Паччагьлугъар-2 24

Агьалйирин кьадар гьисаб апӀбаз лигну Раббийи Давуддиз жаза тувру

1РАББИЙИН хъял цӀийикӀултӀан израилариина гъизмиш гъабхьну, ва Дугъу, гъарах ва Израилинна Ягьудайин агьалйирин кьадар гьисаб апӀин кӀури, дурариз аьксиди Давуд гъитӀирккнийи.

2Паччагьди Юавдиз ва кьушмин дугъахъди хъайи аьхюдариз гъапнийи:

– Дандихъан Беэр-Шевайихъна Израилин вари тухмариз гъарахай ва, дурар фукьан вуш узуз аьгъю хьпан бадали, агьалйирин кьадар гьисаб апӀинай.

3Амма Юавди паччагьдиз жаваб туву:

– Гъит РАББИЙИ, яв Заанури, агьалйирин кьадар варж ражну артухъ апӀри, ва гъит йиз агъа вуйи паччагьдин улариз думу рябкъри. Хъа гьаз йиз агъа паччагьдиз дициб ляхин апӀуз ккунду?

4Амма паччагьдин гаф Юавдин ва кьушмин аьхюдарин гафтӀан гужлиб гъабхьнийи, ва дурар, израилин агьалйирин кьадар гьисаб апӀбан бадали, паччагьдихьан гъушнийи. 5Ярдандикан кудучӀвну, дурар Гаддин дерейин кьялаъ айи шагьрихьан кьибла терефназди, Язер шагьрихьинди хьайи Аруериъ бина йивну дийигъу ва вари думу йишварин агьалйир гьисаб гъапӀу. 6Дурар Галааддиз ва Тахтим-Ходшийин жилиина гъушу, дурар Дан-Яандиз Сидондихьна вуйи хътицбан рякъюъди гъафнийи ва вари думу йишварин агьалйирра гьисаб гъапӀнийи. 7Хъасин дурар Тир гъалайихьна ва хивеярин, ва ханаанарин вари шагьрарихьна рякъюъ учӀву ва Ягьудайин варитӀан кьибла пайназ, Беэр-Шевайиз, думу йишварин вари агьалйирра гьисаб дапӀну, гъафи. 8УрчӀвуб вазна къад йигъан вари уьлке ккадапӀну, дурар Ерусалимдиз кьяляхъ гъафнийи. 9Юавди паччагьдиз агьалйирин кьадар гьисаб апӀбан гьякьнаан мялумат туву: тур ишлетмиш апӀуз удукьру, гужли миржидварж агъзур жилижви Израилиъ а ва хьудварж агъзур – Ягьудайиъ.

10Амма Давудди, чав агьалйирин кьадар гьисаб апӀбан кьяляхъ, нач хьувал гьисс гъапӀнийи ва РАББИЙИЗ гъапнийи:

– Думу ляхин дапӀну, узу зурба гунагь гъапӀунза. Гьамус, я РАББИ, Увуз ккарагураза, Яв лукӀралан тахсир алдабгъ! Узу асуллагь фикир дарапӀди ляхин гъапӀунза.

11Хъайигъан гвачӀнинган Давуд гъудужвайиз, Гад пайгъамбрихьна, Давуддин хьуз ккайиб рякърурихьна, РАББИЙИН гаф гъафи:

12– Гъарах ва Давуддиз йип: «Гьамци кӀура РАББИЙИ: Узу увуз шубуб жаза теклиф апӀураза. Узу увʼина гьапӀбан бадали, дурарикан саб кадабгъ».

13Гад Давуддихьна гъафнийи ва дугъаз гъапнийи:

– Яв уьлкейиъ ургуд йисан гаш хьибдин? Ясана шубуб вазли увухъ хъергру яв душмнарихьан гьергидина? Ясана яв уьлкейиъ шубуд йигъан вари гъирмиш апӀру уьзур хьибдин? Гьаци вуйиган, фикир апӀин ва, узу Гьаънайириз узу фициб жаваб тувруш, къарар адабгъ.

14Давудди Гаддиз гъапнийи:

– Узуз гизаф гъагъиди вузуз, вушра гъит ухьу РАББИЙИН хилариъ ахъри, Дугъан рягьим зурбаб ву аьхир, амма узу адмийирин хилариъ ахъуз мигъитан.

15Ва РАББИЙИ гьадму гвачӀниан тяйин дапӀнайи вахтнан аьхириз Израилиина вари гъирмиш апӀру уьзур гьапӀру, ва Дандихъан Беэр-Шевайихъна ургуцӀур агъзур адми кечмиш гъахьнийи. 16РАББИЙИН амриинди малайикди Ерусалим терг апӀуз хил гьачӀабккиган, РАББИЙИ бала алапӀбан гьяйиф гъизигу ва халкьдиз йивурайи малайикдиз гъапи:

– ЧӀяаьн! Ис апӀин яв хил.

РАББИЙИН малайик думуган Евус халкьдиан вуйи Орнайин раццан зиин алди гъахьну. 17Халкьдиз йивурайи малайик чаз гъяркъиган, Давудди РАББИЙИЗ гъапнийи:

– Гьаму гунагь ва писвал узу гъапӀунза, хъа мурар марччар ву – фу гъапӀну дурари? Гъит Яв хил узʼина ва йиз хизандиина илтӀибкӀри.

Давудди гъурбан апӀрушв тикмиш апӀуру

18Думу йигъан Гад Давуддихьна гъафнийи ва дугъаз гъапнийи:

– Гъарах ва евусжви Орнайин раццʼин РАББИЙИЗ гъурбан апӀрушв тикмиш апӀин.

19Ва Давуд, Гаддикди РАББИЙИ амур гъапӀганси, гъушу. 20Орна гъилигиган ва чахьна гъюрайи паччагь ва дугъан адмийир гъяркъиган, думу улихьна удучӀву ва, жилик маш кубкӀну, паччагьдиз икрам гъапӀу.

21Орнайи гъапи:

– Гьаз йиз агъа вуйи паччагь чан гъаравашдихьна гъафну?

– Яв рацц масу гъадабгъуз, – жаваб туву Давудди, – ва, халкьдин арайиъ вари гъирмиш апӀру уьзур ккудубкӀбан бадали, РАББИЙИЗ гъурбан апӀрушв тикмиш апӀуз.

22Орнайи Давуддиз гъапи:

– Гъит йиз агъа вуйи паччагьди чаз лазим вуйиб вари гъадабгъри ва гъурбан апӀри. Магьа вариубгбан гъурбан апӀуз йицар, хъа гакӀвларди гад апӀру кьул ва йицар ккитӀру алатар. 23Я паччагь, Орнайи гьамрар вари паччагьдиз тувра.

Хъана Орнайи дугъаз гъапи:

– Гъит РАББИ, яв Заанур, увухьна ужувлиинди янашмиш ишри!

24Хъа паччагьди Орнайиз жаваб туву:

– Ваъ, узу яв гьякъи тувдиза. Узу РАББИЙИЗ, йиз Заануриз, узу чахъ фукӀа тутруву вариубгбан гъурбан апӀидарза.

Ва Давудди рацц ва йицар, дурарихъ арснан хьуцӀур шекел#24:24 ХьцӀур шекел: тахминан 550 грамм. тувну, масу гъадагънийи. 25Давудди душвʼин РАББИЙИЗ гъурбан апӀрушв тикмиш гъапӀнийи ва вариубгбан ва демдин гъурбнар#24:25 Демдин гъурбнар: Му жюре гъурбнар Заанурихъди дюз аьлакьйир уьрхюз ва Дугъахъди албагбан ва цӀийикӀултӀан аьлакьйир хьпан шадлугъар ипӀбар-ухбариинди къайд апӀуз апӀури гъахьну. Убккбахъан гьяйванатдин тялукь пай гъурбан апӀрушвʼин убгуйи; хъа имбу пай гъурбан гъапӀу касди, дугъан хизанди ва Заанурин гъуллугъчийи ипӀури гъахьну. гъапӀнийи. РАББИЙИЗ Давуддин чан уьлкейихъан вуйи ккарагбар гъеерхьнийи, ва Израилиъ вари гъирмиш апӀру уьзур ккудубкӀнийи.

Currently Selected:

Паччагьлугъар-2 24: ТабГК

Highlight

Copy