Якьубдин 3

Мелз ва гафар

1Йиз гъардшар, вари мялимар хьуз мюхъюгъянай. Ихь, мялимарин, суд ижмиди апӀруб аьгъячвузки, 2фицики ухьу варидари гагь-гагь лайикьсуз тӀулар апӀурахьа. Чан мелзниинди чӀуруб даркӀрур гьуркӀу кас ву ва дугъаз чан бедендин эйсивал апӀузра кьувват а. 3Эгер гьяйвнин сппаригъ ухьу фури гъипиш, думу ухьуз мютӀюгъ шулу, дидин вари жандин эйвал апӀурхьа. 4Гьадмукьан аьхю гимйирра магьа гьаци, пис микӀари гьирчнайидар, саб бицӀи рулиинди хъапӀрури чаз ккунишвахъинди хъапӀра. 5Гьамци ихь мелзра, учв ихь бедендин бицӀи пайтӀан даршра, дидхьан зурба ляхнар апӀуз шулу. ЦӀюмгъял кабхъиш, гьадму бицӀи цӀи зурба яркур убгуру! 6Мелз – цӀа ву. Ихь жандин имбу паярик гъилигган, дидиъ варитӀан гизаф писвал а. Диди вари жан чиркин апӀура; дидик жегьеннемдин цӀикан цӀа кабхъра ва ихь уьмур убгура. 7Адмийи гьубкьу жюрейин гьяйванатар, жакьвар, улчвурхури гъягърудар ва гьюлерин гьяйванатар вердиш дапӀна ва апӀурира а. 8Хъа гьич сарихьанра мелз вердиш апӀуз шулдар. Му дебккуз даршлу, агъуйи абцӀнайи завал ву. 9Гьамдиинди ухьу ихь Адаш Агъайин тярифар апӀури шулхьа ва гьамдиинди Аллагьдиз ухшар ади халкь дапӀнайи адмийириз агьрарра апӀури шулхьа. 10Саб ушвниан удучӀвуру ужувлан гафарра, агьрарра. Йиз гъардшар, дици дубхьну ккундар. 11Саб булагъдиан марцци штарра, кьилзи штарра удучӀвури хьуз мумкин вуйинхъа? 12Йиз гъардшар, шулин ари, инжирин гьаригъ хифар гъиршри, ясана тӀумтӀарин ширариин инжирар илиршури? Гьаци кьилзи булагъдиан марцци шид удубчӀвуб мумкин дар!

Гьякь вуйи аькьюл ва кучӀал

13Ичв арайиъ фужкӀа дугъридан фагьумлу ва варибдин гъавриъ айи кас адарин? Эгер дицир аш, дугъу чан фагьумлувал гьякь уьмриинди улупну ккунду, фагьумлуйириси кӀул ис дапӀну ккунду. 14Хъа эгер ичв юкӀвариъ пис бахилвал аш, ва иблисвалиинди жвуваз хайир абгураш, фурслу махьанай ва гьякьнакан кучӀал макадапӀанай. 15Мициб фагьум заълан гъюруб дар, думу му дюнʼяйинуб ву; рюгьниинди вуйиб дар, иблисдихьан гъюрайиб ву. 16Наан бахилвал ва жвувтӀан даккнивал аш, гьадушваъ къайдасузвал ва гьарсаб пис ляхин а. 17Заълан гъюрайи фагьумлувал, сифте нубатнаъ, марцциб ву, гьацира мясляаьт хурайиб ву, аькьюллуб ву, аьлакьайихъна хруб ву, рягьимлувалихьди ва ужувлан ляхнарихьди абцӀна, диди адмийир ккунидаризна даккнидариз жара апӀдар ва машназ лигдар. 18Ислягьвал бадали мясляаьтниинди лихрудари гьякьвалин бегьер ккадабцӀиди.

Currently Selected:

Якьубдин 3: ТабГК

Highlight

Copy