Паччагьлугъар-4 24

1Якимди паччагьвал апӀурайи вахтна Вавилондин паччагь Навухаднасар Ягьудайиин алархьнийи. Яким паччагь шубуд йисазди дугъан гьюкмикк ккахънийи, амма хъасин Якимди фикир гьюдюхнийи, ва Навухаднасариз къаршуди удучӀвнийи. 2РАББИЙИ Якимдиина Халдеяйиан, Арамдиан, Муавдиан ва Аммундиан тӀарашчйир гьаънийи. Дугъу дурар Ягьуда терг апӀуз гьауйи, Чан гъаравашар пайгъамбрарин мелзналан РАББИЙИН гафнаъ дупнайиганси. 3Гьелбетда, Ягьудайиин му вари ляхнар РАББИЙИН амриинди, Манашейин гунгьариз ва дугъу гъапӀу вари ляхнариз лигну улуркьдар вуйи. 4Манашейи гизаф тахсир ктру ифи удубзнийи, ва Ерусалим ифдихъди абцӀнийи аьхир. РАББИЙИЗ гьаддиз хил алдабгъуз ккунди адайи.

5Якимди паччагьвал гъапӀу вахтнан жара гьядисйирикан ва дугъу гъапӀу вари ляхнарикан «Ягьудайин паччгьарин тарихарин китабдиъ» дибикӀна. 6Яким чан архйирихъди архаин гъахьнийи. Ва дугъан бай Якин дугъахъна паччагь гъахьнийи.

7Египетдин паччагь чан уьлкейиан сарун удучӀвундайи, гьаз гъапиш Вавилондин паччагьди Египетдин дерейихъан Евфрат нирихъна дугъан вари жилар гъидиснийи.

Ягьудайин паччагь Якин йисирвализ дисуб

8Учв паччагь шлуган, Якиндин йицӀимиржид йис вуйи. Дугъу Ерусалимдиъ шубуб вазли паччагьвал гъапӀнийи. Дугъан дадайиз Нехушта кӀуйи, думу тухумдиинди Ерусалимдиан вуйи Элнатандин риш вуйи. 9Якинди, варибдиъ чан адашдиз ухшар шули, РАББИЙИН улариъ писвал апӀуйи.

10Думу вахтна Вавилондин паччагь Навухаднасарин кьушмарин аьхюрар Ерусалимдиина гъушнийи ва шагьур кьялаъ апӀнийи. 11Учв Навухаднасар шагьур кьялаъ апӀган гъафнийи. 12Ягьудайин паччагь Якин, чан дадара, багахь гъуллугъ апӀурайидарра, кьушмарин аьхюрарра, гъалайиъ гъуллугъ апӀурайидарра хъади, Навухаднасариз йисирвализ гъушнийи.

Чан паччагьвалин миржидпи йисан Навухаднасари Якин йисирвализ гъадагънийи. 13РАББИЙИ гъапиганси, Навухаднасари РАББИЙИН Хулʼан ва паччагьдин гъалайиан вари хазнйир гъурхнийи. Израилин паччагь Сулейманди РАББИЙИН Хулаз гъапӀу гъизилин аваданлугъар дугъу тикйир гъапӀнийи. 14Дугъу Ерусалимдиан вари гьякимар ва эскрар, сяняаьткар ва рукьан устйир – уьмуми гьисабниинди йицӀуд агъзур инсан – йисирвализ гъурхнийи. Гъитдар анжагъ уьлкейин касиб инсанар вуйи.

15Навухаднасари Якин йисирди Вавилондиз гъурхнийи. Дугъу Ерусалимдиан Вавилондиз Якин паччагьдин дада, дугъан хпар, дугъан гъалайиъ гъуллугъ апӀурайидар ва уьлкейин гьякимар гъурхнийи. 16Гьаци, Вавилондин паччагьди йисирарди ургуд агъзур кьувватлу эскер, агъзур сяняаьткар ва рукьан уста Вавилондиз гъурхнийи. Дурар вари дяви апӀуз шлудар вуйи. 17Дугъу Якиндин халу Матания дугъан ерина паччагь гъапӀнийи ва дугъан ччвур Цедекия ччвурнахъди гьюдюхнийи.

Ягьудайин паччагь Цедекия

18Учв паччагь шлуган, Цедекияйин къанна сад йис яш вуйи. Дугъу Ерусалимдиъ йицӀисад йисан паччагьвал гъапӀнийи. Дугъан дадайиз Хамутал кӀуйи, думу Ливна шагьриан вуйи Иремияйин риш вуйи. 19Цедекияйи, варибдиъ Якимдиз ухшар шули, РАББИЙИН улариъ писвал апӀуйи. 20Ерусалимди ва Ягьудайи РАББИЙИК гьацикьан хъял капӀнийики, Дугъу дурар Чахьан гьутӀурккнийи.

Цедекия Вавилондин паччагьдиз къаршуди удучӀвнийи.

Currently Selected:

Паччагьлугъар-4 24: ТабГК

Highlight

Copy