Паччагьлугъар-2 1
1
Давуддиз Саулин аьжаликан аьгъю шулу
1Саул кечмиш хьубхъан Давуд, амалекариин гъалиб духьну, кьяляхъ гъафнийи ва кьюд йигъан Циклагдиъ ади гъахьнийи. 2Шубудпи йигъан Саулин бинайилан, учв яснаъ айивал улупури, гъячӀябгъю палат ва кӀулʼин бишируг алабхьну, сар адми гъафнийи.
Думу Давуддихьна гъафнийи ва дугъаз жилиинакьан икрам гъапӀнийи.
3– Уву наънан гъафунва? – гьерхнийи Давудди дугъхьан.
– Узу израиларин бинайилан вуза ва узу душвлан къутармиш гъахьунза, – жаваб тувнийи дугъу.
4– Фу гъабхьну? – гьерхнийи Давудди. – Кидибт узуз.
Адмийи гъапнийи:
– Халкь дявдин майдандилан гьебгнийи. Гизафдар дявдиъ гъакӀнийи. Саул ва дугъан бай Юнатан дукӀна.
5Чаз гьаму хабар гъабхи жигьилиз Давудди гъапнийи:
– Саул ва дугъан бай Юнатан дукӀнайивал наънан аьгъявуз?
6– Узу дюшюшнаан Гилбоа дагъдиина алдахъунзу, – гъапну хабар гъабхи жигьили, – душвʼин, чан жида ккутӀубкьну, дийигънайи Саул алийи, хъа атлуйир ва гьяйвнар ккитӀнайи аьрабйир дугъаз багахь шулайи. 7Кьяляхъ илдицну ва узу дяркъну, Саули узуз дих гъапӀнийи. Ва узу гъапнийза: «Узу фу дапӀну ккунду?» 8Дугъу узхьан гьерхнийи: «Уву фуж вува?» «Амалекжви», – жаваб тувнийза узу. 9Думуган Саули узуз гъапнийи: «Багахьна гъач ва узу йивну йикӀ! Узу аьхиримжи нефес хътабгъураза, амма гьеле чӀивиди имиза». 10Узу багахьна гъушнийза ва Саул йивну гъакӀнийза, гьаз гъапиш гьацдар зийнарин кьяляхъ думу чӀивиди гъудрузруб аьгъяйзуз. Узу, дугъан кӀулʼин али таж ва хлихъ хъайи кулих гъадагъну, дурар гьамина, йиз агъайихьна, гъахунза.
11Думуган Давудди ва дугъахъди хъайидари варидари, яснаъ айивал улупури, чпин палтар гъячӀяргънийи. 12Дурар гьарйир апӀури гъишнийи, ва, яс уьбхюри, Саулихъан, ва дугъан бай Юнатандихъан, РАББИЙИН кьушмихъан, Израилин тухумдихъан хябяхъдизкьан ушв гъибиснийи, гьаз гъапиш дурар вари дявдиъ гъакӀнийи. 13Чаз гьаму хабар гъабхи жигьилиз Давудди гъапнийи:
– Уву наънан вува?
– Узу гъураба вуйи амалекжвуван бай вуза, – жаваб тувнийи дугъу.
14Давудди дугъаз гъапнийи:
– РАББИЙИ ччим кадатнайир талаф апӀбан бадали, хил за апӀуз гучӀ фици гъабхьундарвуз?
15Давудди чан адмийирикан сариз дих гъапӀнийи ва дугъаз гъапнийи:
– Багахьна гъарах ва думу йивну йикӀ!
Дугъу хабар гъабхи жигьилиз гъиву, ва думу гъакӀи. 16Хъа Давудди, амалекжвувахьинди илдицну, гъапнийи:
– Увуз жаза уву ктабгъунва. «РАББИЙИ ччим кадатнайир йивну гъакӀунза» гъапиган, уву увуз къаршуди шагьидвал гъапӀунва.
Саулихъ ва Юнатандихъ Давуддин ишал
17Давудди Саулихъ ва Юнатандихъ гьаму дерднан мяълийиинди ишал гъапӀну 18ва Ягьудайин вари агьалйириз гьаму «ЧӀимрин мяъли» улупуз амур гъапӀну (думу мяъли «Дугъри вуйирин китабдиъ» дибикӀна):
19– Яв ад вуйир, Израил,
яв тепйириин ккагъну.
Кьудратлудар фици гъакӀнуш!
20Филистимарин шубар шад дархьбан бадали,
суннат дапӀну адрударин шубари гьуррай дарапӀбан бадали,
дидин гьякьнаан макӀанай Гъатдиъ,
Ашкелондин#1:20 Гъат, Ашкелон: мурар филистимарин шагьрар ву. кючйириъ хабрар марагъанай.
21Эй Гилбоайин дагълар,
гъит сарун учвуз я чиг, я мархь,
я жумарт хутӀлар даришри.
Душваъ кьудратлударин гъалхнар,
ва Саулин сарун чакан
ччим ктатури имдру гъалхан#1:21 Ччим ктатури имдру гъалхан: гъалхан гъидкьикан апӀури гъахьну. Думу пуч дархьуз ччим ктатуйи.,
чиркин гъапӀну аьхир.
22Магълуб гъахьидарин ифдихьан,
кьудратлударин жанарихьан
Юнатандин чӀимир кьяляхъ илбицудайи,
Саулин тур адрабцӀди кьяляхъ хътабкудайи.
23Саул ва Юнатан –
чӀивиди имиди гьамкьан ккунидар
ва гьюрмат айидар,
Аьжалиъра жара гъахьундар.
Вуйи дурар люкьяртӀан зарб кайидар,
асланартӀан гужлидар.
24Эй Израилин шубар,
ишай Саулихъ,
учвʼин аку-уьру палат алабхьури гъахьирихъ,
ичв палат гъизилихъди балгури гъахьирихъ.
25Кьудратлудар дявдиъ фици гъакӀнуш!
Юнатан яв тепйирʼин талаф гъахьну.
26Увухъ хажалат зигураза, Юнатан, йиз чве,
уву узуз гизаф багьа вуйва.
Яв ккунивал узуз успагьиб вуйзуз,
дишагьлийирин ккунивалтӀан успагьиб.
27Кьудратлудар фици гъакӀнуш!
Дявдин яракь талаф гъабхьну!
Currently Selected:
Паччагьлугъар-2 1: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
