Паччагьлугъар-1 11

Саули аммунар дагъитмиш апӀуру

1Аммундиан вуйи Нахаш дявдиз удучӀвнийи, ва дугъу Галааддин Явеш шагьур кьялаъ тӀапӀнийи. Явешдин вари агьалйири Нахашдиз гъапнийи:

– Учухъди мясляаьтнан йикьрар йитӀ, ва учу увуз табигъ хьидича.

2Хъа Аммундиан вуйи Нахашди дурариз гъапнийи:

– Узу учвухъди мясляаьтнан йикьрар саб шартӀниинди йитӀарза: гьарсарин арчул ул адабгъарза ва гьаци вари Израил аьйибнакк ккипарза.

3Явешдин аьхюдари дугъаз гъапнийи:

– Учуз ургуд йигъ вахт ча. Учу Израилин вари йишвариз вакилар гьаъдича ва, сарира учуз кюмек дарапӀиш, учу увуз мютӀюгъ хьидича.

4Вакилар Саул яшамиш шулайи Гивайиз гъафиган, ва дурари дидкан халкьдиз ктибтиган, вари халкь ишуз хъюбгъю. 5Гьадму вахтна Саул йицарин кьяляхъди хутӀлиан гъюради гъахьну. Саули гьерху:

– Фу гъабхьну? Гьаз инсанар ишура?

Ва дугъаз Явешдин агьалйирин гафар ктитнийи.

6Думу гафар чаз гъеерхьиган, Саулиин Заанурин Рюгь алабхънийи ва дугъак яманди хъял кубчӀвнийи. 7Дугъу жут йицар гъадагънийи, парчйириз гьадатӀнийи ва, «Саулихъди ва Шамуилихъди сатӀиди дявдиз дурушиш, дугъан йицарикан гьамци хьибди» дупну, вакиларихъди думу парчйир Израилин вари йишвариз хътаънийи.

Ва вари халкьдиин РАББИЙИХЬАН гучӀ алабхънийи, гьаддиз вари, сарси, удучӀвнийи. 8Саули дурар Безекдиъ лигуз уч гъапӀнийи, ва Израилиан шубудварж агъзур кас ва Ягьудайиан сумчӀур агъзур кас жилар гъахьнийи.

9Думуган вакилариз гъапнийи:

– Галааддин Явешдин агьалйириз йипай, закур лисундиз дурар къурхуйиккан уьрхиди.

Кьяляхъ дуфну, вакилари Явешдин агьалйириз дидкан ктибтнийи, дурар гизаф шад гъахьнийи. 10Думуган Явешдин агьалйири аммунариз жаваб туву:

– Закур учу учвуз мютӀюгъ хьидича, ва учкан учвуз ккуниб апӀинай.

11ГвачӀнинган Саули кьушум шубуб дестейиз пай гъапӀу, ва дурари, душмни бина йивнайи йишваъ учӀвну, ахсрар ккивхъанмина лисузкьан аммунариз гъивнийи, сагъди гъуздар, са-сарди гьергри, къутармиш гъахьнийи.

12Думуган халкьди Шамуилиз гъапнийи:

– Саул паччагь хьуз ярамиш кайир дар шли гъапну? Ча учухьна думу адмийир, учу дурарин гьял апӀурча.

13Хъа Саул рази гъахьундар:

– Гъи саризра йикӀбан жаза тувидар, гьаз гъапиш гъи РАББИЙИ Израилиз къутармишʼвал пешкеш гъапӀну.

14Шамуили халкьдиз гъапи:

– Гъачай Гилгализ гъягъюрхьа ва Саул паччагьди ктагъувалин гьюрматназ серенжем гъабхурхьа.

15Думуган вари Гилгализ гъушу. Душваъ, Гилгалиъ, РАББИЙИН улихь Саул паччагь вуди мялум гъапӀу ва РАББИЙИЗ демдин гъурбнар гъахи. Саули ва вари израилари думу гьядиса аьхю шадвалиинди къайд гъапӀнийи.

Currently Selected:

Паччагьлугъар-1 11: ТабГК

Highlight

Copy