ᓂᐢᑕᒼ ᓵᒼᔪᐃᓬ 16
16
1ᑳ ᑎᐯᔨᐦᒋᑫᐟ ᒫᑲ ᑭ ᐃᑌᐤ ᓵᒼᔪᐃᓬᐊ, ᑖᓂᔨᑯᕽ ᑭᓀᐧᐢ ᑫ ᒥᑖᑕᐟ ᓵᓬ, ᐃᐧᔭ ᐁ ᑭ ᐋᑕᐁᔨᒪᐠ ᑭᑕ ᑭᐦᒋᐅᑲᒫᑲᑕᐋᐧᐟ ᐃᐢᕒᐁᐃᓬᐊ? ᒧᐢᑭᓇᑖ ᑭᐟ ᐊᓯᐊᐧᒋᑲᐣ ᐱᒥ ᐅᐦᒋ, ᒥᓇ ᓯᐯᐧᐦᑌ; ᑭ ᑲ ᐃᓯᑎᓴᐦᐅᑎᐣ ᑭᑕ ᓇᑕᐊᐧᐸᒪᐟ ᒉᓯ ᐊᓇ ᐯᐟᓬᐃᐊᒪᐃᐟ; ᒋᑫᒫ ᓂ ᑭ ᐅᐦᑎᓇᒫᓱᐣ ᑭᐦᒋᐊᑭᒫᐤ ᐅᑯᓯᓴ ᐅᐦᒋ. 2ᓵᒼᔪᐃᓬ ᒫᑲ ᑭ ᐃᑌᐧᐤ, ᑖᓂᓯ ᑫ ᑭ ᐃᓯ ᐃᑐᐦᑌᔮᐣ? ᑭᐢᐱᐣ ᓵᓬ ᐯᐦᑕᐦᑭ ᓂ ᑲ ᓂᐸᐦᐃᐠ. ᑳ ᑎᐯᔨᐦᒋᑫᔨᐟ ᒫᑲ ᑭ ᐃᑎᐠ, ᐅᓂᒑᓂᓯᐢ ᑕᐦᑯᐣ, ᒥᓇ ᐃᑌᐧ, ᓂ ᐯ ᓇᑕᐃᐧ ᐸᑭᑎᓇᒪᐋᐧᐤ ᑳ ᑎᐯᔨᐦᒋᑫᐟ. 3ᓇᑐᒼ ᒫᑲ ᒉᓯ ᐁᑯᑕ ᐸᑭᑎᓈᓱᐃᐧᓂᕽ, ᐁᑯᓯ ᑭ ᑲ ᐋᐧᐸᐦᑕᐦᐃᑎᐣ ᑖᓂᓯ ᑫ ᐃᓯᐦᒋᑫᔭᐣ; ᐁᑯᓯ ᑭ ᑲ ᑐᒥᓇᒪᐃᐧᐣ ᐊᓇ ᑫ ᐃᐧᐦᑕᒫᑖᐣ ᐁ ᐃᐧᔭᐠ. 4ᓵᒼᔪᐃᓬ ᒫᑲ ᑭ ᐃᑐᑕᒼ ᐊᓂᒪ ᑳ ᑎᐯᔨᐦᒋᑫᔨᐟ ᑳ ᑭ ᐃᑌᐧᔨᐟ, ᐁᑯᓯ ᑭ ᐯ ᐃᑐᐦᑌᐤ ᐯᐟᓬᐃᐊᒥᕽ. ᑳ ᓂᑳᓀᔨᑖᑯᓯᔨᐟ ᒫᑲ ᐅᑌᓈᕽ ᑭ ᓇᑭᐢᑳᐠ ᐁ ᓇᓇᒥᐸᔨᔨᐟ, ᐁᑯᓯ ᑭ ᐃᑎᐠ, ᐯᔭᐦᑕᑫᔨᒧᐃᐧᓂᕽ ᒋ ᑳ ᐯ ᐃᑐᐦᑌᔭᐣ? 5ᑭ ᐃᑌᐤ ᒫᑲ, ᐯᔭᐦᑕᑫᔨᒧᐃᐧᓂᕽ; ᓂ ᐯ ᐃᑐᐦᑖᐣ ᐸᑭᑎᓈᓱᐃᐧᐣ ᑭᑕ ᐸᑭᑎᓇᒪᐊᐧᐠ ᑳ ᑎᐯᔨᐦᒋᑫᐟ; ᑲᓈᒋᐃᓱᐠ, ᒥᓇ ᐯ ᐃᐧᒉᐃᐧᐠ ᐸᑭᑎᓈᓱᐃᐧᓂᕽ. ᐁᑯᓯ ᑭ ᑲᓈᒋᐁᐤ ᒉᓯᐊᐧ ᒥᓇ ᐅᑯᓯᓯᔨᐊᐧ, ᒥᓇ ᑭ ᓇᑐᒣᐤ ᐸᑭᑎᓈᓱᐃᐧᓂᕽ.
6ᑭ ᐃᐦᑭᐣ ᒫᑲ ᐃᐢᐱ ᐁ ᐯ ᐃᑐᐦᑌᔨᐟ, ᑭ ᑲᓇᐋᐧᐸᒣᐤ ᐃᓬᐃᔮᐸ, ᐁᑯᓯ ᑭ ᐃᑌᐧᐤ, ᑫᐦᒋᓈ ᑳ ᑎᐯᔨᐦᒋᑫᐟ ᐅ ᑐᒥᓈᑲᓇ ᓄᑎᐢᑲᐃᐧᐢᑳᑯᔨᐊᐧ. 7ᒫᑲ ᑳ ᑎᐯᔨᐦᒋᑫᐟ ᑭ ᐃᑌᐤ ᓵᒼᔪᐃᓬᐊ, ᐁᑳᐊᐧᔮ ᑲᓇᐋᐧᐸᐦᑕ ᐁ ᐃᓯᓈᑯᓯᐟ ᐅᐦᑳᐧᑲᓂᕽ, ᐊᐦᐳ ᐁ ᐃᓯ ᑭᓄᑳᐸᐃᐧᐟ; ᒋᑫᒫ ᓂ ᑭ ᐋᑕᐁᐧᔨᒫᐤ; ᐊᔨᐢ ᑳ ᑎᐯᔨᐦᒋᑫᐟ ᑭᑖᐸᑫᐤ ᓇᒪᐃᐧᔭ ᐊᔨᓯᔨᓂᐤ ᑳ ᐃᓯ ᑭᑖᐸᑫᐟ; ᒋᑫᒫ ᐊᔨᓯᔨᓂᐤ ᐊᐧᐢᑭᐨ ᐱᑯ ᑳ ᑲᓇᐋᐧᐸᐦᑕᕽ, ᒫᑲ ᐃᐧᔭ ᑳ ᑎᐯᔨᐦᒋᑫᐟ ᒥᑌᐦ ᑳ ᑲᓇᐋᐧᐸᐦᑕᕽ. 8ᐁᑲᐧ ᒉᓯ ᑭ ᓇᑐᒣᐤ ᐊᐱᓇᑖᐸ, ᒥᓇ ᐁᐊᐧᑯᓂ ᑭ ᐱᒧᑕᐁᐤ ᐅᐦᑎᐢᑲᐤ ᓵᒼᔪᐃᓬᐊ. ᑭ ᐃᑌᐧᐤ ᒫᑲ, ᓇᒪᔦᐊᐧ ᑫᔮᐱᐨ ᑳ ᑎᐯᔨᐦᒋᑫᐟ ᑳ ᑭ ᓇᐊᐧᓱᓈᐟ. 9ᐁᑲᐧ ᒫᑲ ᒉᓯ ᓴᒪᐊᐧ ᑭ ᐱᒧᑕᐁᐤ. ᑭ ᐃᑌᐧᐤ ᒫᑲ, ᓇᒪᔦᐊᐧ ᑫᔮᐱᐨ ᑳ ᑎᐯᔨᐦᒋᑫᐟ ᑳ ᑭ ᓇᐊᐧᓱᓈᐟ. 10ᒉᓯ ᒫᑲ ᑌᐸᑯᑊ ᐅᑯᓯᓴ ᑭ ᐱᒧᑕᐁᐤ ᐅᐦᑎᐢᑲᐤ ᓵᒼᔪᐃᓬᐊ. ᓵᒼᔪᐃᓬ ᒫᑲ ᑭ ᐃᑌᐤ ᒉᓯᐊᐧ, ᓇᒪᔦᐊᐧ ᐅᐦᐃ ᑳ ᑎᐯᔨᐦᒋᑫᐟ ᑳ ᑭ ᓇᐊᐧᓱᓈᐟ. 11ᓵᒼᔪᐃᓬ ᒫᑲ ᑭ ᐃᑌᐤ ᒉᓯᐊᐧ, ᐅᑕ ᒋ ᐊᔮᐊᐧᐠ ᑲᐦᑭᔭᐤ ᑭᐟ ᐊᐋᐧᓯᒥᓴᐠ? ᑭ ᐃᑎᐠ ᒫᑲ, ᑫᔮᐱᐨ ᐅᓯᒥᒫᐤ ᐃᐦᑖᐤ, ᒫᑲ ᒫᑎᑲ, ᑲᓇᐁᐧᔨᒣᐤ ᒫᔭᑎᐦᑲᐧ. ᓵᒼᔪᐃᓬ ᒫᑲ ᑭ ᐃᑌᐤ ᒉᓯᐊᐧ, ᐃᓯᑎᓴᐦᐅᐁᐧ ᑭᑕ ᓈᑎᐦᐟ; ᒋᑫᒫ ᓇᒪᐃᐧᔭ ᑭ ᑲ ᓇᐦᐊᐱᓈᓇᐤ ᐹᑎᒫ ᑕᑯᓯᑭ. 12ᑭ ᐃᓯᑎᓴᐦᐅᐁᐧᐤ ᒫᑲ ᐁᑯᓯ ᑭ ᐯ ᐱᐦᑐᑲᐦᐁᐤ. ᑭᓵᐢᑕᐤ ᒫᑲ ᑭ ᒥᐦᑯᑫᐧᐤ ᒥᓇ ᑭ ᑲᑕᐊᐧᓯᓯᐤ ᐃᓴ ᐱᑯ, ᒥᓇ ᑭ ᒥᔪᓈᑯᓯᐤ. ᑳ ᑎᐯᔨᐦᒋᑫᐟ ᒫᑲ ᑭ ᐃᑌᐧᐤ, ᐸᓯᑯ, ᑐᒥᐣ; ᒋᑫᒫ ᐁᐊᐧᑯ ᐊᐊᐧ. 13ᐁᑲᐧ ᓵᒼᔪᐃᓬ ᑭ ᐅᑎᓇᒼ ᐊᓯᐊᐧᒋᑲᐣ ᒥᓇ ᑭ ᑐᒥᓀᐤ ᒣᑳᐧ ᐃᑕ ᐁ ᐊᔮᔨᐟ ᐅᒋᐋᐧᒥᔨᐊᐧ; ᐁᑯᓯ ᐅᐟ ᐦᒑᐦᑯᔨᐊᐧ ᑳ ᑎᐯᔨᐦᒋᑫᔨᐟ ᑭ ᓱᑳᔭᐃᐧ ᐅᑎᐦᑎᐠ ᑌᐱᐟ ᐁᐊᐧᑯ ᐁ ᑭᓯᑳᐠ ᐅᐦᒋ. ᐁᑯᓯ ᓵᒼᔪᐃᓬ ᑭ ᐸᓯᑯ ᒥᓇ ᑭ ᑭᐁᐧᐤ ᕒᐁᒪᐃᕽ.
14ᑳ ᑎᐯᔨᐦᒋᑫᐟ ᒫᑲ ᐅᐟ ᐊᐦᒑᐦᑲᐧ ᑭ ᓇᑲᑎᐠ ᓵᓬ ᐁᑯᓯ ᒪᒋ ᐊᐦᒑᐦᑲᐧ ᑳ ᑎᐯᔨᐦᒋᑫᔨᐟ ᐅᐦᒋ ᑭ ᒥᑯᐢᑳᒋᐃᐠ. 15ᓵᓬ ᒫᑲ ᐅᐟ ᐊᑐᐢᑫᔮᑲᓇ ᑭ ᐃᑎᐠ, ᒫᑎᑲ ᐁᑲᐧ, ᒪᒋ ᐊᐦᒑᕽ ᑳ ᑎᐯᔨᐦᒋᑫᐟ ᐅᐦᒋ ᑭ ᒥᑯᐢᑳᒋᐃᐠ. 16ᑭᔮᒼ ᐁᑲᐧ ᓂᐟ ᐅᑭᒫᒥᓇᐣ ᐃᑕᓱᐋᐧᓯᐠ ᑭᐟ ᐊᑐᐢᑫᔮᑲᓇᐠ ᑳ ᐅᐦᑎᐢᑲᐃᐧᐢᑲᐢᑭᐠ ᑭᑕ ᓇᑐᓇᐋᐧᒋᐠ ᓈᐯᐊᐧ ᐁ ᓂᐦᑖ ᑭᑐᐦᑖᔨᐟ ᐦᐋᕒᑊ; ᐁᑯᓯ ᑭᑕ ᐃᐦᑭᐣ ᐃᐢᐱ ᐊᓇ ᒪᒋ ᐊᐦᒑᕽ ᑭᓭᒪᓂᑐ ᐅᐦᒋ ᐅᑎᑎᐢᑭ, ᑭᑕ ᑭᑐᒋᑫᐤ ᐅᒋᐦᒋ ᐅᐦᒋ ᐁᑯᓯ ᑭ ᑲ ᒥᔪᐊᔮᐣ. 17ᓵᓬ ᒫᑲ ᑭ ᐃᑌᐤ ᐅᐟ ᐊᑐᐢᑫᔮᑲᓇ, ᐅᐦᑎᓇᒪᐃᐧᐠ ᓈᐯᐤ ᐁ ᓂᐦᑕ ᑭᑐᐦᒋᑫᐟ ᒥᓇ ᐯᓯᕽ. 18ᐁᑲᐧ ᐯᔭᐠ ᐅᐢᑭᓂᑭᐊᐧ ᑭ ᓇᐢᑫᐧᐊᐧᓯᒥᐠ ᒥᓇ ᑭ ᐃᑎᐠ, ᒫᑎᑲ, ᓂ ᑭ ᐋᐧᐸᒥᒫᐊᐧ ᐅᑯᓯᓴ ᒉᓯ ᐊᓇ ᐯᐟᓬᐃᐊᒪᐃᐟ, ᐁ ᓂᐦᑖ ᑭᑐᐦᒋᑫᐟ ᒥᓇ ᐁ ᓱᑳᔨᐃᐧᓯᐟ ᓈᐯᑳᓱᐃᐧᓂᕽ, ᒥᓇ ᐅᓇᑐᐸᔨᐤ ᒥᓇ ᐁ ᐊᔮᑳᐧᒥᓯᐟ ᐱᑭᐢᑫᐧᐃᐧᓂᕽ, ᒥᓇ ᐁ ᒥᔪᓈᑯᓯᐟ, ᒥᓇ ᑳ ᑎᐯᔨᐦᒋᑫᔨᐟ ᐃᐧᒉᐃᐧᐠ.
19ᐁᑯᓯ ᒫᑲ ᓵᓬ ᑭ ᐃᓯᑎᓴᐦᐊᒪᐁᐧᐤ ᐅᑖᒋᒧᐊᐧ ᒉᓯᐊᐧ, ᑭ ᐃᑌᐧᐤ ᒫᑲ, ᐃᓯᑎᓴᐦᐊᒪᐃᐧᐣ ᑌᐱᐟ ᑭᑯᓯᐢ ᑳ ᑲᓇᐁᐧᔨᒫᐟ ᒫᔭᑎᐦᑲᐧ. 20ᐁᑯᓯ ᒉᓯ ᑭ ᐅᑎᓀᐤ ᓱᓱᒥᐢᑕᑎᒪᐧ ᑭ ᓇᔭᑕᐁᐤ ᐸᐦᑫᐧᓯᑲᓇ ᒥᓇ ᐯᔭᐠ ᐊᓯᐊᐧᒋᑲᐣ ᓱᒥᓈᐳ ᒥᓇ ᐋᐧᐸᑎᑯᓯᓴ, ᐁᑯᓯ ᑭ ᐃᓯᑎᓴᐦᐊᒪᐁᐧᐤ ᓵᓬᐊ ᐁ ᑕᐦᑯᓇᒧᐋᐟ ᐅᑯᓯᓴ ᑌᐱᐟ. 21ᑌᐱᐟ ᒫᑲ ᑭ ᐅᑎᐦᑌᐤ ᓵᓬᐊ, ᐁᑯᓯ ᑭ ᐅᐦᑎᐢᑲᐃᐧᑲᐸᐃᐧᐢᑕᐁᐧᐤ; ᒥᐢᑕᐦᐃ ᒫᑲ ᑭ ᓵᑭᐦᐃᐠ; ᑭ ᐃᑕᑭᒥᐠ ᒫᑲ ᑭᑕ ᑕᐦᑯᓇᒫᐧᐟ ᐅᐟ ᐊᓱᐃᐧᓂᔨᐊᐧ. 22ᓵᓬ ᒫᑲ ᑭ ᐃᓯᑎᓴᐦᐊᒪᐁᐧᐤ ᒉᓯᐊᐧ ᐁ ᐃᑌᐧᐟ, ᑭᔮᒼ ᑌᐱᐟ ᑭ ᐸᑯᓭᔨᒥᑎᐣ ᓂ ᑲ ᐅᐦᑎᐢᑲᐃᐧᑳᐸᐃᐧᐢᑖᐠ; ᒋᑫᒫ ᐃᓯ ᒥᐢᑲᒼ ᑭᑕ ᒥᔦᐧᔨᒪᐠ. 23ᑭ ᐊᔨᑭᐣ ᒫᑲ ᐃᐢᐱ ᐊᓂᐦᐃ ᒪᒋ ᐊᐦᒑᐦᑲᐧ ᑭᓭᒪᓂᑐ ᐅᐦᒋ ᐁᐧᑎᑎᑯᒋ ᓵᓬ, ᑌᐱᐟ ᑭ ᐅᑎᓇᒼ ᐊᓂᒪ ᐦᐋᕒᑊ, ᐁᑯᓯ ᑭ ᑭᑐᑖᐤ ᐅᒋᐦᒋ ᐅᐦᒋ; ᐁᑲᐧ ᒫᑲ ᓵᓬ ᑭ ᐋᐹᑲᐃᐧ ᐊᔮᐤ ᒥᓇ ᑭ ᒥᔪ ᐊᔮᐤ, ᒥᓇ ᐊᓂᐦᐃ ᒪᒋ ᐊᐦᒑᐦᑲᐧ ᑭ ᓇᑲᑎᐠ.
Currently Selected:
ᓂᐢᑕᒼ ᓵᒼᔪᐃᓬ 16: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
