Паччагьлугъар-1 13

Филистимарихъди дяви

1Саул, сумчӀур йис яшнаъ ади, паччагь гъахьну, ва дугъу ягъчӀвурна кьюд йисан Израилиин паччагьвал гъапӀну.

2Саули израиларигъян шубуд агъзур эскер гъядягъю. Кьюд агъзур кас Саулихъди Михмасдиъ ва Бет-Элин багахь дагълариъ айи, агъзур кас – Вениаминдин Гивайиъ Юнатандихъди. Имбудар вари дугъу чпин хулариз деету.

3Юнатанди Гива кӀуру шагьриъ бина йивнайи филистимарин десте дагъитмиш апӀуру, ва вари филистимариз дидкан аьгъю шулу. Хъа Саули, «Гъит жугьдариз ебхьри!» кӀури, вари уьлкейиъ кӀарчназ ухшар вуйи зурна йивуру.

4Саули филистимарин десте дагъитмиш апӀбакан ва Израил филистимариз лапра даккниб хьуваликан израилариз аьгъю гъабхьиган, халкь Гилгализ Саулихьна уч гъабхьну.

5Филистимар Израилиз къаршуди дявдиз удучӀву. Дурарин гьяйвнар ккитӀнайи сумчӀур агъзур фургъун, йирхьуд агъзур атлу ва гьюлин гъирагъдихъ гъумкьан гизаф пияда кьушум айи. Дурари, дуфну, Бет-Авендихьан ригъ гьудубчӀвру терефнаъ айи Михмасдиъ бина гъивнийи. 6Израилар, чпиз къурхувал айиб дябкъну (дурар гужалди хъуржуйи), хьарариъ, гъалинди айи рукар-кьаларигъ, гъарзаригъ, жилиъ ерккнайи йишвариъ ва шид уьбхюз вуйи ичӀариъ жин гъахьнийи. 7Гаддин ва Галааддин ругариин жин хьпан бадали, саб пай жугьдар Ярдан ниркан ктучӀвнийи. Хъа Саул гьеле Гилгалиъ имийи, ва дугъахъди хъайи кьушум гучӀʼвалиан гукӀни дубхьнайи. 8Саул ургуд йигъан Шамуилиз, чаз дугъу гъапиганси, ккилигнийи, хъа Шамуил Гилгализ гъюрадайи, ва адмийир дугъхьан, Саулихьан, гьергуз хъюгънийи. 9Думуган дугъу гъапи:

– Вариубгбан ва демдин гъурбнар апӀуз гьязур дапӀнайиб вари гьамина аьбкъинай, – ва вариубгбан гъурбан гъапӀу.

10Думу вариубгбан гъурбан дапӀну ккудубкӀуз хъуркьайизра, Шамуил гъафи, ва Саул, дугъаз салам тувбан бадали, дугъан улихьна удучӀву. 11Амма Шамуили гъапи:

– Уву фу гъапӀва?

Саули жаваб туву:

– Узуз рябкъюрайзуз: адмийир узхьан гьерграйи, йикьрар гъапӀу йигъан уву дуфнадайва, хъа филистимар Михмасдиъ уч духьнайи. 12Ва узу фикир гъапӀнийза: филистимар багарихьди Гилгалиъ узʼин алархьиди, хъа узу РАББИЙИХЬАН узуз ягъур шлувал тямин дапӀнадайза. Гьаддиз узуз вариубгбан гъурбан апӀуб алабхънийзуз.

13Шамуили Саулиз гъапи:

– Ахмакь ляхин гъапӀунва. Уву РАББИЙИН, яв Заанурин, Дугъу увуз гъапӀу амур чӀур гъапӀунва.#13:13 РАББИЙИН, яв Заанурин, Дугъу увуз гъапӀу амур чӀур гъапӀунва: Саулин гунагь вариубгбан гъурбан апӀуб вуйи, думу гъурбан апӀуз Заанурин гъуллугъчйиризтӀан ихтияр адайи. РАББИЙИХЬАН Израилиин паччагьвалин яв гьюкум аьсраризди мюгькам апӀуз хьибдийи, 14хъа гьамус яв гьюкмихьан дурум тувуз хьибдар. РАББИЙИ сарун чан кӀваъ РАББИЙИН амур айи адми ктагъну ва думу Чан халкьдин гьюкумдарди тяйин гъапӀну, гьаз гъапиш уву РАББИЙИН амур чӀур гъапӀунва.

15Ва Шамуил Гилгалиан гъушну, Вениаминдин Гивайиз за гъахьну. Саули чан имбу адмийир гьисаб гъапӀу: дурар йирхьудварж касдихьна гъахьнийи.

16Саул, дугъан бай Юнатан ва дурарин адмийир Вениаминдин Гивайиъ бина йивну дийигънийи, хъа филистимарин бина Михмасдиъ айи. 17Чпин бинайиан филистимари шубуб терефназди аьтрафариъ алжагъбар апӀуйи: саб-кӀуруб, Офрайихьна, Шуал кӀуру вилаятдихьна; 18кьюб-кӀуруб, Бет-Хорондихьна; шубуб-кӀуруб, Цевоим дерейин зиъхъан сяргьятдихъна, ичӀи чюлин терефназ гъябгъюрайи рякъюхьна.

19Израиларин уьлкейиъ думуган саркьан рукьан уста адайи, гьаз гъапиш, жугьдари чпи чпиз турар ва жидйир ктаур кӀури, филистимар гьилигури гъахьну.

20Чпин мукьйир, газар, екӀвар ва дагьрар учӀру апӀуз вари израилар филистимарихьна мажбури вуди душну ккундийи. 21Мукьу, газу, кьюрш, екӀв вая гьяйвнатар хъаъру жида учӀру апӀуз шекел арснан шубуб пайнак кьюб пай#13:21 Шекел арснан шубуб пайнак кьюб пай: тахминан 8 грамм. кьимат вуйи.

22Гьаддиз, дяви ккебгъиган, Саулин ва Юнатандин адмийирихь турар ва жидйир хьади гъахьундар, дурар анжагъ Саулихь ва Юнатандихь, Саулин балихь, хьайи.

23Гьадму арайиъ филистимарин улгьан десте Михмасдин гуриз багахь гъабхьнийи.

Currently Selected:

Паччагьлугъар-1 13: ТабГК

Highlight

Copy