Якьубдин 2

Ичв багахь хьайидар ккун апӀинай

1Йиз гъардшар, ихь адлу вуйи Агъа Иса Месигьдихъ хъугъри, адмийир ккунидаризна даккнидариз жара мапӀанай. 2Мисалназ, учву уч духьнайишваз багьа палат али ва гъизилин тӀублан хъайи адми гъюру, гьацира – йирси палат али касибра. 3Учву багьа палат алириз, артухъ гьюрмат апӀури, гьамци кӀурачва: «Уву гьаму ужударсдар йишварикан гьамунубдиин деъ». Хъа касибдиз кӀурачва: «Гьатушвахьинди гьудучӀв», ясана, «Йиз ликарихъинди деъ». 4Учву гьапӀрачва? Учву сарин улихь сар заан апӀурачва ва ичв дюз дару хияларихьди, фунур артухъур вуш, гьял апӀурачва. 5Хъебехъай, йиз масан вуйи гъардшар! Аллагьди гьаму дюнʼяйин улихь касиб вуйидар кадагънадаринхъа, чпин хъугъувалиъ мюгькам ва, Учв ккунидариз гаф тувнайиси, Чан Паччагьлугъдин ирс рубкьрудар хьпан бадали? 6Хъа учву касибар гьясбикк апӀурадарчва! Девлетлуйир даринхъа учвлан гъидикь алдабхъурайидар. Учву судариз хъчӀюхюрайидар гьадрар даринхъа? 7Гьадрар даринхъа, учву Чазди кадагънайи Месигьдин ччвур беябур апӀурайидар?! 8Эгер учву дугъриданра, Гирами китабариъ улупнайи: «Багахь хьайир жвуваз жвувси ккун апӀин» кӀуру паччагьвалин закондиъ айиси апӀураш, учву дюзди апӀурачва. 9Хъа эгер учву сартӀан сар артухъди дисураш, гунагьариъ ахърачва, ва учвуз, закон гъючӀюбгъдаризси, жаза гьадабтӀиди. 10Гьаз гъапиш, шли, Къанундиъ улупнайиб вари тамам апӀури, хъа душвʼан саб фукӀа-мукӀа тамам дарапӀди гъибтиш, дицир кас вари Къанун чӀюбгъбаъ тахсиркар ву. 11Фицики «кьяппавал мапӀан» гъапи Аллагьди «миликӀан» гъапундаринхъа? Ва гьаддиз, эгер уву кьяппавал апӀурадарш, хъа йивну йикӀураш, Къанун чӀюбгъюрава. 12Азадвал тувру Къанундиинди суд апӀурайи адмийинсдар гафар ва ляхнар апӀин. 13Фицики Аллагьдин судди жарариз ужʼвал дарапӀрурин язухъ апӀидар. Ужʼвал судтӀан зиина ву!

Хъугъувал ва ужувлан ляхнар

14Йиз гъардшар, фу тӀяаьм ахъа, эгер шли, хъугъраза, кӀураш, хъа ужувлан ляхнар апӀдарш? Мициб хъугъували думу уьрхидар, гьаци дарин? 15Эгер чвуччвуз, ясана чуччуз алабхьуз палат, ясана ипӀуз уьл адарш, 16хъа учвкан сари: «Гъарах мясляаьтниинди. Яшамиш йихь манишнаъ ва тухъди!» – дупну, фукӀа-мукӀа дугъаз адрубдикан тутрувиш, мушваъ фу шул? 17Ари гьамци, эгер хъугъувал лайикь вуйи ляхнариинди улупдарш, хъугъувал дубкӀнайи гьисаб ву.

18Сари пуз мумкин ву: «Увуз хъугъувал авуз, хъа узуз – ляхнар! Ляхнар дарди яв хъугъувал гьан, улуп узуз! Хъа узу увуз йиз ляхнариъ рябкъюрайи йиз хъугъувал улупидизавуз».

19Уву Аллагь сар вуйивалихъ хъугърана? Ужуйи апӀурава! Гьеле жинарра хъугъра ва гукӀунди йихура.

20Эй ичӀи инсан! Увуз ляхнариинди дару хъугъувал файдасуз вуйивал аьгъю дубхьну ккундийвуз? 21Хъа ихь абйирин аба Ибрагьим, чан бай Исакь, гъурбан апӀрушвʼина гъахиган, чан ляхнариинди гьякь гъапӀундайинхъа? 22Рябкъюрайвуз, дугъан хъугъувал ляхнариинди шуйи ва ляхнарин кюмекниинди дугъан хъугъувал гьубкӀуб гъабхьну. 23Ва гьамци, Гирами бикӀбариъ дибикӀнайиб тамам гъабхьну: «Ибрагьим Аллагьдихъ хъугънийи ва, чан хъугъувализ дилигну, думу гьякь гъапӀнийи» ва гьаддиз, дугъаз Аллагьдин дуст гъапнура вуйи. 24Рябкъюрайчвуз, Аллагьдин улихь адми, неинки саб хъугъвалиинди, хъа чан ляхнариинди гьякь апӀура. 25Гьаци гъабхьну качʼвал кайи Раавдихъдира. Дугъу, чпин шагьур ахтармиш апӀури гъафидар, кьабул дапӀну, жара рякъди гьаиган, думу чан ляхнариз дилигну, гьякь гъапӀундайинхъа?! 26Ари гьамци, рюгь адру беден фици дубкӀну шулуш, хъугъувалра, ляхнар даруган, дубкӀна.

Currently Selected:

Якьубдин 2: ТабГК

Highlight

Copy