Коринф-2 1
1
Павели, Агъайиз баркаллагь кӀури, Дугъан ад за апӀура
1Аллагьдин амриинди Иса Месигьдин вакил духьнайи Павелихьан ва Тимофей гъардшихьан – Коринфдиъ Аллагьдихъ хъугърудариз ва Ахаяйин варишвариъ яшамиш шулайи Аллагьдин гирами халкьдиз.
2Аллагьдихьан, ихь Адашдихьан ва Агъа Иса Месигьдихьан мясляаьт ва ужʼвал ибшричвуз!
3Рягьимлувалин Адаш, ухьу ккаарцурайи Аллагь, ихь Агъа Иса Месигьдин Адаш ва Аллагь, гъит ужувлан аднаъ ишри. 4Ихь гьарсаб читинвалиъ Дугъу ухьу ккарцура. Дердериъ ахьнайи жара адмийир ухьура гьаци ккарцбан бадали, Аллагьди ккарцурахьу. 5Гьаз гъапиш, Месигь бадали ухьʼин алахьурайи аьзабар фукьан аьхюдар вуш, Месигьдиланмина вуйи ккарцувалра гьадму кьадар артухъ шулахьуз. 6Уьмриъ учʼин алахьурайи читинвалар, учву ккарцбан ва уьрхбан бадали аьгь апӀурайидар вуйич. Учуз дурубкьнайи ккарцувал, учвура ккарцбан бадали, туврайиб вучуз. Диди, учу аьгь апӀурайидарстар учвʼинра алахьру аьзабар учвура кӀубанди аьгь апӀбан бадали, кюмек апӀидичвуз. 7Учвук ижми миж кайич, ва аьгъячуз: ич аьзабарин пай гъадабгъурайиси, учву ич ккарцувалинра пай гъадабгъурачва.
8Узуз, гъардшар, Азияйиъ айиган учʼин улукьу читинваларикан учвузра аьгъю дубхьну ккундузуз. Дурар гьадмукьан аьгь апӀуз даршлукьандар вуйики, сарун учу чӀивиди гъузур кӀури, миж кимдайич. 9Учу сарун чӀивиди гъитур кӀури хиял дайич, аьжал гьадабтӀнайчуз, аммаки мици, учу учук ваъ, хъа гъачӀидар чӀиви апӀру Аллагьдик миж кади гъузбан бадали, гъабхьиб вуйи. 10Гьадгъу аьжалин хатӀайиккан ккадаунчу, ва гьамусдихъантинара ккадаиди! Ич Гьадгъак миж кайич, учу уьрхиди кӀури. 11Учву, ккарагури, учуз кюмек апӀурачва. Гизафдар ккарагну, Аллагьди багъишар учуз гъапӀган, гизафдари учхъанди чухсагъул пиди.
12Учу, гьаму дюнʼяйиндарихъди, иллагьки учвухъди ич аьлакьйир, намуслуди ва дугъриди дерккри гъахьунча, – ич марцци намуснура гьаци кӀура, – учу гьамдиинди тяриф апӀурача. Му учуз Аллагьдихьан дурубкьнайиб ву. 13-14Учу гъибикӀубдик, дурхну, гъавриъ адрахъуб, гьич фукӀара гъабхьундаричв. Ич гьубкӀну гъавриъ ахъну, – хъа саб кьадар учву гьамустӀанра ич гъавриъ ачва, – Агъа Иса Месигь хъадакну гъюру Йигъан, учу учвʼинди тяриф апӀурайиси, учвура учʼинди апӀур кӀури, йиз миж кайиз.
15Гьаци шлуб аьгъяди, учвуз кьюбан ужʼвал хьузди, сифте учвухьна гъюз ккунди азуз. 16Македонияйиз гъягъюрайир учвʼин улукьуз ккайза, хъасин – кьяляхъ гъюрурра, ва гьадмуган узуз Ягьудияйиз гъягъюз кюмек апӀидийчва. 17Учву, узу мици фикир дарапӀди дапӀна, кӀури, хиял апӀурайчва? Ясана, фагьумсузди, узу гьадму саб гагьди «авра» «ваъра» кӀурайиси?
18Аллагьдин улихь тасдикь апӀураза: узу учвуз кӀурайиб саб гагьди «авра» «ваъра» кӀури кӀурадарза. 19Учвуз узу, Сильванди ва Тимофейи хабар дебкку Аллагьдин Бали, Иса Месигьди саб гагьди «авра» «ваъра» кӀурадар, Дугъаъ айиб гьарган «ав» ву! 20Аллагьди тувнайи вари гаф Иса Месигьдиъ тамам гъабхьну! Гьаддиз Аллагьдин ад бадали Гьадгъахъди сатӀи духьнайидари «Амин» кӀурача. 21Учвура учура Месигьдиъ саб духьнайивал ижми АпӀурайир Аллагь ву. Гьадгъан гъуллугънаъ хьуз Аллагьди ухькан ччим кадатна 22ва Чан лишан учʼин йивна. Ихь юкӀвариъ Дугъу, гъюз имбубдин тасдикьвал вуди, Гирами Рюгь аъна.
23Узу гьамусдиз Коринфдиз, ичв язухъ апӀури, гъафундайза, Аллагь шагьид ву. 24Учуз, ичв хъугъувалиин агъавал апӀуз ккунди адарчуз, ваъ, учу апӀурайиб вари, ичв шадвализ вуйич, гьаз гъапиш учву хъугъувалиъ мюгькамди дийигъначва.
Currently Selected:
Коринф-2 1: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
