Насигьятар 29
29
1Ерхьурайи насигьятариз къаршу вуйир
йикӀиди хабарсузди, кьяляхъ дяргъруси.
2Гьякьлуйир кьувватнаъ а – халкь шад шула;
гьякьсузар гьюкмихь хьа – халкьди ипна суза.
3Аькьюл ккунири шад апӀура чан адаш,
лицру дишагьлийихъ хъайири зяя апӀура уч дапӀнайиб.
4Паччагьдин дюз гьюкми уьлке ижми апӀуру,
хъа дашбашари ккидипуру.
5Жарариз иблис гафар апӀрури
дугъан ликарикк ккипра чул.
6Гьякьсузур дисиди чан гунгьи,
хъа гьякьлури мяълийир апӀура ва шадвал хъапӀра.
7Гьякьлуйин кӀваин ал касибрин ихтиярар,
хъа гьякьсузриз дидкан аьгъю дубхьнукьан ккундар.
8Ягьсузари шагьур бикьура,
хъа аькьюл айидари гъизгъинвал дебккра.
9Аькьюл айир ахмакьрихъди суддиз удучӀвнаш,
бикьувална аьлхъюб кам хьибдар.
10Инсанар йивну йикӀуз ккунириз дяркънукьан ккундар марццир
ва дюзирра йикӀуз гьяракатнаъ шулу.
11Абдли деебтуру хъял,
хъа аькьюл айири учв гъурдаъ дисуру.
12Эгер гьюкумдар хъпехъураш кучӀлихъ,
везирарра хьиди гьякьсузар.
13Магьа фти сатӀи апӀураш касибна касибдиз илзигрур:
кьюриддинра уларихь хьайи акв РАББИЙИХЬАН ву.
14Эгер паччагьди касибрин суд апӀуруш дюзди –
дугъан тахт дабгъруб дар аьсрариз.
15ЧӀвякъи тӀули ва тербияйи тувра аькьюл,
хъа улʼан идитнайи бицӀир аьйиб ву дадайиз.
16Наан кьувватлу вуш гьякьсузар, кьувватлу ву гуннагьра,
аммаки гьякьлуйириз рябкъиди дурарин аьхир.
17Фагьум тӀапӀ балиъ ва хьидива дугъхъанди архаин,
хьибдияв кӀваз рягьят.
18Имдар пайгъамбарвалин гаф – зат мидарди чӀур дубхьна халкь,
аммаки хушбахтавар ву тамам апӀурайир Къанун.
19Гафну лукӀ фагьмихъна хидар,
гъавриъ ахъишра, фикир тувидар.
20Гъяркъюнвуз инсан, дав гафар идирчрур?
Гьацир адмийикантӀан абдликан хъа артухъ хайир а.
21Эгер лукӀ, бицӀидихъанмина интӀи гъапӀиш –
ужувлиинди думу ккудубкӀидар.
22Хъял кайири арайиз хура гъярхьувалар,
дишла хъял кубчӀврури артухъ апӀура чӀуру ляхнар.
23Заанди улупрур апӀиди асккан,
хъа фурс ктрури гъазанмиш апӀиди ад.
24ТӀафлиз юлдаш гъахьир чав чан душман ву:
тӀафлик фици тахсир кипраш ебхьури, ккебехънайир, чавра агьдикк ккахъди.
25Инсанарин улихь гучӀ кайивал – ккипнайи чул ву,
амма РАББИЙИИН хъугъвал алириз сабдихьанра гучӀ адар.
26Гьюкумдрикан ккидицури гизафдар хъюгъра,
хъа инсандин диван апӀрур сар РАББИ ву.
27Хявиди ву гьякьлуйириз писур,
хявиди ву гьякьсузариз дюз кас.
Currently Selected:
Насигьятар 29: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
