James 5

kitahamawāwak owēyōtisak

1pēhtamok kiyawāw kā‑wēyōtisiyēk, mah‑mātok ēkwa kitimākēyimok, kakwātakihtāwin ōtē nīkān kiwī-nakiskēnāwāw. 2kiwēyōtisiwiniwāwa kī‑misiwanātanwa, ēkwa kitayiwinisiwāwa kī‑mīciwak kamāmakosak. 3kisōniyāmiwāw, osāwi-sōniyāwak mīna wāpiski-sōniyāwak misiyāpiskisiwak, ēkota ohci kita-nōkwan ē‑kī-pē-itātisiyēk. ēwako kika-misiwanācihikonāwāw tāpiskōc iskotēw. ahpō piko kimāwacihtānāwāw kiwēyōtisiwiniwāwa ōhi iskwēyāc kīsikāwa. 4namōya kitohci-tipahamawāwak otatoskēwak kā‑kī-manisikēcik kikistikāniwāhk. natohtāhkok ē‑matwē-mawimocik! pēhtākwak kā‑tipēyihcikēyit kā‑māwaci-sōhkātisiyit. 5kipē-wēyōci-pamihonāwāw ōta askīhk ē‑pē-miyawātamēk, kipē-tāhcipohisonāwāw tāpiskōc pisiskiwak kā‑wiyinohihcik kita-nipahihcik. 6kikī-maci-wiyasiwātāwāwak ayisiyiniwak mīna kinipahāwāwak, āta ēkāya kīkway ē‑ohci-māyi-tōtahkik ēkwa namōya ē‑ohci-nātamāsocik.

sāsīpēyihtamowin mīna ayamihāwin

7ēkosi māka sāsīpēyihtamok, nitōtēmitik, isko takosihki kā‑tipēyihcikēt. wāpamihk okistikēwiyiniw, ē‑pēhot kita-miyokihcikēt otaskīhk. sāsīpēyihtam kita-kimiwaniyik kā‑takwākiniyik mīna kā‑sīkwaniyik.#5.7 kā‑takwākiniyik kistikēwak māna Israel askīhk. piko ta‑kimiwaniyik kā‑takwākiniyik mīna kā‑sīkwaniyik ta‑miyo-ohpikihcikēcik. 8kīstawāw mīna piko kita-sāsīpēyihtamēk ēkwa kita-āhkamēyimoyēk, ayisk kā‑tipēyihcikēt wīpac kā‑wī-takosihk.

9ēkāya āyimōmitok, nitōtēmitik, ēkosi ēkāya kita-wiyasiwātikawiyēk. wīpac kisē-manitow kita-wiyasiwātāt ayisiyiniwa. 10nitōtēmitik, kiskinawāpamihkok okiskiwēhikēwak kā‑kī-ātotahkik kā‑tipēyihcikēyit otācimowiniyiw, ē‑kī-sāsīpēyihtahkik kā‑kakwātakihtācik. 11sawēyihtākosiwak aniki kā‑kī-sōhkikāpawīstahkik, āta ē‑kakwātakihtācik. ēkwa kikiskisināwāw ē‑kī-ācimiht Job ē‑kī-sāsīpēyihtahk, ēkwa piyisk kā‑tipēyihcikēyit kā‑kī-isi-sawēyimikot. kā‑tipēyihcikēt ayisk kākikē kitimākinākēw mīna kisēwātisiw.

12nitōtēmitik, ōma nīkānēyihtākwan, ēkāya kihci-kīsik, ahpō askiy, ahpō kotaka kīkwaya ohci kihci-itwēk. tāpwē piko itwēk, “ēha” ahpō “namōya,” ēkwa pimitisahamok ēwako. ēkosi namōya kika-wiyasiwātikawināwāw.

13kīspin awiyak ōma kā‑ihtasiyēk nayēhtāwīw, kita-kī-ayamihēstawēw kisē-manitowa. kīspin awiyak ē‑mōcikēyihtahk, kita-kī-nikamot ē‑mamihcimāt. 14kīspin awiyak āhkosiw, ta‑kī-natomāt anihi kā‑nīkānīyit otayamihāwa, kita-ayamihēstamākot mīna kita-tōminikot kā‑tipēyihcikēyit owīhowiniyihk. 15ispī kā‑ayamihēstamawācik ē‑tāpowakēyihtahkik, ana kā‑āhkosit kita-miywāyāw. kā‑tipēyihcikēt kita-pimācihēw ēkwa kita-pōnēyihtamawēw kīspin ē‑kī-māyi-tōtamiyit. 16ēkosi māka wīhtamātok kimāyi-tōtamowiniwāwa, ēkwa ayamihēstamātok ēkosi kita-ati-miywāyāyēk. kwayask ē‑itātisit ayisiyiniw sōhkaniyiw mīna ayiwāk itēyihtākwaniyiw okākīsimowin. 17Elijah kī‑ayisiyinīwiw tāpiskōc kiyānaw, mīna kī‑kākīsimow ēkāya kita-kimiwaniyik, ēkwa nisto askiy mīna nikotwāsik pīsim namwāc ohci-kimiwaniyiw ōta askīhk. 18ēkwa mīna kīhtwām kī‑kākīsimow ēkwa kī‑ati-kimiwaniyiw mīna kī‑ohpikiyiwa kistikāna.

19nitōtēmitik, kīspin pēyak kā‑ihtasiyēk wanisihki tāpwēwin ohci, ēkwa awiya pē‑kīwēhtahik, 20kiskisik ōma kā‑pē-kīwēhtahāt ē‑kī-kwēskināt ēkāya kita-maci-tōtamiyit, kita-pimācihtāw otahcāhkwa nipowin ohci anihi, ēkwa mihcēt maci-tōtamowina kita-pakitēyihtākwanwa.

Currently Selected:

James 5: PCSBR

Highlight

Compare

Copy