Петрин-1 2
2
ЧӀиви гъван ва гирами халкь
1Гьаци вуйиган, гьарсаб чӀуруб, гьарсаб кучӀал, кью-кьюб маш гъивнайивал, маш ккадарди хьувал, гьар жюрейин футнийир гатӀахьай. 2Тазади бабкан духьну имбу бицӀидарси, рюгьнан тӀяаьмлу никкдихъ, гьаддин кюмекниинди аьхю хьуз ва уьрхювал гъазанмиш апӀуз, тямягь хъивай. 3ИкибаштӀан, Агъа фици ужур вуш, учвуз аьгъю гъабхьунчвуз. 4Гьадгъахьна гъачай – чӀиви Гъвандихьна, адмийири тина гьадапӀубдихьна, хъа Аллагьди ктабгъубдихьна, Дугъан уларихь багьа вуйибдихьна. 5Учвура, чӀиви гъванарикан хал диврайиси, ичв учвкан рюгьвалин хал тикмиш апӀинай. Гьадмуган, гирами вуйи гъуллугъчйир хьпан кьяляхъ, Месигьдиланмина Аллагьдиз кьабул вуйи, Рюгьниинди вуйи гъурбнар апӀидичва. 6Гьаз гъапиш, Гирами китабариъ гьаци кӀура:
«Магьа, Узу Сион дагъдиин
мурччван гъван дивдиза – кадабгънайиб, багьа вуйиб.
Дугъахъ хъугъру гьич саркьан биябур хьидар».
7Гьаци вуйиган, учвуз, хъугърудариз, Думу зурба хазна ву, хъа хътругърудариз –
«Устайи тина гъапӀу гъван
мурччвануб гъабхьну»,
8ва
«Му Гъван хъарсру гъван ву.
Му Гъвандихъ хъарсу адмийир
алдакуру».
Магьа, дурар хъарсну, гьаз гъапиш Ужувлан хабарнахъ хъугърадар. Дурарихъди гьаци шулайиб ву.
9Хъа учву, кадабгънайи жинс, Паччагьдин гъуллугъчйир, гирами халкь, Аллагьдин хусусият, мучӀушнаан Чан аьжайиб аквнаъ хьуз учвуз Шли дих дапӀнаш, Гьадгъан зурба ляхнарикан хабар дебккбан бадали, гъядягънайидар вучва.
10«Саб вахтна,
халкь ву дупну – халкь дарудар,
хъа гьамус – Аллагьдин халкь.
Улихьди – ужʼвал дархьидар,
хъа гьамус
думу учвуз гъабхьунчвуз».
11Йиз багьа вуйидар, гьаму дюнʼяйиин улукьуз дуфну, кьяляхъ гъягъюри рякъʼин алидарси, кӀвахьди дяви гъабхурайи жандин тямягьярихьан ярхлади гъузуб учвкан ккун апӀураза. 12Гъит, ичв хасият Аллагьдихъ хътругърударин арайиъ марцциб ибшри. Ва гьадмуган, гьаму ражари учвуз, пис касар ву, кӀури люкьнар апӀурайидари, учву апӀурайи ужувлан ляхнар рякъюри, Аллагь гъафи гъиямат йигъан, Дугъан ад апӀиди.
Гьюкумдариз мютӀюгъ йихьай
13Агъа бадали мютӀюгъ йихьай адмийири дерккнайи вари гьюкмариз, 14гьюкум гъабхурайидариз, гьаз гъапиш дурари тӀафларизна тӀарашчйириз жазйир гьадатӀуру ва ужувлар апӀрудариз пешкешар тувру. 15Даршуз Аллагьдин ният гьациб ву: ужувлар апӀрудари, абдларин чӀуруди улхру ушварихь, ужудар ляхнар апӀбариинди гьитӀибшвну ккунду. 16Хъа учву, азад адмийир вуйивализ дилигну, ахмакь ляхнар ккеркуз ичв азадвал ишлетмиш мапӀанай – учву Аллагьдин лукӀар вучва, аьхир. 17Варидариз гьюрмат апӀинай, гъардшар ккун апӀинай, Аллагьдихьан гучӀ апӀинай, паччагь гьисабназ гъадагъай. 18ЛукӀар, ичв агъйириз хай гъюру жюрейиинди гучӀʼвал кади, неинки гъянириз ва гъюдлириз, хъа учӀвру хасият хъайириз вушра, мютӀюгъ йихьай. 19Тяриф хьибди, чан аьзабар аьгь апӀрурин, гьаз гъапиш дицир Аллагьдин ниятнан гъавриъ айир ву; думу лайикь дарди бедбахтваларикк ккахъна. 20Хъа эгер, тахсир дапӀну, учву урччвураш, ичв фициб ад шул? Хъа учву ужʼвал апӀури, аьзабар сабурлуди аьгь апӀуруш, Аллагьдин улихь ичв аваза за хьибди. 21Учвуз, учву гьамци хьуз, дих дапӀначвуз, аьхир, гьаз гъапиш Месигь учвхъанди аьзабарикк ккахъну ва Дугъу дурар аьгь гъапӀну. Дугъу учвуз, Чан шилнаъди гъюз, мисал гъибтну.
22Дугъу «гунагь гъапӀундар ва Дугъан ушвниин кучӀал илибшундар».
23Учв биябур апӀруган, Дугъу Чавра адмийир биябур апӀуз хъюгъюндар. Учв аьзабарикк ккахънайиган, Дугъу гучӀар ккаундар, хъа Дугъу Учв гьякь вуйи Судʼяйин хилиз тувнийи. 24Дугъу Чав, ухьу гунгьариз дийихнайидарси хьуз ва гьякьвал бадали яшамиш хьуз, Чан хусуси бедендиъди ихь гунгьар хачриина гъухну. Учву Дугъан зийнариинди сагъ гъахьунчва. 25Учву саб фила-вуш, марччарси, улдугнайчва, хъа гьамус учву ичв Марччлихънихьна – гъайгъу Зигрурихьна кьяляхъ хътакунчва.
Currently Selected:
Петрин-1 2: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
