Паччагьлугъар-4 23

Юшияйи Заанурихъди Йикьрар цӀийи алауб

1Думуган Юшия паччагьди Ягьудайин ва Ерусалимдин вари гьюрматлу яшлуйириз дих гъапӀнийи. 2Думу Ягьудайин халкьдихъди, Ерусалимдин агьалйирихъди, Заанурин гъуллугъчйирихъди ва пайгъамбрарихъди – бицӀирихъан аьхюрихъна вари халкьдихъди – сатӀиди РАББИЙИН Хулаз гъушнийи. Дугъу РАББИЙИН Хулаъ гъибихъу Йикьрарин Китабдик кайи вари гафар дурариз гъурхнийи. 3Паччагь мурхьлин багахь дийигънайи. Паччагьди, РАББИЙИН рякъюъди гъягъюз, Дугъан амрар, улупбар ва тяйинвалар кӀваантӀан ва вари кьувватариинди тамам апӀуз ва гьаму китабдик дидикӀнайи гафарихъди гъягъюз гаф туври, РАББИЙИН улихь Йикьрар гъийитӀнийи. Вари халкь думу Йикьрарихъди рази гъабхьнийи.

4Паччагьди Заанурин аьхюну гъуллугъчи Хилкияйиз, Заанурин исина дережайин гъуллугъчйириз ва раккнарихъ дийигънайи гъаравлариз амур гъапӀнийи:

– РАББИЙИН Хулʼан Баализ, Ашерайиз#23:4 Баал, Ашера: Баал – ханаанарин кӀулин бут, чаз кюгьне вахтари ханаанари ибадат апӀури гъахьи завар рахбан бут. Думу гафнан мяна – «агъа, эйси». Ашера Ханаандин бегьерлуварин бут вуйи. Думу мурхьулси улупуйи. ва заварин кьушум вуйи ригъдиз, вазлиз ва хядариз дапӀнайи вари шейʼар адагъай.

Дугъу дурар Ерусалимдин гъирагъдиъ Кьидрун дерейиъ цӀигъ гъургнийи, дурарин рюкъ Бет-Эл шагьриз гъубхнийи. 5Юшияйи Ягьудайин паччгьари тепйириин, Ягьудайин шагьрариъ ва Ерусалимдин гъирагъарихъ иццидар ниар хъайи шейʼар ургуз дерккнайи ва Баализ, заварин кьушум вуйи ригъдиз, вазлиз ва хядариз иццидар ниар хъайи шейʼар ургурайи бутарин гъуллугъчйир ултӀурккнийи. 6Дугъу РАББИЙИН Хулʼан Ашерайин мурхьул Кьидрун дерейиз адабгънийи ва душваъ думу гъубгнийи. Мурхьлин рюкъ дугъу халкьдин умуми накьваригъ гъарабгънийи. 7Гьацира дугъу РАББИЙИН Хулан багахь хьайи хулар гъарагънийи. Думу хулариъ ибадатханайин кьяппа жилижвувар яшамиш шуйи ва дишагьлийири Ашерайиз парчйир урхуйи.

8Юшия паччагьди Ягьудайин шагьрариан вари Заанурин гъуллугъчйир адаънийи, ва Гивайихъан Беэр-Шевайихъна тепйириин али гъурбан апӀрушвар чиркин гъапӀнийи. Дугъу шагьрин урнарин багахь хьайи гъурбан апӀрушв гъарабгънийи (душв гьюкумдар Гьисайин урнарихьан гагул терефназди хьайи). 9Тепйириин али гъурбан апӀрушвариан вуйи Заанурин гъуллугъчйири Ерусалимдиъ РАББИЙИН гъурбан апӀрушваъ гъуллугъ апӀурдайи. Гьаци вушра, дурари чпин чвйирихъди, Заанурин гъуллугъчйирихъди, сатӀиди дун ктру уьл ипӀуйи.

10Мулех кӀуру бутдиз баяр ва шубар сарун сарихьанра цӀигъ гъурбан апӀуз дархьбан бадали, дугъу Бен-Гинум дерейиъ айи Туфет кӀуру гъурбан апӀрушв чиркин гъапӀнийи. 11Дугъу РАББИЙИН Хулан учӀврушвахь Ягьудайин паччгьари ригъдиз бахш вуди дивнайи гьяйвнар гьадагънийи. Дурар гьяятдиъ, паччагьдин гъалайин гъуллугъчи Натан-Мелехдин хулан багахь, жилиин дивнайи. Хъасин Юшияйи ригъдиз бахш дапӀнайи дявдин фургънар цӀигъ гъургнийи.

12Ягьудайин паччгьари Ахаздин заан хулан гъваин тикмиш гъапӀу гъурбан апӀрушвар ва Манашейи РАББИЙИН Хулан кьюб гьяятдиъ тикмиш гъапӀу гъурбан апӀрушвар Юшияйи гъарагънийи. Дугъу дурар душвлан алдагънийи, гъюргънийи ва тикйир Кьидрун дерейизди гатӀархьнийи. 13Юшия паччагьди гьацира Ерусалимдихьан ригъ гьудубчӀвру терефнаъ, Аьжлин дагъдихьан кьибла терефнаъ айи тепйириин али гъурбан апӀрушвар чиркин гъапӀнийи. Дурар Израилин паччагь Сулейманди сидонарин хяви бут-дишагьли Астартайиз, Муавдин халкьдин хяви бут Кемушдиз ва Аммундин халкьдин хяви бут Милхумдиз тикмиш гъапӀдар вуйи. 14Юшия паччагьди гирами гъванар тикйир гъапӀнийи, Ашерайин мурхьлар алдатӀнийи ва дурар алди гъахьи йишвариин инсанарин кӀурбар дахьнийи.

15Гьятта Бет-Элиъ айи, Израилиз гунгьихьна ял гъапӀу Яравамди, Наватдин бали, тикмиш гъапӀу гъурбан апӀрушвра кмиди дугъу гъарабгънийи. Дугъу тепейиин али ибадатханайик цӀа кипнийи ва думу рюкъ-руг гъапӀнийи, Ашерайин мурхьулра гъубгнийи. 16Дидин кьяляхъ Юшия паччагь гургутум гъилигнийи, ва дугъаз тепейин ямажнак накьвар гъяркънийи. Дугъу накьвариан кӀурбар адагъуз ва гъурбан апӀрушвʼин, думу чиркин апӀбан бадали, дурар ургуз амур гъапӀнийи. Гьаци Заанурин инсанди вахт ккимиди мялум гъапӀу РАББИЙИН гаф Юшияйи тамам гъапӀнийи.

17Паччагьди гьерхнийи:

– Узуз рябкъюрайиб шлин накьвдин гъван ву?

Шагьрин агьалйири гъапнийи:

– Му накьв Бет-Элин гъурбан апӀрушвкан уву гъапӀуб вари вахт ккимиди гъапи Ягьудайиан гъафи Заанурин инсандин ву.

18Паччагьди гъапнийи:

– Гъит думу архаинди дахъри. Гъит сарира дугъан кӀурбар инжик дарапӀри.#23:18 Мушваъ улхуб Заанурин инсан кьяляхъ гъапӀу пайгъамбрикан гъябгъюра. Думу Заанурин инсандин гюмбтиъ кивнийи (3 Пачч. 13:11-32). Самария мушваъ вари Израил паччагълугъдиз кӀура.

Дурари дугъан ва Самарияйиан гъафи пайгъамбрин кӀурбариз инсаф гъапӀнийи.

19Гьацира Юшия паччагьди Самарияйин шагьрариъ тепйириин али вари ибадатханйир терг гъапӀнийи. Дурар, РАББИЙИК хъял капӀри, Израилин паччгьари тикмиш гъапӀдар вуйи. Дугъу дурарикан Бет-Элиъ гъапӀуб гъапӀнийи. 20Юшия паччагьди думу ибадатханйирин гъуллугъчйир гъурбан апӀрушвариин гъурккнийи ва душвʼин инсанарин кӀурбар гъургнийи. Хъасин думу Ерусалимдиз кьяляхъ гъафнийи.

Песах машквар цӀийи алапӀуб

21Паччагьди халкьдиз амур гъапӀнийи:

– РАББИЙИЗ, ихь Заануриз, Йикьрарин Китабдиъ дибикӀнайиганси, Песах машквар#23:21 Песах машквар: жугьдарин асас машкврарикан саб вуйи му машквар Израилин халкь Египетдиан удучӀвувалихъди аьлакьалу ву. Думу гьарсад йисан хьадукра къайд апӀуру. Думу машквриз жугьдар Ерусалимдиз дуфну ккундийи. апӀинай.

22Израилиз диванбегари регьбервал тувуз хъюгъю йигъланмина#23:22 Паччгьар хьайиз Израилиъ диванбегари регьбервал тувуйи. Диванбегар Израилин кьушмарин аьхюрарра вуйи., Израилин паччгьарин ва Ягьудайин паччгьарин вари йигъари мициб аьхю Песах машквар гъабхьундайи. 23Юшия паччагьдин паччагьвалин йицӀимиржидпи йисан РАББИЙИЗ думу Песах Ерусалимдиъ къайд гъапӀнийи.

Юшия паччагьдин паччагьваликан

24Гьацира Юшия паччагьди гъийихдариз дих апӀрудар, фалчйир, хулан бутар ва Ягьудайиъна Ерусалимдиъ гъидихъу хяви шейʼар терг гъапӀнийи. Дугъу думу ляхин РАББИЙИН Хулаъ Заанурин гъуллугъчи Хилкияйиз гъибихъу китабдик дибикӀнайи Къанундин тӀалабар тамам апӀбан бадали гъапӀнийи. 25Я Юшия паччагь хьайиз, я дугъан кьяляхъ дугъаз ухшар вуйи, думуси вари кӀваантӀан, вари рюгьниинди ва кьувватариинди, Муса пайгъамбрин вари Къанундиинди РАББИЙИХЬНА илтӀикӀу паччагь гъахьундар.

26Гьаци вушра, РАББИЙИ, Чак хъял капӀри Манашейи гъапӀубдин варибдин кӀуллан Ягьудайикан гъабхьи Чан гизаф зурба ажугълувал кьяляхъ гъапӀундайи. 27РАББИЙИ гъапнийи:

– Узу Ягьудара Узхьан, Израил ярхла гъапӀганси, ярхла апӀидиза. Узу ктабгъуб вуйи гьаму шагьур, Ерусалим, ва Узу «Мушваъ Йиз ччвур хьибди» гъапи Халра гатӀахьидиза.

Юшия йивну йикӀуб

28Юшияйи паччагьвал гъапӀу вахтнан жара гьядисйирикан ва дугъу гъапӀу вари ляхнарикан «Ягьудайин паччгьарин тарихарин китабдиъ» дибикӀна.

29Юшияйи паччагьвал апӀурайи вахтна Египетдин паччагь, фяряуьн Неху Ашурдин паччагьдиз кюмекназ Евфрат нирихъна гъушнийи. Юшия паччагь дугъахъди дяви апӀуз удучӀвнийи, амма Неху фяряуьнди Мегиддо шагьриъ думу йивну гъакӀнийи. 30Юшияйин гъаравашари дугъан майит дявдин фургъниъди Мегиддойиан Ерусалимдиз гъабхнийи ва чан гюмбтиъ накьвдик кивнийи. Хъа халкьди Юшияйин бай Яхаздикан чан адашдин ерина паччагь хьуз ччим ктатнийи.

Ягьудайин паччагь Яхаз

31Учв паччагь шлуган, Яхаздин къанна шубуд йис яш вуйи. Дугъу Ерусалимди шубуб вазли паччагьвал гъапӀнийи. Дугъан дадайиз Иремияйин риш Хамутал кӀуйи. Тухумдиинди думу Ливна шагьриан вуйи. 32Яхазди, варибдиъ чан абйириз ухшар шули, РАББИЙИН улариъ писвал апӀуйи.

33Неху фяряуьнди Хамат вилаятдиъ айи Ривла шагьриъ дугъахъ, сарун Ерусалимдиъ паччагьвал дарапӀбан бадали, къандалар хъитӀнийи. Гьацира дугъу Ягьудайиин варж талант#23:33 тахминан 3400 килограмм. арснан ва саб талант#23:33 тахминан 34 килограмм. гъизилин харж иливнийи. 34Неху фяряуьнди Юшияйин бай Элиаким чан адашдин ерина паччагь гъапӀнийи ва дугъʼин Яким ччвур иливнийи. Хъа Яхаз дугъу Египетдиз гъурхнийи, думу душваъ кечмишра гъахьнийи. 35Якимди Неху фяряуьндиз дугъу тӀалаб апӀру кьадар арс ва гъизил тувнийи. Дици апӀбан бадали, дугъу уьлкейиин налог илипнийи ва уьлкейин халкьдихьан, гьарсарихъ хъайи мутмуйиз дилигну, арс ва гъизил уч гъапӀнийи.

Ягьудайин паччагь Яким

36Учв паччагь шлуган, Якимдин къанна хьуд йис яш вуйи. Дугъу Ерусалимдиъ йицӀисад йисан паччагьвал гъапӀнийи. Дугъан дадайиз Зевуда кӀуйи, думу тухумдиинди Рума шагьриан вуйи Педайин риш вуйи. 37Якимди, варибдиъ чан абйириз ухшар шули, РАББИЙИН улариъ писвал апӀуйи.

Currently Selected:

Паччагьлугъар-4 23: ТабГК

Highlight

Copy