ᓂᐢᑕᒼ ᓵᒼᔪᐃᓬ 9
9
1ᑭ ᐃᐦᑖᐤ ᒫᑲ ᐯᔭᐠ ᓈᐯᐤ ᐯᐣᒋᒪᐣ ᐅᐦᒋ, ᑭᐢ ᐁ ᐃᓯᔨᐦᑳᓱᐟ, ᐅᑯᓯᓴ ᐋᐹᔨᓬ, ᐅᑯᓯᓴ ᓯᕒᐋᕒ, ᐅᑯᓯᓴ ᐯᑯᕒᐊᐦᐟ, ᐅᑯᓯᓴ ᐊᐦᐹᔭ, ᐯᐣᒋᒪᐧᐟ, ᐁ ᑭᐦᒑᔨᐃᐧᐟ ᐊᔨᓯᔨᓂᐤ. 2ᑭ ᐅᑯᓯᓯᐤ ᒫᑲ, ᓵᓬ ᐁ ᐃᓯᔨᐦᑳᓱᔨᐟ, ᓇᐊᐧᓱ ᐅᐢᑭᓂᑭᐤ, ᒥᓇ ᐁ ᒥᔪᓯᐟ; ᓇᒪᐋᐧᐨ ᒫᑲ ᐊᐃᐧᔭᐠ ᑳ ᐃᐦᑕᓯᒋᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᐊᐊᐧᓯᒣ ᒥᔪᓯᐤ ᐃᔨᑯᕽ ᐃᐧᔭ; ᐅᑎᐦᑎᒪᓂᕽ ᐅᐦᒋ ᒥᓇ ᐃᐢᐱᒥᕽ ᐃᓯ ᑭ ᐊᔨᐃᐧᑳᐸᐃᐧᐢᑕᐁᐧᐤ ᑲᐦᑭᔭᐤ ᐁᐊᐧᑯᓂ ᐊᔨᓯᔨᓂᐊᐧ. 3ᐅ ᓱᓱᒥᐢᑕᑎᒧᒪ ᒫᑲ ᑭᐢ, ᓵᓬ ᐅᑖᐃᐧᔭ ᑭ ᐊᐧᓂᐋᐊᐧᐠ. ᑭᐢ ᒫᑲ ᐅᒥᓯ ᑭ ᐃᑌᐤ ᓵᓬᐊ ᐅᑯᓯᓴ, ᐃᐧᒉᐤ ᓈᐣᑕᐤ ᐯᔭᐠ ᐊᑐᐢᑫᔮᑲᐣ, ᓯᐯᐧᐦᑌ ᒫᑲ ᓇᓈᑐᓇᐃᐧᐠ ᓱᓱᒥᐢᑕᑎᒪᐧᐠ. 4ᑭ ᓵᐳ ᐱᒧᑖᑐᑕᒼ ᒫᑲ ᐃᐸᕒᐁᐃᒼ ᐊᐧᒋ, ᒥᓇ ᑭ ᓵᐳ ᐱᒧᑖᑐᑕᒼ ᓵᓬᐃᓴ ᐊᐢᑭ, ᒫᑲ ᓇᒪᐃᐧᔭ ᒥᐢᑲᐁᐧᐊᐧᐠ; ᐁᑲᐧ ᑭ ᓵᐳ ᐱᒧᑖᑐᑕᒪᐧᐠ ᓭᓬᐃᒼ ᐊᐢᑭ, ᓇᒪᐃᐧᔭ ᒫᑲ ᐁᑯᑕ ᐊᔮᔨᐊᐧ. ᐁᑯᓯ ᑭ ᐊᑎ ᓵᐳ ᐱᒧᑖᑐᑕᒼ ᐅᐟ ᐊᐢᑭᔨᐤ ᐯᐣᒋᒪᐃᑕ, ᒫᑲ ᓇᒪᐃᐧᔭ ᒥᐢᑲᐁᐧᐊᐧᐠ. 5ᐃᐢᐱ ᒫᑲ ᑌᑯᓯᑭᐠ ᐊᓂᑕ ᓴᐦᑊ ᐊᐢᑭᕽ, ᓵᓬ ᑭ ᐃᑌᐤ ᐅᐟ ᐊᑐᐢᑫᔮᑲᓇ ᑳ ᐃᐧᒉᐃᐧᑯᐟ, ᐁᑲᐧ, ᑭᔮᒼ ᑭᐁᐧᑖᐠ; ᓈᐣᑕᐤ ᐃᓯ ᓄᑖᐃᐧ ᑭᑕ ᐳᓂ ᒪᒥᑐᓀᔨᒣᐤ ᓱᓱᒥᐢᑕᑎᒪᐧ, ᐁᑯᓯ ᑭᔮᓇᐤ ᑭᑕ ᒫᒥᑐᓀᔨᒥᑯᔭᕽ. 6ᑭ ᐃᑎᐠ ᒫᑲ, ᒋᐢᐟ ᐅᑕ ᐅᑎᓈᕽ ᐊᔮᐤ ᑭᓭᒪᓂᑐ ᐅᐟ ᐊᔨᓯᔨᓂᒪ, ᐁᐊᐧᑳᐧᓇ ᓈᐯᐤ ᑭᐦᒑᔨᐃᐧᐤ; ᑲᐦᑭᔭᐤ ᑳ ᐃᑌᐧᐟ ᑫᐦᒋᓈ ᑎᐱᐸᔨᔨᐤ; ᑭᔮᒼ ᐁᑯᑌ ᐃᑐᐦᑌᑖᐠ; ᒫᐢᑯᐨ ᑭ ᑲ ᑭ ᐃᐧᐦᑕᒫᑯᓇᐤ ᐃᑌ ᑭᑕ ᐃᑐᐦᑌᔭᕽ. 7ᓵᓬ ᒫᑲ ᐅᒥᓯ ᑭ ᐃᑌᐤ ᐅᐟ ᐊᑐᐢᑫᔮᑲᓇ, ᒫᑲ, ᒋᐢᐟ, ᑭᐢᐱᐣ ᑭᐟ ᐃᑐᐦᑖᓇᐤ ᑫᑲᐧᐩ ᑫ ᐯᑕᒪᐋᐧᔭᕽ ᐁᐊᐧᑳᐧᓇ ᓈᐯᐤ? ᒋᑫᒫ ᐸᐦᑫᐧᓯᑲᐣ ᒣᐦᒋᐸᔨᐤ ᑭᐟ ᐊᓯᐊᐧᒋᑲᓂᓈᕽ, ᓇᒪᑕᑲᐧᐣ ᒫᑲ ᒣᑭᐃᐧᐣ ᑭᑕ ᐯᑕᒪᐋᐧᔭᕽ ᐊᓇ ᑭᓭᒪᓂᑐ ᐅᐟ ᐊᔨᓯᔨᓂᒪ; ᑫᑲᐧᐩ ᐁᔮᔭᕽ? 8ᐊᑐᐢᑫᔮᑲᓇ ᒫᑲ ᒥᓇ ᑭ ᓇᐢᑫᐧᐊᐧᓯᒥᐠ ᓵᓬ, ᐁᑯᓯ ᑭ ᐃᑎᐠ, ᒋᐢᐟ ᓂᐟ ᐊᔮᐋᐧᐤ ᐅᑕ ᐁᐧᐦᐯᒼ ᐯᔭᐠ ᐁ ᑭ ᓀᐅᐃᐦᐟ ᓭᑭᓬ ᐋᐧᐱᐢᑭᓱᓂᔮᐤ; ᐁᐊᐧᑲᐧᓂ ᓂ ᑲ ᒥᔮᐤ ᑭᓭᒪᓂᑐ ᐅᐟ ᐊᔨᓯᔨᓂᒪ ᑭᑕ ᐃᐧᐦᑕᒫᑯᔭᕽ ᐃᑌ ᑭᑕ ᐃᑐᐦᑌᔭᕽ. 9(ᑲᔮᐢ ᒫᓇ ᐃᐢᕒᐁᐃᓬᐃᕽ, ᐃᐢᐱ ᐊᔨᓯᔨᓂᐤ ᓀᑕᐃᐧ ᑲᑫᐧᒋᒪᒋ ᑭᓭᒪᓂᑐᐊᐧ, ᐅᒥᓯ ᑭ ᐃᑌᐧᐤ, ᓇᑕᐃᐧ ᐋᐧᐸᒫᑕᐠ ᐅ ᐊᐧᐸᐦᒋᑫᐤ; ᒋᑫᒫ ᐊᓇ ᐅᑭᐢᑭᐁᐧᐦᐃᑫᐤ ᐁᑲᐧ ᑳ ᐃᑎᐦᐟ ᑲᔮᐢ ᐃᐧᔭ ᐅᐋᐧᐸᐦᒋᑫᐤ ᑭ ᐃᑖᐤ.) 10ᐁᑲᐧ ᓵᓬ ᑭ ᐃᑌᐤ ᐅᐟ ᐊᑐᐢᑫᔮᑲᓇ, ᑲᐧᔭᐢᐠ ᑭᐟ ᐃᑖᐧᐣ; ᑭᔮᒼ, ᐃᑐᐦᑌᑖᐠ. ᐁᑯᓯ ᑭ ᐃᑐᐦᑌᐊᐧᐠ ᐅᑌᓈᕽ ᐃᑕ ᑭᓭᒪᓂᑐ ᐅᐟ ᐊᔨᓯᔨᓂᒪ ᐁ ᐊᔮᔨᐟ.
11ᐁ ᐊᑎ ᐋᒪᒋᐁᐧᒋᐠ ᒫᑲ ᐅᑌᓈᕽ ᐃᓯ, ᑭ ᒣᑲᐧᐢᑲᐁᐧᐊᐧᐠ ᐅᐢᑭᓂᑭᐢᑫᐧᐊᐧ ᐁ ᐯ ᐊᐧᔭᐃᐧᔨᐟ ᑭᑕ ᑳᐧᐱᑫᔨᐟ, ᐁᑯᓯ ᑭ ᐃᑌᐊᐧᐠ, ᐅᑕ ᒋ ᐊᔮᐤ ᐅᐋᐧᐸᒋᑫᐤ? 12ᑭ ᓇᐢᑫᐧᐊᐧᓯᒥᑲᐧᐠ ᒫᑲ, ᐁ ᑭ ᐃᑎᑯᒋᐠ, ᐁᑯᑕ ᐊᔮᐤ; ᒋᐢᐟ, ᑭᐟ ᐋᓯᐢᑳᑯᐋᐧᐤ: ᑲᑫᐧᔮᐅᐠ ᒫᑲ, ᒋᑫᒫ ᐊᓄᐦᐨ ᑳ ᑕᑯᓯᕽ ᐅᑌᓈᕽ; ᐃᐧᔭ ᐁ ᐃᐧᑯᐦᑫᒋᐠ ᐊᔨᓯᔨᓂᐊᐧᐠ ᐊᓄᐦᐨ ᑳ ᑭᓯᑳᐠ ᐃᐢᐹᔭᓄᕽ. 13ᑖᐯᐧ ᐱᑯ ᐊᑎ ᐱᐦᑐᑫᔦᑯ ᐅᑌᓈᕽ ᓭᒫᐠ ᑭ ᑲ ᐊᑎ ᒥᐢᑲᐋᐧᐋᐧᐤ ᒪᐧᔦᐢ ᓇᑕᐃᐧ ᒥᒋᓱᐟ ᐃᐢᐹᔭᓄᕽ; ᒋᑫᒫ ᓇᒪᐃᐧᔭ ᑭᑕ ᒥᒋᓱᐊᐧᐠ ᐊᔨᓯᔨᓂᐊᐧᐠ ᒫᐧᔦᐢ ᑕᑯᓯᓂᔨᐟ; ᐊᔨᐢ ᐃᐧᔭ ᒥᔭᐧᑭᐦᑕᒼ ᐸᑭᑎᓈᓱᐃᐧᐣ; ᒣᐧᐢᑕᐢ ᒫᑲ ᒥᒋᓱᐊᐧᐠ ᐊᓂᑭ ᑳ ᐃᐧᑯᒥᐦᒋᐠ. ᓂᔮᐠ ᒫᑲ ᐁᑲᐧ, ᒋᑫᒫ ᓈᐣᑕᐤ ᐅᒪ ᐁ ᐃᐦᑭᕽ ᑭ ᑲ ᒥᐢᑲᐋᐧᐋᐧᐤ. 14ᑭ ᐊᑎ ᐃᑐᐦᑌᐊᐧᐠ ᒫᑲ ᐅᑌᓈᕽ: ᐃᐢᐱ ᒫᑲ ᑳᐦ ᐱᐦᑐᑫᐠ ᐅᑌᓈᕽ, ᐳᑎ ᓵᒼᔪᐃᓬᐊ ᑭ ᒣᑳᐧᐢᑳᑲᐧᐠ, ᐁ ᐊᑎ ᐃᑐᐦᑌᔨᐟ ᐊᓂᑕ ᐃᐢᐹᔭᓄᕽ.
15ᑳ ᑎᐯᔨᐦᒋᑫᔨᐟ ᒫᑲ ᑭ ᐃᐧᐦᑕᒫᐠ ᓵᒼᔪᐃᓬ ᐅᐦᑕᐊᑳᕽ ᐯᔭᐠ ᑭᓯᑳᐤ ᒪᐧᔦᐢ ᑕᑯᓯᓂᔨᐟ ᓵᓬᐊ, ᐁ ᐃᑎᑯᐟ, 16ᐋᐧᐸᑭ, ᓈᐣᑕᐤ ᐅᒪ ᐃᑭᐦᑫ, ᑭ ᑲ ᐃᓯᑎᓴᐦᐊᒫᑎᐣ ᓈᐯᐤ ᐯᐣᒋᒪᐣ ᐊᐢᑭᕽ ᐅᐦᒋ, ᐁᑯᓯ ᑭ ᑲ ᐅᔭᑭᒫᐤ ᑭᑕ ᑎᐯᔨᒫᐟ ᓂᐟ ᐊᔨᓯᔨᓂᒪ ᐃᐢᕒᐁᐃᓬᐊ, ᑭᑕ ᐱᒫᒋᐦᐋᐟ ᓂᐟ ᐊᔨᓯᔨᓂᒪ ᐅ ᒋᐦᒋᔨᕽ ᐅᐦᒋ ᐱᓬᐃᐢᑎᓇ: ᒋᑫᒫ ᓂ ᑭ ᑲᓇᐋᐧᐸᒫᐊᐧᐠ ᓂᐟ ᐊᔨᓯᔨᓂᒪᐠ, ᐃᐧᔭ ᐁ ᐅᑎᐦᑎᑯᐊᐧᐠ ᐅ ᒪᐃᐧᒧᐦᑫᐃᐧᓂᐋᐧᐤ. 17ᐃᐢᐱ ᒫᑲ ᓵᒼᔪᐃᓬ ᐃᐧᔮᐸᒫᐟ ᓵᓬᐊ, ᑳ ᑎᐯᔨᐦᒋᑫᔨᐟ ᑭ ᐃᑎᐠ, ᐋᐧᐸᒼ ᐊᓇ ᓈᐯᐤ ᑳ ᑭ ᒥᐢᑯᑕᒫᑖᐣ! ᐁᐊᐧᑳᐧᓇ ᑫ ᑎᐯᔨᒫᐟ ᓂᐟ ᐊᔨᓯᔨᓂᒪ. 18ᐁᑲᐧ ᓵᓬ ᑭᓯᐋᐧᐠ ᑭ ᐊᑎ ᓈᑌᐤ ᓵᒼᔪᐃᓬᐊ ᑭᐦᒋ ᐃᐢᑳᐧᑌᒥᕽ, ᐁᑯᓯ ᑭ ᐃᑌᐤ, ᐃᐧᐦᑕᒪᐃᐧᐣ ᑭ ᐸᑯᓭᔨᒥᑎᐣ, ᑖᓂᑕ ᐅᐋᐧᐸᒋᑫᐤ ᐅ ᐋᐧᐢᑳᐦᐃᑲᐣ ᐁᔮᔨᐠ. 19ᓵᒼᔪᐃᓬ ᒫᑲ ᑭ ᓇᐢᑫᐧᐊᐧᓯᒣᐤ ᓵᓬᐊ, ᐁᑯᓯ ᑭ ᐃᑌᐤ, ᓂᔭ ᐁᐊᐧᑯ ᐅᐋᐧᐸᒋᑫᐤ: ᓂᔮᐠ ᑭᔭᐋᐧᐤ ᓂᑳᐣ ᐃᑐᐦᑌᐠ ᐊᓂᑕ ᐃᐢᐹᔭᓄᕽ; ᒋᑫᒫ ᑭ ᑲ ᐃᐧᒋᒥᒋᓱᒥᓈᐋᐧᐤ ᐊᓄᐦᐨ ᑳ ᑭᓯᑳᐠ; ᐋᐧᐸᑭ ᒫᑲ ᑭ ᑲ ᐸᑭᑎᓂᑎᐣ, ᐁᑯᓯ ᑭ ᑲ ᐃᐧᐦᑕᒫᑎᐣ ᑲᐦᑭᔭᐤ ᑭ ᑌᐦᐃᕽ ᑳ ᐊᔮᐠ. 20ᒫᑲ ᐃᐧᔭ ᑭᑌᒪᐠ ᑳ ᑭ ᐊᐧᓂᐃᐦᒋᐠ ᓂᐢᑐ ᑭᓯᑳᐤ ᐊᐊᐧᓯᐢᐱ, ᐁᑳᐃᐧᔭ ᑭ ᑲ ᒥᑯᐢᑳᑌᔨᑕᒥᐃᑲᐧᐠ; ᒋᑫᒫ ᒥᐢᑲᐋᐧᐊᐧᐠ. ᐊᐁᐧᓇ ᒫᑲ ᑫ ᐊᔮᐟ ᑲᐦᑭᔭᐤ ᑳ ᒧᐢᑕᐁᐧᔨᑖᑲᕽ ᐃᐢᕒᐁᐃᓬᐃᕽ? ᓇᒪ ᒋ ᑭᔭ ᒥᓇ ᑲᐦᑭᔭᐤ ᑯᑖᐃᐧ ᐅ ᐋᐧᐢᑳᐦᐃᑲᓂᕽ ᑳ ᐊᔮᒋᐠ? 21ᓵᓬ ᒫᑲ ᑭ ᓇᐢᑫᐧᐊᐧᓯᒣᐤ ᐁ ᑭ ᐃᑖᐟ, ᓇᒪ ᒋ ᓂᔭ ᓂ ᐯᐣᒋᒪᐃᑎᐃᐧᐣ, ᐃᑕ ᑯᐦᒋᔮᐣ ᒫᐊᐧᐨ ᐁ ᐊᐱᐢᑌᔨᑖᑯᓯᒋᐠ, ᐁ ᐃᑕᐦᑐᑌᐃᐧᓯᐟ ᐃᐢᕒᐁᐃᓬ? ᐁᑯᓯ ᓂ ᐋᐧᑯᒪᑲᓇᐠ ᒫᐊᐧᐨ ᓄᐦᑕᐤ ᐁ ᐃᑕᑭᐦᒋᑳᓱᒋᐠ ᐁ ᐃᑕᐦᑐ ᐋᐧᑯᑐᒋᐠ ᐯᐣᒋᒪᐣ? ᑖᓀᐦᑭ ᒫᑲ ᐅᒪ ᑳ ᐃᓯ ᐊᔭᒥᐃᔭᐣ?
22ᓵᒼᔪᐃᓬ ᒫᑲ ᑭ ᐅᑎᓀᐤ ᓵᓬᐊ ᒥᓇ ᐅᐟ ᐊᑐᐢᑫᔮᑲᓂᔨᐊᐧ, ᒥᓇ ᑭ ᐱᐦᑐᑲᐦᐁᐤ ᓇᑐᐦᑐᐃᐧᑲᒥᑯᕽ, ᐁᑯᓯ ᑭ ᒥᔦᐤ ᑭᑕ ᐊᐱᔨᐟ ᐁ ᒫᐊᐧᒋ ᑭᐢᑕᑭᑌᑭ ᐊᐱᐃᐧᓇ ᐃᑕ ᐁ ᐊᐱᒋᐠ ᐊᓂᑭ ᑳ ᑭ ᓇᑐᒥᐦᒋᐠ, ᓈᐣᑕᐤ ᓂᐢᑐᒥᑕᓇᐤ ᐁ ᐃᐦᑕᓯᒋᐠ. 23ᓵᒼᔪᐃᓬ ᒫᑲ ᑭ ᐃᑌᐤ ᐅᐱᒥᓇᐊᐧᓱᐊᐧ, ᐯᑖ ᐊᓂᒪ ᑳ ᑭ ᒥᔨᑖᐣ, ᑳ ᑭ ᐃᑎᑖᐣ, ᓇᐦᐊᐢᑖ. 24ᐅᐱᒥᓇᐊᐧᓱ ᒫᑲ ᑭ ᐅᑎᓇᒼ ᐊᓂᒪ ᐅᓴᑭᐣ, ᒥᓇ ᐊᓂᒪ ᐁᑯᑕ ᐁ ᐊᔮᔨᐠ, ᐁᑯᓯ ᑭ ᐅᔭᐢᑐᐁᐧᐤ ᓵᓬᐊ. ᓵᒼᔪᐃᓬ ᒫᑲ ᑭ ᐃᑌᐧᐤ, ᒋᐢᐟ ᐊᓂᒪ ᑳ ᑭ ᐊᐢᑖᐧᑲᓂᑫᕽ! ᐅᔭᐢᑕᒫᓱ ᒥᓇ ᒥᒋᓱ; ᒋᑫᒫ ᐅᑎᐦᒋᐸᔨᐤ ᐃᐢᑯ ᑳ ᑭ ᑲᓇᐁᐧᔨᑕᒫᑲᐃᐧᔭᐣ ᐊᐢᐱᐣ ᑳ ᑭ ᐃᑌᐧᔮᐣ, ᓂ ᑭ ᐃᐧᐦᑯᒫᐊᐧᐠ ᐊᔨᓯᔨᓂᐊᐧᐠ. ᐁᑯᓯ ᓵᓬ ᑭᐦ ᐃᐧᒋᒥᒋᓱᒣᐤ ᓵᒼᔪᐃᓬᐊ ᐁᐊᐧᑯ ᐁ ᑭᓯᑳᐠ.
25ᐃᐢᐱ ᒫᑲ ᑳᐦ ᐯ ᑭᐁᐧᒋᐠ ᐃᐢᐹᔭᓄᕽ ᐅᐦᒋ ᐁ ᐱᐦᑐᑫᒋᐠ ᐅᑌᓈᕽ, ᓵᒼᔪᐃᓬ ᑭ ᐊᔭᔭᒥᐁᐤ ᓵᓬᐊ ᐁᑯᑕ ᑕᑯᐦᒋ ᐋᐧᐢᑳᐦᐃᑲᓂᕽ. 26ᐃᐧᐸᐨ ᒫᑲ ᑭ ᐊᐧᓂᐢᑳᐊᐧᐠ: ᑭ ᐊᔨᐦᑭᐣ ᒫᑲ ᐱᒉᔭᐠ ᐁ ᐯᑖᐸᕽ, ᓵᒼᔪᐃᓬ ᑭ ᑌᐹᐧᑌᐤ ᓵᓬᐊ ᑕᑯᐦᒋ ᐋᐧᐢᑳᐧᐃᑲᓂᕽ, ᐁ ᐃᑌᐧᐟ, ᐊᐧᓂᐢᑳ, ᑭᑕ ᓯᐯᐧᑎᓴᐅᑖᐣ. ᐁᑯᓯ ᓵᓬ ᑭ ᐊᐧᓂᐢᑳᐤ, ᑭ ᐊᑎ ᓂᓱ ᐊᐧᔭᐃᐧᐊᐧᐠ ᒫᑲ, ᐃᐧᔭ ᒥᓇ ᓵᒼᔪᐃᓬᐊ, ᒥᑐᓂ ᐊᐧᔭᐃᐧᑎᒥᕽ. 27ᐁ ᐊᑎ ᑭᓯᐱᐢᑲᑭᐠ ᒫᑲ ᐅᑌᓇᐤ, ᓵᒼᔪᐃᓬ ᑭ ᐃᑌᐤ ᓵᓬᐊ, ᐃᐧᐦᑕᒪᐤ ᐊᑐᐢᑫᔮᑲᐣ ᑭᑕ ᐊᑎ ᐃᐢᐱᐦᒋ ᓂᑳᓄᑌᐟ (ᐁᑯᓯ ᑖᐯᐧ ᑭ ᐊᑎ ᓂᑲᓄᑌᔨᐊᐧ) ᒫᑲ ᐱᑕᒫ ᑭᔭ ᑭᔮᒥᑳᐸᐃᐧ, ᑭᑕ ᐯᐦᑕᒧᐃᑖᐣ ᐅᐟ ᐃᑌᐧᐃᐧᐣ ᑭᓭᒪᓂᑐ.
Currently Selected:
ᓂᐢᑕᒼ ᓵᒼᔪᐃᓬ 9: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
