ᓂᐢᑕᒼ ᓵᒼᔪᐃᓬ 11
11
1ᐁᑯᐢᐱ ᒫᑲ ᓀᐦᐊᐢ ᐊᓇ ᐋᒪᓇᐃᐟ ᑭ ᐯ ᐃᑐᐦᑌᐤ, ᑭ ᑲᐯᓯᐤ ᒫᑲ ᒋᑭ ᒉᐱᐢᑭᓬᐃᔭᐟ: ᑲᐦᑭᔭᐤ ᒫᑲ ᒉᐱᐢ ᐊᔨᓯᔨᓂᐊᐧ ᑭ ᐃᑎᐠ ᓀᐦᐋᐢ, ᐃᐧᒋᐦᐃᓯᒋᑫᒥᓈᐣ ᐁᑯᓯ ᑭ ᑲ ᐊᑐᐢᑳᑎᓈᐣ. 2ᓀᐦᐋᐢ ᒫᑲ ᐊᓇ ᐋᒪᓇᐃᐟ ᑭ ᓇᐢᑫᐧᐊᐧᓯᒣᐤ, ᐅᒪ ᐱᑯ ᓇᐢᑯᒧᔦᑯ ᑭ ᑲ ᐃᐧᒋᐃᓯᒋᑫᒥᑎᓈᐋᐧᐤ ᑭᑕ ᑫᒋᑳᐧᐸᐅᑕᑯᐠ ᑲᐦᑭᔭᐤ ᑭ ᑭᐦᒋᓂᐢᑭᐋᐧᕽ ᐃᑌᐦᑫ, ᐁᑯᓯ ᐁᐊᐧᑯ ᑭᑕ ᒪᓂ ᓇᓀᐯᐃᐧᐊᑭᐠ ᑲᐦᑭᔭᐤ ᐃᐢᕒᐁᐃᓬ. 3ᐊᓂᑭ ᒫᑲ ᑳ ᓂᑳᓀᔨᑖᑯᓯᒋᐠ ᒉᐱᓯᕽ ᑭ ᐃᑌᐊᐧᐠ, ᒥᔨᓈᐣ ᑌᐸᑯᑊ ᑭᓯᑳᐊᐧ ᑭᑕ ᐃᑎᓴᐋᐧᔮᐦᑭᐠ ᐅᑖᒋᒧᐊᐧᐠ ᒥᓯᐁᐧ ᐃᐢᕒᐁᐃᓬ ᐊᐢᑭᕽ: ᐁᑲᐧ ᒫᑲ, ᑭᐢᐱᐣ ᐁᑳ ᐊᐃᐧᔭᐠ ᐃᐦᑖᒋ ᑭᑕ ᐱᒫᒋᐦᐃᑯᔮᕽ, ᑭ ᑲ ᐯ ᓈᑎᑎᓈᐣ.
4ᐁᑲᐧ ᑭ ᑕᑯᓯᓇᐧᐠ ᐅᑖᒋᒧᐊᐧᐠ ᑭᐱᐊᐃᕽ ᐃᑕ ᓵᓬ ᑳ ᐊᔮᐟ, ᑭ ᐋᒋᒣᐊᐧᐠ ᒫᑲ ᐁ ᓇᑐᐦᑖᑯᒋᐠ ᑲᐦᑭᔭᐤ ᐊᔨᓯᔨᓂᐊᐧ; ᑲᐦᑭᔭᐤ ᒫᑲ ᐊᔨᓯᔨᓂᐊᐧᐠ ᑭ ᐯᐦᑖᑯᓯᐊᐧᐠ, ᒥᓇ ᑭ ᒫᑐᐊᐧᐠ. 5ᐳᑎ ᒫᑲ ᓵᓬ ᑭ ᐯᒋᑎᓴᐁᐧᐤ ᒧᐢᑐᓴᐧ ᑭᐢᑎᑳᓂᕽ ᐅᐦᒋ; ᐁᑯᓯ ᓵᓬ ᑭ ᐃᑌᐧᐤ, ᑖᓀᐦᑭ ᐅᒪ ᐊᔨᓯᔨᓂᐊᐧᐠ ᑳ ᒫᑐᒋᐠ? ᑭ ᐃᐧᐦᑕᒪᐁᐧᐊᐧᐠ ᒫᑲ ᑳ ᐃᑖᒋᒧᔨᐟ ᐊᓂᐦᐃ ᓈᐯᐊᐧ ᒉᐱᓯᕽ ᐅᐦᒋ.
6ᐅᐟ ᐊᐦᒑᐦᑯᔨᐊᐧ ᒫᑲ ᑭᓭᒪᓂᑐᐊᐧ ᑭ ᐅᑎᐦᑎᐠ ᓵᓬ ᐃᐢᐱ ᐱᔦᐦᑕᕽ ᐊᓂᐦᐃ ᐋᒋᒧᐃᐧᓇ, ᐁᑯᓯ ᒥᐢᑕᐦᐃ ᑭ ᓴᐢᑲᐊᒫᐧᐣ ᐅ ᑭᓯᐋᐧᓯᐃᐧᐣ. 7ᑭᐦ ᐅᑎᓀᐤ ᒫᑲ ᐯᔭᑳᐧᐢᑯᒣᐤ ᒧᐢᑐᓴᐧ, ᐁᑯᓯ ᐁ ᑭ ᐱᑭᐢᑭᑲᐋᐧᐟ, ᑭ ᐃᑎᓴᐊᒼ ᒫᑲ ᐃᐧᔮᐢ ᒥᓯᐁᐧ ᐃᐢᕒᐁᐃᓬ ᐊᐢᑭᕽ ᐁ ᑕᐦᑯᓇᒧᐋᐟ ᐅᑕᒋᒧᐊᐧ, ᐁ ᐃᑌᐧᐟ, ᐱᑳᐧᓇ ᐊᔨᓯᔨᓂᐤ ᐁᑳ ᑫ ᐱᒥᑎᓴᐋᐧᑫᐧ ᓵᓬᐊ ᒥᓇ ᓵᒼᔪᐃᓬᐊ, ᐁᑯᓯ ᑫ ᐃᑐᑖᒥᐦᐟ ᐅ ᒧᐢᑐᓱᒪ. ᐁᑯᓯ ᐅ ᑯᐢᑎᑯᐃᐧᐣ ᑭᓭᒪᓂᑐ ᑭ ᐅᑎᐦᑎᑲᐧᐠ ᐊᔨᓯᔨᓂᐊᐧᐠ, ᑭ ᐯ ᒫᒪᐃᐧᐃᑐᐦᑌᐊᐧᐠ ᒫᑲ. 8ᐃᐢᐱ ᒫᑲ ᐁᑭᒫᐟ ᐊᓂᑕ ᐱᓭᑭᕽ, ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᓂᐢᑖᐧᐤ ᒥᑖᐦᑐᒥᑕᓇᐤ ᑕᐦᑐ ᑭᐦᒋᒥᑖᐦᑐᒥᑕᓇᐤ ᑭ ᐃᐦᑕᓯᐊᐧᐠ, ᐁᑯᓯ ᒍᑕ ᐊᔨᓯᔨᓂᐊᐧᐠ ᓂᐢᑐᒥᑕᓇᐤ ᑕᐦᑐ ᑭᐦᒋᒥᑖᐦᑐᒥᑕᓇᐤ. 9ᑭᐦ ᐃᑌᐊᐧᐠ ᒫᑲ ᐅᑖᒋᒧᐊᐧ ᑳ ᑭ ᑕᑯᓯᓂᔨᐟ, ᐅᒥᓯ ᑭ ᑲ ᐃᑖᐋᐧᐊᐧᐠ ᐊᔨᓯᔨᓂᐊᐧᐠ ᒉᐱᐢᑭᓬᐃᔭᑎᕽ, ᐋᐧᐸᑫ ᓈᐣᑕᐤ ᐊᑎ ᑭᓵᓯᑫᒋ ᐱᓯᒼ, ᑭ ᑲ ᐃᐧᒋᐦᐃᑲᐃᐧᓈᐋᐧᐤ. ᐅᑖᒋᒧᐊᐧᐠ ᒫᑲ ᑭ ᐯ ᓇᑕᐃᐧ ᐃᐧᐦᑕᒪᐁᐧᐊᐧᐠ ᒉᐱᐢ ᐊᔨᓯᔨᓂᐊᐧ ᐁᑯᓯ ᑭ ᒥᔦᐧᔨᑕᒥᔨᐊᐧ. 10ᐁᐊᐧᑯ ᐅᐦᒋ ᒉᐱᐢ ᐊᔨᓯᔨᓂᐊᐧᐠ ᑭ ᐃᑌᐧᐊᐧᐠ, ᐋᐧᐸᑫ ᑭ ᑲ ᐯ ᐊᔭᐃᐧᑐᑖᑎᓈᐣ, ᑭ ᑲ ᐃᐦᑐᑕᐃᐧᓈᐣ ᒫᑲ ᐱᑯ ᐁ ᐃᓯ ᒥᔦᐧᔨᑕᒣᐠ ᑭᔭᐋᐧᐤ. 11ᑭ ᐊᔨᐢᐸᔨᐤ ᒫᑲ ᐁ ᐊᑎ ᐋᐧᐸᓂᔨᐠ ᓵᓬ ᓂᐢᑕᐧᔭᐠ ᑭ ᐅᔨᑳᐸᐃᐧᐁᐤ ᐊᔨᓯᔨᓂᐊᐧ, ᑭ ᒧᐢᑭᐢᑕᐁᐧᐊᐧᐠ ᒫᑲ ᐅᓇᑐᐸᔨᐊᐧ ᐃᐧᐸᐨ ᑫᑭᓭᐹ, ᑭ ᓂᐸᐁᐊᐧᐠ ᒫᑲ ᐋᒪᓇᐃᑕ ᐱᔨᐢ ᐁ ᑭᓵᐢᑌᐠ ᐁ ᑭᓯᑳᐠ; ᑭ ᐊᔨᐦᑭᐣ ᒫᑲ ᑕᐦᑐ ᑳ ᐃᐢᑯᐃᐦᒋᐠ ᐁ ᐃᓯ ᐱᐋᐧᒧᑳᑎᐦᒋᐠ ᓇᒪ ᐋᐧᐊᐧᐨ ᑲᓇᑫ ᓂᓱ ᐃᐧᒉᑐᐊᐧᐠ.
12ᐊᔨᓯᔨᓂᐊᐧᐠ ᒫᑲ ᑭ ᐃᑌᐊᐧᐠ ᓵᒼᔪᐃᓬᐊ, ᐊᐁᐧᓈᓇ ᑲ ᑭ ᐃᑌᐧᐟ, ᓵᓬ ᒋ ᑭ ᑲ ᑎᐯᔨᒥᓇᐤ? ᐯᓯᐦᑯᐠ ᐁᐊᐧᑯᓂᐠ ᐊᔨᓯᔨᓂᐊᐧᐠ ᑭᑕ ᓂᐸᐦᐋᔭᑯᐠ. 13ᓵᓬ ᒫᑲ ᑭ ᐃᑌᐧᐤ, ᓇᒪᐃᐧᔭ ᐊᐃᐧᔭᐠ ᐊᔨᓯᔨᓂᐤ ᑭᑕ ᓂᐸᐦᐋᐤ ᐊᓄᐦᐨ ᑳ ᑭᓯᑳᐠ, ᒋᑫᒫ ᐊᓄᐦᐨ ᑳ ᑭᓯᑳᐠ ᑳ ᑎᐯᔨᐦᒋᑫᐟ ᑭ ᐊᑐᐢᑳᑕᒼ ᐱᒫᒋᐦᐃᐁᐧᐃᐧᐣ ᐃᐢᕒᐁᐃᓬᐃᕽ.
14ᐁᑲᐧ ᓵᒼᔪᐃᓬ ᑭ ᐃᑌᐤ ᐊᔨᓯᔨᓂᐊᐧ, ᑭᔮᒼ ᐃᑐᐦᑌᑖᐠ ᑭᓬᑳᓬᐃᕽ, ᒥᓇ ᑭᐦᑖᐧᒼ ᐅᔭᐢᑖᑖᐠ ᑭᐦᒋ ᐅᑭᒫᐃᐧᐃᐧᐣ ᐁᑯᑕ. 15ᑲᐦᑭᔭᐤ ᒫᑲ ᐊᔨᓯᔨᓂᐊᐧ ᑭ ᐃᑐᐦᑌᐊᐧᐠ ᑭᓬᑳᓬᐃᕽ; ᐁᑯᑕ ᒫᑲ ᑭ ᑭᐦᒋ ᐅᑭᒫᑫᐊᐧᐠ ᓵᓬᐊ ᐅᐦᑎᐢᑲᐤ ᑳ ᑎᐯᔨᐦᒋᑫᔨᐟ ᑭᓬᑳᓬᐃᕽ; ᐁᑯᑕ ᒫᑲ ᑭ ᐸᑭᑎᓇᒪᐧᐠ ᐸᑭᑎᓂᑫᐃᐧᓇ ᐯᔭᐦᑕᑫᔨᒧᐃᐧ ᐸᑭᑎᓈᓱᐃᐧᓇ ᐅᐦᑎᐢᑲᐤ ᑳ ᑎᐯᔨᐦᒋᑫᔨᐟ; ᐁᑯᑕ ᒫᑲ ᓵᓬ ᒥᓇ ᑲᐦᑭᔭᐤ ᐃᐢᕒᐁᐃᓬ ᐊᔨᓯᔨᓂᐊᐧᐠ ᒥᐢᑕᐦᐃ ᑭ ᒪᒪᐦᑖᑯᓯᐊᐧᐠ.
Currently Selected:
ᓂᐢᑕᒼ ᓵᒼᔪᐃᓬ 11: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
