Матта 22

Сумчрин мяракайикан тахалус

1Исайи хъанара дурар тахалусариинди гъаврикк ккауб давам гъапӀнийи.

2Аьршарин Паччагьлугъ сар гьамцир паччагьдиз ухшар ву. Сар паччагьди, гизафдариз сумчрик дупну, чан балин сумчрин мярака дюзмиш гъапӀнийи. 3Вахт улубкьган, дугъу чан лукӀар хялариз теклиф апӀуз гьау, амма дурариз гъюз ккун гъабхьундайи. 4Дугъу хъанара дурарихьна чан жара лукӀар гьаънийи:

– Магьа, дюрхнайи жердар, якъар дурккну, хурагарра дапӀну, вари гьязурди а, сумчрин демраз гъачай.

5Садар, дугъан гафарихъ хъпебехъди, чпин хутӀлариз, тмундар ариш-вериш апӀуз гъушнийи. 6Имбудари, дугъан лукӀар дидисну, дурччвну йихуру. 7Мидкан, пис хъял дуфну, паччагьди, чан кьушмар гьаъну, дурар тӀанкь апӀуру ва дурарин шагьрик цӀа кипру. 8Хъасин паччагьди чан лукӀариз кӀуру:

– Сумчрин дем гьязурди а, хъа сумчриз теклиф дапӀнайидар лайикьлу гъахьундар. 9Гьаддиз, душну, кючйириъ алахькьандариз варидариз сумчрин демраз дих апӀинай.

10ЛукӀарира, душну, кючйириъ чпиз алахькьандар вари: гьам ужудар, гьамсана харжидар хъади дуфну, сумчрин суфра хялари хъабцӀру. 11Хяларихьна удучӀву паччагьдиз дураригъ сумчриз ярамиш дару палтар али сар кас рякъюру. 12Паччагьди дугъаз кӀуру:

– Я дуст кас, сумчрин палтар алдарди увхьан мина гъюз фици гъабхьунвухьан?

Дугъазра кӀуруб гъибихъундайи. 13Гьадмуган паччагьди лукӀариз гъапнийи:

– Му, ликар-хилар йитӀну, чӀатинди мучӀушназ, ишуб, гьарай-суза, фигъан айишвазди гатӀахьай. 14Фицики теклиф дапӀнайидар гизафдар ву, хъа кадагънайидар – цӀиб.

«Паччагьдиз паччагьдинуб, хъа Аллагьдиз Аллагьдинуб тувай»

15Гьадмуган фарисйири, мушвʼан удучӀвну, Исайи фукӀа дюз даруб кӀайиз ккеуз мясляаьт апӀуру, 16ва Дугъахьна, Гьироддин терефкрарра хъади, чпин ученикар гьаъру. Дурари Исайиз кӀуру:

– Я Мялим! Учуз Уву гьякьлу кас вуйивал ва инсанар Аллагьдин дугъри рякъюъ тӀаърайивал аьгъячуз. Уву инсандин машназ, яна гъуллугъназ лигурдарва. 17Гьаци вуйиган, учуз йип: Римдин паччагьдиз учу налук тувуз хай шулин, даш шулдарин?

18Исайи, дурарин чӀуру ниятар рякъюри, кӀуру:

– Кьюб маш гъяйидар, Узу гьаз ахтармиш апӀурачва? 19Учву налукди туврайи пул Узуз улупай.

Дурари Дугъахьна саб манат хуру.

20– Мидик шлин шикилна ччвур ка? – пну, гьерху Исайи дурарихьан.

21– Римдин паччагьдин, – жаваб туву дурари.

Гьадмуган Исайи дурариз кӀуру:

– Дици вуш, паччагьдинуб паччагьдиз, хъа Аллагьдинуб Аллагьдиз тувай.

22Му гафар гъеерхьиган, дурар мюгьтал шулу ва Дугъхьан гьудучӀвну гъягъюру.

ГъачӀидар чӀиви шлуваликан

23Гьадму йигъан Дугъахьна гъачӀидар чӀиви шуб айиб дар кӀурайи саддукйир гъюру, ва дурари Исайихьан гьерхру:

24– Я Мялим! Муса пайгъамбри дупна: «Эгер фуж чаз велед даршиди гъачӀиш, дугъан хпир дугъан чвуччвуз дитри ва чвуччвун тухум давам апӀри». 25Учу ургур чве вуйча, ва сарпир эвлемиш духьну, гъакӀну ва, велед хътарди хьпаз лигну, хпир дугъан чвуччвуз дитру. 26Гьамци кьюрпирра, шубурпирра, та-а-ап ургурпириина гъяйиз, вари йихуру. 27Аьхирки гьадму хпирра йикӀуру. 28Гьаци гъабшиган, гъиямат йигъан вари чӀиви шлуган, думу ургурикан фунурин хпир хьиди? Дурариз вардариз думу швуваз гъушнийи аьхир.

29Исайи дурариз гьамциб жаваб апӀуру:

– Учву, я Гирами китабар, ясана Аллагьдин кьудрат аьгъдарди, улдугурачва. 30ЧӀиви гъахьиган, дурари я швушвар хурдар, я швуваз гъягъюрдар. Дурар аьршариъ айи малайикарси хьиди. 31Хъа гъиямат йигъан гъийихдар чӀиви хьувалин гьякьнаан Аллагьди учвуз гъапи гьаму гафар яраб учву гъурхундайкӀан? 32«Узу Ибрагьимдин Аллагь вуза, Исакьдин Аллагь вуза ва Якьубдин Аллагь вуза». Аллагь дийихнайидарин ваъ, хъа чӀивидарин Аллагь ву.

33Му гафар гъеерхьиган, халкь Исайин аьгъювалар улупбиин мюгьтал шуйи.

ВартӀан метлеблу табшуругъ

34Исайи саддукйир фици чпин йишвʼин дитнуш, гъеебхьиган, фарисйирна саддукйир, сатӀиди уч шулу. 35Дурарикан сар къанунчийи, Исайи фу кӀуруш кӀури, Дугъхьан гьерхру:

36– Мялим! Къанундиъ вартӀан метлеблу табшуругъ фунуб ву?

37Исайира дугъаз кӀуру:

– «Яв Агъа Аллагь, вари юкӀв хъипну, вари рюгьнаан ва яв вари фагьмиан ккун апӀин». 38Му сабпи ва вартӀан метлеблу табшуругъ ву. 39Кьюбпибра гьаддиз барабар ву: «Яв багахь хьайир жвуваз жвувси ккун апӀин». 40Гьаму кьюб табшуругъдиин вари Къанун ва пайгъамбрарин БикӀбар биналамиш духьна.

Месигь шлин бай ву?

41Саб йишвʼина уч духьнайи фарисйирихьан Исайи гьерху:

42– Учву Месигьдин гьякьнаан фу фикир апӀурачва? Думу шлин Бай ву?

Фарисйири Дугъаз:

– Давудгъярин Бай ву, – кӀуру.

43Исайи дурарихьан хъана гьерхру:

– Дици вуйиган, Рюгьну ацӀнайи Давудри Дугъаз Агъа фици кӀура? Давудри дупнаки:

44«Агъайи йиз Агъайиз гъапну:

Узу Яв душмнар Яв ликарикк дахьайизкьан,

Йиз арччул гъвалахъ деъ?»

45Гьамци, Давудри Дугъаз Агъа кӀурайиган, Думу дугъан Бай фици хьидихъа?

46Сарихьанра Дугъаз жаваб тувуз гъабхьундар. Ва гьадму йигъланмина, Исайиз суалар тувуз кӀури, Сарун сарира Исайихьан гьич сабдиканра гьерхуз кӀубанвал гъапӀундар.

Currently Selected:

Матта 22: ТабГК

Highlight

Copy