Матта 25
25
ЙицӀур шуркан тахалус
1Гьадмуган Аьршарин Паччагьлугъ, лампйир гъадагъну, йишвну жамран улихьна гъюрайи йицӀур шураз ухшар хьибди. 2Дурарикан хьур аькьюллудар ва хьур абдалдар гъахьну. 3Абдал шубари, лампйир гъадагъну, дурарихъ хъубзруб гъадабгъундар. 4Аькьюллудари лампйирихъди хъубзрубра гъадабгъуру. 5Жамру кьан апӀуради хьпаз лигну, дурар вари нивкӀуз гъягъюру. 6Хъа гьацӀишваринган: «Магьа жам гъюра, улихьна удучӀвай», – кӀури, сесер утӀурччвуру.
7Вари шубар, гъудужвну, чпин лампйир акуди кархьуз хъюгъру. 8Абдал шубари аькьюллудариз: «Ичв хъубзрубдикан учузра чавай, даршиш ич лампйир ктӀушвура», – кӀуру. 9Хъа аькьюллудари: «Хъубзруб учузра, учвузра гьубкӀидар. Масу туврайидарихьна душну, учвуз гъадабгъай», – кӀуру.
10Хъа дурар хъубзруб гъадабгъуз душну имиди, жам гъюру. Гьязурди айи шубар дугъахъди сумчрин демраз гъягъюру, ва сарун раккар хъяркьру. 11Хъасин хъубзруб гъадабгъуз гъушу тмуну шубарира дуфну: «Я Агъа, я Агъа! Учуз раккин абцца», – кӀуру. 12Жамру дурариз жаваб вуди: «Дюзди кӀуразачвуз, узуз учву зат аьгъюдаркьан дарзуз», – кӀуру.
13Гьаци вуйиган, мааханай, гьаз гъапиш я йигъ, я сяаьт аьгъдарчвуз.
Шубур гъуллугъчийикан тахалус
14Аьршарин Паччагьлугъ сар гьамцир касдихь тевуз шул: саб ражари ярхла уьлкйириз гъягъруган, дугъу чан гъуллугъчйириз дих дапӀну, чан мяишатдиз лигуз табшурмиш гъапӀнийи. 15Дурарин удукьувалариз лигну, сарихьна хьуд агъзур, тмунурихьна кьюд агъзур, шубурпирихьна сад агъзур манат тувну, учв гъушнийи. 16Хьуд агъзур манат гъибисури, дишлади думу ляхник кипру ва хьуд агъзурсана гъазанмиш апӀуру. 17Гьаци кьюд агъзур гъибисурира кьюд агъзурсан гъазанмиш гъапӀнийи. 18Хъа сад агъзур манат гъибисури, душну, жил деебккну, душвакк ккивну, пул жин гъапӀну. 19Саб хайлин вахтналан агъа гъюру ва дурарихьан арсран гьякь-гьисаб апӀувал ккун апӀуру. 20Чахь хьуд агъзур манат гъибтури, пул дубхну, кӀуру:
– Агъа! Уву узухьна хьуд агъзур манат тувунва, магьа узу дурариинди хъана хьуд агъзурсан гъазанмиш гъапӀунза.
21Агъайи дугъаз кӀуру:
– Аферин увуз, ужур ва вафалу гъуллугъчи, бицӀи ляхниъ узуз вафалу гъахьунва, аьхю ляхнар табшурмиш апӀидизавуз; яв агъайин мяракайиз дуфну, дугъахъди шадвал апӀин.
22Гьаци кьюд агъзур манат гъибисурира, дуфну, кӀуру:
– Агъа! Уву узухьна кьюд агъзур манат тувунва, магьа дурарин кюмекниинди узу хъана кьюд агъзурсан гъазанмиш гъапӀунза.
23Агъайи дугъаз кӀуру:
– Увузра аферин, ужур ва вафалу гъуллугъчи, бицӀи ляхниъ узуз вафалу гъахьунва, аьхю ляхин табшурмиш апӀидизавуз; йиз мяракайиз дуфну, узухъди йиз шадвал пай апӀин.
24Хъасин сад агъзур манат хьайир дуфну, кӀуру:
– Агъа! Узуз уву учӀру адми вуйиб аьгъяйзуз: дурубзру йишвʼан ккадабцӀуз ва ктриву йишвʼан бегьер уч апӀуз ккунир вува. 25ГучӀ кабхъури пул жиликк жин гъапӀунза: магьа яв думу гъадабгъ.
26Хъа агъайи дугъаз гьамци кӀуру:
– Эй жинжал ва темпел гъуллугъчи, увуз узу дурубзру йишвʼан ккадабцӀрур ва ктриву йишвʼан бегьер уч апӀрур вуйиб аьгъдайнуз? 27Гьаддиз уву йиз пул ляхник кипну ккундийи, гъафири узу думу артухъ дубхьну гъадабгъидийза. 28Гьаддиз тадабгъай мугъахь хьайи пул ва тувай йицӀуд агъзур хьайирихьна. 29Фицики гьарсар чаз айи касдиз хъанара тувди ва дугъан разу хьибди, хъа чаз адрурихьан айибра тадабгъиди. 30Ва башаккадру гъуллугъчи чӀатинди мучӀушназ гатӀахьай. Душваъ суза-фигъан, зурба ишуб хьибди.
Хъасин Исайи кӀуру:
– Ебхьуз ибар кайидариз гьаму гафар ерхьри!
Аьхиримжи суд
31Инсаниятдин Бай Чан аднаъди малайикарра хъади гъафиган, Дугъу Чан адлувалин паччагьвал апӀиди. 32Дугъан улихь вари миллетар уч духьну хьиди, хъа Дугъу, марччлихъни марччар цӀигьарихьан фици жара апӀури шулуш, гьаци дурар сар-сарихьан жара апӀиди: 33марччар Чан арччул, цӀигьар гагул терефнаъ дерккди. 34Гьадмуган Паччагьди Чан арччул терефнаъ айидариз пиди:
– Гъачай йиз адашдин ужувлакк ккахьнайидар, дюнʼя ккебгъхъанмина учвуз гьязурди дебккнайи Аьршарин Паччагьлугъ ирсди кьабул апӀинай. 35Узуз гашди айзуз, учву Узуз уьл тувнийчва; Узу штухъ дахаргнайза, учву штухъди тухъ гъапӀнийчва; Узу яд жви вуйза, учву Узу кьабул гъапӀнийчва; 36гъяцӀалди айза, Узʼин палат алабхьнийчва; иццури айза, учву Узуз гъилигнийчва; дустагъдиъ айза, Узухьна гъафнийчва.
37Гьадмуган дугъри касари Дугъаз пиди:
– Я Агъа! Уву учуз гашди дяркъну, Увуз фила уьл гьивнийихъа? Вая дахаргну ади, фила шид тувнийихъа? 38Уву яд жви вуди, учу Уву фила кьабул гъапӀнийихъа? Вая гъяцӀалди дяркъну, учу Увʼин фила палат алабхьнийихъа? 39Уву кетӀерццну ади, ясана дустагъдиъ ади дяркъну, учу Увухьна фила гъафнийихъа?
40Ва Паччагь вуйи Инсаниятдин Бали дурариз жаваб вуди пиди:
– Дюзди кӀуразачвуз, учву гьаму Йиз бицӀи гъардшарикан саризкьан гьаци гъапӀнуш, гьадму учву Узуз гъапӀу мисал ву.
41Гьадмуган Дугъу чан гагул терефнахъ хъайидариз пиди:
– Йиз улариккан дург духьну гъарахай, нянайикк ккайидар, иблисдиз ва дугъан хликк ккайидариз гьязур дапӀнайи жегьеннемдин цӀиз гъарахай. 42Узуз гашди айзуз, учву Узуз уьл тувундайчва; Узу дахаргнайза, шид тувундайчва; 43Узу яд жви вуди гъафиган, Узу кьабул гъапӀундайчва; гъяцӀалди айиган, Узухъ палат хъабхьундайчва; иццурайиган ва дустагъдиъ айиган, Узухьна гъафундайчва.
44Гьадмуган дурарира Дугъаз жаваб вуди пиди:
– Я Агъа! Увуз гашди вая дахаргну ади, гъураба вая гъяцӀалди ади, кетӀерццнади, вая дустагъдиъ ади дяркъну, учу Увуз гъуллугъ дарапӀди фила гъитнухъа?
45Гьадмуган Дугъу пиди:
– Дюзди кӀуразачвузки, учву гьаму Йиз бицӀи гъардшарикан саризкьан гьаци гъапӀундарш, Узузра гъапӀундарчва.
46Гьамци, нягьякьдар жегьеннемдин ккудудубкӀру аьзабнаъ ахьди, хъа гьякьлудар ккудудубкӀру уьмур хъапӀри хьиди.
Currently Selected:
Матта 25: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
