Эвел 43

Юсуфдин гъардшари Египетдиз Вениамин хъади гъюб

1Ханаан жилиин гаш гужал гъабхьнийи. 2Египетдиан гъабхи вари рузи хътипӀган, адашди баяриз кӀуру:

– Гъарахай, ухьуз сацӀибсана ипӀруб гъадабгъай.

3Хъа Ягьудайи дугъаз кӀуру:

– Думу адмийи учуз ижмиди гъапнийи: «Йиз улариз учву рякъюзкьан мигъитанай, эгер учвухъди ичв гъардаш хътарди гъабшиш!» 4Уву учухъди гъардаш деетиш, учу душну увуз ипӀруб гъадабгъидича. 5Хъа уву думу дееетиш, учу гъягъидарча, фицики думу адмийи дупначуз: «Йиз улариз учву рякъюзкьан мигъитанай, эгер учвухъди ичв гъардаш хътарди гъабшиш!»

6– Гьаз учву узʼин гьаму бала илипначва, гьаз думу касдиз сарсана гъардаш хъачухъ гъапунчва? – гьерху Израили.

7Дурари жаваб туву:

– Думу адмийи учкан ва ихь хизандикан хъайи-хъайиси гьерхнийи: «Ичв адаш чӀивиди имийин? Учвухъ сарун гъардаш хъайинчвухъ?» Учу дугъан суалариз жаваб тувнийча. Дугъу, ичв гъардаш мина аькъинай кӀуруб, учуз наънан аьгъяйи?

8Ягьудайи чан адаш Израилиз кӀуру:

– Бай узухъди деет. Ухьу: учу, уву, ихь веледар – вари чӀивиди гъузбан бадали, учу дишла рякъюъ учӀвдича. 9Магьа йиз гардан, узу дугъхъанди жаваб тувдиза: дугъан гьякьнаан узхьан уву гьерхдива. Эгер узу думу увухьна дархиш ва гьамушвахь яв улихьна духну дедрерккиш, узу яв улихь аьхиризкьан тахсирлуди гъуздиза. 10Эгер ухьу гьамкьан ккилигури гъузундайиш, кьюб ражари душну гъюз шуйи.

11Гьадмуган, дурарин адаш Израили гъапи:

– Эгер жараси шулдарш, магьа гьамци апӀинай: гьюрбйириъди ихь жилин варитӀан ужударстар бегьерар гьадму касдиз багъишарди гъайихай – ицци ниар хъайи мялгьямар ва йиччв, ицци ниар хъайи укӀар ва аьтрар, миндаль ва фисташкйир. 12Кьюб ражари артухъди арс гъадабгъай, кьяляхъ ичв шишлариъ ади гъабхьибра кади гъабхбан бадали: мумкин ву думу гъалатӀ духьну ивнайибра хьуз. 13Ичв гъардашра гъадагъай, хъана гьадму касдихьна гъарахай. 14Гъит Кьудратлу Заанури дугъан улихь, дугъу ихтияр тувну ичв тмуну гъардашна Вениамин учвухъди кьяляхъ гьаъруси, учвуз рягьим улупри. Узкан улхуруш, эгер узу веледерихъ мягьрум духьну ккуниб вуш, гъит мягьрум ишри.

15Дурар, багъишарна кьюб ражари артухъ арс гъадабгъну, Вениаминра хъади дишла Египетдиз гъушу ва Юсуфдин улихь дийигъу. 16Юсуфди, дурарихъди Вениамин хъади гъяркъган, чан гъуллугъчйирин аьхюриз гъапи:

– Гьаму адмийир йиз хулаз хъади гъарах ва мал-марччликан саб фукӀа дубккну, лисуз ипӀруб гьязур апӀин, дурари узухъди лисундин уьл ипӀиди.

17Адмийи чаз гъапибси апӀуру ва дурар Юсуфдин хулариз хъади гъюру. 18Гъардшариз, чиб дугъан хулариз гъурхган, гучӀ гъабхьнийи. Дурари: «Ухьу мина сифте ихь шишлариъ ади гъабхьи арснан кӀуллан духнахьа, – кӀури фикир гъапӀнийи. – Мугъаз ухьʼин алархьуз, ухьу дисуз, ккагъуз, лукӀʼвализ гъадагъуз ва ихь дажйир ттадагъуз ккунди а».

19Дурари Юсуфдин гъуллугъчйирин аьхюрихъди хулазди учӀвайиз урчӀарихъ гафар апӀуз хъюгъру:

20– Хъебехъа, аьхюр, – гъапи дурари, – учу мина ипӀруб гъадабгъуз саб ражари гъафидар вуча, 21хъа учу йишв адапӀуз саб йишваъ дергну шишлар хътурчган, учуз гьардиз зат ктручу ич арс гъибихъунчуз, гьаддиз думу учу кьяляхъ гъабхунча. 22Учу учухьди ипӀруб гъадабгъуз хъана арс гъабхунча. Гъубшу ражари ич шишлариъ думу арс шли ивнуш аьгъдарчуз.

23Думу адмийи жаваб туву:

– Вари ужу ву, гучӀ мапӀанай. Ичв Заанур – ичв адашдин Заанур – ву думу хазна ичв шишлариъ жиниди Ивур. Узухьна ичв арс гъурубкьунзухьна.

Хъасин дугъу Симеонра дурарихьна адау.

24Гъуллугъчйирин аьхюри гъардшар Юсуфдин хулариз гъурхнийи ва ликар жикӀуз шидра, дажйириз ккабхьрубра тувнийи. 25Лисуз Юсуф гъяйиз дурари багъишарра гьязур апӀуру, фицики дурариз, лисун гьадушваъ апӀидичва, дупнайи.

26Юсуф хулаз гъафиган, дурари дугъаз багъишар тувру ва жилиинакьан икрам апӀуру. 27Дугъу дурариз салам тувру, хъа кӀуру:

– Хъа фици ву, учву узуз чакан ктибту гьадму ичв яшлу адаш? ЧӀивиди имийин думу?

28Дурари жаваб туву:

– Яв лукӀ, ич адаш, сагъди ву.

Ва гьюрматнаан дугъан улихь дурари икрам гъапӀу. 29Юсуфди ул илбицу ва дугъаз чан дадайин бай, чан чве Вениамин, гъяркъю.

Хъа Юсуфди гьерху:

– Гьаму вуйин ичв, узуз кӀурайи бицӀину гъардаш? Заанурин ккуниваликк ккади ишриву, йиз бай!

30Чве гъяркъюбси, ккунивалиан Юсуфдин кӀваз яман тясир гъабхьи. Уларигъна нивгъ гъафи думу, тяди удучӀвну, жара хулаз душну, душваъ гъишу. 31Хъасин маш дижибкӀну, хъана хяларихьна гъафи, ва учв хилиъ дидисну гъапи:

– Уьл гьивай.

32Дугъаз жаради гьиву, гъардшариз – жаради ва дурарихъди ипӀурайи египтариз жаради гьиву, гьаз гъапиш египтариз жугьдарихъди сатӀиди деъну ипӀуб гьярамси гьисаб апӀуйи. 33Дугъан улихь гъардшар, сарпирилан бицӀинуриинакьан хъайи-хъайиси дитру, хъа дурар чиб-чпихьинди мюгьтал духьну лигуру. 34Гъардшариз ипӀруб Юсуфдин суфрайилан туву. Вениаминдиз, имбударик гъилигган, хьуб ражари артухъ пай тувру. Дурари Юсуфдихъди бегьемди ипӀуб-убхъуб гъапӀу.

Currently Selected:

Эвел 43: ТабГК

Highlight

Copy