Паччагьлугъар-3 15
15
Авиям – Ягьудайин паччагь
1Наватдин бай Яравамдин паччагьвалин йицӀимиржидпи йисан Авиям Ягьудайин паччагь гъахьнийи. 2Дугъу Ерусалимдиъ шубуд йисан паччагьвал гъапӀнийи. Дугъан дадайиз Мааха кӀуйи, думу Авессаломдин худул вуйи.
3Дугъура чан адаш Рехувуамди улихьна апӀури гъахьи вари гунгьар гъапӀнийи. Дугъан юкӀв РАББИЙИЗ, чан Заануриз, чан арха Давуддинси вафалу дайи. 4Гьаци вушра, Давуддин гьюрматназ РАББИЙИ, дугъан Заанури, Ерусалимдиъ дугъан кьяляхъ дугъан бай тахтниина за ва Ерусалим мюгькам гъапӀнийи. 5Давудди РАББИЙИН уларикк гьякьлу ляхнар апӀуйи, ва думу чан уьмрин вари йигъари Дугъан амрарилан улдучӀвундайи, хетт Урияйихъди вуйи вакьиа гьисабназ гъадрабгъиш.
6Авиямдин паччагьлугъвалин вари вахтна дугъан ва Яравам паччагьдин арайиъ дяви гъябгъюри гъабхьну. 7Авиямдин паччагьлугъвалин вахтнан жара гьядисйирикан ва дугъу гъапӀу вари ляхнарикан «Ягьудайин паччгьарин тарихарин китабдиъ» дибикӀна. Авиямдин ва Яравамдин арайиъ дяви гъябгъюри гъабхьнийи. 8Авиям чан архйирихъди фаракьат гъахьнийи ва Давуддин Шагьриъ накьвдик кивнийи. Дугъан ерина паччагь дугъан бай Аса гъахьнийи.
Аса – Ягьудайин паччагь
9Израилин паччагь Яравамдин паччагьвалин къадпи йисан Ягьудайин паччагь Аса гъахьнийи. 10Дугъу Ерусалимдиъ ягъчӀвурна сад йисан паччагьвал гъапӀнийи. Дугъан аьхю бабаз Мааха кӀуйи, думу Авессаломдин худул вуйи. 11Асайи, чан арха Давуддиси, РАББИЙИН уларикк гьякь вуйиб апӀуйи. 12Дугъу уьлкейиан вари кьяппа-жилижвувар утӀуркӀнийи ва чан архйири гъапӀу бутар алдагънийи. 13Дугъу гьятта чан аьхю баб, дугъу Ашерайин хяви мурхьул апӀбаз лигну, паччагь-дада ччвурнахъ мягьрум гъапӀнийи. Асайи Маахайин дестег алдабтӀнийи ва думу Кьидрун дерейиъ цӀигъ гъубгнийи. 14Дугъан юкӀв чан уьмрин вари йигъари РАББИЙИЗ тамамди вафалу вуйи, амма дугъу тепйириин гирамишвар ккидирчундайи. 15Дугъу РАББИЙИН Хулаз арс, гъизил ва чав ва чан адашди бахш гъапӀу жюрбежюр гъаб-гъажагъ гъабхнийи.
16Асайин ва Израилин паччагь Баашайин арайиъ дурари паччагьвал апӀури гъахьи вари йигъари дяви гъябгъюри гъабхьнийи. 17Израилин паччагь Бааша Ягьудайиин алархьнийи, ва Ягьудайин паччагь Асайин ругариина шилхьанкӀа я гъюз, душвʼан шилхьанкӀа я гъягъюз дархьбан бадали, Рама шагьур мюгькам гъапӀнийи. 18Думуган Асайи РАББИЙИН Хулаъ ва чан хусуси гъалайиъ имбу вари арс ва гъизил уч гъапӀнийи. Дугъу арс ва гъизил чан багахь хьайи гъуллугъчйирихьна тувнийи. Дурар Арамдин паччагь, Табримондин бай, Хезиондин худул Бен-Гьададдихьна (дугъу Дамаскдиъ паччагьвал апӀурайи) гьаънийи ва гъапнийи:
19– Гъит, йизна яв арайиъ, ихь адашарин арайиъ гъабхьиганси, йикьрар ибшри. Магьа, узу увуз пешкешди арс ва гъизил хътапӀураза. Йиз кьялхъян думу хъадакбан бадали, Израилин паччагь Баашайихъди йикьрар чӀюргъ.
20Бен-Гьадад Аса паччагьдин теклифнахъди рази гъахьнийи. Дугъу чан кьушмарин аьхюдар Израилин шагьрариз къаршуди гьаънийи. Дурари Ийон, Дан, Авел-Бет-Мааха шагьрар ва Нефталим тухумдин жилра хъади Киннерет вилаят гъидиснийи. 21Дидкан гъеебхьиган, Баашайи Рама мюгькам апӀувал дебккнийи ва Тирцайиз кьяляхъ гъизигнийи. 22Хъа Аса паччагьди вари Ягьудайиъ айидариз вардариз Баашайи Рама мюгькам апӀуз гъахи гъванар ва хамхрар душвʼан адагъуз амур гъапӀнийи. Аса паччагьди думу гъванарихъди ва хамхрарихъди Вениамин тухумдин жилиин али Гива шагьур, хъа гьацира Мицпа шагьур мюгькам гъапӀнийи.
23Асайин паччагьвалин вахтнан жара гьядисйирикан, дугъан гьунарарикан ва дугъу гъапӀу вари ляхнарикан, гьадму гьисабнаан дугъу тикмиш гъапӀу шагьрариканра «Ягьудайин паччгьарин тарихарин китабдиъ» дибикӀна. Кьабивалиъ дугъан ликар иццури гъахьну. 24Аса чан архйирихъди фаракьат гъахьнийи ва дурарихъди сатӀиди чан арха Давуддин Шагьриъ накьвдик кивнийи. Дугъан ерина паччагь дугъан бай Югьушафат гъахьнийи.
Надав – Израилин паччагь
25Яравамдин бай Надав Ягьудайин паччагь Асайин паччагьвалин кьюдпи йисан Израилин паччагь гъахьнийи. Дугъу кьюд йисан Израилин паччагьвал гъапӀнийи. 26Чан адашдин рякъюъди гъягъюри ва дугъу Израилиз ял гъапӀу гунагь текрар апӀури, Надавди РАББИЙИН уларикк писвал гъапӀнийи.
27Иссахарин тухумдиан вуйи Ахияйин бай Бааша жиниди дугъаз къаршуди удучӀвнийи. Надавди ва вари Израили филистимарин Гиббетон шагьур кьялаъ тӀапӀнайиган, Баашайи душваъ думу йивну гъакӀнийи. 28Баашайи Надав Ягьудайин паччагь Асайин паччагьвалин шубудпи йисан йивну гъакӀнийи. Бааша Надавдин ерина паччагь гъахьнийи.
29Паччагьвал апӀуз хъюгъюбси, дугъу Яравамдин вари тухум тӀанкь гъапӀнийи. Дугъу Яравамдин тухумдиъ сарра чӀивиди гъитундайи, Шилойиан вуйи Чан гъараваш Ахияйин мелзналан РАББИЙИН гафнаъ дупнайиганси#15:29 Ахия пайгъамбри дидкан улихь ккимиди гъапнийи (лиг 3 Пачч. 14:7-11).. 30Яравамди гъапӀу гунгьариз ва дугъу Израилиз ял гъапӀу гунгьариз ва РАББИЙИК, Израилин Заанурик, хъял капӀбаз лигну, дурар вари терг гъапӀнийи.
31Надавдин паччагьвалин вахтнан жара гьядисйирикан ва дугъу гъапӀу вари ляхнарикан «Израилин паччгьарин тарихарин китабдиъ» дибикӀна. 32Асайин ва Израилин паччагь Баашайин арайиъ дурарин паччагьвалин вахтна гьарган дяви гъябгъюри гъабхьнийи.
Бааша – Израилин паччагь
33Ягьудайин паччагь Асайин паччагьвалин шубудпи йисан Иссахарин тухумдиан вуйи Ахияйин бай Бааша Тирцайиъ вари Израилин паччагь гъахьнийи. Дугъу къанна юкьуд йисан паччагьвал гъапӀнийи. 34Яравамдин рякъяриъди ва дугъу Израил ял гъапӀу дугъан гунгьиъди гъягъюри, Баашайи РАББИЙИН уларикк писвал апӀуйи.
Currently Selected:
Паччагьлугъар-3 15: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
