Югьандин-2 1
1
1Яшлу аьхюрихьан – Аллагьди кадагънайи агъа-ханумдиз – хъугърударин жямяаьтдиз ва дугъан бицӀидариз. Узу учву вари гьякьвалиъди ккун гъапӀунзачву. Гьацира, гьякьвалин гъавриъ ахъу вариди учву ккун гъапӀну, 2фицики ухьуъ гьякьвал яшамиш шула. Му гьякьвал ухьухъди гьаммишандиз хъайиб ву. 3Учвуз Аллагь Адашдихьан ва Дугъан Бай Иса Месигьдихьан гьякьвалиъди ва масанвалиъди ужʼвал, рягьимлувал ва мясляаьт ибшричвуз.
Масанваликан насигьят
4Яв саб кьадар бицӀидар, ихь Адашди табшурмиш дапӀнайиганси, гьякьвалин рякъюъди гъягъюри гъяркъган, гизаф шад гъахьунза.
5Хъа магьа гьамус узу, багьалу вуйи агъа-ханум, саб ккун апӀураза (му насигьят цӀийиб даршра, сифте бинайианмина ухьуз тувнайиб ву): гъач, сари-сар масанди дисурхьа! 6Масанвал магьа гьаму ву: ухьу Аллагьдин табшуругъарихъди яшамиш духьну ккунду. Му табшуругъ учвуз сифте бинайиан деебхьнайиб ву, ва гьаддихъди яшамишра духьну ккунду.
Месигьдиз аьгьтлуди гъузай
7Ихь арайиан дюнʼяйиз гизаф кучӀляхяр душна. Дурари Иса Месигь, инсан духьну, жилиина гъювал кьабул апӀурадар. Дицир адми кучӀлях ва Месигьдиз къаршур ву. 8Лигай гьа, учву фу бадали гъилихнуш, гьадму ичв дубгруси дарибшри гьа, хъа ичв пешкеш гьубкӀну учвухьна рубкьруганси апӀинай.
9Месигьдин аьгъювалар чӀюргъруриз ва дурар тамам дарапӀруриз Аллагь аьгъдар. Хъа Месигьдин аьгъювалар тамам апӀруриз Адашра, Байра аьгъя. 10Гьамцдар аьгъювалар хьади дяргърур гьич зат кьабул мапӀанай, я ичв хулаз гъюз мигъитанай, я дугъаз салам мутуванай. 11Гьацир кьабул апӀрур дугъан чӀуру ляхнарик ктикьура.
12Узуз хъана гизафубдикан учвуз бикӀуб лазим вуйи, хъа узу кагъзииндина чернилиинди бикӀуб ужу вуди гьисаб апӀурадарза. Мидин ерина, учвухъди машна-машди улхбан бадали ва ихь шадвал гьубкӀуб хьпан бадали, багарихьди учву рякъюр пну, умуд кайиз. 13Аллагьди кадагънайи яв чуччун веледари саламар хътаура.
Currently Selected:
Югьандин-2 1: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023