Паччагьлугъар-4 19

Ерусалим къутармиш шлуваликан Ешаяйи вахт ккимиди пуб

1Хизкьи паччагьдиз думу гафар гъеерхьиган, дугъу чан палтар гъячӀяргънийи ва, дерднан лишан вуди, ирин ккуртар алахьну, РАББИЙИН Хулаз гъушнийи. 2Дугъу гъалайиъ буйругъар туврур вуйи Элиаким, бикӀрур вуйи Шевна ва аьхюнудар Заанурин гъуллугъчйир ирин ккуртар алди Амоцдин бай Ешая пайгъамбрихьна гьаънийи. 3Дурари Ешая пайгъамбриз гъапнийи:

– Хизкьийи гьамци кӀура: «Гъи балайин, жазайин ва аьйибнан йигъ ву, хиял апӀин бицӀир гьамус-хъа бабкан хьиди, хъа бабкан хуз кьувват адар. 4Белки, яв Заанур вуйи РАББИЙИЗ Ашурдин паччагьди чӀиви Заанурик кялхъюз гьау аьхюну чяхирчийи гъапи вари гафар ерхьур. Белки, яв Заанур вуйи РАББИЙИЗ гъеерхьу гафарин Дугъу жаза тувур. Гьеле чӀивиди имбударихъан дюаь апӀинава».

5Хизкьи паччагьдин гъаравашар Ешая пайгъамбрихьна гъафиган, 6дугъу дурариз гъапнийи:

– Ичв агъайиз йипай: «Гьамци кӀура РАББИЙИ: „Увуз гъеебхьубдихьан, Ашурдин паччагьдин гъаравашари гъапи Узук кялхъбан гафарихьан гучӀ мапӀан. 7Магьа Узу думу гьаци чашмиш хьуз гъитдизаки, дугъаз саб хабар ебхьиган, думу чан уьлкейиз кьяляхъ хътаркуз мажбур хьиди. Хъа душваъ Узу гьаци апӀидизаки, думу тур йивну йикӀиди“».

8Аьхюну чяхирчийиз Ашурдин паччагь Лахишдиан удучӀвуваликан гъеебхьиган, думу кьяляхъ гъафнийи. Аьхюну чяхирчийиз паччагь дугъу Ливна шагьур кьялаъ апӀради гъидихънийи.

Санхерибди цӀийикӀултӀан гучӀ ккапӀуб ва Хизкьийин ккарагуб

9Санхерибдихьна Кушдин паччагь Тиргьакьа чаина дявдиинди гъюрайиваликан хабар гъурубкьнийи. Думуган дугъу гьамци пуз Хизкьийихьна хъана вакилар гьаънийи:

10– Ягьудайин паччагь Хизкьийиз йипай: «Уву умуд киврайи Заанури, Дугъу Ерусалим Ашурдин паччагьдиз тувидар кӀуруган, увуз кучӀлар апӀуз мугъузан. 11Увуз гъеебхьунвуз аьхир, Ашурдин паччгьари вари уьлкйирикан, дурар бегьемди терг дапӀну, фу гъапӀнуш. Хъа мегер уву сагъ-саламатди гъуздивахъа? 12Йиз абйири терг гъапӀу халкьарин заанурари, мисалназ, Гузан, Харан, Рецеф шагьрарин агьалйирин ва Телассар шагьриз алдау Эден шагьрин агьалйирин заанурари дурар къутармиш гъапӀнийин? 13Хаматдин паччагь, Арпадайин паччагь, Сепарваим, Гьена ясана Ивва шагьрарин паччгьар гьамус наан а?»

14Вакиларихьан Хизкьийихьна кагъаз гъурубкьнийи, дугъу думу гъурхнийи. Хъасин Хизкьи РАББИЙИН Хулаз гъушнийи, ва дугъу кагъаз РАББИЙИН улихь гьатӀабццнийи. 15Хизкьи РАББИЙИЗ ккарагуйи:

– Я РАББИ, Израилин Заанур, малайикар-херувимариин#19:15 Малайикар-херувимар: завуъ айи хлинццар кайи чӀиви шейʼар. деънайир! Жилин вари паччагьлугъариин анжагъ сар Уву Заанур вува. Уву зав ва жил яратмиш гъапӀунва. 16Ис апӀин, РАББИ, Яв иб ва ебхь. Арцц, РАББИ, Яв улар ва лиг. ЧӀиви Заанурик кялхъбан бадали, Санхерибди хътау гафар ерхь. 17Ашурдин паччгьари думу халкьар ва дурарин уьлкйир гьякьикьатди терг гъапӀну. 18Дурарин бутар цӀигъ гъирчувал ва дурар терг апӀувал гьякьикьат ву, гьаз гъапиш дурар заанурар дайи. Дурар инсандин хилариинди тартиб дапӀнайи гакӀул ва гъванар вуйи. 19Гьамус, ич Заанур вуйи РАББИ, миннат апӀурза, жилин вари паччагьлугъариз анжагъ Уву, РАББИ, сар Заанур вуйивал аьгъю хьпан бадали, учу дугъан хилккан къутармиш апӀин.

Санхериб дагъитмиш хьпан гьякьнаан Ешая пайгъамбри вахт ккимиди пуб

20Амоцдин бай Ешая пайгъамбри Хизкьийиз гьамци пуз гьаънийи:

– Израилин Заанур вуйи РАББИЙИ гьамци кӀура: «Ашурдин паччагь Санхерибдин гьякьнаан яв ккарагуб Узуз гъеебхьунзуз».

21Магьа Санхерибдин гьякьнаан РАББИЙИ гъапи гаф:

– Эй, Ашурдин паччагь! Сиондин марцци шураз#19:21 Сиондин марцци риш: Гирами БикӀбариъ саспиган Ерусалим шагьриз гьаци кӀуйи.

уву гьяспикк ккадар. Думу увʼин аьлхъюра.

Дугъу, Ерусалим-шуру,

уву чӀюрхсира гьисаб апӀурадар.

22Уву шлик кялхънийва, фуж биябур гъапӀнийва?

Шилʼина уву сес

ва дамагъ кайи улар за гъапӀунва?

Израилин Гирами Заануриина!

23Яв вакиларин мелзналан

уву Раббийик кялхънийва.

Ашурдин паччагь, уву гъапнийва:

«Гизаф кьадар йиз дявдин фургънарихъди

узу дагъларин кӀакӀариина,

Ливандин ярхла ямажарикна за гъахьунза.

Узу Ливандин варитӀан ягъли кедрйин гьарар,

дидин варитӀан ужударсдар кипарисдин гьарар алдатӀунза.

Узу дидин варитӀан ярхла йишвариз,

дидин ужударсдар яркврариз хъуркьунза.

24Узу гъуййир гъириккунза

ва яд йишварин шид гъубхъунза.

Узу Египетдин вари нирарикан,

гъеебццу жилиланси, ктучӀвунза».

25Эй, Ашурдин паччагь! Мегер увуз гъеебхьундайвуз?

Узу, РАББИЙИ, думу ляхнар ухдитӀан тяйин гъапӀнийза,

кюгьне вахтари кьаст гъапӀнийза.

Гьамус Узу, мюгькам дапӀнайи шагьрар

гъюрдарин чӀвеэриз илтӀикӀуз увуз мумкинвал тувну,

думу ляхнар тамам гъапӀунза.

26Думу шагьрарин агьалйир кьувватнаан адахъна,

дурариз гучӀ дубхьна, дурар биябур дапӀна.

Дурар хутӀлиъ набататарси,

назук чру гъелемарси,

гъваин ктубчӀву, ягъал хьайизра

гъубгу укӀси ву.

27Хъа Узуз яв гьарсаб

алдабгъру гам аьгъязуз.

Узкан фици хъял апӀуруш, аьгъязуз.

28Узухьна вуйи яв гужли хъюлаз

ва Йиз ибарихъна дуфнайи яв дамагъназ лигну,

Узу яв хъюхъниан рукьан ппул итӀибгъидиза

ва яв ушвниин Йиз фурин алапӀидиза,

ва уву гъафи рякъюъди

кьяляхъ апӀидиза.

29Му увуз улупру лишан хьибди, Хизкьи:

цци учву чав чаланди кудубчӀвуб ипӀидичва,

хъа гъюру йисан – дидкан кудубчӀвуб.

Хъа шубудпи йисан тум убзай ва иган убгай,

тӀумтӀин багълар кивай ва дурарин йимишар итӀинай.

30Ягьудайин тухумдиан сагъди гъуздари хъана

исикк ччивар деетиди ва зиин йимишар хиди.

31Ерусалимдиан хъйибгъуб удубчӀвиди,

Сион дагъдилан сагъди гъуздар улдучӀвиди.

Гьамци Заварин Кьувватарин Аьхюрин, РАББИЙИН, зурба ккунивали апӀиди.

32Гьаддиз РАББИЙИ Ашурдин паччагьдикан гьамци кӀура:

– Думу му шагьриъ учӀвидар,

ва дугъу чӀимрар деетидар.

Думу дидихьна гъалхан хьади гъидар

ва думу бисуз руг хъабхьидар#19:32 Думу бисуз руг хъабхьидар: кюгьне вахтари, кьялаъ тӀапӀнайи шагьур бисбан бадали, дидин цаларихъ руг хъабхьуйи ва цалариин улучӀвуйи..

33Думу учв гъафи рякъюъди кьяляхъ хътаркиди,

думу му шагьриъ учӀвидар.

34Узу ва Йиз лукӀ Давуд бадали,

Узу думу шагьур уьбхидиза ва къутармиш апӀидиза.

Ашурдин кьушум магълуб хьуб

35Думу йишван РАББИЙИН малайикди, дуфну, Ашурдин кьушмин бинайиъ варжна миржцӀурна хьуд агъзур инсан аьжлин хлиз тувнийи. Хъайигъан гвачӀнинган нивкӀʼан хъиргиган, инсанариз варишварихь майтар гъяркънийи. 36Думуган Ашурдин паччагь Санхериб, бина алдабгъну, гъушнийи. Думу хулаз кьяляхъ хътаркнийи ва Ниневияйиъ яшамиш гъахьнийи.

37Саб ражари, Санхерибди чан бут Нисрухдин ибадатханайиъ ибадат апӀурайиган, дугъан баяр Адрамелехди ва Сарецери думу, тур йивну, гъакӀнийи. Дурар Арарат вилаятдиз гьергнийи. Хъа Санхерибдин бай Асархаддон дугъан ерина паччагь гъахьнийи.

Currently Selected:

Паччагьлугъар-4 19: ТабГК

Highlight

Copy