ᓂᐢᑕᑦ ᑭᐦᒋ ᐅᑭᒫᐊᐧᐠ 12
12
1ᕒᐃᐦᐋᐳᐊᒼ ᒫᑲ ᑭ ᐃᑐᐦᑌᐤ ᓯᑫᒥᕽ; ᒋᑫᒫ ᑲᐦᑭᔭᐤ ᐃᐢᕒᐁᐃᓬ ᑭ ᐃᑐᐦᑌᐊᐧᐠ ᓯᑫᒥᕽ ᑭᑕ ᑭᐦᒋ ᐅᑭᒫᑳᑖᒋᐠ. 2ᑭ ᐊᔨᑭᐣ ᒫᑲ, ᐃᐢᐱ ᒉᕒᐊᐳᐊᒼ ᐅᑯᓯᓴ ᓂᐹᐟ ᐱᔦᐦᑕᕽ, (ᒋᑫᒫ ᑫᔮᐱᐨ ᑭ ᐊᔮᐤ ᐃᒋᑊᑎᕽ ᐃᑌ ᑳ ᑭ ᐃᑖᒧᐟ ᐁ ᑕᐸᓯᐋᐟ ᑭᐦᒋ ᐅᑭᒫᐊᐧ ᓵᓬᐊᒪᓇ, ᐁᑯᓯ ᒉᕒᐊᐳᐊᒼ ᑭ ᐊᔮᐤ ᐃᒋᑊᑎᕽ, 3ᑭ ᐃᓯᑎᓴᐦᐅᐁᐧᐊᐧᐠ ᒫᑲ ᐁᑯᓯ ᑭ ᐯᓯᐁᐧᐊᐧᐠ;) ᒉᕒᐊᐳᐊᒼ ᒥᓇ ᑲᐦᑭᔭᐤ ᐁ ᒫᒪᐁᐧᔭᑎᒋᐠ ᐃᐢᕒᐁᐃᓬ ᑭ ᐯ ᐃᑐᐦᑌᐊᐧᐠ ᒥᓇ ᑭ ᑭᑐᑌᐊᐧᐠ ᕒᐃᐦᐋᐳᐊᒪ, ᐁ ᐃᑌᐧᒋᐠ, 4ᑯᑖᐃᐧ ᑭ ᐋᐦᑫᐧᔨᑖᑯᑖᐤ ᑳ ᑭ ᐃᓯ ᑖᐱᐢᑲᐦᐃᑯᔮᕽ; ᐁᑲᐧ ᒫᑲ ᐃᓯᑖᐤ ᑳ ᐊᐦᑫᐧᔨᑖᑲᐧᓂᔨᐠ ᐅᐟ ᐊᑐᐢᑫᐃᐁᐧᐃᐧᐣ ᑯᑖᐃᐧ ᒥᓇ ᑳ ᐃᓯ ᑯᓯᑲᐧᓂᔨᐠ ᑳ ᑭ ᐃᓯ ᑖᐱᐢᑲᐦᐃᑯᔮᕽ, ᓇᐊᐧᐨ ᑭᑕ ᔮᑲᓯᐠ, ᐁᑯᓯ ᑭ ᑲ ᐊᑐᐢᑫᐢᑖᑎᓈᐣ. 5ᑭ ᐃᑌᐤ ᒫᑲ, ᓯᐯᐧᑌᐠ ᑭᔮᒼ ᓂᐢᑐ ᑭᓯᑳᐊᐧ ᐃᔨᑯᕽ, ᐁᑲᐧ ᒥᓇ ᐯ ᓇᑕᐋᐧᐸᒥᑫᐠ. ᐁᑯᓯ ᐊᔨᓯᔨᓂᐊᐧᐠ ᑭ ᓯᐯᐧᑌᐊᐧᐠ.
6ᑭᐦᒋ ᐅᑭᒫᐤ ᕒᐃᐦᐋᐳᐊᒼ ᒫᑲ ᑭ ᐊᔭᒥᐦᐁᐤ ᑭᓭᔨᓂᐊᐧ, ᐊᓂᐦᐃ ᑳ ᑭ ᐅᑎᐢᑲᐃᐧᑳᐸᐃᐧᐢᑕᐋᔨᐟ ᓵᓬᐊᒪᓇ ᐅᑖᐃᐧᔭ, ᒣᑳᐧᐨ ᑫᔮᐱᐨ ᐁ ᐱᒫᑎᓯᔨᐟ, ᐅᒥᓯ ᐁ ᑭ ᐃᑖᐟ, ᑖᓂᓯ ᑭᔭᐋᐧᐤ ᑫ ᐃᑕᓱᐁᐧᔦᐠ ᑭᑕ ᐃᓯ ᓇᐢᑫᐧᐊᐧᓯᒪᑭᐠ ᐅᑭ ᐊᔨᓯᔨᓂᐊᐧᐠ? 7ᑭ ᐊᔭᒥᐁᐧᐊᐧᐠ ᒫᑲ ᐁ ᐃᑌᐧᒋᐠ, ᑭᐢᐱᐣ ᐃᑕᐱᐃᓱᔭᓂ ᐅᐟ ᐊᑐᐢᑫᔮᑲᓂᐋᐧᐊᐧ ᐅᑭ ᐊᔨᓯᔨᓂᐊᐧᐠ ᐊᓄᐦᐨ ᑳ ᑭᓯᑳᐠ ᒥᓇ ᐃᐧ ᐊᑐᐢᑲᐊᐧᑖᐧᐃᐧ, ᒥᓇ ᓇᐢᑫᐧᐊᐧᓯᐦᐊᑖᐧᐃᐧ, ᒥᓇ ᒥᔪ ᑭᑐᑕᑖᐧᐃᐧ, ᐁᑲᐧ ᑭ ᑲ ᐅᐟ ᐊᑐᐢᑫᔮᑲᓂᐣ ᑳᑭᑫ. 8ᒫᑲ ᑭ ᐁᐧᐱᓇᒼ ᐅᐟ ᐃᑕᓱᐁᐧᐃᐧᓂᔨᐤ ᑭᓭᔨᓂᐊᐧ, ᑳ ᑭ ᒥᔨᑯᐟ, ᐁᑯᓯ ᑭ ᐊᔭᒥᐦᐁᐤ ᐅᐢᑭᓂᑭᐊᐧ ᑳ ᑭ ᐃᐧᒋᐅᐦᐱᑭᒥᑯᐟ ᒥᓇ ᑳ ᐅᐦᑎᐢᑲᐃᐧᑳᐸᐃᐧᐢᑖᑯᐟ. 9ᑭ ᐃᑌᐤ ᒫᑲ, ᑖᓂᓯ ᑭᔭᐋᐧᐤ ᐁᑕᓱᐁᐧᔦᐠ ᑭᑕ ᐃᓯ ᓇᐢᑫᐧᐊᐧᓯᒪᑭᐠ ᐅᑭ ᐊᔨᓯᔨᓂᐊᐧᐠ, ᑳ ᑭ ᑭᑐᓯᒋᐠ, ᐁ ᐃᑌᐧᒋᐠ, ᔮᑭᐦᑖ ᐊᓂᒪ ᑳ ᑭ ᐃᓯ ᑖᐱᐢᑲᐦᐃᑯᔮᕽ ᑯᑖᐃᐧ? 10ᐊᓂᐦᐃ ᒫᑲ ᐅᐢᑭᓂᑭᐊᐧ ᑳ ᑭ ᐃᐧᒋᐅᐱᑭᒥᑯᐟ ᑭ ᐊᔭᒥᐦᐁᐠ ᐁ ᐃᑌᐧᔨᐟ, ᐅᒥᓯ ᑭ ᑲ ᐃᑖᐊᐧᐠ ᐅᑭ ᐊᔨᓯᔨᓂᐊᐧᐠ ᑳ ᑭ ᑭᑐᑎᐢᑭᐠ ᐁ ᐃᑌᐧᒋᐠ, ᑯᑖᐃᐧ ᐁ ᑯᓯᑲᐧᓂᔨᐠ ᓂ ᑭ ᑖᐱᐢᑲᐦᐃᑯᓈᐣ, ᒫᑲ ᑭᔭ ᔮᐦᑭᓇᒪᐃᐧᓈᐣ; ᐅᒥᓯ ᑭ ᑲ ᐃᓯ ᑭᑐᑖᐊᐧᐠ, ᓂᐟ ᐊᐱᐢᒋᒋᐦᒑᓂᐢ ᓇᐊᐧᐨ ᒥᓵᐤ ᐃᔨᑯᕽ ᓄᑖᐃᐧ ᐁ ᐃᐢᐱᑖᐢᑯᔭᐁᐧᐟ. 11ᐁᑲᐧ ᒫᑲ ᓄᑖᐃᐧ ᐁ ᑭ ᓇᔭᑕᐃᑯᔦᐠ ᐁ ᑯᓯᑯ ᑖᐱᐢᑲᐦᐃᑯᔦᐠ, ᓂ ᑲ ᑕᑯᐦᑖᐣ ᑳ ᐃᓯ ᑖᐱᐢᑲᐦᐃᑲᐃᐧᔦᐠ; ᓄᑖᐃᐧ ᑭ ᑭ ᑲᑫᐢᑭᒧᐦᐃᑯᐋᐧᐤ ᐸᓴᐢᑌᐃᑲᓇ ᐁ ᐋᐸᒋᐦᑖᐟ, ᒫᑲ ᓂᔭ ᑭ ᑲ ᑲᑫᐢᑭᒧᐃᑎᓈᐋᐧᐤ ᐅᒋᐢᑕᐅᐁᐧᐊᐧᐠ ᐁ ᐋᐸᒋᐊᒋᐠ.
12ᐁᑯᓯ ᒫᑲ ᒉᕒᐊᐳᐊᒼ ᒥᓇ ᑲᐦᑭᔭᐤ ᐊᔨᓯᔨᓂᐊᐧᐠ ᑭ ᐯ ᓈᑌᐊᐧᐠ ᕒᐃᐦᐋᐳᐊᒪ ᐁ ᐊᑎ ᓂᐢᑐ ᑭᓯᑳᔨᐠ, ᐃᔨᑯᕽ ᑳ ᑭ ᐃᑌᐧᔨᐟ ᑭᐦᒋ ᐅᑭᒫᐊᐧ ᐁ ᐃᑌᐧᔨᐟ ᐯ ᓇᑕᐋᐧᐸᒥᑫᐠ ᒥᓇ ᓂᐢᑐ ᑭᓯᑳᑭ. 13ᑭᐦᒋ ᐅᑭᒫᐤ ᒫᑲ ᑭ ᑭᓯᓇᐢᑫᐧᐊᐧᓯᒣᐤ ᐊᔨᓯᔨᓂᐊᐧ ᒥᓇ ᑭ ᐁᐧᐱᓇᒼ ᑭᓭᔨᓂᐊᐧ ᐅᐟ ᐃᑕᓱᐁᐧᐃᐧᓂᔨᐤ ᑳ ᑭ ᒥᔨᑯᐟ; 14ᑭ ᐃᓯ ᑭᑐᑌᐤ ᒫᑲ ᑳ ᑭ ᐃᑕᓱᐁᐧᔨᐟ ᐅᐢᑭᓂᑭᐊᐧ, ᐁ ᐃᑌᐧᐟ, ᓄᑖᐃᐧ ᐁ ᑯᓯᑲᐧᓂᔨᐠ ᑭ ᑭ ᑖᐱᐢᑲᐦᐃᑯᐋᐧᐤ, ᒫᑲ ᓂᔭ ᑭ ᑲ ᑕᑯ ᑖᐱᐢᑲᐦᐃᑎᓈᐋᐧᐤ, ᓄᑖᐃᐧ ᑭ ᑭ ᑲᑫᐢᑭᒧᐦᐃᑯᐋᐧᐤ ᐸᓴᐢᑌᐃᑲᓇ ᐁ ᐋᐸᒋᐦᑖᐟ, ᒫᑲ ᓂᔭ ᑭ ᑲ ᑲᑫᐢᑭᒧᐃᑎᓈᐋᐧᐤ ᐅᒋᐢᑕᐅᐁᐧᐊᐧᐠ ᐁ ᐋᐸᒋᐊᑭᐠ. 15ᐁᑯᓯ ᒫᑲ ᑭᐦᒋ ᐅᑭᒫᐤ ᓇᒪᐃᐧᔭ ᓇᑐᐦᑕᐁᐧᐤ ᐊᔨᓯᔨᓂᐊᐧ; ᒋᑫᒫ ᑳ ᑎᐯᔨᐦᒋᑫᐟ ᐅᒪ ᑭ ᐅᐦᒋᐸᔨᑖᐤ, ᑭᑕ ᐋᔮᑕᐢᑖᐟ ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ, ᑳ ᑭ ᐃᑌᐧᐋᐟ ᐊᐦᐊᐃᒐᐊᐧ ᐊᓂᐦᐃ ᓵᐃᓬᐆᓇᐃᑕ ᑭᑕ ᐃᑖᔨᐟ ᒉᕒᐊᐳᐊᒪ ᐅᑯᓯᓴ ᓂᐹᐟ.
16 #
2 ᓵᒼᔪᐃᓬ 20:1
ᐃᐢᐱ ᒫᑲ ᑲᐦᑭᔭᐤ ᐊᔨᓯᔨᓂᐊᐧᐠ ᐃᐧᔮᐸᐦᑕᑭᐠ ᑭᐦᒋ ᐅᑭᒫᐊᐧ ᐁᑳ ᐁ ᓇᑐᐦᑖᑯᒋᐠ, ᐊᔨᓯᔨᓂᐊᐧᐠ ᑭ ᓇᐢᑫᐧᐊᐧᓯᒣᐊᐧᐠ ᑭᐦᒋ ᐅᑭᒫᐊᐧ ᐁ ᐃᑌᐧᒋᐠ, ᑫᑲᐧᐩ ᐃᐧᔨᒋᐦᐃᐁᐧᔮᕽ ᑌᐱᐟ? ᒥᓇ ᓇᒪ ᑫᑲᐧᐩ ᑎᐯᔨᒋᑲᐣ ᓂᐟ ᐊᔮᓈᐣ ᐅᑯᓯᓴ ᒉᓯ; ᑭᑭᐋᐧᕽ ᐃᑐᐦᑌᐠ ᐃᐢᕒᐁᐃᓬ; ᐁᑲᐧ ᒫᑲ ᑭᔭ ᑭᑖᐸᑕᒫᓱ ᑭ ᐋᐧᐢᑳᐦᐃᑲᐣ ᑌᐱᐟ. ᐁᑯᓯ ᒫᑲ ᐃᐢᕒᐁᐃᓬ ᑭ ᐃᑐᐦᑌᐊᐧᐠ ᐃᐧᑭᐋᐧᕽ. 17ᒫᑲ ᐃᐧᔭ ᐊᓂᑭ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑳ ᐅᐟ ᐃᐦᑖᐃᐧᓂᒋᐠ ᒍᑕ ᐅᑌᓈᕽ ᕒᐃᐦᐋᐳᐊᒼ ᑭ ᑎᐯᔨᒣᐤ. 18ᐁᑲᐧ ᑭᐦᒋ ᐅᑭᒫᐤ ᕒᐃᐦᐋᐳᐊᒼ ᑭ ᐃᓯᑎᓴᐁᐧᐤ ᐊᑖᕒᐊᒪ ᑳ ᑎᐯᔨᐦᑕᒥᔨᐟ ᐊᑐᐢᑫᐃᐁᐧᐃᐧᐣ; ᑲᐦᑭᔭᐤ ᒫᑲ ᐃᐢᕒᐁᐃᓬ ᑭ ᐱᒫᐧᐱᐢᑲᐁᐧᐊᐧᐠ ᐊᓯᓂᔭ ᐅᐦᒋ ᐁᑯᓯ ᑭ ᓇᐱᐤ. ᑭᐦᒋ ᐅᑭᒫᐤ ᕒᐃᐦᐋᐳᐊᒼ ᒫᑲ ᑭ ᑲᑫᐧᔮᐅ ᐁ ᐳᓯᐟ ᐅ ᑎᑎᐱᑖᐹᓈᐢᑯᕽ ᒉᕒᐅᓴᓬᐊᒥᕽ ᐁ ᐃᑖᒧᐟ. 19ᐁᑯᓯ ᒫᑲ ᐃᐢᕒᐁᐃᓬ ᑭ ᓇᑲᑕᒪᐧᐠ ᑌᐱᐟ ᐃᐧᑭᔨᐤ ᐱᔨᐢ ᐊᓄᐦᐨ ᑳ ᑭᓯᑳᐠ. 20ᑭ ᐊᔨᑭᐣ ᒫᑲ ᐃᐢᐱ ᑲᐦᑭᔭᐤ ᐃᐢᕒᐁᐃᓬ ᑳ ᐯᐦᑕᐦᑭᐠ ᒉᕒᐊᐳᐊᒪ ᑳᐃᐧ ᐁ ᑭ ᐯ ᑕᑯᓯᓂᔨᐟ ᑭ ᐃᓯᑎᓴᐦᐅᐁᐧᐊᐧᐠ ᐁ ᑭ ᓇᑐᒫᒋᐠ ᒫᒪᐁᐧᔭᑎᓈᓂᕽ, ᐁᑯᓯ ᑭ ᑭᐦᒋ ᐅᑭᒫᑳᑌᐊᐧᐠ ᑭᑕ ᑎᐯᔨᒫᔨᐟ ᑲᐦᑭᔭᐤ ᐃᐢᕒᐁᐃᓬᐊ; ᓇᒪᐃᐧᔭ ᐊᐃᐧᔭᐠ ᐱᒥᑎᓴᐁᐧᐤ ᐊᓂᐦᐃ ᑌᐱᑕ ᐃᐧᑭᔨᕽ ᐱᑯ ᒍᑕ ᐅ ᐱᐢᑭᑐᑌᐃᐧᓯᐃᐧᐣ.
21ᐃᐢᐱ ᒫᑲ ᕒᐃᐦᐋᐳᐊᒼ ᑳ ᑕᑯᓯᕽ ᒉᕒᐅᓴᓬᐊᒥᕽ, ᑭ ᒫᒪᐃᐧ ᓇᑐᒣᐤ ᑲᐦᑭᔭᐤ ᐅ ᐋᐧᐢᑳᐦᐃᑲᓂᔨᕽ ᒍᑕ, ᒥᓇ ᐯᐣᒋᒪᐣ ᐅ ᐱᐢᑭᑐᑌᐃᐧᓯᐃᐧᐣ, ᒥᑖᐦᑐᒥᑕᓇᐤ ᐊᔨᓈᓀᒥᑕᓇᐤ ᐊᔨᐊᐧᐠ ᑕᐦᑐ ᑭᐦᒋᒥᑖᐦᑐᒥᑕᓇᐤ ᓇᐊᐧᓱ ᓈᐯᐊᐧᐠ, ᐁ ᓂᐦᑕ ᓄᑎᓂᑫᒋᐠ, ᑭᑕ ᓄᑎᓇᒋᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓯᔨᐊᐧ, ᑳᐃᐧ ᑭᐦᒋ ᐅᑭᒫᐃᐧᐃᐧᐣ ᑭᑕ ᑲᐢᑭᑕᒪᐊᒋᐠ ᕒᐃᐦᐋᐳᐊᒪ ᐅᑯᓯᓴ ᓵᓬᐊᒪᐣ. 22ᒫᑲ ᑭᓭᒪᓂᑐ ᐅᐟ ᐃᑌᐧᐃᐧᐣ ᑭ ᐅᑎᐦᑎᐠ ᓯᒣᐋᔭ ᑭᓭᒪᓂᑐ ᐅᐟ ᐊᔨᓯᔨᓂᒪ ᐁ ᐃᑎᑯᐟ, 23ᐃᐧᐦᑕᒪᐤ ᕒᐃᐦᐋᐳᐊᒼ ᐅᑯᓯᓴ ᓵᓬᐊᒪᐣ ᒍᑕ ᑭᐦᒋ ᐅᑭᒫᐤ, ᒥᓇ ᑲᐦᑭᔭᐤ ᐅ ᐋᐧᐢᑳᐦᐃᑲᓂᕽ ᒍᑕ ᒥᓇ ᐯᐣᒋᒪᐣ, ᒥᓇ ᑲᐦᑭᔭᐤ ᑯᑕᑲᐠ ᐊᔨᓯᔨᓂᐊᐧᐠ, ᑭᑕ ᐃᑕᒋᐠ, 24ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ, ᓇᒪᐃᐧᔭ ᑭ ᑲ ᐃᑐᐦᑖᓈᐋᐧᐤ, ᐊᐦᐳ ᓇᒪᐃᐧᔭ ᑭ ᑲ ᓄᑎᓈᐋᐧᐊᐧᐠ ᑭᒋᐋᐧᒥᐋᐧᐊᐧᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ; ᑭᐁᐧᐠ, ᑲᐦᑭᔭᐤ ᐊᔨᓯᔨᓂᐤ ᐃᐧᑭᕽ; ᒋᑫᒫ ᐅᒪ ᓂᔭ ᑳ ᐅᐦᒋᐸᔨᐠ ᐁᑯᓯ ᑭ ᓇᑐᐦᑕᒪᐧᐠ ᐅᐟ ᐃᑌᐧᐃᐧᓂᔨᐤ ᑳ ᑎᐯᔨᐦᒋᑫᔨᐟ, ᒥᓇ ᑭ ᐊᑎ ᑭᐁᐊᐠ, ᐁ ᐃᑌᐧᔨᐟ ᑳ ᑎᐯᔨᐦᒋᑫᔨᐟ.
25ᐁᑲᐧ ᒉᕒᐊᐳᐊᒼ ᑭ ᐅᓯᐦᑖᐤ ᓯᑫᒼ ᐊᐧᒋᐊᐧᐢᑭᕽ ᐃᐸᕒᐁᐃᒥᕽ, ᒥᓇ ᐁᑯᑕ ᑭ ᐊᔮᐤ; ᐁᑯᑕ ᒫᑲ ᑭ ᐅᐦᒋ ᐊᐧᔭᐃᐧᐤ ᐁᑯᓯ ᑭ ᐅᓯᐦᑖᐤ ᐯᐣᔪᐃᓬ.
26ᒉᕒᐊᐳᐊᒼ ᒫᑲ ᑭ ᐃᑌᐧᐤ ᐅᑌᐦᐃᕽ, ᐁᑲᐧ ᑭᐦᒋ ᐅᑭᒫᐃᐧᐃᐧᐣ ᑭᑕ ᑭᐁᐧᑐᑖᐠ ᐅ ᐋᐧᐢᑳᐦᐃᑲᐣ ᑌᐱᐟ; 27ᑭᐢᐱᐣ ᐅᑭ ᐊᔨᓯᔨᓂᐊᐧᐠ ᐃᑐᐦᑌᑖᐧᐃᐧ ᑭᑕ ᐸᑭᑎᓇᑭᐠ ᐸᑭᑎᓈᓱᐃᐧᓇ ᐅ ᐋᐧᐢᑳᐦᐃᑲᓂᔨᕽ ᑳ ᑎᐯᔨᐦᒋᑫᔨᐟ ᒉᕒᐅᓴᓬᐊᒥᕽ, ᐅᑌᐦᐃᐋᐧᐊᐧ ᐅᑭ ᐊᔨᓯᔨᓂᐊᐧᐠ ᑭᑕ ᑭᐁᐧᑐᑖᑯᔨᐊᐧ ᐅᐟ ᐅᑭᒫᒥᐋᐧᐊᐧ, ᐊᓂᐦᐃ ᐅᑎ ᕒᐃᐦᐋᐳᐊᒪ ᒍᑕ ᑭᐦᒋ ᐅᑭᒫᐤ ᓂ ᑲ ᓂᐸᐃᑲᐧᐠ ᒫᑲ ᐁᑯᓯ ᑳᐃᐧ ᑭᑕ ᓈᑌᐊᐧᐠ ᕒᐃᐦᐋᐳᐊᒪ ᒍᑕ ᑭᐦᒋ ᐅᑭᒫᐊᐧ. 28#ᐁᐠᓴᑕᐢ 32:4ᐁᐊᐧᑯ ᐅᐦᒋ ᑭᐦᒋ ᐅᑭᒫᐤ ᑭ ᐅᔭᓱᐁᐧᐤ ᐁᑯᓯ ᑭ ᐅᓯᐦᐁᐤ ᓂᓱ ᐅᓴᐃᐧᓱᓂᔮᐤ ᒧᐢᑐᓱᓯᑳᓇ, ᐅᒥᓯ ᒫᑲ ᑭ ᐃᑌᐤ, ᐅᓵᒼ ᒥᐢᑕᐦᐃ ᒉᕒᐅᓴᓬᐊᒥᕽ ᑭᑕ ᐃᑐᐦᑌᔦᐠ; ᒫᑎᑲ, ᐁᐊᐧᑯᓂᐠ ᑭ ᒪᓂᑐᒥᐋᐧᐊᐧᐠ, ᐃᐢᕒᐁᐃᓬ, ᑳ ᑭ ᐯ ᐊᐧᔮᐃᐧᑕᐃᐢᑭᐠ ᐃᒋᑊᐟ ᐊᐢᑭᕽ ᐅᐦᒋ. 29ᑭ ᐊᔦᐤ ᒫᑲ ᐯᔭᐠ ᐯᐦᑎᓬᐃᕽ, ᐁᑯᓯ ᐊᓂᐦᐃ ᑯᑕᑲ ᑭ ᐊᔦᐤ ᑖᓂᕽ. 30ᐅᒪ ᒫᑲ ᒪᒋᐃᑎᐃᐧᐣ ᑭ ᐃᐢᐸᔨᐤ; ᒋᑫᒫ ᐊᔨᓯᔨᓂᐊᐧᐠ ᑭ ᓇᑕᐃᐧ ᐊᔭᒥᐦᐋᐃᐧᐊᑐᐢᑲᐁᐧᐊᐧᐠ ᐊᓂᐦᐃ ᐱᐢᑭᐢ ᐊᓂᑕ ᑖᐣ ᐃᐢᑯ. 31ᑭ ᐋᐧᐢᑳᐦᐃᑲᓂᑫᐤ ᒫᑲ ᐃᐢᐹᔭᓄᕽ, ᒥᓇ ᑭ ᐊᔭᒥᐦᐁᐃᐧᔨᓂᑫᐤ ᐱᑲᐧᓂᐃ ᐊᔨᓯᔨᓂᐊᐧ ᐁᑳ ᓬᐃᐸᐩ ᐅᑯᓯᓴ ᐁ ᐅᐦᒋᔨᐟ. 32#ᓬᐃᐱᑎᑲᐢ 23:33,34ᒉᕒᐊᐳᐊᒼ ᒫᑲ ᑭ ᐅᔭᑭᐦᑕᒼ ᐃᐧᐦᑯᐦᑐᐃᐧᐣ ᐊᔨᓈᓀᐤ ᐱᓯᒼ ᐁ ᐊᑭᒥᐦᐟ, ᒥᑖᑕᐦᐟ ᓂᔮᓇᓄᓵᑊ ᑭᓯᑳᐤ ᐁ ᐃᑕᑭᒥᐦᐟ ᐁᐊᐧᑯ ᐱᓯᒼ, ᑖᐱᐢᑯᐨ ᐊᓂᒪ ᐃᐧᐦᑯᐦᑐᐃᐧᐣ ᒍᑕ ᑳ ᐊᔮᐠ, ᑭ ᐃᑐᐦᑌᐤ ᒫᑲ ᐸᑭᑎᓈᓱᐃᐧᓈᐱᐢᑯᕽ; ᐁᑯᓯ ᑭ ᐃᑐᑕᒼ ᐯᐦᑎᓬᐃᕽ ᐁ ᐸᑭᑎᓇᒪᐋᐧᐟ ᐸᑭᑎᓈᓱᐃᐧᓈ ᐊᓂᐦᐃ ᒧᐢᑐᓱᓯᓯᑳᓇ ᑳ ᑭ ᐅᓯᐦᐋᐟ; ᐁᑯᑕ ᒫᑲ ᐯᐦᑎᓬᐃᕽ ᑭ ᐸᑭᑎᓀᐤ ᐊᓂᐦᐃ ᐊᔭᒥᐦᐁᐃᐧᔨᓂᐊᐧ ᑭᑕ ᐸᒥᑖᔨᐟ ᐊᓂᐦᐃ ᐃᐢᐹᔭᐊᐧ ᑳ ᑭ ᐅᓯᐦᑖᐟ. 33ᑭ ᐃᑐᐦᑌᐤ ᒫᑲ ᐸᑭᑎᓈᓱᐃᐧᓈᐱᐢᑯᕽ ᑳ ᑭ ᐅᓯᐦᑖᐟ ᐯᐦᑎᓬᐃᕽ ᒥᑖᑕᐦᐟ ᓂᔮᓈᓄᓵᑊ ᑭᓯᑳᐤ ᐁ ᐊᑭᒥᐦᐟ ᐊᔨᓈᓀᐤ ᐱᓯᒼ, ᐁ ᐱᒪᑭᒥᐦᐟ ᐊᓇ ᐱᓯᒼ ᐃᐧᔭ ᐃᑕ ᑳ ᑭ ᐅᔭᐢᑖᐟ ᐅᑌᐦᐃᕽ; ᐁᑯᓯ ᑭ ᐅᔭᑭᑕᒪᐁᐧᐤ ᐃᐧᐦᑯᐦᑐᐃᐧᐣ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᒥᓇ ᑭ ᐃᑐᐦᑌᐤ ᐸᑭᑎᓈᓯᐃᐧᓈᐱᐢᑯᕽ ᑭᑕ ᒪᒍᐢᑌᐊᕽ ᐃᐧᑭᒫᓯᑲᐣ.
Currently Selected:
ᓂᐢᑕᑦ ᑭᐦᒋ ᐅᑭᒫᐊᐧᐠ 12: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
