ᓇᐊᐧᓵᐧᑖᐤ ᑌᐱᐟ ᐊᓄᐦᐨ ᑳ ᑎᐱᐢᑳᐠ; 2ᐁᑯᓯ ᓂ ᑲ ᐊᑎᒫᐤ ᐁ ᓄᑌᓯᕽ ᒥᓇ ᐁ ᓀᓱᐃᐧᒋᐦᒉᐟ, ᓂ ᑲ ᓭᑭᐋᐤ ᒫᑲ; ᐁᑯᓯ ᑲᐦᑭᔭᐤ ᐊᔨᓯᔨᓂᐊᐧ ᑳ ᐃᐧᒉᐃᐧᑯᐟ ᑭᑕ ᑕᐸᓯᔨᐊᐧ; ᐱᑯ ᒫᑲ ᑭᐦᒋ ᐅᑭᒫᐤ ᓂ ᑲ ᐸᑲᒪᐋᐧᐤ. 3ᑲᐦᑭᔭᐤ ᒫᑲ ᐊᔨᓯᔨᓂᐊᐧᐠ ᑭ ᑲ ᑭᐁᐧᑕᑕᒫᑎᐣ; ᐊᓇ ᓈᐯᐤ ᑳ ᓇᑐᓇᐊᐧᐟ ᐁᐊᐧᑯ ᑖᐱᐢᑯᐨ ᑲᐦᑭᔭᐤ ᐁ ᐯ ᑭᐁᐧᒋᐠ; ᐁᑯᓯ ᒫᑲ ᑲᐦᑭᔭᐤ ᐊᔨᓯᔨᓂᐊᐧᐠ ᑭᑕ ᐯᔭᑕᑭ ᐊᔮᐊᐧᐠ. 4ᐊᓂᒪ ᒫᑲ ᑳ ᐃᑌᐧᔨᐟ ᑭ ᓇᐦᐃᔭᐁᐧᐃᐠ ᐋᑊᓴᓬᐊᒼ ᒥᓇ ᑲᐦᑭᔭᐤ ᑳ ᓂᑳᓀᔨᑖᑯᓯᔨᐟ ᐃᐢᕒᐁᐃᓬ.
5ᐁᑲᐧ ᐋᑊᓴᓬᐊᒼ ᑭ ᐃᑌᐧᐤ, ᒫᐦᑎ ᓇᑐᒥᕽ ᐦᔪᓵᐩ ᐊᓇ ᐋᕒᑲᐃᐟ ᐃᐧᐢᑕ, ᑭᑕ ᐯᐦᑕᐋᐧᔭᕽ ᑖᓂᓯ ᐁ ᐃᑌᐧᐟ. 6ᐃᐢᐱ ᒫᑲ ᐦᔪᓵᐩ ᑳ ᐯ ᓈᑖᐟ ᐋᑊᓴᓬᐊᒪ, ᑭ ᑭᑐᑎᐠ ᐋᑊᓴᓬᐊᒪ ᐁ ᐃᑌᐧᔨᐟ, ᐁᑯᓯ ᐅᒪ ᑳ ᐃᑌᐧᐟ ᐊᐦᐃᑕᐯᓬ; ᑭ ᑲ ᐃᐦᑐᑕᒫᐧᓇᐤ ᒋ ᑳ ᐃᑌᐧᐟ? ᑭᐢᐱᐣ ᓇᒪᐃᐧᔭ ᐱᑭᐢᑫᐧ ᑭᔭ. 7ᐦᔪᓵᐩ ᒫᑲ ᑭ ᐃᑌᐤ ᐋᑊᓴᓬᐊᒪ, ᐊᓂᒪ ᐊᓄᐦᐨ ᑳ ᑭ ᐃᑕᓱᐁᐧᐟ ᐊᐦᐃᑕᐯᓬ ᓇᒪᐃᐧᔭ ᒥᔮᐧᓯᓂᔨᐤ. 8ᐦᔪᓵᐩ ᒥᓇ ᑭ ᐊᑎ ᐃᑌᐧᐤ, ᑭ ᑭᐢᑫᔨᒫᐤ ᑯᑖᐃᐧ ᒥᓇ ᐅᐢᑭᓂᑭᒪ, ᐁ ᓱᑳᔮᐃᐧᓯᐃᐧ ᐊᔨᓯᔨᓂᐃᐧᒋᐠ, ᒥᓇ ᑭᓯᐁᐧᔨᑕᒥᐋᐊᐧᐠ ᑖᐱᐢᑯᐨ ᒪᐢᑲᐧ. ᐅᐟ ᐊᔨᓯᓯᒪ ᐁ ᒪᐢᑭᒥᐦᐟ ᐱᑲᐧᒑᔨᕽ; ᐁᑯᓯ ᑯᑖᐃᐧ ᐅᓇᑐᐸᔨᐃᐧᔨᓂᐤ ᒥᓇ ᓇᒪᐃᐧᔭ, ᑭᑕ ᐃᐧᒋᑲᐯᓯᒣᐤ ᐊᔨᓯᔨᓂᐊᐧ. 9ᒫᑎᑲ, ᒣᑳᐧ ᑳᓱᑐᑫ ᓈᐣᑕᐤ ᐋᐧᑎᕽ, ᐊᐦᐳ ᓈᐣᑕᐤ ᐃᑕ ᐱᑐᐢ; ᐁᑯᓯ ᑭᑕ ᐃᐦᑭᐣ, ᐃᐢᐱ ᐋᑎᐦᐟ ᑭ ᐸᐦᑭᓯᑳᐧᐃᐧ ᓂᐢᑕᒼ, ᐊᐃᐧᔭᐠ ᐯᐦᑕᑭ ᑭᑕ ᐃᑌᐧᐤ, ᓂᐸᐦᐋᐊᐧᐠ ᐊᓂᑭ ᐊᔨᓯᔨᓂᐊᐧᐠ ᑳ ᐱᒥᑎᓴᐋᐧᒋᐠ ᐋᑊᓴᓬᐊᒪ. 10ᐁᑲᐧ ᐊᐦᐳ ᐊᓇ ᑳ ᓈᐯᑳᓱᐟ ᑳ ᐃᓯᑌᐦᐁᐟ ᑖᐱᐢᑯᐨ ᒥᐢᑕᐦᑫᓯᐤ, ᒥᑐᓂ ᑭᑕ ᓀᓱᐃᐧᐸᔨᐤ; ᒋᑫᒫ ᑲᐦᑭᔭᐤ ᐃᐢᕒᐁᐃᓬ ᑭᐢᑫᔨᑕᒼ ᑯᑖᐃᐧ ᐁ ᓱᑳᔭᐃᐧᓯᐃᐧ ᐊᔨᓯᔨᓂᐃᐧᐟ, ᒥᓇ ᐊᓂᐦᐃ ᑳ ᐃᐧᒉᐃᐧᑯᐟ ᑳ ᓈᐯᑳᓱᒋᐠ ᑐᐊᐧ ᐊᔨᓯᔨᓂᐊᐧᐠ. 11ᒫᑲ ᓂᔭ ᐁ ᐃᑕᓱᐁᐧᔮᐣ ᓇᐊᐧᐨ ᑲᐦᑭᔭᐤ ᐃᐢᕒᐁᐃᓬ ᒫᐊᐧᒋᐦᐊᒋᐠ, ᑖᐣ ᐅᐦᒋ ᐱᕒᓯᐸ ᐃᐢᑯ, ᑖᐱᐢᑯᐨ ᔦᑲᐤ ᓯᓱᓀ ᑭᐦᒋᑲᒥᕽ ᑭᑕ ᐃᑌᔭᑎᒋᐠ; ᐁᑯᓯ ᑭᔭ ᑫᐦᒋᐋᐧᐠ ᑭᑕ ᓇᑐᐸᔨᔭᐣ. 12ᐁᑯᓯ ᒫᑲ ᑭ ᑲ ᐅᑎᑖᓇᐤ ᓈᐣᑕᐤ ᐃᑕ ᑭᑕ ᑭ ᒥᐢᑲᐋᐧᔭᕽ, ᐁᑯᓯ ᑭ ᑲ ᐸᑭᒋᑐᑕᐋᐧᓇᐤ ᑖᐱᐢᑯᐨ ᑳ ᓂᐱᐊᐧᐢᑳᐠ ᐯᐦᑭᑎᑭ ᐊᐢᑭᕽ; ᐁᑯᓯ ᐃᐧᔭ ᒥᓇ ᐊᓂᐦᐃ ᓈᐯᐊᐧ ᑳ ᐃᐧᒉᐃᐧᑯᐟ ᓇᒪᐋᐧᐨ ᐯᔭᐠ ᑭ ᑲ ᐃᐢᑯᐦᐋᓇᐤ. 13ᐁᑯᓯ ᒥᓇ ᑭᐢᐱᐣ ᑭ ᐱᐦᑐᑫᒋ ᐅᑌᓈᕽ, ᑲᐦᑭᔭᐤ ᐃᐢᕒᐁᐃᓬ ᑭᑕ ᐯᑖᐊᐧᐠ ᐱᒪᓇᑳᐧᓇ ᐁᑯᑕ ᐅᑌᓈᕽ, ᒥᓇ ᑭ ᑲ ᐸᐦᑯᐯᑖᐹᓇᐤ ᓯᐱᕽ, ᐱᔨᐢ ᐁᑳ ᑲᓇᑫ ᐯᔭᐠ ᐊᓯᓂᐢ ᑭᑕ ᒥᐢᑳᐦᐟ ᐁᑯᑕ. 14ᐁᑲᐧ ᐋᑊᓴᓬᐊᒼ ᒥᓇ ᑲᐦᑭᔭᐤ ᐃᐢᕒᐁᐃᓬ ᐊᔨᓯᔨᓂᐊᐧᐠ ᑭ ᐃᑌᐧᐊᐧᐠ, ᐅᐟ ᐃᑕᓱᐁᐧᐃᐧᐣ ᐦᔪᓵᐩ ᐊᓇ ᐋᕒᑲᐃᐟ ᓇᐊᐧᐨ ᒥᔮᐧᓯᓂᔨᐤ ᐃᔨᑯᕽ ᐊᐦᐃᑕᐯᓬ ᐅᐟ ᐃᑕᓱᐁᐧᐃᐧᐣ. ᒋᑫᒫ ᑳ ᑎᐯᔨᐦᒋᑫᐟ ᑭ ᐃᑕᑭᐦᑕᒼ ᑭᑕ ᐊᐧᓈᑖᐋᐧᐟ ᐅ ᒥᔭᐧᓱᐁᐧᐃᐧᓂᔨᐤ ᐊᐦᐃᑕᐯᓬᐊ, ᑳ ᑎᐯᔨᐦᒋᑫᐟ ᑭᑕ ᐅᐦᒋ ᒫᔨᐸᔨᐦᐋᐟ ᐋᑊᓴᓬᐊᒪ.
15ᐁᑲᐧ ᐦᔪᓵᐩ ᑭ ᐃᑌᐤ ᓭᑖᑲ ᒥᓇ ᐊᐹᔭᑕᕒᐊ ᐊᓂᐦᐃ ᐊᔭᒥᐦᐁᐃᐧᔨᓂᐊᐧ, ᐁᑯᓯ ᐅᒪ ᐊᐦᐃᑕᐯᓬ ᑳ ᐊᔨᑕᓱᐋᐧᑖᐟ ᐋᑊᓴᓬᐊᒪ ᒥᓇ ᑳ ᓂᑳᓀᔨᑖᑯᓯᔨᐟ ᐃᐢᕒᐁᐃᓬᐊ; ᓂᔭ ᒫᑲ ᐁᑯᓯ ᐅᒪ ᑳ ᐊᔨᑕᓱᐁᐧᔮᐣ. 16ᐁᑲᐧ ᒫᑲ ᑭᔨᐸ ᓯᐯᐧᑎᓴᐅᐁᐧᐠ ᒥᓇ ᐃᐧᐦᑕᒫᕽ ᑌᐱᐟ, ᐁ ᐃᑌᐧᔦᐠ, ᐁᑳᐃᐧᔭ ᑲᐯᓯᐠ ᐊᓄᐦᐨ ᑳ ᑎᐱᐢᑳᐠ ᐋᓱᐊᐧᑳᓯᐃᐧᓂᕽ ᐱᑲᐧᑕᐢᑭᕽ, ᒫᑲ ᔮᔨᑌ ᐋᓱᐊᐧᐦᐊᒧᐠ; ᐁᑳ ᑭᐦᒋ ᐅᑭᒫᐤ ᑭᑕ ᒣᐦᒋᐃᐦᐟ ᐊᓯᒋ ᑲᐦᑭᔭᐤ ᐊᔨᓯᔨᓂᐊᐧ ᑳ ᐃᐧᒉᐃᐧᑯᐟ. 17ᒑᓇᐦᑕᐣ ᒫᑲ ᐊᓯᒋ ᐊᐦᐃᒣᐋᐢ ᑭ ᐊᔭᔮᐊᐧᐠ ᐊᓂᑕ ᐁᐣᕒᐋᑫᓬ, ᐁᑯᓯ ᐊᑐᐢᑫᔮᑲᓂᐢᑫᐧᐊᐧ ᒫᓇ ᑭ ᓇᑕᐃᐧ ᐋᒋᒧᐢᑖᑲᐧᐠ; ᐁᑯᓯ ᑭ ᓇᑕᐃᐧ ᐃᐧᐦᑕᒪᐁᐧᐊᐧᐠ ᑭᐦᒋ ᐅᑭᒫᐊᐧ ᑌᐱᑕ; ᐊᔨᐢ ᐁᑳ ᑭᑕ ᐋᐧᐸᒥᐦᒋᐠ ᑭᑕ ᐱᐦᑐᑫᒋᐠ ᐅᑌᓈᕽ. 18ᒫᑲ ᐅᐢᑭᓂᑭᓴ ᐋᐧᐸᒥᑲᐧᐠ ᐁᑯᓯ ᓇᑕᐃᐧ ᐃᐧᐦᑕᒪᐁᐧᔨᐊᐧ ᐋᑊᓴᓬᐊᒪ; ᒫᑲ ᑖᐱᐢᑯᐨ ᐁ ᐃᓯ ᓂᓯᒋᐠ ᑭᔨᐸ ᑭ ᓯᐯᐧᑌᐊᐧᐠ, ᐁᑯᓯ ᑭ ᑕᑯᓇᐧᐠ ᐊᔨᓯᔨᓂᐊᐧ ᐅ ᐋᐧᐢᑳᐦᐃᑲᓂᔨᕽ ᐊᓂᑕ ᐹᐦᐊᕒᐃᒼ, ᐁᐊᐧᑯᓂ ᐊᔮᔨᐊᐧ ᒧᓇᐦᐃᐹᐣ ᐅ ᐱᐦᒋᒣᓂᑲᓂᕽ; ᐁᑯᑕ ᒫᑲ ᑭ ᑲᐧᔭᓯᑌᐊᐧᐠ. 19ᐃᐢᑫᐧᐤ ᒫᑲ ᑭ ᐅᑎᓇᒼ ᒥᓇ ᑭ ᑕᓭᐧᑲᐢᑖᐤ ᐊᑲᐧᓇᐃᑲᐣ ᐃᑕ ᐁ ᔪᑌᔮᐠ ᒧᓇᐦᐃᐹᐣ, ᐁᑯᓯ ᑭ ᓯᑲᔦᐤ ᐁᑯᑕ ᐸᐦᑫᐧᓯᑲᓂᑳᓇ ᐁ ᑭ ᐸᑲᒪᐃᑳᓱᔨᐟ; ᐁᑯᓯ ᓇᒪ ᑫᑲᐧᐩ ᑭᐢᑫᔨᐦᒋᑳᑌᐤ. 20ᐋᑊᓴᓬᐊᒼ ᒫᑲ ᐅᐟ ᐊᑐᐢᑫᔮᑲᓇ ᑭ ᐯ ᓈᑌᐊᐧᐠ ᐊᓂᐦᐃ ᐃᐢᑫᐧᐊᐧ ᐋᐧᐢᑳᐦᐃᑲᓂᕽ; ᐁᑯᓯ ᑭ ᐃᑌᐧᐊᐧᐠ, ᑖᓂᑌ ᐁᔮᒋᐠ ᐊᐦᐃᒣᐋᐢ ᒥᓇ ᒑᓇᐦᑕᐣ? ᐊᓂᐦᐃ ᒫᑲ ᐃᐢᑫᐧᐊᐧ ᑭ ᐃᑎᑲᐧᐠ, ᑭ ᐋᓱᐊᐧᐊᒪᐧᐠ ᓯᐱᓯᐢ. ᐃᐢᐱ ᒫᑲ ᑳ ᓇᓈᑐᓇᐋᐧᒋᐠ ᐁᑳ ᒫᑲ ᐁ ᑭ ᒥᐢᑲᐋᐧᒋᐠ, ᒉᕒᐅᓴᓬᐊᒥᕽ ᑭ ᐃᓯ ᑭᐁᐧᐊᐧᐠ.
21ᑭ ᐊᔨᑭᐣ ᒫᑲ ᐃᐢᐱ ᑳ ᓯᐯᐧᑌᔨᐟ, ᑭ ᐯ ᐃᐢᑳᐧᑕᐃᐧᐊᐧᐠ ᒧᓇᐃᐹᓂᕽ ᐅᐦᒋ, ᒥᓇ ᑭ ᓇᑕᐃᐧ ᐃᐧᐦᑕᒪᐋᐧᐊᐧᐠ ᑭᐦᒋ ᐅᑭᒫᐊᐧ ᑌᐱᑕ; ᑭ ᐃᑌᐊᐧᐠ ᒫᑲ ᑌᐱᑕ, ᐊᐧᓂᐢᑳᐠ, ᒥᓇ ᑭᔨᐸ ᐊᓱᐊᐧᑳᓯᐠ ᓂᐱ; ᒋᑫᒫ ᐅᒥᓯ ᐊᐦᐃᑕᐯᓬ ᑭ ᑭ ᐃᑕᓱᐋᐧᑎᐠ. 22ᐁᑲᐧ ᑌᐱᐟ ᑭ ᐊᐧᓂᐢᑳᐤ ᒥᓇ ᑲᐦᑭᔭᐤ ᐊᔨᓯᔨᓂᐊᐧ ᑳ ᐃᐧᒉᐃᐧᑯᐟ, ᑭ ᐋᓱᐊᐧᐊᒪᐧᐠ ᒫᑲ ᒑᕒᑕᐣ; ᐃᐢᐱ ᐁ ᐯᑖᐸᕽ ᓇᒪᐋᐧᐨ ᐯᔭᐠ ᐁᑳ ᐁ ᑭ ᐅᐦᒋ ᐋᓱᐊᐧᐊᕽ ᒑᕒᑕᐣ.
23ᐃᐢᐱ ᒫᑲ ᐊᐦᐃᑕᐯᓬ ᐃᐧᔮᐸᐦᑕᕽ ᐁᑳ ᐁ ᐱᒥᑎᓴᐃᑳᑌᔨᐠ ᐅᐟ ᐃᑕᓱᐁᐧᐃᐧᐣ, ᑭ ᐅᔭᐱᑌᐤ ᐅ ᓱᓱᐃᐧᒥᐢᑕᑎᒧᒪ, ᐁᑯᓯ ᑭ ᐸᓯᑯ ᒥᓇ ᑭ ᑭᐁᐧᐤ ᐅᐟ ᐅᑌᓈᕽ. ᑭ ᑲᐧᔭᐢᑲᐧᐢᑖᐤ ᑲᐦᑭᔭᐤ ᑫᑲᐧᐩ ᐅ ᐋᐧᐢᑳᐦᐃᑲᓂᕽ, ᐁᑯᓯ ᑭ ᐊᑯᑎᓱ; ᑭ ᐳᓂ ᐱᒫᑎᓯᐤ ᒫᑲ, ᐁᑯᓯ ᑭ ᓇᐃᓈᐤ ᐅ ᓇᐦᐃᓂᑐᐃᐧᑲᒥᑯᔨᕽ ᐅᑖᐃᐧᔭ. 24ᐁᑲᐧ ᑌᐱᐟ ᑭ ᐯ ᑕᑯᓯᐣ ᐊᓂᑕ ᒣᐦᐋᓀᐃᒼ. ᐋᑊᓴᓬᐊᒼ ᒫᑲ ᑭ ᐋᓱᐊᐧᐊᒼ ᒑᕒᑕᐣ ᐃᐧᔭ ᒥᓇ ᑲᐦᑭᔭᐤ ᐃᐢᕒᐁᐃᓬ ᐊᔨᓯᔨᓂᐊᐧ ᑳ ᐃᐧᒉᐃᐧᑯᐟ.
25ᐋᑊᓴᓬᐊᒼ ᒫᑲ ᑭ ᑎᐯᔨᐦᑕᒧᐁᐤ ᐁᒫᓴᐊᐧ ᐊᓂᐦᐃ ᐅᓄᑎᓂᑫᐊᐧ ᒥᐢᑯᐨ ᒍᐋᐸ. ᐊᓇ ᒫᑲ ᐁᒫᓴ ᐁᐊᐧᑯ ᐅᑯᓯᓴ ᓈᐯᐤ ᐃᐦᑕᕒᐊ ᐁ ᐃᓯᔨᐦᑳᓱᐟ, ᐃᐢᒣᐃᓬᐊᐃᐟ, ᑳ ᑭ ᐱᑐᑲᐋᐧᐟ ᐋᐱᑫᓬᐊ ᐅᑖᓂᓴ ᓀᐦᐋᐢ, ᐅᒋᐋᐧᒥᐢᑫᐧᒪ ᓯᕒᔪᐋᔭ ᒍᐋᑊ ᐅᑳᐃᐧᔭ. 26ᐁᑯᓯ ᒫᑲ ᐃᐢᕒᐁᐃᓬ ᒥᓇ ᐋᑊᓴᓬᐊᒼ ᑭ ᑲᐯᓯᐊᐧᐠ ᑭᓬᐃᔭᐟ ᐊᐢᑭᕽ.
27ᑭ ᐊᔨᑭᐣ ᒫᑲ ᐃᐢᐱ ᑌᐱᐟ ᑌᑯᓯᕽ ᐊᓂᑕ ᒣᐦᐋᓀᐃᒥᕽ, ᐊᓇ ᓵᐸ, ᐅᑯᓯᓴ ᓀᐦᐋᐢ ᕒᐋᐸ ᐅᐦᒋ ᐅᐟ ᐊᐋᐧᓯᒥᓴ ᐋᒪᐣ, ᒥᓇ ᒫᑲᕒ ᐅᑯᓯᓴ ᐋᒥᐁᓬ ᓬᐋᑎᐹᕒ ᐅᐦᒋ, ᒥᓇ ᐸᕒᓯᓬᐋᐩ ᐊᓇ ᑭᓬᐃᔭᑕᐃᐟ ᕒᐋᑭᓬᐃᒼ ᐅᐦᒋ, 28ᑭ ᐯᑖᐊᐧᐠ ᓂᐯᐃᐧᓇ ᒥᓇ ᐅᔮᑲᓇ ᒥᓇ ᐊᓯᐢᑭᐃᐧᔮᑲᓇ ᒥᓇ ᐸᐦᑫᐧᓯᑲᓂᑳᓇ, ᒥᓇ ᐃᐢᑫᐧᓯᓯᑳᓇ ᒥᓇ ᐸᐦᑫᐧᓯᑲᓇ, ᒥᓇ ᑳᐢᐱᓯᑲᓇ, ᒥᓇ ᒥᐢᑕᔨᒋᒥᓇ, ᒥᓇ ᒥᐦᑯᒥᓇ, ᒥᓇ ᑳᐢᐸᔨᒋᒥᓇ, 29ᒥᓇ ᐋᒧᓯᓯᐹᐢᑲᐧᐟ, ᒥᓇ ᑐᑐᓵᐳᐃᐧᐱᒥ, ᒥᓇ ᒫᔭᑎᐦᑲᐧ, ᒥᓇ ᒋᐢ ᒧᐢᑐᓴᐧᐠ ᐅᐦᒋ, ᑭᑕ ᐋᐸᒋᐋᔨᐟ ᑌᐱᑕ ᒥᓇ ᐊᔨᓯᔨᓂᐊᐧ ᑳ ᐃᐧᒉᐃᐧᑯᔨᐟ ᒋᑫᒫ ᑭ ᐃᑌᐧᐊᐧᐠ, ᐊᔨᓯᔨᓂᐊᐧᐠ ᓄᑌᑲᑌᐊᐧᐠ ᒥᓇ ᓄᑌᓯᓇᐧᐠ, ᒥᓇ ᓄᑌᔮᐹᑫᐧᐊᐧᐠ ᐱᑲᐧᑕᐢᑭᕽ.
Currently Selected:
ᓃᓵᐧᐤ ᓵᒼᔪᐃᓬ 17: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
