Матта 26

Иса йикӀуз кьаст апӀуб

1Вари гьаму гафар дупну ккудукӀхъан, Исайи Чан ученикариз кӀуру:

2– Учвуз аьгъячвузки, кьюд йигълан Пасхайин машквар хьибди ва Инсаниятдин Бай хачриин дариз зигбан бадали душмнарин хилиз тувди.

3Гьадму вахтна аьхю маллйирна аьхюдар Каяфа кӀуру аьхюну маллайин гьяятдиъ уч духьнайи. 4Дурари, аьмалдарвалиинди дидисну, Иса йикӀуз йикьрар апӀуру. 5Амма дурари гьамци гъапнийи:

– Анжагъ машквар йигъан ваъ, фицики халкьдик гъалабулугъ кабхъди.

Вифанияйиъ

6Иса Вифанияйиъ хамран аьзар кади гъаши Шимондин хулаъ айи вахтна, 7Дугъан багахьна, лизи ругдин бетисибдиъди багьа ягъра хьади, сар дишагьли гъюру. Дугъу гутдиз гъюн йивну илдигънайи Исайин кӀулʼин ягъ улубзуру. 8Му гъябкъю ученикарик, хъял кубчӀвру.

Дурари:

– Гьамкьан ицци ниъ хъайи ягъ мугъу гьаз чӀур гъапӀу? 9Му аьхю кьиматнахъ масу тувну, пул касибариз пай апӀуз шулийда, – кӀуйи.

10Дурарин гъавриъ ахъу Исайи кӀуру:

– Дишагьлийиз нач шлуси гьаз кӀурачва? Узу бадали дугъу ужуб ляхин апӀура. 11Касибар гьарган учвухъди хьиди, хъа Узу учвухъди гьарган хьидарза. 12Гьаму ягъ Йиз кӀулкан ктатбиинди дугъу Йиз беден накьвдик кивбан бадали гьязур апӀура. 13Гьякь кӀуразачвуз: дюнʼяйиъ му Ужувлан хабар наан рабгъури гъабшишра, думу кӀваин апӀиди ва дугъу гъапӀубдикан ктибтиди.

Искариот Ягьудайи Иса масу тувуб

14Гьадмуган йицӀикьюрикан сари – Искариот Ягьуда кӀурури, аьхюну маллйирихьна душну, кӀуру:

15– Иса дисуз учвуз кюмек гъапӀиш, узуз фу тувдичва?

Дурари дугъаз, арсран сумчӀур манат тувурча, гъапи. 16Гьаддихъанмина дугъу Иса масу тувуз гъулай вахт абгури шулу.

Пасхайин машквран суфрайихъ

17ЛичӀван лавшарин машквран садпи йигъан Исайихьна дуфну, Дугъан ученикари гьерхнийи:

– Увуз пасхайин хураг учу наан гьязур дапӀну ккундувуз?

18Исайи дурариз кӀуру:

– Шагьриз сар фланурихьна гъарахай ва дугъаз йипай: «Мялимди гьерхра: „Узу пасхайин машквар Йиз ученикарра хъади яв хулаъ апӀурза“».

19Исайи гъаписи вари дапӀну, ученикари пасхайин хураг гьязур гъапӀнийи. 20Хябяхъ гъабхьибси, Иса Чан йицӀикьюр ученикдихъди гъюн йивну суфрайихъ деънийи. 21Дурари ипӀуз хъюгъиган, Дугъу кӀуру:

– Гьякь кӀуразачвуз: учвкан сари Узу масу тувди.

22Бегьем дерд дубхьну, гьарури Дугъаз пуз хъюгъю:

– Я Агъа, думу узу дарза аьхир?

23Дугъура жаваб вуди кӀуру:

– Узухъди саб гъабрак уьл кубсрайири Узу масу тувди.

24Гьамци, Гирами китабариъ улупнайиганси, Инсаниятдин Бай масу тувди, амма шли Инсаниятдин Бай масу тувраш, дугъаз бала хьибди: думу касдиз, учв бабкан гъахьундайиш, ужу шуйи!

25Иса душмнариз масу тувуз рази гъахьи Ягьудайи кӀуру:

– Думу узу дарза аьхир, Мялим?

Исайи дугъаз кӀуру:

– Гьаци уву кӀурава.

ЦӀийи йикьрарнан ифи

26Дурари хураг ипӀурайи вахтна, Исайи уьл гъадабгъуру, ужуб сяаьт ибшри дупну, думу гьудубтӀуру ва, ученикарихьна туври, кӀуру:

– Ма гъадабгъай, ипӀинай: му Йиз беден вуйиз.

27Аллагьдиз чухсагъул дупну, зах гъадабгъуру ва, ученикарихьна тувну, кӀуру:

– Мидʼан варидари убхъай. 28Му цӀийи йикьрар йитӀурайи ва гизафдарихъанди, гунгьарилан хил алдабгъбан бадали, удубзурайи Йиз ифи вуйиз. 29КӀуразачвузки, тӀумтӀарин му чяхир сарун, Йиз Адашдин Паччагьлугъдиъ учвухъди цӀийи чяхир убхъайизкьан, убхъидарза.

30Хъасин Аллагьдин тярифназ мяъли дапӀну, дурар Елион дагъдиз удучӀвуру.

Петрин инкар хьуваликан улихьмиди пуб

31Дагъдиина удучӀвиган, Исайи ученикариз кӀуру:

– Учву варидари ахъли Узу гъитдичва, фицики Гирами китабариъ дибикӀна:

«Марччлихъан йикӀидиза,

ва лижраъ айи марччар даргъиди!»

32Хъа Узу чӀиви гъашиган, Узу Галилейиз гъягъидиза ва душваъ учвуз ккилигури хьидиза.

33Хъа Петри Исайиз жаваб вуди гъапи:

– Варидари Уву гъитишра, узу гьич саб вахтнара дици дарапӀарза.

34Исайи дугъаз гъапи:

– Гьякь кӀуразавуз, ахъли даттли уьъйир дапӀну ккудубкӀайиз, Узу шубубан «аьгъюр дарзуз» пидива.

35Петри Дугъаз кӀуру:

– Узу Увухъди йикӀуб алабхъурушра, Уву «аьгъюр дарзуз» пидарза.

Имбу ученикарира гьамцдар гафар гъапнийи.

Исайин ккарагуб

36Хъасин Иса дурарихъди Гефсимания кӀуру йишваз гъягъюру ва Дугъу чан ученикариз кӀуру:

– Учву гьамшвахь деай, хъа Узу душну гьатушвахь ккарагидиза.

37Чахъди Петрна Зеведейин кьюрид баярра гъадагъу. ЮкӀв лап пашман дубхьну, Дугъак сикинсузвал кабхъру. 38Гьадмуган Исайи дурариз гъапи:

– Йиз юкӀв яман хажалатнаъ абхънайиз, гьамшвахь Узухъди гъузай, гъафил махьанай!

39ЦӀиб тинаси душну, машнахъди жилʼина ис духьну, Думу гьамци кӀури, ккарагуз хъюгъру:

– Я Аьршарин Адаш, эгер шулуш, му аьзаб Узʼина дяргъруси апӀина, вушра, Узуз ккуниси ваъ, хъа Увуз ккуниси ибшри.

40Хъасин ученикарихьна гъафиган, лигуруш, дурар нивкӀуз душнади рякъюру. Думуган Дугъу Петриз кӀуру:

– Саб сяаьтнаъкьан Узухъди даърахди гъузуз шуладарин учвхьан? 41Гъафил махьанай. Тямягьвалариъ адрахъбан бадали, ккарагай. Рюгь кӀубан ву, хъа беден – зяиф. 42Хъана, гьудучӀвну, Думу кьюбпи ражарира ккарагуру:

– Я Адаш, эгер Узу му аьзабнаккан ккадауб мумкин дарш, Яв гаф тамам ибшри.

43Кьяляхъ гъафириз, дурар хъана даахну рякъюру. Дурарин улар гъагъи духьнайи. 44Дурар гъитну, хъана тинаси гьудучӀвну, Исайи шубубпи ражари гьадму гафар кӀури, Чан ккарагуб текрар гъапӀнийи. 45Хъасин ученикарихьна дуфну, дурариз кӀуру:

– Гьамусра даахну имичва, рягьятвал гъадабгъуранчва? Инсаниятдин Бай гунагькрарин хилиз тувру вахт магьа сарун хъубкьна. 46Гъудужвай, гъягъюрхьа; лигайки, Узу масу туврайир багахь шула.

Иса дисуб

47Дугъу гьеле гьамци кӀури имиди магьа йицӀикьюрикан сар Ягьуда дуфну хъуркьу. Дугъахъди, ханжларна маргъар хьади, аьхюну маллйирина аьхюдари гьаънайи адмийирин аьхю гъварчра хъайи.

48Иса масу тувуз дуфнайи Ягьудайи дурариз гьамци дупнайи: салам тувруган, узу шлиз мак гъапӀиш гьадму Иса ву, ари Гьадму дисай.

49Дугъу, дишлади Исайихьна дуфну, гъапи:

«Салам Увуз, Мялим!» – ва Дугъаз мак гъапӀу.

50Исайи дугъаз кӀуру:

– Яв апӀуз ккайи ляхин апӀин, дусткас.

Дишла, алархьну, эскрари Иса дисуру. 51Гьадму арайиъ Исайин ученикарикан сари, сабпну чан ханжал уьчӀюбгъну, йивну, аьхю маллайин гъаравшин иб ктабтӀуру. 52Гьадмуган Исайи дугъаз кӀуру:

– Яв ханжал чан гъашариъ ив, фицики ханжал уьчӀюбгъю гьарсар ханжалихьан йикӀиди. 53Ваяки Узу Йиз Адашдикан тӀалаб гъапӀиш, Дугъу Узуз гьамусяаьт малайикарин йицӀикьюб кьушумтӀан артухъ тутрувур, кӀурана? 54Даршиш, гьаму вари гьамци дубхьну ккунду, кӀури, Гирами китабариъ дидикӀнайидар фици кӀулиз удучӀвиди?

55Хъасин Исайи халкьдиз кӀуру:

– Узу дисуз, гъачагъ дисурайиганси, ханжларна маргъар хьади дуфначва. Узу гьар йигъан Аллагьдин хулаъ аьгъювалар улупури деъну шуйза, хъа думуган Узу гъидисундайчва.

56Вари гьаму ляхнар пайгъамбрарин Китабариъ дибикӀнайиб кӀули удубчӀвуз шулайидар ву.

Гьадмуган вари Дугъан ученикар, Иса гъитну, гьергнийи.

Иса Заан диванханайин улихь

57Иса гъидисдари Думу аьхюну малла Каяфайихьна гъухнийи, душваъра къанунчйирна аьхюдар уч духьнайи. 58Петр ярхлаанси Исайихъди Каяфайин гьяятдихьнакьан гъафнийи ва, айитӀинди учӀвну, аьхир фициб шулуш лигуз кӀури, Аллагьдин хулан эскрарихъди деънийи. 59Аьхюну маллйири, аьхюдари ва вари Диванханайин миди вуйидари, Иса йикӀбан къарар адабгъбан бадали, Дугъаз къаршуди кучӀлин шагьидвалар агурайи. 60КучӀлин шагьидвал апӀури, гизафдар уч гъахьнушра, дурариз лазим вуйи шагьидвалар гъидихъундайи. Аьхирки кьюр кас багахьнаси гъафи 61ва дурари гъапи:

– Мугъу кӀурайи: Узхьан Аллагьдин хал рабгъуз ва шубуд йигъан думу цӀийи кӀултӀан тикмиш апӀуз шулзухьан.

62Маллйирин аьхюри, гъудужвну, Исайиз гъапи:

– Уву гьаз чӀалкьан кӀурадарва? Мурари апӀурайи шагьидвал дюзиб вуйин?

63Исайи чӀалкьан гъапундайи. Маллйирин аьхюри гъудужвну Исайиз кӀуру:

– Узу Аллагьдин улихь Увкан дишди пуб тӀалаб апӀураза: Аллагьдин Бай Месигь Уву вуна?

64Исайи дугъаз кӀуру:

– Уву гьаци кӀурава. Дидланна гъайри, Узу кӀуразачвуз: гьамусдихъантина Инсаниятдин Бай вари Удукьрурин арччулну гъвалахъ деъну ва дифариинди гъюри рякъидичвуз.

65Гьадмуган маллйирин аьхюри, хъял улупури, чаин али палтар дячӀяргъну, кӀуру:

– Мугъу Аллагь гьясбикк ккадру гафар кӀура! Ухьуз сарун шагьидар гьаз ву? Магьа гьамусяаьт учвуз варидариз Мугъан Аллагь гьясбикк ккадру гафар гъеерхьунчвуз! 66Учву фици фикир апӀурачва?

Дурарира жаваб вуди гъапи:

– Думу тахсиркар ву ва аьжализ лайикь ву.

67Гьадмуган садари Дугъан машнаъ тутйир атӀу, гъурдар гъиву. Тмундари гарцӀлариккан бачӀар ккадату 68ва «Увуз шли гъивнуш, йип ари, Уву Месигь вуш?» – кӀури, кялхъри гъаши.

69Хъа Петр чӀат гьяятдиъ деънайи. Дугъахьна дуфну, сар гъараваш дишагьлийи кӀуру:

– Увура Галилейжви Исайихъ хъади гъахьунва.

70Амма думу варидарин улихь инкар гъахьи:

– Уву фу кӀурашра, аьгъдарзуз.

71Петр урнариан удучӀвурайиган, думу сар жара гъараваш дишагьлийиз рякъюру, ва душваъ айидариз кӀуру:

– Гьаму кас Назаретдиан вуйи Исайихъ хъади гъахьну.

72Ва дугъу хъанара: «Узуз думу Кас аьгъюркьан дарзуз», – пну, ху апӀуру.

73Саб арайилан гьамшварихь дийигънайидари, багахьнаси дуфну, Петриз кӀуру:

– Дугъриданна увура гьадрарикан сар вува, фицики яв улхбан нугъатнура гьаци вуйиб улупура.

74Думуган Петр:

– Узуз думу Кас гьич аьгъюркьан дарзуз, – кӀури, хуйир апӀуз хъюгънийи.

75Гьаму арайиъ даттли уь-уь гъапӀу. Петрин, Исайи гъапи: «Даттли уьъйир дапӀну ккудубкӀайиз, Узу шубубан „аьгъдарзуз“ пидива», – кӀуру гафар кӀваина гъюру. Ва гьадлин удучӀву Петр, дерд дубхьну, зарбди гъишнийи.

Currently Selected:

Матта 26: ТабГК

Highlight

Copy