Рим 8

Рюгьну абцӀнайи уьмур

1Сарун Месигьдихъди яшамиш шулайидарик тахсир кипдар. 2Гьаз гъапиш Месигь Исайилантина уьмрихъна хурайи рюгьнан законди узу гунгьарихъна ва аьжалихъна хурайи закондиккан азад гъапӀну. 3Ихь гунагькар бедендиинди Къанун зяиф гъабхьну. Гьаддиз Аллагьди Чан Бай гунагькар адмийириз ухшар ади, гунгьарихъанди гъурбан хьуз жилариина гьаъну. Гьаци Дугъу адмийирин бедендиъ айи гунгьар тахсирназ гъахну. 4Жвуван гунагькар бедендин гьюкмиъ – ваъ, хъа рюгьнан гьюкмиъ яшамиш шули, ухьу Къанундин гьякьлу табшуругъар тамам апӀбан бадали, Аллагьди гьамци гъапӀну.

5Фицики чан гунагькар бедендин гьюкмиъ яшамиш шулайидари бедендин тямягьарикан фикир апӀура, хъа рюгьнан гьюкмиъ яшамиш шулайидари Рюгьнан ляхнарикан фикир апӀура. 6Бедендин тямягьарикан вуйи фикрари аьжалихъна хуру, хъа Рюгьнан ляхнарикан вуйи фикрари уьмур ва архаинвал хуру. 7Гьаз мици ву? Гьаз гъапиш бедендин тямягьарикан вуйи фикрар Аллагьдиз душмнар ву. Дурар Аллагьдин Къанундиз табигъ шулдар, я табигъ хьузра шулдар. 8Бедендин гьюкмиъ яшамиш шулайидарихьан Аллагьдиз ккуниб апӀуз шулдар.

9Эгер дугъридан учвуъ Аллагьдин Рюгь яшамиш шулаш, учву бедендин гьюкмиъ яшамиш шуладарчва, хъа Рюгьназ мютӀюгъ шулачва. Шлиъ Месигьдин Рюгь адарш, думу Месигьдинур дар. 10Тмуну терефнаан, эгер учвуъ Месигь аш, гьеле ичв беден гунгьари дубкӀнашра, Рюгьну, Аллагьдин улихь гьякь дапӀну, учвуз уьмур тувра. 11ЙикӀбан кьяляхъ Иса чӀиви ГъапӀурин Рюгь учвуъ яшамиш шулаш, Месигь чӀиви ГъапӀури, учвуъ яшамиш шулайи Рюгьналанмина ичв жанариз уьмур багъиш апӀура.

12Гьаддиз, гъардшар, ухьу ихь гунагькар бедендиз ккуниб дапӀну, дидиз мютӀюгъ духьну ккундар. 13Эгер учву ичв бедендин гьюкмиъ яшамиш шулуш, йихидичву. Хъа эгер учву рюгьниинди ичв гунагькар бедендин тямягьар гъачӀиш, уьмур гъазанмиш апӀидичва. 14Фицики Аллагьдин Рюгьнан гьюкмиъ айидар Аллагьдин гьякь веледар ву. 15Ухьу кьабул дапӀнайи Рюгьну ухьу лукӀариз илтӀикӀурадар ва ухьуз цӀийи гучӀ ккапӀрадар, му Рюгьну ухьу Аллагьдин веледариз илтӀикӀура. Ва Дугъу «Авва», яна «Адаш» кӀури, гьарай апӀуз гъитра. 16Ихь рюгьнахъди сабси Рюгьну Чав ухьу Аллагьдин веледар вуйиб тасдикь апӀура. 17Ухьу Аллагьдин веледар вуйиган, Месигьдихъди ухьузра ад хьпан бадали, Дугъан аьзабар ухьу кьабул апӀурайиган, Месигьдизси, Аллагьдин ирс ухьузра рубкьиди.

Адлу хьидихьа

18Ухьуз гъюз имбу уьмриъ хьуз ккайи адлувалихьан ихь гьамусдин аьзабар фукӀара дар. 19Фицики Аллагьдин веледар фужар вуш, ачмиш апӀру вахт хьайиз, Аллагьди халкь дапӀнайиб вари, аьгь апӀуз даршули, ккилибгура.

20-21Аллагьди халкь дапӀнайиб вари му мянасуз дюнʼяйиъ чпин ниятниинди адар, хъа – халкь ГъапӀурин ниятниинди. Хъа Аллагьди халкь дапӀнайи варибдин, чпи пуч шлу лукӀʼваликкан азад хьиди ва Аллагьдин веледариз гъурубкьу азадвална адлувал чпизра кайиб хьибди, кӀури, миж ади гъабхьну.

22Ухьуз аьгъяхьуз, Аллагьди халкь дапӀнайиб вари, бицӀир апӀури аьзиятнакк ккайи дишагьлиси, гъийин йигъазкьан аьзабариъ ади гъабхьну. 23Неинки вари халкь дапӀнайиб, хъа гьацира Рюгьну ацӀну цӀийи уьмур ккебгъу ухьура вари ккилигурайхьа. Дидлан гъайри, Аллагьди ухьу Чан веледарди гъадагъур, кӀури, ва ихь жанар азад апӀур, кӀури, айтӀанзина аьзабнаъ ккилигури айхьа. 24Ихь умудну ухьу гъюрхну. Ихь умуд ухьуз гъурубкьиш, думу умудди гъубзрадар. Адмийир, миж кайиб тамам гъабхьихъан, фтиккӀа миж кади гъуздар. 25Ухьу ухьуз адрубдик миж кади гъузрахьа ва сабурлуди дидиз ккилигурахьа.

26Дидихьна, ухьуз, зяиф касариз, ихь зяифвализ дилигну, Рюгьну кюмек апӀурахьуз. Ухьуз хай вуйибси ккарагуз аьгъдархьуз, аммаки ухьхъанди Аллагьдиз мидкан гафариинди пуз даршлу гьигьариинди Рюгь Чав ккарагура. 27Хъа Аллагьдиз, ихь юкӀвар Шлиз арццнаш аьгъяди, Рюгьну Чаз фтикан ккарагураш аьгъя, фицики, Рюгь, Аллагьдиз Чандарихъанди Чаз, Аллагьдиз ккуниси ккарагуру. 28Ухьуз, Аллагь ккунидариз, Чаз ккуниси Дугъу дих гъапӀдариз, вариб ужувлаз ачухъ шлуб аьгъяхьуз. 29Фицики, дюнʼя арайиз хайиз Дугъаз аьгъюди айидар, Гьадгъу улихьмиди Чан Бай вари чвйир-чйиригъян сарпирди хьпан бадали, Чан Бализ ухшар хьуз ктагъну. 30Чав ктагъдариз Дугъу дихра гъапӀну, хъа дих гъапӀдар Чан улихь гьякь гъапӀну, хъа гьякь гъапӀдар адлу гъапӀну.

Аллагьдин масанвал Иса Месигьдиъ а

31Фу кӀухьа? Аллагь ухьхъанди вуш, ухьуз къаршу шлихьан хьуз шул? 32Ухьу вари бадали, Чан Бай, гьяйиф дарапӀди, аьзабнакк Ккитури, Чан Балихъди сатӀиди ухьуз вари имбубра тувидаринхъа? 33Шилхьан Аллагьди кадагънайи халкьдик тахсир кипуз хьибди? Аллагьди Чав дурар гьякь апӀура. 34Шли дурар тахсирлу апӀиди? Месигь Иса гъакӀну, хъа чӀиви гъахьну, хъа гьамус Аллагьдин арччулну хилихъинди деъна ва ухьхъанди ккарагура. 35Ухьхьан Месигьдин масанвал тадабгъуз фтихьан шул? Дердерихьан? читинваларихьан? хъергуваларихьан? гашʼваларихьан? гъяцӀливаларихьан? хатӀйирихьан? ханжларихьан? 36Гирами китабариъ дибикӀна:

«Уву бадали учу гьар йигъан йивну йихура,

урккуз гьязур дапӀнайидарси,

учу марччарик гьисаб апӀура».

37Гьаци вушра, ухьу ккун гъапӀу Аллагьдин кюмекниинди гьаму варибдиъ зурба гъалибвал гъадабгъидихьа. 38Фицики узуз дугъридан аьгъязуз: я уьмрихьан, я аьжалихьан, я малайикарихьан, я заан рюгьярихьан, я гьамусдин, я гъюз имбу заманайихьан, я кьудратарихьан, 39я зиин али, я кӀанакк ккайи гъатарихьанра, я вари дюнʼя гъадабгъиш, жара жюрейин гьич сабдихьанра ухьхьан ихь Агъа, Месигь Исайиланмина улупу Аллагьдин масанвал тадабгъуз хьибдар.

Currently Selected:

Рим 8: ТабГК

Highlight

Copy