Шамуили Саулиз гъапи:
– Ахмакь ляхин гъапӀунва. Уву РАББИЙИН, яв Заанурин, Дугъу увуз гъапӀу амур чӀур гъапӀунва. РАББИЙИХЬАН Израилиин паччагьвалин яв гьюкум аьсраризди мюгькам апӀуз хьибдийи, хъа гьамус яв гьюкмихьан дурум тувуз хьибдар. РАББИЙИ сарун чан кӀваъ РАББИЙИН амур айи адми ктагъну ва думу Чан халкьдин гьюкумдарди тяйин гъапӀну, гьаз гъапиш уву РАББИЙИН амур чӀур гъапӀунва.