ᓂᐢᑕᒼ ᓵᒼᔪᐃᓬ 14
14
1ᑭ ᐊᔨᐦᑭᐣ ᒫᑲ ᐁ ᑲᑭᓯᑳᐠ, ᒑᓇᐦᑕᐣ ᐅᑯᓯᓴ ᓵᓬ ᑭ ᐃᑌᐤ ᐊᓂᐦᐃ ᐅᐢᑭᓂᑭᐊᐧ ᑳ ᐱᒥᐃᐧᑖᔨᐟ ᐅᐟ ᐊᓱᐃᐧᓇ, ᐦᐊᐤ ᒫᐦᑎ, ᓇᑕᐋᐧᐸᒥᒫᑖᓇ ᐅᐟ ᐊᓱᐅᐁᐧᒥᐋᐧᐊᐧ ᐱᓬᐃᐢᑎᓇᐠ, ᐊᑳᒫᔨᕽ ᑳ ᐊᔮᔨᐟ. ᒫᑲ ᓇᒪᐃᐧᔭ ᐃᐧᐦᑕᒪᐁᐧᐤ ᐅᑖᐃᐧᔭ. 2ᓵᓬ ᒫᑲ ᑭ ᐊᔭᔮᐤ ᑭᓯᐹᔨᕽ ᑭᐱᔭᐃᕽ ᓯᐹ ᐱᑎᑯᒥᓈᓈᑎᑯᕽ ᒥᐠᕒᐊᓂᕽ ᑳ ᐊᔮᔨᐟ: ᐊᓂᐦᐃ ᒫᑲ ᐊᔨᓯᔨᓂᐊᐧ ᑳ ᐃᐧᒋ ᐊᔮᒥᑯᐟ ᓈᐣᑕᐤ ᓂᑯᑖᐧᓵᐧᐤ ᒥᑖᐦᑐᒥᑕᓇᐤ ᑭ ᐃᐦᑕᓯᔨᐊᐧ ᓈᐯᐊᐧ; 3ᐊᓯᒋ ᐊᐦᐊᐃᒐ, ᐅᑯᓯᓴ ᐊᐦᐊᐃᑕᑊ, ᐃᑲᐹᐟ ᐅᒋᐋᐧᒪ, ᐅᑯᓯᓴ ᐱᓂᐋᐢ, ᐅᑯᓯᓴ ᐃᓬᐋᐩ, ᑳ ᑎᐯᔨᐦᒋᑫᐟ ᐅᐟ ᐊᔭᒥᐦᐁᐃᐧᔨᓂᒪ ᓴᐃᓬᐆᐃᕽ, ᐁ ᑭᑭᐢᑲᕽ ᐁᐦᐸᐟ. ᐁᑯᓯ ᐊᔨᓯᔨᓂᐊᐧᐠ ᓇᒪᐃᐧᔭ ᑭᐢᑫᔨᑕᒪᐧᐠ ᒑᓇᐦᑕᓇ ᐁ ᑭ ᓯᐯᐧᑌᔨᐟ.
4ᐁᑯᓯ ᑕᐢᑕᐋᐧᔨᕽ ᐊᓂᒪ ᐁ ᑖᐦᑕᐊᐧᐠ, ᐃᑕ ᒑᓇᐦᑕᐣ ᐁ ᐃᑌᔨᑕᕽ ᑭᑕ ᐋᓱᐃᐧ ᓈᑎᒫᐟ ᐱᓬᐃᐢᑎᓇ ᐅᐟ ᐊᓱᐅᐁᐧᒥᔨᐊᐧ, ᑭ ᐃᐦᑕᑲᐧᐣ ᐁ ᑭᓂᑳᐱᐢᑳᐠ ᓇᐸᑌ, ᒥᓇ ᐁ ᑭᓂᑳᐱᐢᑳᐠ ᑫᐧᐢᑭᑌ: ᐯᔭᐠ ᐊᓂᒪ ᑭ ᐃᓯᔨᐦᑳᑌᐤ ᐹᓯᐢ, ᐁᑯᓯ ᐊᓂᒪ ᑯᑕᐠ ᓭᓂ ᑭ ᐃᓯᔨᐦᑳᑌᐤ. 5ᐯᔭᐠ ᐊᓂᒪ ᑭ ᐅᐦᑎᐢᑲᐃᐧ ᐊᔮᐤ ᑭᐁᐧᑎᓄᕽ ᐃᑌᐦᑫ ᑎᐱᐢᑯᐨ ᒥᐠᒫᓯᕽ, ᐁᑯᓯ ᐊᓂᒪ ᑯᑕᐠ ᓵᐊᐧᓄᕽ ᐃᑌᐦᑫ ᑎᐱᐢᑯᐨ ᑭᐸᐃᕽ. 6ᒑᓇᐦᑕᐣ ᒫᑲ ᑭ ᐃᑌᐤ ᐊᓂᐦᐃ ᐅᐢᑭᓂᑭᐊᐧ ᑳ ᐱᒥᐃᐧᑕᒫᑯᐟ ᐅᐟ ᐊᓱᐃᐧᓇ, ᐦᐊᐤ ᐁᑲᐧ, ᐊᓱᐃᐧ ᓈᑎᒫᑕᐣ ᐅᐟ ᐊᓱᐅᐁᐧᒥᐋᐧᐊᐧ ᐅᑭ ᐁᑳ ᑳ ᓴᕒᑲᒼᓴᐃᓯᐃᐧᒋᐠ: ᑭᑕ ᑭ ᐃᐦᑭᐣ ᑳ ᑎᐯᔨᐦᒋᑫᐟ ᑭᑕ ᐊᑐᐢᑳᑯᔭᕽ: ᒋᑫᒫ ᓇᒪᐃᐧᔭ ᑫᑲᐧᐩ ᐱᐁᐧᔨᑕᒼ ᑳ ᑎᐯᔨᐦᒋᑫᐟ ᑭᑕ ᐱᒫᒋᐦᐃᐁᐧᐟ ᒥᐦᒉᐟ ᐁ ᐋᐸᒋᐦᐋᐟ ᐊᐦᐳ ᒐᑲᐋᐧᓯᐢ. 7ᐁᑯᓯ ᑳ ᐱᒥᐃᐧᑖᔨᐟ ᐅᐟ ᐊᓱᐃᐧᓇ ᑭ ᐃᑎᐠ, ᑲᐦᑭᔭᐤ ᑫᑲᐧᐩ ᐃᐦᑐᑕ ᑭ ᑌᐦᐃᕽ ᑳ ᐊᔮᐠ: ᑫᐧᐢᑭ; ᒫᑎᑲ, ᑭ ᐃᐧᒉᑎᐣ ᒣᐧᐦᒋ ᑳ ᐃᑕᐢᑌᐠ ᑭᑌᐦ. 8ᐁᑲᐧ ᒑᓇᐦᑕᐣ ᑭ ᐃᑌᐧᐤ, ᒫᑎᑲ, ᑭ ᑲ ᐋᓱᐃᐧᑐᑕᐋᐧᓇᐊᐧᐠ ᐅᑭ ᓈᐯᐊᐧᐠ, ᐁᑲᐧ ᑭ ᑲ ᓄᑯᐦᐃᓱᐢᑕᐋᐧᓇᐊᐧᐠ. 9ᑭᐢᐱᐣ ᐅᒥᓯ ᐃᑎᑯᔭᑳᐧᐁᐧ, ᐁᑯᑕ ᐊᔮᐠ, ᑭ ᑲ ᐯ ᓈᑎᑎᓈᐣ; ᑭᔮᒼ ᑭ ᑲ ᑭᐱᐦᒋᑳᐸᐃᐧᓈᓇᐤ, ᓇᒪᐃᐧᔭ ᑭ ᑲ ᓈᑖᓇᐊᐧᐠ. 10ᒫᑲ ᑭᐢᐱᐣ ᐃᑌᐧᑖᐧᐁᐧ, ᐯ ᓈᓯᓈᐣ; ᐁᑲᐧ ᑭ ᑲ ᐃᑐᐦᑖᓈᓇᐤ: ᒋᑫᒫ ᑳ ᑎᐯᔨᐦᒋᑫᐟ ᐁ ᐸᑭᑎᓈᐟ ᑭ ᒋᐦᒋᓈᕽ: ᐁᐊᐧᑯᒪ ᑫ ᐃᓯ ᑭᐢᑭᓇᐋᑌᔨᑕᒪᕽ. 11ᐁᑯᓯ ᐁ ᐃᓯ ᓂᓯᒋᐠ ᑭ ᓄᑯᐦᐃᓱᐢᑕᐁᐧᐊᐧ ᐅᐟ ᐊᓱᐅᐁᐧᒥᔨᐊᐧ ᐱᓬᐃᐢᑎᓇ: ᐱᓬᐃᐢᑎᓇᐠ ᒫᑲ ᑭ ᐃᑌᐧᐊᐧᐠ, ᒋᐢᐟ, ᐦᐃᐸᕒᐅᐊᐧᐠ ᐯ ᒧᐢᑭᐊᐧᐠ ᐋᐧᑎᕽ ᐅᐦᒋ ᐃᑕ ᐁ ᑭ ᑳᓱᒋᐠ. 12ᐊᓂᑭ ᒫᑲ ᓈᐯᐊᐧᐠ ᑳ ᐊᓱᐅᐁᐧᒋᐠ ᑭ ᓇᐢᑫᐧᐊᐧᓯᒣᐊᐧᐠ ᒑᓇᐦᑕᓇ ᒥᓇ ᐊᓂᐦᐃ ᑳ ᐱᒥᐃᐧᑖᔨᐟ ᐅᐟ ᐊᓱᐃᐧᓇ, ᑭ ᐃᑌᐧᐊᐧᐠ ᒫᑲ, ᐯ ᓈᓯᓈᐣ, ᑫᑲᐧᐩ ᑭ ᑲ ᐋᐧᐸᐦᑕᐦᐃᑎᓈᐣ. ᐁᑲᐧ ᒑᓇᐦᑕᐣ ᑭ ᐃᑌᐤ ᑳ ᐱᒥᐃᐧᑖᔨᐟ ᐅᐟ ᐊᓱᐃᐧᓇ, ᐯ ᐱᒥᑎᓴᐦᐅᐣ; ᒋᑫᒫ ᑳ ᑎᐯᔨᐦᒋᑫᔨᐟ ᑭ ᐸᑭᑎᓂᑲᐧᐠ ᐅ ᒋᐦᒋᔨᕽ ᐃᐢᕒᐁᐃᓬᐊ. 13ᐁᑯᓯ ᒑᓇᐦᑕᐣ ᑭ ᐊᑎ ᑯᐢᐹᑕᐃᐧᐤ ᐅ ᒋᐦᒋᔭ ᒥᓇ ᐅᓯᑕ ᐁ ᐋᐸᒋᐦᑖᐟ, ᒥᓇ ᑳ ᐱᒥᐃᐧᑖᔨᐟ ᐅᐟ ᐊᓱᐃᐧᓇ ᐁ ᐱᒥᑎᓴᐦᐅᑯᐟ: ᑭ ᑳᑲᐃᐧᐁᐧᐸᐁᐧᐤ ᒫᑲ ᒑᓇᐦᑕᐣ, ᒥᓇ ᑳ ᐱᒥᐃᐧᑖᔨᐟ ᐅᐟ ᐊᓱᐃᐧᓇ ᑭ ᐊᑎ ᓈᓂᐸᐁᐤ. 14ᐊᓂᐦᐃ ᒫᑲ ᓂᐢᑕᒼ ᑳ ᑭ ᓂᐸᐦᐋᒋᐠ ᒑᓇᐦᑕᐣ ᒥᓇ ᑳ ᐱᒥᐃᐧᑖᔨᐟ ᐅᐟ ᐊᓱᐃᐧᓇ, ᓈᐣᑕᐤ ᓂᓯᑕᓇᐤ ᓈᐯᐊᐧ, ᐱᐦᒑᔨᕽ ᓈᐣᑕᐤ ᐋᐱᐦᑕᐤ ᐊᐢᑭᐦᑳᓂᐢ ᐁ ᐃᐢᑳᐧᐠ. 15ᑭ ᓭᑭᓯᓈᓂᐊᐧᐣ ᒫᑲ ᐃᑕ ᑳ ᒫᒪᐁᐧᔭᑎᒋᐠ, ᒥᓇ ᐅᐦᐱᒣ ᐃᑌ, ᒥᓇ ᒣᑳᐧᐨ ᐃᑕ ᐁ ᐊᔮᒋᐠ ᑲᐦᑭᔭᐤ ᐊᔨᓯᔨᓂᐊᐧᐠ; ᐅᑕᓱᐅᐁᐧᐊᐧᐠ ᒥᓇ ᐅᒪᓂᐊᐧᑌᐊᐧᐠ, ᐃᐧᐢᑕᐋᐤ ᑭ ᓇᓇᒥᐸᔨᐊᐧᐠ, ᐊᐢᑭ ᑭ ᑭᐦᑲᐧᐣ: ᐁᑯᓯ ᑖᐯᐧ ᑭᐦᒋ ᓇᓇᒥᐸᔨᐃᐧᐣ ᑭ ᐃᐦᑕᑲᐧᐣ. 16ᐊᓂᐦᐃ ᒫᑲ ᑳ ᐊᓴᐋᐧᐱᐢᑕᒫᑯᐟ ᓵᓬ ᐊᓂᑕ ᑭᐱᐊᐃᕽ ᐯᐣᒋᒪᐣ ᐊᐢᑭᕽ ᑭ ᐃᑖᐱᔨᐊᐧ; ᐁᑯᓯ, ᐳᑎ, ᐊᑎ ᒣᐦᒋ ᓇᒪᑌᐊᐧᐠ ᐁ ᑭ ᐅᓵᒣᔭᑎᒋᐠ ᐊᔨᓯᔨᓂᐊᐧᐠ, ᒥᓇ ᑭ ᐊᑎ ᐸᑲᒪᐅᑐᐊᐧᐠ.
17ᐁᑲᐧ ᓵᓬ ᑭ ᐃᑌᐤ ᐊᔨᓯᔨᓂᐊᐧ ᑳ ᐃᐧᒋ ᐊᔮᒥᑯᐟ, ᐊᑭᒥᑐᐠ ᐁᑲᐧ, ᒫᐦᑎ ᐊᐁᐧᓇ ᑳᐦ ᓇᑲᑎᑯᔭᕽ. ᐃᐢᐱ ᒫᑲ ᑳ ᐊᑭᒥᑐᒋᐠ ᐳᑎ ᒑᓇᐦᑕᐣ ᒥᓇ ᑳ ᐱᒥᐃᐧᑕᒫᑯᐠ ᐅᐟ ᐊᓱᐃᐧᓇ ᓇᒪᐃᐧᔭ ᐁᑯᑕ ᐊᔮᐊᐧᐠ. 18ᓵᓬ ᒫᑲ ᑭ ᐃᑌᐤ ᐁᐦᐊᐃᒐᐊᐧ, ᐯᑖ ᐅᑕ ᐅ ᑭᐢᑭᓇᐋᐧᒋᐅᐃᐧᓂᐊᐧᐟ ᑭᓭᒪᓂᑐ: (ᒋᑫᒫ ᐁᑯᐢᐱ ᐅ ᑭᐢᑭᓇᐋᐧᒋᐅᐃᐧᓂᐊᐧᐟ ᑭᓭᒪᓂᑐ ᑭ ᐃᐧᒉᐃᐧᑲᐧᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ.)
19ᑭᐦ ᐊᔨᐦᑭᐣ ᒫᑲ, ᒣᑳᐧᐨ ᓵᓬ ᐁ ᐊᔭᔭᒥᐋᐟ ᐊᓂᐦᐃ ᐊᔭᒥᐦᐁᐃᐧᔨᓂᐊᐧ, ᑳ ᑭ ᐯᐦᑖᑲᐧᕽ ᐃᑕ ᐁ ᒫᒪᐁᐧᔭᑎᒋᐠ ᐱᓬᐃᐢᑎᓇᐠ ᐊᔨᐋᐧᐠ ᑭ ᐊᑎ ᐃᑎᐦᑖᑲᐧᐣ: ᓵᓬ ᒫᑲ ᑭᐦ ᐃᑌᐤ ᐊᔭᒥᐦᐁᐃᐧᔨᓂᐊᐧ, ᐅᒋᓂᐢᑫᔨ. 20ᐁᑲᐧ ᓵᓬ ᒥᓇ ᑲᐦᑭᔭᐤ ᐊᔨᓯᔨᓂᐊᐧ ᑳ ᐃᐧᒉᐃᐧᑯᐟ ᑭ ᒫᐊᐧᒋᐦᐃᑐᐊᐧᐠ, ᑭ ᐊᑎ ᐅᑎᐦᑕᒪᐧᐠ ᒫᑲ ᐃᑕ ᐁ ᓄᑎᓂᑐᕽ: ᐁᑯᓯ, ᐳᑎ, ᑲᐦᑭᔭᐤ ᓈᐯᐤ ᐁ ᐸᑲᒪᐋᐧᐟ ᐅ ᐃᐧᒉᐋᐧᑲᓇ ᐅᐟ ᐃᓴᐁᐧᑯᒫᐣ ᐅᐦᒋ, ᐁᑯᓯ ᒥᐢᑕᐦᐃ ᓂᓯᐊᐧᓈᒋᐃᑐᐃᐧᐣ ᑭ ᐃᐦᑕᑲᐧᐣ. 21ᐁᑲᐧ ᒥᓇ ᐊᓂᑭ ᐦᐃᐸᕒᐅᐊᐧᐠ ᑳ ᑭ ᐃᐧᒉᐋᐧᒋᐠ ᐱᓬᐃᐢᑎᓇ ᐊᐊᐧᓯᐢᐱ, ᑳ ᑭ ᐃᑐᐦᑌᒋᐠ ᐅ ᑲᐯᓯᐃᐧᓂᔨᕽ ᐋᐧᐢᑳ ᐅᐦᒋ, ᐁᐊᐧᑯᓂᐠ ᒥᓇ ᑫᐧᐢᑭᐊᐧᐠ ᑭᑕ ᐃᐧᒋᐦᐋᒋᐠ ᐃᐢᕒᐁᐃᓬᐊᐃᑕ ᑳ ᐃᐧᒉᐃᐧᑯᔨᐟ ᓵᓬ ᒥᓇ ᒑᓇᐦᑕᐣ. 22ᐁᑲᐧ ᒥᓇ ᑲᐦᑭᔭᐤ ᐃᐢᕒᐁᐃᓬ ᓈᐯᐊᐧᐠ ᑳ ᑭ ᑳᓱᒋᐠ ᐃᐸᕒᐁᐃᒼ ᐊᐧᒋᕽ, ᐃᐢᐱ ᐱᔦᐦᑕᐦᑭᐠ ᐁ ᑖᐸᓯᔨᐟ ᐱᓬᐃᐢᑎᓇ ᐁᐊᐧᑯᓂᐠ ᒥᓇ ᓱᐦᑭ ᓇᐊᐧᓵᐧᑌᐊᐧᐠ ᓄᑎᓂᑐᐃᐧᓂᕽ. 23ᐁᑯᓯ ᑳ ᑎᐯᔨᐦᒋᑫᐟ ᑳ ᐃᓯ ᐱᒫᒋᐦᐋᐟ ᐃᐢᕒᐁᐃᓬᐊ ᐁᐊᐧᑳᐧᓂᒪ ᐁ ᑭᓯᑳᐠ: ᑭ ᐊᑎ ᓄᑎᓂᑐᓈᓂᐊᐧᐣ ᒫᑲ ᐱᔨᐢ ᐃᐢᑯ ᐯᐟᐁᐱᐣ.
24ᒥᐢᑕᐦᐃ ᒫᑲ ᑭ ᑯᑕᑭᑖᐊᐧᐠ ᐃᐢᕒᐁᐃᓬ ᓈᐯᐊᐧᐠ ᐁᐊᐧᑳᐧᓂᒪ ᐁ ᑭᓯᑳᐠ: ᒋᑫᒫ ᓵᓬ ᑭ ᐋᔮᒋᒣᐤ ᐊᔨᓯᔨᓂᐊᐧ ᐁ ᑭᐦᒋᐃᑌᐧᐟ, ᑭᑕ ᒪᒐᑭᒫᐤ ᐊᓇ ᓈᐯᐤ ᑫ ᒥᒋᓱᑫᐧ ᐃᐢᑯ ᑫ ᐅᑖᑯᓯᐠ, ᒥᑐᓂ ᑭᑕ ᐋᐯᐦᐅᔮᐣ ᓂ ᓄᑎᓈᑲᓇᐠ. ᐁᑯᓯ ᓇᒪᐃᐧᔭ ᐊᐃᐧᔭᐠ ᑯᒋᐢᑕᒼ ᒥᒋᐃᐧᐣ. 25ᑲᐦᑭᔭᐤ ᒫᑲ ᐊᔨᓯᔨᓂᐊᐧᐠ ᑭ ᐊᑎ ᐅᑎᐦᑕᒪᐧᐠ ᓴᑳᐢᑲᐧᐤ, ᐊᒧᓯᓯᐹᐢᑲᐧᐟ ᒫᑲ ᑭ ᐊᔮᐤ ᒧᐦᒋᕽ. 26ᐃᐢᐱ ᒫᑲ ᐊᔨᓯᔨᓂᐊᐧᐠ ᓯᔦᐢᑭᓯᒋᐠ ᓴᑳᐢᑳᐧᕽ, ᐳᑎ, ᐋᒧᓯᓯᐹᐢᑲᐧᐟ ᑭ ᐹᐸᐦᑭᑲᐊᐧᐣ; ᓇᒪᐃᐧᔭ ᐊᐃᐧᔭᐠ ᒫᑲ ᑭ ᓴᐢᑲᒧ: ᒋᑫᒫ ᐊᔨᓯᔨᓂᐊᐧᐠ ᑭ ᑯᐢᑕᒪᐧᐠ ᑭᐦᒋᐃᑌᐧᐃᐧᐣ. 27ᒫᑲ ᒑᓇᐦᑕᐣ ᓇᒪᐃᐧᔭ ᐯᐦᑕᐁᐧᐤ ᐅᑖᐃᐧᔭ ᐃᐢᐱ ᑳ ᐊᔮᑳᐧᒥᒪᔨᐟ ᐊᔨᓯᔨᓂᐊᐧ ᐁ ᑭᐦᒋᐃᑌᐧᔨᐟ: ᐁᐊᐧᑯ ᐅᐦᒋ ᑭ ᐃᑎᓯᓇᒼ ᓴᐢᑲᐅᐣ ᐁ ᑕᐦᑯᓇᕽ ᑭ ᑭᐦᑖᓇᒼ ᐊᒧᓯᓯᐹᐢᑲᐧᑎᕽ ᒥᓇ ᑭ ᓴᐢᑲᒧ; ᑭ ᐸᑲᐦᑲᐸᑕᒫᐤ ᒫᑲ. 28ᐁᑲᐧ ᐯᔭᐠ ᐊᔨᓯᔨᓂᐊᐧ ᑭ ᑭᑐᑎᐠ, ᐁ ᐃᑌᐧᔨᐟ, ᑯᑖᐃᐧ ᑭ ᐊᔮᑳᐧᒥᒣᐤ ᐊᔨᓯᔨᓂᐊᐧ ᑭᐦᒋ ᐃᑌᐧᐃᐧᐣ ᑭᑭ, ᐁ ᐃᑌᐧᐟ, ᑭᑕ ᒪᒐᑭᒫᐤ ᐊᓇ ᓈᐯᐤ ᑫ ᒥᒋᑫᐧ ᓈᐣᑕᐤ ᒥᒋᐃᐧᐣ ᐊᓄᐦᐨ ᑳ ᑭᓯᑳᐠ. ᑭ ᓇᓄᐦᑌᓯᓇᐧᐠ ᒫᑲ ᐊᔨᓯᔨᓂᐊᐧᐠ. 29ᐁᑲᐧ ᒑᓇᐦᑕᐣ ᑭ ᐃᑌᐧᐤ, ᓄᑖᐃᐧ ᑭ ᓇᔦᐦᑖᐃᐧ ᑐᑕᒼ ᐊᐢᑭᔨᐤ; ᒫᑎᑲ, ᐋᐧᐸᐦᑕᒧᐠ, ᐁᓯ ᐸᑲᑳᐸᐦᑕᒫᔮᐣ, ᒋᑫᒫ ᐁ ᑭ ᑯᒋᐢᑕᒫᐣ ᐊᐱᓯᐢ ᐅᒪ ᐊᒧᓯᓯᐹᐢᑲᐧᐟ; 30ᐋᐧᐃᐧᐢ ᒫᑲ ᑭᐢᐱᐣ ᐊᔨᓯᔨᓂᐊᐧᐠ ᑭ ᒥᒋᐋᐧᑯᐸᓀ ᐋᐧᓇᑕᐠ ᐊᓂᒪ ᑳ ᑭ ᒥᐢᑲᐦᑭᐠ ᐁ ᒪᓂᐊᐧᑖᑖᒋᐠ ᐅ ᓄᑎᓈᑲᓂᐋᐧᐊᐧ? ᒋᑫᒫ ᐁᑲᐧ ᒥᐢᑕᐦᐃ ᒥᐦᒉᐟ ᑭᑕ ᑭ ᓂᐸᐦᐋᑕᔭᐠ ᐱᓬᐃᐢᑎᓇᐠ?
31ᑭ ᓈᐦᓂᐸᐁᐊᐧᐠ ᒫᑲ ᐱᓬᐃᐢᑎᓇ ᐁᐊᐧᑳᐧᓂᒪ ᐁ ᑭᓯᑳᐠ ᒥᐠᒫᓯᕽ ᐅᐦᒋ ᐋᒋᓬᐊᐣ ᐃᐢᑯ: ᒥᐢᑕᐦᐃ ᒫᑲ ᑭ ᓇᓄᑌᓯᓇᐧᐠ ᐊᔨᓯᔨᓂᐊᐧᐠ. 32ᐁᑯᓯ ᐊᔨᓯᔨᓂᐊᐧᐠ ᑭ ᑳᐧᐢᑯᑐᑕᒪᐧᐠ ᒪᓂᐊᐧᑌᐃᐧᐣ, ᑭ ᐅᑎᐦᑎᓀᐊᐧᐠ ᒫᑲ ᒫᔭᑎᐦᑲᐧ, ᒥᓇ ᒧᐢᑐᓴᐧ ᒥᓇ ᒧᐢᑐᓱᓯᓴ, ᐁᑯᓯ ᑭ ᓂᐸᐁᐊᐧᐠ ᒧᐦᒋᕽ; ᐊᔨᓯᔨᓂᐊᐧᐠ ᒫᑲ ᑭ ᒧᐁᐧᐊᐧᐠ ᑭᑭ ᒥᐦᑯ.
33 #
ᒉᓂᓯᐢ 9:4; ᓬᐃᐱᑎᑲᐢ 7:26,27; 17:10-14; 19:26; ᑎᔪᑕᕒᐊᓇᒥ 12:16,23; 15:23 ᐁᑲᐧ ᑭ ᐃᐧᐦᑕᒪᐁᐧᐊᐧᐠ ᓵᓬᐊ, ᐁ ᐃᑌᐧᒋᐠ, ᒋᐢᐟ ᐊᔨᓯᔨᓂᐊᐧᐠ ᒪᒋᑐᑕᐁᐧᐊᐧᐠ ᑳ ᑎᐯᔨᐦᒋᑫᔨᐟ ᐁ ᑭᑭ ᒥᒋᒋᐠ ᒥᐦᑯ. ᑭᐦ ᐃᑌᐧᐤ ᒫᑲ, ᑭ ᑭ ᐊᐧᓂᑐᑌᓈᐋᐧᐤ; ᐯ ᑎᑎᐱᓇᒪᐃᐧᐠ ᒥᐢᑕᓯᓂ ᐊᓄᐦᐨ ᑳ ᑭᓯᑳᐠ. 34ᓵᓬ ᒫᑲ ᑭᐦ ᐃᑌᐧᐤ, ᐹᐸᐦᑳᐣ ᐃᑐᐦᑌᐠ ᐃᑕ ᐁ ᐊᔮᒋᐠ ᐊᔨᓯᔨᓂᐊᐧᐠ, ᐅᒥᓯ ᒫᑲ ᐃᑎᐦᑯᐠ, ᐯᓯᕽ ᑲᐦᑭᔭᐤ ᓈᐯᐤ ᐅ ᒧᐢᑐᓱᒪ, ᒥᓇ ᑲᐦᑭᔭᐤ ᓈᐯᐤ ᐅ ᒫᔭᑎᐦᑯᒪ, ᐅᑕ ᒫᑲ ᓂᐸᐦᐃᑯᐠ ᒥᓇ ᒥᒋᓱᐠ; ᐁᑳᐃᐧᔭ ᒫᑲ ᐊᐧᓂᑐᑖᕽ ᑳ ᑎᐯᔨᐦᒋᑫᐟ ᑭᑕ ᑭᑭ ᒥᒋᔦᐠ ᒥᐦᑯ. ᑲᐦᑭᔭᐤ ᒫᑲ ᐊᔨᓯᔨᓂᐊᐧᐠ ᐁ ᐃᐦᑕᓯᒋᐠ ᑭ ᐯᓯᐁᐧᐊᐧᐠ ᐅ ᒧᐢᑐᓱᒥᐋᐧᐊᐧ, ᐁᐊᐧᑳᐧᓂᒪ ᐁ ᑎᐱᐢᑳᐠ ᒥᓇ ᑭ ᓂᐸᐁᐊᐧᐠ ᐁᑯᑕ. 35ᓵᓬ ᒫᑲ ᑭ ᐅᓯᑐᐁᐧᐤ ᐸᑭᑎᓈᓱᐃᐧᓈᐱᐢᑯᔨᐤ ᑳ ᑎᐯᔨᐦᒋᑫᔨᐟ; ᐁᐊᐧᑫᐧᔨᐤ ᐊᓂᒪ ᓂᐢᑕᒼ ᐁ ᐅᓯᑐᐋᐧᐟ ᐸᑭᑎᓈᓱᐃᓈᐱᐢᑯᔨᐢ ᑳ ᑎᐯᔨᐦᒋᑫᔨᐟ.
36ᐁᑲᐧ ᓵᓬ ᑭ ᐃᑌᐧᐤ, ᑭᔮᒼ ᓂᐹ ᐱᒥᑎᓴᐋᐧᑖᓂᐠ ᐱᓬᐃᐢᑎᓇᐠ, ᒥᓇ ᓂᓯᐊᐧᓈᒋᐦᐋᑖᓂᐠ ᐱᔨᐢ ᑭᑕ ᐯᑖᐸᕽ, ᐁᑯᓯ ᑭᔮᒼ ᐁᑳᐃᐧᔭ ᐯᔭᐠ ᓈᐯᐤ ᐃᐢᑯᐋᑖᐠ. ᑭ ᐃᑌᐧᐊᐧᐠ ᒫᑲ, ᑭᔮᒼ ᐁ ᐃᓯ ᒥᔮᐧᐱᓯᒥᑯᔭᐣ ᐃᐦᑐᑕ. ᐊᔭᒥᐦᐁᐃᐧᔨᓂᐤ ᒫᑲ ᑭ ᐃᑌᐧᐤ, ᒫᐦᑎ ᑭᓯᐋᐧᐠ ᓈᑖᑖᐠ ᑭᓭᒪᓂᑐ. 37ᓵᓬ ᒫᑲ ᑭᑕ ᐃᐧᐦᑕᒫᑯᐟ ᑭᓭᒪᓂᑐᐊᐧ ᑭ ᑲᑫᐧᒋᒣᐤ, ᓂ ᑲ ᐱᒥᑎᓴᐋᐧᐊᐧᐠ ᒋ ᐱᓬᐃᐢᑎᓇᐠ? ᑭ ᑲ ᐸᑭᑎᓈᐊᐧᐠ ᒋ ᐃᐢᕒᐁᐃᓬᐊ ᐅ ᒋᐦᒋᔨᕽ? ᒫᑲ ᓇᒪᐃᐧᔭ ᑭ ᓇᐢᑫᐧᐊᐧᓯᒥᐠ ᐁᐊᐧᑳᐧᓂᒪ ᐁ ᑭᓯᑳᐠ. 38ᐁᑯᓯ ᓵᓬ ᑭ ᐃᑌᐧᐤ, ᑭᓯᐋᐧᐠ ᐯ ᐃᑐᐦᑌᐠ ᑲᐦᑭᔭᐤ ᑭᔭᐋᐧᐤ ᑳ ᓂᑳᓀᔨᑖᑯᓯᔦᐠ ᐊᔨᓯᔨᓂᑎᐠ; ᑭᐢᑫᔨᑕᒧᐠ ᒫᑲ ᒥᓇ ᐋᐧᐸᐦᑕᒧᐠ ᑖᓂᑕ ᐅᒪ ᐁᔮᐠ ᐅᒪ ᒪᒋᐦᑎᐃᐧᐣ ᐊᓄᐦᐨ ᑳ ᑭᓯᑳᐠ; 39ᒋᑫᒫ, ᐁ ᐱᒫᑎᓯᐟ ᑳ ᑎᐯᔨᐦᒋᑫᐟ, ᑳ ᐱᒪᒋᐋᐟ ᐃᐢᕒᐁᐃᓬᐊ, ᑭᐢᐱᐣ ᐁᐊᐧᑯ ᒑᓇᐦᑕᐣ ᓂᑯᓯᐢ, ᑫᐦᒋᓈ ᑭᑕ ᓂᐱᐤ. ᒫᑲ ᓇᒪᐋᐧᐨ ᐊᐃᐧᔭ ᐁ ᐃᐦᑕᓯᔨᐟ ᐊᔨᓯᔨᓂᐊᐧ ᓇᐢᑫᐧᐊᐧᓯᒥᐠ. 40ᐁᑲᐧ ᒫᑲ ᑭ ᐃᑌᐤ ᑲᐦᑭᔭᐤ ᐃᐢᕒᐁᐃᓬᐊ, ᓇᐸᑌ ᑭᔭᐋᐧᐤ ᐊᔮᐠ, ᐁᑯᓯ ᓂᔭ ᒥᓇ ᒑᓇᐦᑕᐣ ᓂᑯᓯᐢ ᑫᐧᐢᑭᑌ ᓂ ᑲ ᐊᔮᓈᐣ, ᐊᔨᓯᔨᓂᐊᐧᐠ ᒫᑲ ᑭ ᐃᑌᐊᐧᐠ ᓵᓬᐊ, ᐃᐦᑐᑕ ᐁ ᐃᓯ ᒥᔮᐧᐱᓯᒥᑯᔭᐣ. 41#ᓇᒼᐸᕒᐢ 27:21; 1 ᓵᒼᔪᐃᓬ 28:6ᐁᐊᐧᑯ ᐅᐦᒋ ᓵᓬ ᑭ ᐃᑌᐤ ᑳ ᑎᐯᔨᐦᒋᑫᔨᐟ ᐅ ᑭᓭᒪᓂᑐᒪ ᐃᐢᕒᐁᐃᓬ, ᑲᐧᔭᐢᐠ ᑭᐢᑫᔨᑕᒧᐃᐁᐧ. ᓵᓬ ᒫᑲ ᒥᓇ ᒑᓇᐦᑕᐣ ᑭ ᐅᑎᓈᐊᐧᐠ; ᐊᔨᓯᔨᓂᐊᐧᐠ ᒫᑲ ᐃᐧᔭ ᑭ ᐸᐢᐱᐊᐧᐠ. 42ᓵᓬ ᒫᑲ ᑭ ᐃᑌᐧᐤ, ᐊᐃᐧᐸᔨᐦᒋᑫᐠ ᐊᐁᐧᓇ ᑳ ᑐᑕᕽ ᓂᔭ ᐊᐦᐳ ᒑᓇᐦᑕᐣ ᓂᑯᓯᐢ. ᒑᓇᐦᑕᐣ ᒫᑲ ᑭ ᐅᑎᓈᐤ. 43ᐁᑲᐧ ᓵᓬ ᑭ ᐃᑌᐤ ᒑᓇᐦᑕᓇ, ᐃᐧᐦᑕᒪᐃᐧᐣ ᑫᑲᐧᐩ ᑳ ᐃᐦᑐᑕᒪᐣ. ᒑᓇᐦᑕᐣ ᒫᑲ ᑭᐦ ᐃᐧᐦᑕᒪᐁᐧᐤ, ᒥᓇ ᑭ ᐃᑌᐤ, ᐱᑯ ᓂ ᑭ ᑯᒋᐢᑌᐣ ᐊᐱᓯᐢ ᐊᒧᓯᓯᐹᐢᑲᐧᐟ ᓂ ᓴᐢᑲᐅᓂᕽ ᑭᓯᐸᓄᕽ, ᐁᑯᓯ ᒫᑎᑲ, ᐱᑯ ᑭᑕ ᓂᐱᔮᐣ. 44ᓵᓬ ᒫᑲ ᓇᐢᑫᐧᐊᐧᓯᒣᐤ, ᑭᓭᒪᓂᑐ ᐁᑯᓯ ᑲᑕ ᐃᐦᑐᑕᒼ ᒥᓇ ᐊᔨᐋᐧᐠ; ᒋᑫᒫ ᐱᑯ ᑭᑕ ᓂᐱᔭᐣ, ᒑᓇᐦᑕᐣ. 45ᐊᔨᓯᔨᓂᐊᐧᐠ ᒫᑲ ᑭ ᐃᑌᐊᐧᐠ ᓵᓬᐊ, ᑭᑕ ᓂᐱᐤ ᒋ ᒑᓇᐦᑕᐣ, ᐊᓇ ᑳ ᑭ ᐊᑐᐢᑳᑕᕽ ᐅᒪ ᑭᐦᒋ ᐱᒫᒋᐦᐃᐁᐧᐃᐧᐣ ᐃᐢᕒᐁᐃᓬᐃᕽ? ᓇᒪᐃᐧᔭ ᑭᑕ ᑭ ᐃᐦᑭᐣ; ᐁ ᐱᒫᑎᓯᐟ ᑳ ᑎᐯᔨᐦᒋᑫᐟ ᓇᒪᐋᐧᐨ ᐯᔭᐠ ᐃᐧᐢᑕᑲᐩ ᐅᐢᑎᑳᐧᓂᕽ ᐅᐦᒋ ᒧᐦᒋᕽ ᑭᑕ ᐸᑭᑎᓂᔨᐤ; ᒋᑫᒫ ᑭ ᐃᐧᒋ ᐊᑐᐢᑫᒣᐤ ᑭᓭᒪᓂᑐᐊᐧ ᐊᓄᐦᐨ ᑳ ᑭᓯᑳᔨᐠ. ᐁᑯᓯ ᒫᑲ ᐊᔨᓯᔨᓂᐊᐧᐠ ᑭ ᐃᓯ ᐸᐢᐱᐦᐁᐊᐧᐠ ᒑᓇᐦᑕᓇ ᐁᑳ ᑭᑕ ᐅᐦᒋ ᓂᐱᔨᐟ. 46ᓵᓬ ᒫᑲ ᑭ ᐳᓂ ᐱᒥᑎᓴᐁᐧᐤ ᐱᓬᐃᐢᑎᓇ; ᐱᓬᐃᐢᑎᓇᐠ ᒫᑲ ᑭ ᑭᐁᐧᐊᐧᐠ ᐅᐟ ᐊᐢᑭᐋᐧᕽ.
47ᐁᑯᓯ ᓵᓬ ᑭ ᐅᑎᓇᒼ ᑭᐦᒋ ᐅᑭᒫᐃᐧᐃᐧᐣ ᐃᐢᕒᐁᐃᓬᐃᕽ, ᑭ ᓄᑎᓀᐤ ᒫᑲ ᑲᐦᑭᔭᐤ ᑳ ᒪᐃᐧᓀᐢᑳᑯᐟ ᒥᓯᐁᐧ ᐋᐧᓴᑳᒼ, ᒧᐋᐸ, ᒥᓇ ᐋᒪᓇ ᐅᐟ ᐊᐋᐧᓯᒥᓯᔨᐊᐧ, ᒥᓇ ᐃᑕᒪ, ᒥᓇ ᓵᐸ ᑭᐦᒋ ᐅᑭᒪᐊᐧᐠ, ᒥᓇ ᐱᓬᐃᐢᑎᓇ; ᐱᑯ ᐃᑌ ᒫᑲ ᐁ ᐃᓯ ᑫᐧᐢᑭᐟ ᑭ ᓂᓯᐊᐧᓈᒋᐁᐤ. 48ᐁᑯᓯ ᑭ ᓱᐦᑭᓈᑯᒋᑫᐤ, ᑭ ᓈᓂᐸᐁᐤ ᒥᓇ ᐋᒪᓬᐃᑲᐃᑕ, ᒥᓇ ᑭ ᐹᐢᐱᐁᐤ ᐃᐢᕒᐁᐃᓬᐊ ᐅ ᒋᐦᒋᔨᕽ ᐅᐦᒋ ᐊᓂᐦᐃ ᑳ ᓂᓯᐊᐧᓈᒋᐦᐃᑯᔨᐟ.
49ᐁᐊᐧᑯᓂ ᒫᑲ ᐅᑯᓯᓴ ᓵᓬ, ᒑᓇᐦᑕᐣ, ᒥᓇ ᐃᐢᐸᐩ, ᒥᓇ ᒫᓬᑲᐃᓱᐊ; ᐁᐊᐧᑯᓂ ᒫᑲ ᐅᐦᐃ ᐅ ᐃᐧᔪᐃᐧᓂᔨᐊ ᐁ ᐃᓯ ᓂᓯᔨᐟ ᐅᑖᓂᓴ, ᐊᓇ ᐅᒥᓯᒫᐤ ᒥᕒᐋᑊ ᑭ ᐃᓯᔨᐦᑳᓱ, ᐁᑯᓯ ᐅᓯᒥᒫᐤ ᒪᐃᑲᓬ ᑭᐦ ᐃᓯᔨᐦᑳᓱ; 50ᓵᓬ ᒫᑲ ᐃᐧᐊᐧ ᐋᐦᐃᓄᐊᒼ ᑭ ᐃᓯᔨᐦᑳᓱᔨᐊᐧ, ᐅᑖᓂᓴ ᐊᐦᐃᒣᐋᐢ; ᐁᑯᓯ ᐅ ᑭᐦᒋ ᓯᒫᑲᓂᓯᐃᐧᑭᒫᒪ ᐋᑊᓇᕒ ᑭ ᐃᓯᔨᐦᑳᓱᔨᐊᐧ, ᐅᑯᓯᓴ ᓇᕒ, ᓵᓬ ᐅᐦᑯᒥᓴ. 51ᑭᐢ ᒫᑲ ᐁᐊᐧᑯᓂ ᐅᑖᐃᐧᔭ ᓵᓬ; ᐁᑯᓯ ᓇᕒ, ᐋᑊᓇᕒ ᐅᑖᐃᐧᔭ ᐁᐊᐧᑯ ᐃᐧᔭ ᐋᐹᔨᓬ ᐅᑯᓯᓴ.
52ᑭ ᐊᐦᑯ ᓄᑎᓈᐊᐧᐠ ᒫᑲ ᐱᓬᐃᐢᑎᓇ ᐃᐢᑯ ᐁ ᐱᒫᑎᓯᐟ ᓵᓬ; ᑭᐢᐱᐣ ᒫᑲ ᓵᓬ ᐁ ᐋᐧᐸᒫᐟ ᓈᐯᐊᐧ ᐁ ᓱᐦᑳᔭᐃᐧᓯᔨᐟ, ᐊᐦᐳ ᓈᐯᐊᐧ ᐁ ᓂᐦᑕ ᓄᑎᓂᑫᔨᐟ ᑭ ᐅᑎᓀᐤ ᑭᑕ ᐊᔮᐋᐧᐟ.
Currently Selected:
ᓂᐢᑕᒼ ᓵᒼᔪᐃᓬ 14: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
