Паччагьлугъар-1 12
12
Халкьдихьна Шамуилин аьхиримжи гаф
1Шамуили вари Израилиз гъапи:
– Магьа узу ичв хаиш тамам гъапӀунза ва учвʼин паччагь дитунза. 2Гьамус паччагьди ичвʼин гьюкумдарвал апӀиди. Узу кьаби гъахьунза, йиз кӀул лизи гъабхьниз, хъа йиз баяр учвухъди гъузди. Узу жигьил вахтнахъанмина гьамусдиз ичвʼин гьюкумдарвал гъапӀунза. 3Магьа узу: РАББИЙИН улихь ва Дугъу ччим кадатнайирин улихь узук тахсир кипай. Узу шлин йиц тадабгъну? Узу шлин дажи тадабгъну? Узу шлиз истисмар гъапӀну? Узу шлиз гиран ктапӀну? Ляхин дюз апӀуз узу шлихьан дашбаш гъадабгъну? Узу учвуз гъабхьи зарар ктипарза.
4Дурари жаваб туву:
– Ваъ, уву учуз истисмар гъапӀундарва, учуз гиран ктапӀундарва ва сарихьанра фукӀа гъадабгъундарва.
5Дугъу дурариз гъапи:
– Гъи РАББИ ва Дугъу ччим кадатнайир учвуз узук фукӀа дибрихъувалин учвуз шагьидар ву.
Дурари жаваб туву:
– Ав, шагьидар ву.
6Шамуили давам апӀурайи:
– Учвуз Муса ва Гьарун тяйин гъапӀур ва ичв абйир Египетдиан адаур гьадму РАББИ ву. 7Хъа гьамус гьязур йихьай: РАББИЙИН улихь узу учвук тахсрар кирчдиза ва учвузна ичв абйириз РАББИЙИ гъапӀу ужувлар кӀваин апӀидиза.
8Якьуб Египетдиз гъафиган, ичв абйир, кюмек ккун апӀури, РАББИЙИЗ ккарагнийи, ва РАББИЙИ дурариз Мусана Гьарун гьаънийи. Дурари ичв абйир Египетдиан адаънийи ва гьаму уьлкейиъ дитнийи.
9Хъа ичв абйири РАББИ, чпин Заанур, кӀваълан гьаънийи, ва Дугъу дурар чпихъди дявйир апӀури гъахьи хацор кьушмин аьхюр вуйи Сисерайин хлиз, филистимарин хлиз ва Муавдин паччагьдин хлиз тувнийи. 10Ичв абйир РАББИЙИЗ ккарагуйи, ва дурари кӀуйи: «Учук тахсрар качук: учу РАББИ гъитунча ва Баалинна Астартайин бутариз#12:10 Баалинна Астартайин бутар: Баал – ханаанарин кӀулин бут, чаз кюгьне вахтари ханаанари ибадат апӀури гъахьи завар рахбан бут. Думу гафнан мяна – «агъа, эйси». Астарта – бегьерлувалин бут-дишагьли, дидиз ханаанари ибадат апӀури гъахьну. Астартайиз икрам апӀру йишвариъ гакӀвлин дестгар дурснади гъахьну, мумкин ву, бут-дишагьлийин адатӀнайи шиклар кади. гъуллугъ апӀуз хъюгъюнча. Учу ич душмнарихьан азад апӀин, ва учу Увуз ибадат апӀидича». 11Ва РАББИЙИ Ерубаал, Бедан, Еффай ва Шамуил гьаънийи – Дугъу учву учвлан илтӀишнайи душмнарихьан азад гъапӀнийи, ва учву, сабдихьанра къурху адарди, яшамиш гъахьнийчва.
12Аммунарин паччагь Нахаш учвʼина дявдиинди гъюри гъяркъиган, учву узуз гъапнийчва: «Ваъ, гъит паччагьди учʼин гьюкумдарвал апӀри», РАББИ, ичв Заанур, ичв паччагь вуди гъахьнушра. 13Гьаци, магьа учву ктагъу паччагь. Учву думу тӀалаб апӀуйчва, ва РАББИЙИ учвуз паччагь тувну. 14Анжагъ учву РАББИЙИХЬАН гучӀ апӀинай, учву Дугъаз гъуллугъ апӀинай ва Дугъаз мютӀюгъ йихьай, РАББИЙИН амрариз аькси муудучӀванай, учвура, ичв паччагьра РАББИЙИХЪДИ, ичв Заанурихъди, гъарахай. 15Хъа эгер учву РАББИЙИЗ мютӀюгъвалиан удучӀвиш, эгер учву РАББИЙИН амур апӀбариз аькси шули гъахьиш, РАББИЙИН хли учвуз, ичв абйириз фици гъивнуш, гьаци йивиди.
16Хъа гьамус гьязур йихьай: ичв уларикк РАББИЙИ апӀру зурба аьламат рябкъидичвуз. 17Гьамус игнар ургру, затра мархьар дурургъру вахт ву, гьаци дарин? Хъа узу РАББИЙИЗ ккарагидиза, ва Дугъу мархьна кьюркьлин цӀийир гьаъди, ва учву учвуз паччагь ккун апӀбан РАББИЙИН улихь зурба гунагь апӀувалин гъавриъ ахъдичва.
18Шамуил РАББИЙИЗ ккарагу, ва РАББИЙИ гьадму йигъан мархьна кьюркьлин цӀийир гьау, гьаци вуйиган, вари халкьдик РАББИЙИН ва Шамуилин улихь гучӀ кабхъу.
19Халкьди Шамуилиз гъапи:
– Яв лукӀарихъанди яв РАББИЙИЗ, яв Заануриз, учу диликӀбан бадали, ккараг, гьаз гъапиш ич вари гунгьариин учуз паччагь ккун апӀувалин гьаму тахсирра иливунча.
20Ва Шамуили халкьдиз жаваб туву:
– ГучӀ мапӀанай. Гьелбетда, учвук тахсрар качвук, амма РАББИЙИХЬАН ярхла махьанай ва кӀваантӀан Дугъаз гъуллугъ апӀинай. 21Ярхла махьанай, чибхьан я уьрхюз даршлу, чибкан я хайир адру кучӀлин бутарихъди мягъянай, гьаз гъапиш дурар фукӀа дарудар ву. 22РАББИЙИ, Чан машгьур ччвурнан гьюрматназ, Чан халкь ярхла апӀидар, учву Чан халкь апӀуз РАББИЙИ къарар адабгъну аьхир! 23Хъа узхьан РАББИЙИН улихь гунагь апӀуз – учвхъанди ккарарагди гъузуз – хьибдарзухьан. Узу учву ужуб ва дугъри рякъʼин алаидиза. 24Анжагъ РАББИЙИХЬАН гучӀ апӀинай, хъугъвалиинди ва дугъривалиинди, лап кӀваантӀан Дугъаз гъуллугъ апӀинай: Дугъу учву бадали гъапӀу зурба ляхнар кӀваълан магьаанай! 25Эгер учву гьамусдихъантинара гунгьар апӀури гъахьиш, ичв паччагьдихъди сатӀиди йикӀидичва.
Currently Selected:
Паччагьлугъар-1 12: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
