Коринф-2 2

Павелин насигьятар

1Гьаддиз, учву пашман апӀуз кӀури, сарун учвухьна дарфуз, кьаст гъапӀунза. 2Эгер узу учву пашман гъапӀиш, узлан пашман гъахьири узу шад дарапӀди, сарун шли апӀиди? 3Узу гьатмунуб кагъаз, учвухьна гъафиган узу рази ктауз ккайидарилантина пашман дархьуз, гъибикӀнийза. Йиз шадвал – ихь вардин шадвал вуйивалик саб шак кадариз. 4Учвуз думу кагъаз нивгъар рузури, юкӀв гъагъиди, кӀваъ дерд ади гъибикӀнийза. Йиз метлеб учву пашман апӀуб дайиз, хъа узуз учву фукьан масанди вуш, учвуз аьгъю хьпан бадали, гъибикӀнийза.

5Узу пашман гъапӀури, неинки узу, хъа, сацӀиб вушра (му йиз заанвал дариз), учву вари пашман гъапӀну. 6Сарун дугъаз гизафдарихьан гъурубкьу жаза чӀяаьн ву. 7Хъа гьамус, хил алдабгъну, думу ккарцай, дердну ккагъуз мигъитанай. 8Миннат вуйиз, дугъаз ичв масанвал улупай. 9Гьацира узу думу учвуз, варибдиъ учву хъпехъури шулуш, ахтармиш апӀури, гъибикӀуб вуйиз. 10Учву хил алдабгъурилан узура алдабгъидиза. Хъа узу хил алдабгъурилан, эгер думу касдиз хил алдабгъуз ужуб фукӀа аш, Месигьдин улихь учву бадали алдабгъуб вуйиз, 11иблисди ухьу алдатмиш апӀуз гъидритузди, хъа дидин ниятар ухьуз ужуйи аьгъяхьуз.

12Узу Троадайиз Месигьдикан Ужувлан хабар рабгъури гъафиган, Агъайи душваъ ляхин апӀуз раккнар арццунзуз. 13Аммаки узхьан архаинди гъузуз гъабхьундарзухьан, фицики душваъ хъугъвалиъ йиз гъардаш вуйи Тит адарди гъахьну. Магьа гьаддиз Троадайиъ хъугърудариз баркаллагь дупну, Македонияйиз гъушунза.

14Учу, Месигьдиъ саб духьнайидар, хъуркьувалиинди гьаммишан улихь гъахурайи ва варишвариъ учлантина ширин ниар адаурайи аьгъювалар Дугъкан рагъурайи Аллагьдиз чухсагъул. 15Гьаз гъапиш, уьрхювалин ва аьжалин рякъюъди гъярайидарин арайиъ, Месигьди Аллагьдиз ургурайи гьадму ширин ниар, ари учу вуча. 16ГьацӀариз учу – аьжал хурайи, хъа гьацӀариз – чӀививал хурайи ширин ниар вуча. Гьаци ляхин шлихьан апӀуз шул?! 17Учу, гизафдарси, хайир бадали, Аллагьдин Гафнак камк кипрадарча. Месигьдихъди саб гъахьихъанмина, учу, Аллагьди гьаънайидари, Аллагьдин улихь марцци кӀваан, ктибтурача.

Currently Selected:

Коринф-2 2: ТабГК

Highlight

Copy