Насигьятар 1
1
Эвелин гаф
1Давуддин бай, Израилин паччагь Сулеймандин мисалар –
2Гъит улупри дурари аькьюлна насигьят, фагьумлу гафарин гъавриъ ахъуз;
3ужуб уьмрин, гьякьвалин, дугъри суддин, дюзвалин къайдйир дисуз;
4гъитди дурари авамарихьди фикир апӀуз, жигьиларихьдира аьгъюваларна аьяндарвал дубгъуз;
5аькьюл айирира, гъеебхьиган, заъруси аьгъювалар; фикирлу касаризра бихъиди кюмек;
6аннамиш апӀруси мисаларна тахалусар, аькьюл айидарин дерин гафарна сирар.
7РАББИЙИХЬАН#1:7 Заанури Муса пайгъамбриз Чан ччвур ачмиш гъапӀну. Заанурихьна вуйи гьюрматнаан жугьдари думу ччвур кӀури гъахьундар. Дидин ерина дурари «рабби», яни «йиз аьхюр» кӀури гъахьну. Думу ччвур фици кӀуйиш дюзди аьгъдар, гьаддиз дидин ерина РАББИ бикӀура. гучӀ апӀуб – магьа фтиъ аш аьгъюваларин эвел! Аькьюлна насигьят нигь апӀрур ву ахмакь.
Адашдинна дадайин насигьятар
8Жан бай, адашдин илим уьбх ва дадайин насигьят мапӀан нигь;
9му – зурба таж ву яв кӀулʼина, багьа зунжур ву яв гардандиккна.
10Йиз бай, эгер гуннагькрари чӀурубдихьна ял апӀуруш, рази махьан.
11Дурари пиди: «Гъач учухъди, ккеъдихьа, йивну йикӀидихьа, тахсир ктрудариин алархьидихьа!
12Ухьу дурар, гъийихдарин дюнʼяйиси, накьвди майтарси чӀивидимиди ва сагъдимиди хътӀюркьидихьа.
13Ккуни жюрейин девлет тӀараш апӀидихьа, гъибисубдихьди ихь хулар ацӀдихьа;
14ич вари ляхнариъ кидикь учук, увузра учухъди сабси рубкьруганси пай!»
15Дурарихъди рякъюъди мягъян, йиз бай, дурарин жилгъайиъ лик мииван,
16фицики дурар чӀурубдихьна жаргъура ва ифи удубзбаз гьялак шула.
17Мяна адар, чул гьипур пну, тӀирхурайи жакьварин улихь;
18хъа улам хъипри ккеънайидари чиб-чпи апӀиди терг.
19Гьамциб ву аьхир ифи убхърурин: Гьякьсузди гъазанмиш гъапӀу девлетну уьмур ккудубкӀуру.
20Аькьвли ипна гьарай кючейиъ, гъати сес апӀура раццариъ;
21уч духьнайи адмийириз дих апӀура, гимихъ гаф кӀура:
22«Фукьандиз гъузди авамар авамди, ккуниб апӀури, ягьсузар – ягь адрувалиин аьшкьлуди, абдлар – аьгъювалар даккунди?
23ИлтӀикӀай узу кирчу тахсрарихьинди – йиз кӀван хазна учвуз тувдиза йиз гафнакан учвуз хабар дебккдиза.
24Узу дих гъапӀунза – хъа учву гьидицунчва; хил гьачӀабккназа – амма саризра рябкъюрадар.
25Учву тина гъапӀунчва вари йиз теклифар, кьабул гъапӀундарчва узу кирчу тахсрар.
26Дици вуш, узура ичв балайиин аьлхъидиза, пис гучӀну учву ккаиган, учвук кялхъдиза!
27ТӀурфанси, учвʼин яман гучӀ алабхъиди, балара, микӀна кулакси утӀубчӀвиди; чӀаркӀидичву гъагънуна читинвалари.
28Гьадмуган узуз дих апӀиди – жавабкьан тувидарза, узу агури хьиди – дихъузкьан дихъидарчвуз.
29Дурари аьгъювалар даккун гъапӀну, РАББИЙИХЬАН вуйи гучӀ гьадабгъну,
30йиз насигьят кьабул дарапӀди гъибтну, вари йиз теклифар ярхла гьадаъну –
31гьаддиз дурариин чпин гъапӀу ляхнар улуркьиди, дурар чпин кьастарихьди тухъ хьиди.
32Авамар, аькьвлихьна гъюз дархьиш, йикӀиди. Абдлар чпин гъайгъусузвали ккадахьиди.
33Хъа узухъ хъпехъурайир хьиди яшамиш, саб балайиканра ктарди гучӀ».
Currently Selected:
Насигьятар 1: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
