Эвел 44

Вениаминдин шишлиъ арснан кӀиф

1Юсуфди чан гъуллугъчйирин аьхюриз буйругъ туву:

– Гьаму адмийирин шишлар, чибхьан гъабхуз шлубкьан ипӀрубдихьди ацӀ, гьардин арсра кьяляхъ чпин шишларизди ив. 2Рузийихъан туврайи арснахъди бицӀинурин шишлиъ гьадму йиз арсран кӀифра ив.

Гъуллугъчийи чаз Юсуфди гъапибси гъапӀнийи.

3Акв гъабхьибси, чпин дажйирра хъади, гъардшар рякъюъ аънийи.

4Дурар шагьрихьан ярхла хьайиз Юсуфди чан гъуллугъчйирин аьхюриз гъапи:

– Гьяракатнинди душну гьадму адмийирихъ хъуркь ва хъуркьубси дурариз: «Гьаз учву ужувлаз харживалиинди жаваб туврачва? 5Гьаз му йиз эйсийин убхъруб убхъурайи ва фал кибтрайи кӀиф гъадабгъунчва? Думу йиз эйсийинуб ву! Учву ужуб дару ляхин гъапӀунчва», – йип.

6Гъардшарихъ хъуркьну, Юсуфдин гъуллугъчйирин аьхюри дурариз гьадму гафар текрар гъапӀу. 7Дурари жаваб туву:

– Гьаз агъайи дицдар гафар кӀура? Яв лукӀари гьаци апӀурин! 8Гьеле учу Ханаан жилариин учуз ич шишлариъ гъибихъу арсра кмиди увуз кьяляхъ гъабхундайин? Яв эйсийин хулʼан арс ясана гъизил гьитӀибкӀну ич гьаз ву? 9Эгер думу шейъ учухь шлихь гъибихъиш, гъит думу йикӀри, хъа имбудар, гъит ич агъайин лукӀар ишри!

10Дугъу гъапи:

– Ужуйи ву, гъит, учву гъапибси ибшри: шлихь кӀиф гъибихъиш, думу йиз лукӀ хьиди, хъа имбудар тахсиркрар вуди гьисаб апӀидар.

11-12Думу гъуллугъчийи, аьхю гъардшарин шишларилан ккебгъну бицӀинуриина гъяйиз, кӀиф абгуру – думу Вениаминдин шишлиъ бихъуру. 13Дурари дерднаан чпин ккурттар чӀяргъюру, гьарди чан даждиин гъагъар иливуру ва шагьриз кьяляхъ гъюру.

14Ягьуда ва дугъан гъардшар Юсуфдин хулариз гъюру. Гьамусра Юсуф душваъ имийи. Гъардшари дугъан улихь жилиинакьан икрам апӀуру.

15Юсуфди дурариз гъапи:

– ГьапӀунчва? Учвуз аьгъдарди гъабхьунчвузхъа, гьамцир, узусир адмийи, фалниинди вари аьгъю апӀруб?

16– Учхьан ич агъайиз фу пуз шул? – жаваб туву Ягьудайи. – Учу дарча фици кӀуча? Учук тахсир кадруб фици субут апӀуча? Заанури ич тахсир ачмиш гъапӀну. Гьамус учу ич агъайин лукӀар вуча – учура ва кӀиф хьади гъабхьирра.

17Юсуфди гъапи:

– Узу гьациб апӀурин! Шлихь кӀиф гъибихънуш, гьадму хьиди йиз лукӀ, хъа учву адашдихьна мясляаьтниинди хъадаркай.

18Хъа гьадмуган Ягьудайи дугъан багахьнаси дуфну кӀуру:

– Ккун апӀураза, йиз агъа, яв лукӀрахьди йиз агъайиз гаф пуз ихтияр тув. Уву фяряуьндик гьисаб вува, яв лукӀракан хъял мапӀан. 19Йиз агъайи чан лукӀарихьан гьерхнийи: «Учвухъ адаш вая гъардаш хъайчвухъ?» 20Учу гьамци жаваб тувнийча: «Учуз яш дубхьнайи адаш ва чан кьабишнаккди бабкан гъахьи бицӀи гъардаш ачуз. Дугъан гъахи чве гъакӀну, чан дадайин баярикан имбур гьадму сар ву, гьаддиз адашдиз думу гизаф ккунду».

21Хъа гьадмуган уву яв лукӀариз гъапнийва: «Думу узуз рякъюз узухьна хъади гъачай». 22Хъа учу увуз гъапнийча: «Балхьан адаш гъитуз шуладар, хъа гъитиш, жара хьуб адашдихьан аьгь апӀуз хьибдар». 23Аммаки уву яв лукӀариз гъапнийва: «Ичв гъардаш гьамина дарфикьан гагьди, йиз улариз учву дярякъри».

24Яв лукӀрахьна, йиз адашдихьна кьяляхъ гъафиган, дугъаз уву гъапиб ктибтунча. 25Ич адашди гъапи: «Душну сацӀибсана ипӀруб гъадабгъай». 26Хъа учу жаваб тувча: «Учхьан гъягъюз шулдарчухьан, бицӀи гъардаш хъади гъабшиш, гъягъярча. Учхьан думу адмийин уларикк, эгер бицӀину гъардаш хътарди гъабшиш, ккархьузкьан хьибдарчухьан».

27Яв лукӀру, йиз адашди, учуз гъапи: «Йиз хпир Рахили узуз кьюр бай апӀбакан учвуз аьгъячвуз. 28Дурарикан сар узхьан гъушну ва узу гъапунза: „Хъа ав, думу гъячӀяргъну, парчйир гъапӀну“ ва гьаддихъанмина думу узуз гъяркъюндарзуз. 29Эгер учву узхьан мунурра гъадагъиш, ва дугъазра бала гъабшиш, учву йиз лизи кӀул дердериан накьвдиз гъябгъюз гъибтдичва». 30Гьаддиз, эгер учу бай учухъди хътарди яв лукӀрахьна, ич адашдихьна гъушиш, думу гъузрур дар. Йиз адашдиз гьаму бай гизаф ккунду ва бай хътарди, дугъаз уьмур адар. 31Эгер дугъаз учухъди бай хътарди гъяркъиш, думу йикӀуру. Яв лукӀари гьаму дерд-балайиан ич адашдин лизи кӀул накьвдиз гъябгъюз гъитди. 32Узу, яв лукӀру, гаф тувунза ич адашдиз, бай кьяляхъ хидизаяв, кӀури, хъа эгер дархиш, уьмур ккудубкӀайиз адашдин улихь тахсиркарди гъузурзу. 33Гьаддиз, увкан миннат апӀураза, йиз агъа, узуз балхъанди гьамушваъ гъузуз, хъа бализ кӀуруш, гъардшарихъди гъягъюз ихтияр тув. 34Узхьан фици адашдихьна кьяляхъ хътаркуз хьибди, эгер бай узухъди хътарди гъабшиш? Даршиш, йиз адашдин дерд аьгь апӀуз хьибдарзухьан.

Currently Selected:

Эвел 44: ТабГК

Highlight

Copy