ᓂᐢᑕᒼ ᓵᒼᔪᐃᓬ 17
17
1ᐱᓬᐃᐢᑎᓇᐠ ᒫᑲ ᑭ ᒫᒪᐃᐧ ᒫᐊᐧᒋᐦᐁᐊᐧᐠ ᐅᓄᑎᓂᑫᒥᐋᐧᐊᐧ ᑭᑕ ᓄᑎᓂᑫᒋᐠ, ᐁᑯᓯ ᑭ ᒫᐊᐧᒋᐦᐃᑐᐊᐧᐠ ᐊᓂᑕ ᓵᑳ, ᑳ ᐊᔮᒋᐠ ᒍᑕ, ᑭ ᑲᐯᓯᐊᐧᐠ ᒫᑲ ᑕᐢᑕᐋᐧᔨᕽ ᓵᑳ ᒥᓇ ᐋᓯᑲ, ᐊᓂᑕ ᐁᐦᐱᐢᑖᒥᒼ. 2ᓵᓬ ᒫᑲ ᒥᓇ ᐃᐢᕒᐁᐃᓬ ᐊᔨᓯᔨᓂᐊᐧᐠ ᑭ ᒫᐊᐧᒋᐦᐃᑐᐊᐧᐠ, ᒥᓇ ᑭ ᑲᐯᓯᐊᐧᐠ ᐃᓬᐊ ᐋᐧᔮᒪᑎᓈᕽ, ᐁᑯᓯ ᑭ ᐅᔨᑳᐸᐃᐧᐢᑕᐁᐧᐊᐧᐠ ᐱᓬᐃᐢᑎᓇ ᑭᑕ ᓄᑎᓂᑭᒋᐠ. 3ᐱᓬᐃᐢᑎᓇᐠ ᒫᑲ ᑭ ᓂᐸᐃᐧᐊᐧᐠ ᐊᐧᒋᕽ ᓇᐸᑌ, ᐁᑯᓯ ᐃᐢᕒᐁᐃᓬ ᑭ ᓂᐸᐃᐧᐊᐧᐠ ᐊᐧᒋᕽ ᑫᐧᐢᑭ ᐃᑌᐦᑫ; ᐁᑯᓯ ᐋᐧᔮᒪᑎᓈᐤ ᑕᐢᑕᐋᐧᔨᕽ ᑭ ᐊᔮᐤ.
4ᑭ ᐯ ᐅᐦᒋ ᐊᐧᔭᐃᐧᐤ ᒫᑲ ᐅᓄᑎᓂᑫᐢᑕᒫᑫᐤ ᐅ ᑲᐯᓯᐃᐧᓂᐋᐧᕽ ᐱᓬᐃᐢᑎᓇᐠ, ᑲᓬᐋᔭᐟ ᐁ ᐃᓯᔨᐦᑳᓱᐟ, ᑳᐦᐟ ᐅᐦᒋ, ᓂᑯᑖᐧᓯᐠ ᑯᐱᑕ ᒥᓇ ᐯᔭᐠ ᑎᐱᒋᐦᒑᒋᑲᐣ ᐁ ᐃᐢᑯᑳᐸᐃᐧᐟ. 5ᑭ ᑭᑭᐢᑳᒼ ᒫᑲ ᐅᐢᑎᑳᐧᓂᕽ ᐅᓵᐋᐧᐱᐢᑲᐢᑐᑎᐣ, ᐁᑯᓯ ᑭ ᐅᐢᑯᑖᑳᐤ ᐁ ᐊᐱᑳᑌᐠ ᐱᐋᐧᐱᐢᐠ; ᐊᓂᒪ ᒫᑲ ᐅᐢᑯᑖᑲᐩ ᓂᔮᓇᓈᐧᐤ ᑭᐦᒋᒥᑖᐦᑐᒥᑕᓇᐤ ᑕᐦᑐ ᐅᓵᐋᐧᐱᐢᐠ ᓭᑭᓬᐊ ᑭ ᐃᐢᐱᑎᓂᑲᐧᓂᔨᐤ. 6ᑭ ᑭᑭᐢᑲᒼ ᒫᑲ ᐅᓵᐋᐧᐱᐢᐠ ᐅᐢᑳᑎᕽ, ᒥᓇ ᐅᓵᐋᐧᐱᐢᑯ ᐊᓱᐃᐧᐣ ᑕᐢᑕᐃᐧᑎᐦᑎᒪᐣ. 7ᐁᑯᓯ ᐁ ᑖᐹᐢᑯᑎᓂᔨᐠ ᐅ ᑕᐦᑲᒋᑲᐣ ᑖᐱᐢᑯᐨ ᐅᓯᑫᑭᓄᑫᐤ ᐅ ᐱᒥᑕᑯᒋᑲᐣ; ᐊᓂᒪ ᒫᑲ ᐅ ᑕᐦᑲᒋᑲᐣ ᐁ ᐱᐋᐧᐱᐢᑯᐊᐧᓂᔨᐠ ᓂᑯᑖᐧᓵᐧᐤ ᒥᑖᐦᑐᒥᑕᓇᐤ ᑕᐦᑐ ᐱᐋᐧᐱᐢᐠ ᓭᑭᓬᐊ ᑭ ᐃᐢᐱᑎᓂᑲᐧᓂᔨᐤ; ᐊᓂᐦᐃ ᒫᑲ ᑳ ᐱᒥᐃᐧᑖᔨᐟ ᐅ ᐸᐸᐦᐊᐦᑳᐧᒼ ᑭ ᓂᑳᓄᑖᐠ. 8ᐁᑯᓯ ᑭ ᓂᐸᐃᐧᐤ ᒥᓇ ᑭ ᑌᐹᐧᑌᐤ ᐊᓂᐦᐃ ᐃᐢᕒᐁᐃᓬ ᐅᓄᑎᓂᑫᐊᐧ, ᒥᓇ ᑭ ᐃᑌᐤ, ᑖᓀᐦᑭ ᑳ ᐯ ᓈᑕᐃᐧ ᐅᔨᑳᐸᐃᐧᔦᐠ ᑭᑕ ᓄᑎᓂᑫᔦᐠ? ᓇᒪ ᒋ ᓂᔭ ᐱᓬᐃᐢᑎᐣ, ᐁᑯᓯ ᑭᔭᐋᐧᐤ ᐅᐟ ᐊᑐᐢᑫᔮᑲᓇ ᓵᓬ? ᓇᐊᐧᓱᓂᕽ ᑭᔭᐋᐧᐤ ᓈᐯᐤ, ᐁᑯᓯ ᑭᔮᒼ ᓂ ᑲ ᐯ ᓈᑎᐠ. 9ᑭᐢᐱᐣ ᑲᐢᑭᑖᒋ ᑭᑕ ᓄᑎᓂᐟ ᒥᓇ ᑭᑕ ᓂᐸᐃᐟ ᐁᑲᐧ ᑭ ᑲ ᐊᑐᐢᑫᐢᑖᑎᓈᐣ; ᒫᑲ ᑭᐢᐱᐣ ᓂᔭ ᓵᑯᒋᐊᑭ, ᒥᓇ ᓂᐸᐊᑭ, ᐁᑲᐧ ᑭᔭᐋᐧᐤ ᑫ ᐊᑐᐢᑲᐃᐧᔮᕽ, ᒥᓇ ᑭ ᑲ ᑎᐯᔨᒥᑎᓈᐣ. 10ᐊᓇ ᒫᑲ ᐱᓬᐃᐢᑎᐣ ᑭ ᐃᑌᐧᐤ, ᓂ ᒫᔦᔨᒫᐊᐧᐠ ᐃᐢᕒᐁᐃᓬ ᐅᓄᑎᓂᑫᐊᐧᐠ ᐊᓄᐦᐨ ᑳ ᑭᓯᑳᐠ; ᒥᔨᐠ ᓈᐯᐤ ᑭᑕ ᓄᑎᓂᑐᔭᕽ. 11ᐃᐢᐱ ᒫᑲ ᓵᓬ ᒥᓇ ᑲᐦᑭᔭᐤ ᐃᐢᕒᐁᐃᓬ ᐱᔦᐦᑕᐦᑭᐠ ᐅᐦᐃ ᐅᐟ ᐃᑌᐧᐃᐧᓂᔨᐊᐧ ᐊᓂᐦᐃ ᐱᓬᐃᐢᑎᓇ, ᑭ ᓭᑭᓯᐊᐧᐠ ᒥᓇ ᒥᐢᑕᐦᐃ ᑭ ᑯᐢᑌᐊᐧᐠ.
12ᑌᐱᐟ ᒫᑲ ᐁᐊᐧᑳᐧᓇ ᐅᑯᓯᓴ ᐊᓇ ᐁᐸᕒᐊᑕᐃᐟ ᐯᐟᓬᐃᐊᒼ ᒍᑕ ᐅᐦᒋ ᒉᓯ ᑳ ᐃᓯᔨᐦᑳᓱᐟ ᐊᔨᓈᓀᐤ ᒫᑲ ᑭ ᐃᑕᓯᔨᐊᐧ ᐅᑯᓯᓴ; ᐁᑯᓯ ᐁᐊᐧᑯ ᓈᐯᐤ ᑭᓭᔨᓂᐤ ᑭ ᐃᑕᑭᒫᐤ ᒣᑳᐧᐨ ᓵᓬ ᑳ ᐅ ᑭᓯᑳᒥᐟ, ᐁ ᑫᐦᑌᔮᑎᓯᐟ ᐊᔨᓯᔨᓂᓈᕽ. 13ᐊᓂᐦᐃ ᒫᑲ ᓂᐢᑐ ᐁ ᐅᐢᑌᓯᒫᐃᐧᔨᐟ ᐅᑯᓯᓴ ᒉᓯ ᑭ ᐱᒥᑎᓴᐁᐧᐊᐧᐠ ᓵᓬᐊ ᓄᑎᓂᑐᐃᐧᓂᕽ; ᐁᑯᓯ ᐅ ᐃᐧᔪᐃᐧᓂᔨᐊᐧ ᐊᓂᐦᐃ ᐁ ᓂᐢᑎᔨᐟ ᐅᑯᓯᓴ ᑳ ᑭ ᐃᑐᐦᑌᔨᐟ ᓄᑎᓂᑐᐃᐧᓂᕽ ᐁᐊᐧᑯᓂ ᐃᓬᐃᔮᑊ ᐅ ᓂᐢᑕᒧᓵᓇ, ᐁᑯᓯ ᐁ ᐊᐢᑯᐃᐧᐢᑳᑯᔨᐟ ᐊᐱᓇᑖᑊ, ᐁᑯᓯ ᐊᓂᐦᐃ ᓂᐢᑐ ᐁ ᐃᑕᑭᒥᐦᐟ ᐁᐊᐧᑯ ᓵᒪ. 14ᑌᐱᐟ ᒫᑲ ᐁᐊᐧᑯ ᐅᓯᒥᒫᐤ; ᐁᑯᓯ ᓂᐢᑐ ᐁ ᐅᐢᑌᓯᒫᐃᐧᒋᐠ ᑭ ᐱᒥᑎᓴᐁᐧᐊᐧᐠ ᓵᓬᐊ. 15ᑌᐱᐟ ᒫᑲ ᑳᑫᐧᑯᐢᐠ ᑭ ᐃᑐᐦᑌᐤ ᓵᓬᐊ ᐅᐦᒋ ᑭᑕ ᐊᓴᒫᐟ ᐅᑖᐃᐧᔭ ᐅ ᒫᔭᑎᐦᑯᒥᔨᐊᐧ ᐯᐟᓬᐃᐊᒥᕽ. 16ᐁᑯᓯ ᐊᓇ ᐱᓬᐃᐢᑎᐣ ᑭᓯᐋᐧᐠ ᑭ ᐯ ᐃᑐᐦᑌᐤ ᐁ ᑫᑭᓭᐹᔮᐠ ᒥᓇ ᐁ ᐅᑖᑯᓯᐠ, ᑭ ᓄᑯᐦᐃᓱ ᒫᑲ ᓀᒥᑕᓇᐤ ᑭᓯᑳᐊᐧ.
17ᒉᓯ ᒫᑲ ᑭ ᐃᑌᐤ ᑌᐱᑕ ᐅᑯᓯᓴ, ᐅᑎᓇ ᐁᑲᐧ ᑭᒋᐋᐧᒪᐠ ᐅᐦᒋ ᐯᔭᐠ ᒪᑲᕽ ᐊᐊᐧ ᐁ ᑳᐢᐱᓱᐟ ᐸᐦᑫᐧᓯᑲᓂᑳᐣ, ᒥᓇ ᐅᑭ ᒥᑖᑕᐦᐟ ᐊᔭᑯᓈᐋᐧᐠ, ᐁᑯᓯ ᑭᔨᐸ ᐃᑐᐦᑕᑕᒪᐃᐧᐠ ᑭᒋᐋᐧᒪᐠ ᑲᐯᓯᐃᐧᓂᕽ; 18ᐅᑭ ᒫᑲ ᒥᑖᑕᐦᐟ ᒋᓴᐠ ᐃᑐᐦᑕᑕᒪᐤ ᓯᒫᑲᓂᓯᐃᐧᑭᒫᐤ ᑳ ᑎᐯᔨᒫᐟ ᐁ ᑭᐦᒋᒥᑖᐦᑐᒥᑕᓇᐁᐧᒋᐠ, ᑭ ᑲ ᐋᐧᐸᒫᐊᐧᐠ ᒫᑲ ᑭᒋᐋᐧᒪᐠ ᐁᓯᐊᔮᒋᐠ, ᒥᓇ ᑭ ᑲ ᐅᑎᓇᒫᐧᐣ ᐅᐟ ᐊᓱᑕᒫᑫᐃᐧᓂᐋᐧᐤ. 19ᓵᓬ ᒫᑲ ᒥᓇ ᐃᐧᔭᐋᐧᐤ, ᒥᓇ ᑲᐦᑭᔭᐤ ᐃᐢᕒᐁᐃᓬ ᐊᔨᓯᔨᓂᐊᐧᐠ ᐃᓬᐊ ᐋᐧᔭᒪᑎᓈᕽ ᑭ ᐊᔮᐊᐧᐠ ᑭᑕ ᓄᑎᓈᒋᐠ ᐱᓬᐃᐢᑎᓇ.
20ᐁᑯᓯ ᑌᐱᐟ ᑭ ᐊᐧᓂᐢᑳᐤ ᐃᐧᐸᐨ ᐁ ᑫᑭᓭᐹᔮᐠ, ᑭ ᓇᑲᑌᐤ ᒫᑲ ᒫᔭᑎᐦᑲᐧ ᐁ ᐃᐧᒉᐋᐧᔨᐟ ᑳ ᑲᓇᐁᐧᔨᒫᐟ, ᐁᑯᓯ ᑭ ᐅᑎᓇᒼ ᒥᓇ ᑭ ᓯᐯᐧᑌᐤ, ᒣᐧᐦᒋ ᒉᓯᐊᐧ ᑳ ᑭ ᐃᑕᓱᐋᐧᑎᑯᐟ; ᑭ ᑕᑯᓯᐣ ᒫᑲ ᐃᑕ ᑎᑎᐱᑖᐹᓈᐢᑲᐧ ᐁ ᐊᐱᔨᐟ ᒣᐧᐦᒋ ᑳ ᒫᒪᐁᐧᔭᑎᒋᐠ ᐁ ᐃᑐᐦᑌᒋᐠ ᐃᑕ ᑭᑕ ᓄᑎᓂᑐᕽ ᐁ ᓵᑯᐁᐧᒋᐠ ᒫᑲ ᑭᑕ ᓄᑎᓂᑫᒋᐠ. 21ᐁᑯᓯ ᐃᐢᕒᐁᐃᓬ ᒥᓇ ᐱᓬᐃᐢᑎᓇᐠ ᑭ ᐅᔨᑳᐸᐃᐧᐊᐧᐠ ᑭᑕ ᓄᑎᓂᑫᒋᐠ, ᐅᓄᑎᓂᑫᐊᐧᐠ ᐋᔨᑕᐤ ᐁ ᐅᔨᑳᐸᐃᐧᐢᑖᑐᒋᐠ. 22ᑌᐱᐟ ᒫᑲ ᑭ ᓇᑲᑕᒪᐁᐧᐤ ᐅ ᐱᒥᐃᐧᑖᓱᐃᐧᐣ ᐊᓂᐦᐃ ᑳ ᑲᓇᐁᐧᔨᑕᒥᔨᐟ ᐱᒥᐃᐧᑖᓱᐃᐧᐣ, ᐁᑯᓯ ᑭ ᐃᐢᐸᑖᐤ ᐃᑕ ᐁ ᐊᔮᔨᐟ ᐅᓄᑎᓂᑫᐊᐧ ᐁᑯᓯ ᑭ ᐯ ᓇᑕᐃᐧ ᐊᑕᒥᐢᑲᐁᐧᐤ ᐅᒋᐋᐧᒪ. 23ᒣᑳᐧᐨ ᒫᑲ ᐁ ᐃᐧᒋᐱᑭᐢᑫᐧᒫᐟ, ᐳᑎ ᑭ ᐯ ᓄᑯᓯᐤ ᐊᓇ ᐅᓄᑎᓂᑫᐢᑕᒫᑫᐤ ᐊᓇ ᐱᓬᐃᐢᑎᐣ ᑳᐦᐟ ᐅᐦᒋ, ᑲᓬᐋᔭᐟ ᐁ ᐃᓯᔨᐦᑳᓱᐟ, ᐃᑕ ᐁ ᐅᔨᑳᐸᐃᐧᔨᐟ ᐱᓬᐃᐢᑎᓇ ᐅᐦᒋ, ᐁᑯᓯ ᑭ ᐱᑭᐢᑫᐧᐤ ᑫᔮᐱᐨ ᐁᐊᐧᑯᓂ ᐃᑌᐧᐃᐧᓇ; ᑌᐱᐟ ᒫᑲ ᑭ ᐯᑕᒼ. 24ᐁᑯᓯ ᑲᐦᑭᔭᐤ ᐃᐢᕒᐁᐃᓬ ᐊᔨᓯᔨᓂᐊᐧᐠ, ᐃᐢᐱ ᐃᐧᔮᐸᒫᒋᐠ ᐊᓂᐦᐃ ᓈᐯᐊᐧ, ᑭ ᑕᐸᓯᐁᐊᐧᐠ, ᒥᓇ ᒥᐢᑕᐦᐃ ᑭ ᓭᑭᓯᐊᐧᐠ. 25ᐊᓂᑭ ᒫᑲ ᐃᐢᕒᐁᐃᓬ ᐊᔨᓯᔨᓂᐊᐧᐠ ᑭ ᐃᑌᐧᐊᐧᐠ, ᑭ ᑭ ᐋᐧᐸᒫᐋᐧᐤ ᒋ ᐊᐊᐧ ᓈᐯᐤ ᑳ ᐯ ᐃᑐᐦᑌᐟ? ᑫᐦᒋᓈ ᑭᑕ ᒫᔦᔨᒫᐟ ᐃᐢᕒᐁᐃᓬᐊ ᐯ ᐃᑐᐦᑌᐤ; ᑭᑕ ᐃᐦᑭᐣ ᒫᑲ ᐊᓇ ᓈᐯᐤ ᑫ ᓂᐸᐦᐋᑫᐧ, ᑭᐦᒋ ᐅᑭᒫᐊᐧ ᑭᑕ ᒥᔨᐠ ᑭᐦᒋ ᐁᐧᔪᑎᓯᐃᐧᓇ, ᒥᓇ ᐅᑖᓂᓴ ᑭᑕ ᒥᔨᐠ, ᒥᓇ ᐅᑖᐃᐧᔭ ᐅ ᐋᐧᐢᑳᐦᐃᑲᓂᔨᐤ ᑭᑕ ᑎᐯᔨᒥᓱᐃᐧᑖᐋᐧᐣ ᐃᐢᕒᐁᐃᓬᐃᕽ. 26ᑌᐱᐟ ᒫᑲ ᑭ ᑭᑐᑌᐤ ᓈᐯᐊᐧ ᑳ ᐃᐧᒋᑳᐸᐃᐧᐢᑖᑯᐟ, ᐁ ᐃᑌᐧᐟ, ᑖᓂᓯ ᑫ ᑐᑖᐦᐟ ᐊᓇ ᓈᐯᐤ ᑫ ᓂᐸᐦᐋᑫᐧ ᐊᓂᐦᐃ ᐱᓬᐃᐢᑎᓇ, ᒥᓇ ᑳ ᐅᑎᓇᒫᐧᐟ ᐅ ᒫᔦᔨᒥᑯᐃᐧᓂᔨᐤ ᐃᐢᕒᐁᐃᓬᐊ? ᒋᑫᒫ ᐊᐁᐧᓈᐊᐧ ᐁᑳ ᑳ ᓴᕒᑲᒼᓴᐃᓯᐃᐧᐟ ᐱᓬᐃᐢᑎᐣ, ᑭᑕ ᒫᔦᔨᒫᐟ ᐅᓄᑎᓂᑫᒥᔨᐊᐧ ᑳ ᐱᒫᑎᓯᔨᐟ ᑭᓭᒪᓂᑐᐊᐧ? 27ᐁᑯᓯ ᐊᔨᓯᔨᓂᐊᐧ ᑭ ᓇᐢᑫᐧᐊᐧᓯᒥᐠ ᐅᒪ ᑳ ᐃᑕᐢᑌᐠ, ᐁ ᐃᑌᐧᔨᐟ, ᐁᑯᓯ ᑫ ᐃᑐᑖᐦᐟ ᐊᓇ ᓈᐯᐤ ᑫ ᓂᐸᐦᐋᑫᐧ.
28ᐃᓬᐃᔮᑊ ᒫᑲ ᐅᐢᑌᓴ ᑭ ᐯᑕᒥᔨᐊᐧ ᐃᐢᐱ ᑳ ᐊᔭᒥᐦᐋᐟ ᐊᓂᐦᐃ ᓈᐯᐊᐧ; ᐁᑯᓯ ᐃᓬᐃᔭᑊ ᑭ ᑭᓯᒥᐠ ᑌᐱᑕ, ᑭ ᐃᑌᐧᐤ ᒫᑲ, ᑖᓀᐦᑭ ᐅᑌ ᑳ ᐯ ᐃᑐᐦᑌᔭᐣ? ᒥᓇ ᐊᐁᐧᓇ ᑳ ᓇᑲᑕᒪᐊᐧᐟ ᐊᓂᐦᐃ ᒐᑲᐋᐧᓯᐢ ᒫᔭᑎᐦᑲᐧ ᐱᑲᐧᑕᐢᑭᕽ? ᓂ ᑭᐢᑫᔨᑌᐣ ᑭ ᑭᐢᑌᔨᒥᓱᐃᐧᐣ, ᒥᓇ ᐁ ᐃᓯ ᒫᔨᑌᐦᐁᔭᐣ; ᒋᑫᒫ ᑭ ᐯ ᐃᑐᐦᑖᐣ ᑭᑕ ᐋᐧᐸᐦᑕᒪᐣ ᓄᑎᓂᑐᐃᐧᐣ. 29ᑌᐱᐟ ᒫᑲ ᑭ ᐃᑌᐧᐤ, ᑫᑲᐧᐩ ᒫᑲ ᐁᑲᐧ ᑳ ᐃᑐᑕᒫᐣ? ᓇᒪ ᒋ ᐃᑕᐢᑌᐤ?
30ᐁᑯᓯ ᑭ ᑫᐧᐢᑭᑳᐸᐃᐧᐤ ᑯᑕᑲ ᒥᓇ ᐁ ᓈᑖᐟ, ᐁᑯᓯ ᑫᔮᐱᐨ ᒥᓇ ᐁ ᐃᑖᐟ; ᐁᑯᓯ ᐊᔨᓯᔨᓂᐊᐧ ᑭ ᓇᐢᑫᐧᐊᐧᓯᒥᐠ ᒥᓇ ᑖᐱᐢᑯᐨ ᓂᐢᑕᒼ. 31ᐃᐢᐱ ᒫᑲ ᐱᔦᑕᒥᔨᐟ ᐃᑌᐧᐃᐧᓇ ᑌᐱᑕ ᑳ ᐃᑌᐧᔨᐟ, ᑭ ᐋᒋᒧᐢᑕᐁᐧᐊᐧᐠ ᓵᓬᐊ; ᐁᑯᓯ ᑭ ᐃᓯᑎᓴᐦᐅᐁᐧᐤ ᑭᑕ ᓈᑎᒥᐦᐟ.
32ᑌᐱᐟ ᒫᑲ ᑭ ᐃᑌᐤ ᓵᓬᐊ, ᐁᑳᐃᐧᔭ ᐊᐃᐧᔭᐠ ᐊᔨᓯᔨᓂᐤ ᑭᑕ ᓀᓱᐃᐧᑌᐦᐁᐤ ᐁᐊᐧᑯᓂ ᐅᐦᒋ; ᑭᐟ ᐊᑐᐢᑫᔮᑲᐣ ᑭᑕ ᓇᑕᐃᐧ ᓄᑎᓀᐤ ᐅᐦᐃ ᐱᓬᐃᐢᑎᓇ. 33ᓵᓬ ᒫᑲ ᑭ ᐃᑌᐤ ᑌᐱᑕ, ᓇᒪᐃᐧᔭ ᑭ ᑲᐢᑭᑖᐣ ᑭᑕ ᓈᑕᐟ ᐊᐊᐧ ᐱᓬᐃᐢᑎᐣ ᑭᑕ ᓄᑎᓇᐟ; ᒋᑫᒫ ᐱᒉᔭᐠ ᑯᐢᑳᑎᓯᐣ, ᐃᐧᔭ ᒫᑲ ᓇᑐᐸᔨᐃᐧᔨᓂᐃᐧᐤ ᐁ ᐅᐢᑳᑎᓯᐟ ᐅᐦᒋ. 34ᑌᐱᐟ ᒫᑲ ᑭ ᐃᑌᐤ ᓵᓬᐊ, ᑭᐟ ᐊᑐᐢᑫᔮᑲᐣ ᑭ ᑲᓇᐁᐧᔨᒥᒣᐤ ᐅᑖᐃᐧᔭ ᐅ ᒫᔭᑎᐦᑯᒥᔨᐊᐧ; ᑭ ᐯ ᐃᑐᐦᑌᐤ ᒫᑲ ᒥᐢᑕᐦᑫᓯᐤ ᒥᓇ ᒪᐢᑲᐧ, ᐁᑯᓯ ᑭ ᐅᑎᓀᐤ ᒫᔭᑎᐦᑯᓯᓴ ᒫᔭᑎᐦᑯᓈᕽ ᐅᐦᒋ, 35ᓂ ᑭ ᐱᒥᑎᓴᐋᐧᐤ ᒫᑲ, ᐁᑯᓯ ᓂ ᑭ ᐸᑲᒪᐋᐧᐤ, ᒥᓇ ᓂ ᑭ ᐸᐢᐱᐦᐃᒫᐊᐧ ᐅᑐᓂᕽ ᐅᐦᒋ; ᐃᐢᐱ ᒫᑲ ᐁ ᑳᐧᐢᑯᑐᑕᐃᐧᐟ, ᓂ ᑭ ᐅᑎᑎᓈᐤ ᐅ ᒥᐦᐃᐢᑐᐋᐧᓂᕽ, ᒥᓇ ᓂ ᑭ ᐸᑲᒪᐋᐧᐤ ᒥᓇ ᓂ ᑭ ᓂᐸᐦᐋᐤ. 36ᑭᐟ ᐊᑐᐢᑫᔮᑲᐣ ᑭ ᐸᑲᒪᐁᐧᐤ ᑖᐱᐢᑯᐨ ᐊᓂᐦᐃ ᒥᐢᑕᐦᑫᓯᐊᐧ ᒥᓇ ᐊᓂᐦᐃ ᒪᐢᑲᐧ; ᐊᐊᐧ ᒫᑲ ᐁᑳ ᑳ ᓴᕒᑲᒼᓴᐃᓯᐃᐧᐟ ᐱᓬᐃᐢᑎᐣ ᑭᑕ ᐃᓯ ᐊᔮᐤ ᑖᐱᐢᑯᐨ ᐯᔭᐠ ᐁᐊᐧᑯᓂᐦ, ᐃᐧᔭ ᐁ ᑭ ᒫᔦᔨᒫᐟ ᐅᓄᑎᓂᑫᒥᔨᐊᐧ ᑳ ᐱᒫᑎᓯᔨᐟ ᑭᓭᒪᓂᑐᐊᐧ. 37ᑌᐱᐟ ᒥᓇ ᑭ ᐃᑌᐧᐤ, ᑳ ᑎᐯᔨᐦᒋᑫᐟ ᑳ ᑭ ᐸᐢᐱᐦᐃᐟ ᐊᐧᐢᑲᓯᔨᕽ ᐅᐦᒋ ᒥᐢᑕᐦᑫᓯᐊᐧ, ᒥᓇ ᒪᐢᑲᐧ ᐊᐧᐢᑲᓯᔨᕽ ᐅᐦᒋ, ᓂ ᑲ ᐸᐢᐱᐦᐃᐠ ᐅᒋᐦᒋᔨᕽ ᐅᐦᐃ ᐱᓬᐃᐢᑎᓇ. ᓵᓬ ᒫᑲ ᑭ ᐃᑌᐤ ᑌᐱᑕ, ᓂᔮ ᒫᑲ, ᑳ ᑎᐯᔨᐦᒋᑫᐟ ᑭ ᑲ ᐃᐧ ᐃᐧᒉᐃᐧᐠ.
38ᓵᓬ ᒫᑲ ᑭ ᐳᓯᐢᑲᒧᑎᔦᐤ ᑌᐱᑕ ᐃᐧᔭ ᐅ ᑭᑭᐢᑳᒋᑲᓇ, ᒥᓇ ᐅᓵᐋᐧᐱᐢᐠ ᐊᐢᑐᑎᐣ ᑭ ᐊᐢᑖᐁᐧᐤ ᐅᐢᑎᑳᐧᓂᔨᕽ, ᒥᓇ ᑭ ᐳᐢᑕᓵᑲᐁᐤ ᐁ ᐊᐱᑳᑌᐠ ᐱᐋᐧᐱᐢᑲᐧᓵᑲᐩ. 39ᑌᐱᐟ ᒫᑲ ᑭ ᐸᑲᐧᑌᐦᐅᑐᑕᒼ ᐅᐟ ᐃᓴᐁᐧᑯᒫᐣ ᐅᒪ ᐁ ᑭ ᐳᐢᑕᓵᑫᐟ; ᒫᑲ ᑭ ᓵᑫᐧᔨᒧ ᑭᑕ ᐃᑐᐦᑌᐟ; ᒋᑫᒫ ᓇᒪᐃᐧᔭ ᐅᐦᒋ ᑯᒋᐃᐧᑖᐤ. ᑌᐱᐟ ᒫᑲ ᑭ ᐃᑌᐤ ᓵᓬᐊ, ᓇᒪᐃᐧᔭ ᐅᐦᐃ ᓂ ᑲ ᑭ ᑭᑭᐢᑫᐣ ᒋᑫᒫ ᓇᒪᐃᐧᔭ ᓄᐦ ᑯᒋᐃᐧᑖᐣ. ᐁᑯᓯ ᑌᐱᐟ ᑭ ᑫᒋᑯᐢᑲᒼ. 40ᑭ ᑕᐦᑯᓇᐣ ᒫᑲ ᐅ ᓴᐢᑲᐅᓈᑎᐠ ᐅᒋᐦᒋᕽ, ᐁᑯᓯ ᑭ ᓇᐊᐧᓱᓀᐤ ᓂᔮᓇᐣ ᐁ ᓱᐢᑳᐧᐱᐢᑭᓯᔨᐟ ᐊᓯᓂᔭ ᓯᐱᓯᓯᕽ ᐅᐦᒋ, ᐁ ᑭ ᐊᓯᐊᐧᔮᐟ ᐅᑲᓇᐃᐧᒫᔭᑎᐦᑫᐧᐃᐧ ᒪᐢᑭᒧᑎᓯᕽ ᑳ ᑭ ᐊᔮᐟ, ᓂᒫᐃᐧᓂᐊᐧᑎᐢ ᐅᑎ; ᐁ ᑕᐦᑯᓇᕽ ᒫᑲ ᐅ ᐁᐧᐸᓯᓈᑲᐣ ᐅᒋᐦᒋᕽ; ᐁᑯᓯ ᑭ ᐊᑎ ᐯᓵᐧᐸᒣᐤ ᐊᓂᐦᐃ ᐱᓬᐃᐢᑎᓇ.
41ᐊᓇ ᐱᓬᐃᐢᑎᐣ ᒫᑲ ᑭ ᐯᑖᐢᑕᒧᑌᐤ ᒥᓇ ᑭᓯᐋᐧᐠ ᑭ ᐯ ᓈᑌᐤ ᑌᐱᑕ; ᐊᓂᐦᐃ ᒫᑲ ᓈᐯᐊᐧ ᑳ ᐱᒥᐃᐧᑕᔨᐟ ᐸᐸᐦᐊᐦᑳᐧᐣ ᑭ ᓂᑳᓄᑖᐠ. 42ᐃᐢᐱ ᒫᑲ ᐊᓇ ᐱᓬᐃᐢᑎᐣ ᐁᔨᑖᐱᐟ, ᐃᐧᔮᐸᒫᐟ ᒫᑲ ᑌᐱᑕ ᑭ ᐱᐁᐧᔨᒣᐤ, ᒋᑫᒫ ᐅᐢᑭᓂᑭᓯᔨᐊᐧ ᐱᑯ, ᑭᓵᐢᑕᐤ ᐁ ᒥᐦᑯᑫᐧᔨᐟ, ᒫᑲ ᐋᑕᐃᐧᔭ ᐁ ᒥᔪᓈᑯᓯᔨᐟ. 43ᐊᓇ ᐱᓬᐃᐢᑎᐣ ᒫᑲ ᑭ ᐃᑌᐤ ᑌᐱᑕ, ᓂᐟ ᐊᑎᒧᐃᐧᐣ ᒋ ᑳ ᐯ ᓂᒫᑎᑫᐧᑲᑕᐃᐧᔭᐣ? ᐁᑯᓯ ᐊᓇ ᐱᓬᐃᐢᑎᐣ ᑭ ᒪᒋᐃᑌᐤ ᑌᐱᑕ ᐅ ᒪᓂᑐᒪ ᐁ ᐊᐢᐱᒧᐟ. 44ᐊᓇ ᒫᑲ ᐱᓬᐃᐢᑎᐣ ᑭ ᐃᑌᐤ ᑌᐱᑕ, ᐯ ᓈᓯᐣ, ᓂ ᑲ ᒥᔮᐊᐧᐠ ᒫᑲ ᑭ ᐃᐧᔮᓯᔨᐤ ᐱᔦᓯᓴᐠ ᑳ ᐸᐹᒥᔮᒋᐠ ᒥᓇ ᐱᓯᐢᑭᐊᐧᐠ ᒪᐢᑯᑌᕽ. 45ᐁᑲᐧ ᑌᐱᐟ ᑭ ᐃᑌᐤ ᐊᓂᐦᐃ ᐱᓬᐃᐢᑎᓇ, ᑭ ᐯ ᓇᓯᐣ ᐁ ᑭᑭᔭᐣ ᐃᓴᐁᐧᐢᐠ, ᒥᓇ ᑕᐦᑲᒋᑲᐣ, ᒥᓇ ᒋᑲᑳᐧᐣ; ᒫᑲ ᓂᔭ ᑭ ᐯ ᓈᑎᑎᐣ ᐅ ᐃᐧᔪᐃᐧᓂᕽ ᑳ ᑎᐯᔨᐦᒋᑫᐟ ᒥᓯᐁᐧ ᓯᔪᑳᑎᓯᐟ, ᐅ ᑭᓭᒪᓂᑐᒥᐋᐧᐊᐧ ᐃᐢᕒᐁᐃᓬ ᐅ ᓄᑎᓂᑫᒪ ᐊᓇ ᑳ ᑭ ᒫᔦᔨᒪᐟ. 46ᐊᓄᐦᐨ ᑳ ᑭᓯᑳᐠ ᑳ ᑎᐯᔨᐦᒋᑫᐟ ᑭ ᑲ ᐸᑭᑎᓂᐠ ᓂᒋᐦᒋᕽ; ᐁᑯᓯ ᑭ ᑲ ᐸᑲᐅᑎᐣ, ᒥᓇ ᑭ ᑲ ᑭᐢᑭᑫᐧᑕᐅᑎᐣ; ᓂ ᑲ ᒥᔮᐋᐧᐠ ᒫᑲ ᐊᓄᐦᐨ ᑳ ᑭᓯᑳᐠ ᐃᐧᔭᐃᐧᔨᐊᐧ ᐅ ᓄᑎᓂᑫᒥᐋᐧᐊᐧ ᐱᓬᐃᐢᑎᓇᐠ ᐱᔦᓯᓴᐠ ᑳ ᐸᐹᒥᔮᒋᐠ, ᒥᓇ ᐱᑲᐧᒋ ᐱᓯᐢᑭᐊᐧᐠ ᐊᐢᑭᕽ ᑳ ᐊᔮᒋᐠ; ᒥᓯᐁᐧᐢᑲᒥᐠ ᑭᑕ ᑭᐢᑫᔨᐦᒋᑳᑌᐠ ᐁ ᐃᐦᑖᐟ ᑭᓭᒪᓂᑐ ᐃᐢᕒᐁᐃᓬᐃᕽ; 47ᒥᓇ ᑲᐦᑭᔭᐤ ᐅᑭ ᑳ ᒫᐊᐧᒋᐦᐃᑐᒋᐠ ᑭᑕ ᑭᐢᑫᔨᑕᐦᑭᐠ ᐁᑳ ᐃᓵᐁᐧᐢᐠ ᒥᓇ ᑕᐦᑲᒋᑲᐣ ᐅᐦᒋ ᐁ ᐱᒫᒋᐦᐃᐁᐧᐟ; ᒋᑫᒫ ᐃᐧᔭ ᑳ ᑎᐯᔨᐦᒋᑫᐟ ᐅ ᓄᑎᓂᑫᐃᐧᐣ ᐁᑯᓯ ᑭ ᑲ ᐸᑭᑎᓂᑯᐋᐧᐤ ᓂᒋᐦᒋᓈᕽ. 48ᑭ ᐊᔨᑭᐣ ᒫᑲ ᐃᐢᐱ ᐊᓂ ᐱᓬᐃᐢᑎᐣ ᐯᓯᑯᐟ ᒥᓇ ᐁ ᐯ ᓇᑕᐃᐧ ᓇᑭᐢᑲᐋᐧᐟ ᑌᐱᑕ, ᑌᐱᐟ ᑭ ᑲᑫᐧᔮᐦᐅ, ᒥᓇ ᑭ ᐃᐢᐸᑖᐤ ᐅᓄᑎᓂᑫᐊᐧ ᐃᑕ ᐁ ᐅᔨᑳᐸᐃᐧᔨᐟ ᑭᑕ ᓇᑭᐢᑲᐋᐧᐟ ᐊᓂᐦᐃ ᐱᓬᐃᐢᑎᓇ. 49ᑌᐱᐟ ᒫᑲ ᑭ ᐃᓯᒋᐦᒉᔨᐤ ᐅ ᒪᐢᑭᒧᑎᕽ ᐁᑯᓯ ᐁᑯᑕ ᐅᐦᒋ ᑭ ᐅᑎᓀᐤ ᐊᓯᓂᔭ, ᐁᑯᓯ ᐁ ᑭ ᐁᐧᐸᓯᓈᑖᐟ, ᑭ ᑖᐊᐧᐁᐧᐤ ᒫᑲ ᐊᓂᐦᐃ ᐱᓬᐃᐢᑎᓇ ᐅᐢᑲᑎᑯᔨᕽ; ᐁᑯᓯ ᐊᓂᐦᐃ ᐊᓯᓂᔭ ᑭ ᑯᑖᐃᐧᐸᔨᔨᐊᐧ ᐅᐢᑲᑎᑯᔨᕽ ᒥᓇ ᑭ ᐅᑎᑕᐱ ᐸᐦᑭᓯᓂᔨᐊᐧ ᐊᐢᑭᕽ.
50 #
2 ᓵᒼᔪᐃᓬ 21:19
ᐁᑯᓯ ᑌᐱᐟ ᑭ ᐃᓯ ᓵᑯᒋᐦᐁᐤ ᐊᓂᐦᐃ ᐱᓬᐃᐢᑎᓇ ᐁᐧᐸᓯᓈᐣ ᒥᓇ ᐊᓯᓂᔭ ᐅᐦᒋ, ᐁ ᑭ ᑖᐊᐧᐋᐧᐟ ᒫᑲ ᐊᓂᐦᐃ ᐱᓬᐃᐢᑎᔭᓇ ᒥᓇ ᐁ ᑭ ᓂᐸᐦᐋᐟ; ᒫᑲ ᐃᓴᐁᐧᐢᐠ ᓇᒪᐃᐧᔭ ᑕᐦᑯᓇᒼ ᑌᐱᐟ. 51#2 ᓵᒼᔪᐃᓬ 21:19ᐁᑲᐧ ᑌᐱᐟ ᑭ ᐃᐢᐸᑖᐤ, ᑭ ᓂᐸᐃᐧᐢᑕᐁᐧᐤ ᒫᑲ ᐊᓂᐦᐃ ᐱᓬᐃᐢᑎᓇ, ᑭ ᐅᑎᑎᓇᒣᐧᐤ ᐅᐟ ᐃᓴᐁᐧᑯᒫᓂᔨᐤ, ᑭ ᑫᒋᑯᐱᑕᒣᐧᐤ ᐱᐦᒋᑯᒫᓈᓂᕽ ᐅᐦᒋ, ᒥᓇ ᑭ ᓂᐸᐁᐤ, ᐁᑯᓯ ᑭ ᑭᐢᑭᑫᐧᑕᐁᐧᐤ ᐁᐊᐧᑫᐧᔨᐤ ᐅᐦᒋ. ᐃᐢᐱ ᒫᑲ ᐱᓬᐃᐢᑎᓇᐠ ᐃᐧᔮᐸᐦᑕᑭᐠ ᐅᓄᑎᓂᑫᐢᑕᒫᑫᒥᐋᐧᐊᐧ ᐁ ᓂᐱᔨᐟ, ᑭ ᑕᐸᓯᐊᐧᐠ. 52ᐁᑲᐧ ᐃᐢᕒᐁᐃᓬ ᒥᓇ ᒍᑕ ᐊᔨᓯᔨᓂᐊᐧᐠ ᑭ ᐸᓯᑯᐊᐧᐠ ᒥᓇ ᑭ ᓵᑯᐁᐧᐊᐧᐠ, ᒥᓇ ᑭ ᓇᐊᐧᓵᐧᑌᐊᐧᐠ ᐱᓬᐃᐢᑎᓇ, ᐃᐢᑯ ᐁ ᐅᑎᑕᒥᕽ ᑫᐊᐩ ᒥᓇ ᐁ ᐃᐢᑳᐧᑌᒥᐊᐧᕽ ᐁᑲᕒᐊᐣ. ᐊᓂᑭ ᒫᑲ ᐁ ᒥᓵᐧᑲᓂᑳᑎᒋᐠ ᐱᓬᐃᐢᑎᓇᐠ ᑭ ᐸᐦᑭᓯᓇᐧᐠ ᒣᐢᑲᓈᕽ ᓭᐊᕒᐁᐃᒼ ᑳ ᐊᑎ ᐃᑕᒧᐠ, ᑳᐦᐟ ᐃᐢᑯ ᒥᓇ ᐁᑲᕒᐊᐣ ᐃᐢᑯ. 53ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᒫᑲ ᑭ ᐯ ᑭᐁᐧᐊᐧᐠ ᐁ ᐳᓂ ᓇᐊᐧᓵᐧᑖᒋᐠ ᐱᓬᐃᐢᑎᓇ, ᑭ ᒪᓂᐊᐧᑖᑐᑕᒣᐧᐊᐧᐠ ᒫᑲ ᐅ ᑲᐯᓯᐃᐧᓂᔨᐤ. 54ᑌᐱᐟ ᒫᑲ ᑭ ᐅᑎᓇᒣᐧᐤ ᐱᓬᐃᐢᑎᓇ ᐅᐢᑎᑳᐧᓂᔨᐤ, ᒥᓇ ᒉᕒᐅᓴᓬᐊᒥᕽ ᑭ ᐯᑖᐤ; ᒫᑲ ᐃᐧᔭ ᐅᐟ ᐊᓱᐃᐧᓂᔨᐊᐧ ᑭ ᐊᐢᑖᐤ ᐃᐧᑭᕽ.
55ᐃᐢᐱ ᒫᑲ ᓵᓬ ᐃᐧᔮᐸᒫᐟ ᑌᐱᑕ ᐁ ᓇᑕᐃᐧ ᓄᑎᓈᔨᐟ ᐊᓂᐦᐃ ᐱᓬᐃᐢᑎᓇ, ᑭ ᐃᑌᐤ ᐋᑊᓇᕒᐊ ᑭᐦᒋ ᓯᒫᑲᓂᓯᐃᐧᑭᒫᐊᐧ, ᐋᑊᓇᕒ, ᐊᐁᐧᓇ ᐅᑯᓯᓴ ᐊᐊᐧ ᐅᐢᑭᓂᑭᐤ? ᐋᑊᓇᕒ ᒫᑲ ᑭ ᐃᑌᐧᐤ, ᐁ ᐱᒫᑎᓯᐟ ᑭᐟ ᐊᐦᒑᕽ ᑭᐦᒋ ᐅᑭᒫᐤ, ᓇᒪᐃᐧᔭ ᓂ ᑲ ᑭ ᐃᐧᐦᑌᐣ. 56ᑭᐦᒋ ᐅᑭᒫᐤ ᒫᑲ ᑭ ᐃᑌᐧᐤ, ᑲᑫᐧᒋᑫᒧ ᐊᐁᐧᓇ ᐅᑯᓯᓴ ᐊᐊᐧ ᐅᐢᑭᓂᑭᓯᐢ. 57ᑌᐱᐟ ᒫᑲ ᐃᐢᐱ ᐁ ᐯ ᑭᐁᐧᐟ ᐁ ᑭ ᓂᐸᐦᐋᐟ ᐊᓂᐦᐃ ᐱᓬᐃᐢᑎᓇ, ᐋᑊᓇᕒ ᑭ ᐅᑎᓀᐤ, ᐁᑯᓯ ᑭ ᐯᓯᐁᐧᐤ ᐃᑕ ᐁ ᐊᔮᔨᐟ ᓵᓬᐊ ᐁ ᑕᐦᑯᓇᒥᔨᐟ ᐅᐢᑎᑳᐧᓂᔨᐤ ᐊᓂᐦᐃ ᐱᓬᐃᐢᑎᓇ ᐅᒋᐦᒋᔨᕽ. 58ᓵᓬ ᒫᑲ ᑭ ᐃᑎᐠ, ᐊᐁᐧᓇ ᐅᑯᓯᓴ ᑭᔭ, ᐅᐢᑭᓂᑭᐤ? ᑌᐱᐟ ᒫᑲ ᑭ ᓇᐢᑫᐧᐊᐧᓯᒣᐤ, ᓂᔭ ᐅᑯᓯᓴ ᑭᐟ ᐊᑐᐢᑫᔮᑲᐣ ᒉᓯ ᐊᓇ ᐯᐟᓬᐃᐊᒪᐃᐟ.
Currently Selected:
ᓂᐢᑕᒼ ᓵᒼᔪᐃᓬ 17: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
