Паччагьлугъар-4 20
20
Хизкьийин уьзур ва думу сагъ хьуб
1Думу йигъари Хизкьи иццру гъахьнийи ва йикӀру гьялнахъна дуфнайи. Амоцдин бай Ешая пайгъамбар дугъахьна гъафнийи ва гъапнийи:
– Гьамци кӀура РАББИЙИ: «Яв хулан гьякьнаан амур апӀин, гьаз гъапиш уву кечмиш шулава, уву сагъ хьидарва».
2Хизкьи цалихьинди машди гьидицнийи ва РАББИЙИЗ ккарагнийи:
3– КӀваин апӀин, я РАББИ, узу Яв улихь вафалуди фици гъягъюйиш ва Яв улариъ гьякь вуйиб вари марцци кӀваантӀан апӀуйиш!
Ва Хизкьи яманди гъишнийи.
4Ешая пайгъамбар кьялан гьяятдиан удучӀвайиз, дугъахьна РАББИЙИН гаф гъафнийи:
5– Кьяляхъ хъадарк ва Йиз халкьдин регьбер Хизкьийиз йип: «Гьамци кӀура яв арха Давуддин Заанур вуйи РАББИЙИ: Узуз яв ккарагуб гъеебхьунзуз ва яв нивгъар гъяркъюнзуз. Узу уву сагъ апӀидиза. СаритӀ уву РАББИЙИН Хулаз гъягъидива. 6Узу яв уьмриин йицӀихьуд йис иливидиза. Узу уву ва гьаму шагьур Ашурдин хилхьан азад апӀидиза. Узу бадали ва Йиз лукӀ Давуд бадали Узу гьаму шагьур къутармиш апӀидиза».
7Ешая пайгъамбри гъапнийи:
– Паччагьдиз инжиларин лавашсиб аьбкъинай.
Дурари думу аьмгълиин иливнийи, ва паччагь сагъ гъахьнийи. 8Думуган Хизкьийи Ешая пайгъамбрихьан гьерхнийи:
– РАББИЙИ узу сагъ апӀрувалин ва саритӀ РАББИЙИН Хулаз гъягърувалин тасдикьвалин лишан фу ву?
9Ешая пайгъамбри жаваб тувнийи:
– Гаф тувнайиб РАББИЙИ тамам апӀрувалин РАББИЙИХЬАН увуз тасдикьвалин лишан магьа: гъи сирин йицӀуб умбур улихь, ясана йицӀуб умбур кьяляхъ гъябгъиди. Улихь ясана кьяляхъ гъябгъюруш, кадабгъ.
10Хизкьийи гъапнийи:
– Сирниз йицӀуб умбриинди улихь гъябгъюз рягьятди ву. Ваъ, гъит думу йицӀуб умбриинди кьяляхъ хъадабкри.
11Ешая пайгъамбар РАББИЙИЗ ккарагнийи, ва РАББИЙИ сирин Ахаздин гъядрариъди думу йицӀуб умбриинди кьяляхъ гъапӀнийи.
Вавилондин паччагьдин вакилар Хизкьийихьна гъюб
12Думу вахтна Вавилондин паччагь Мерудах-Баладанди, Баладандин бали, Хизкьийиз кагъаз ва пешкеш хътаънийи, гьаз гъапиш дугъаз Хизкьийин уьзрикан гъеебхьнийи. 13Хизкьи вакиларихъ хъпехънийи, ва дугъу чан хазнаханайиъ айиб вари – арс, гъизил, тюнт даднан шейʼар ва багьалу ччимар – улупнийи. Гьацира дугъу яракьхана ва дидин хазнаханйириъ уьбхюрайиб вари улупнийи. Я гъалайиъ, я чан вари паччагьлугъдиъ дугъу дурариз улулупуб фукӀа имдайи.
14Ешая пайгъамбар паччагьдихьна гъафнийи ва гъапнийи:
– Гьаму инсанари фу кӀуйи ва дурар наънан увухьна гъафну?
Хизкьийи жаваб тувнийи:
– Ярхла уьлкейиан, дурар Вавилондиан гъафну.
15Пайгъамбри гьерхнийи:
– Дурариз яв гъалайиъ фу гъябкъну?
– Йиз гъалайиъ дурариз вари гъябкъну. Йиз хазнаханйириъ узу дурариз улулупуб фукӀа адар, – жаваб тувнийи Хизкьийи.
16Думуган Ешая пайгъамбри Хизкьийиз гъапнийи:
– РАББИЙИН гафнахъ хъебехъ: 17«Яв гъалайиъ айиб вари, гъийин йигъазкьан яв абйири уч дапӀнайиб вари Вавилондиз гъабхру вахт чарасузди улубкьиди. ФукӀа гъубзидар. 18Хъа яв насларикан бязидар дина гъахиди ва Вавилондин паччагьдин гъалайиъ гъаравашар хьиди».
19– Уву узукна гъапи РАББИЙИН гаф ужуб ву, – жаваб тувнийи Хизкьийи. Ва дугъу фикир гъапӀнийи: «Вуш фу вухъа, йиз йигъари ислягьвал ва хатӀасузвал ади гъабхьихъантина?»
Хизкьийин аьжал
20Хизкьийи паччагьвал гъапӀу вахтнан жара гьядисйирикан ва дугъу гъапӀу ляхнарикан, дугъу дагар фици гъапӀнуш ва жиликкди шагьриз шид фици гъизигнуш, «Ягьудайин паччгьарин тарихарин китабдиъ» дибикӀна.
21Хизкьи чан архйирихъди архаин гъахьнийи. Дугъан бай Манаше дугъан кьяляхъ паччагь гъахьнийи.
Currently Selected:
Паччагьлугъар-4 20: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
