Паччагьлугъар-3 13
13
1Яравам гъурбан апӀрушвахьна иццидар ниар деетру шейʼарик цӀа кипуз дийигънайиган, РАББИЙИН гафниинди Бет-Эл шагьриз Ягьудайиан Заанурин инсан гъафнийи. 2Дугъу гъурбан апӀрушваз РАББИЙИН гафниинди чӀигъ гъапӀнийи:
– Гъурбан апӀрушв, гъурбан апӀрушв! РАББИЙИ гьамци кӀура: «Давуддин тухумдиъ бай (Юшия ччвур али) бабкан хьиди. Дугъу увʼин иццидар ниар деетру шейʼарик цӀа кипрайи гирамишван гъуллугъчйир увʼин гъурбан апӀиди ва увʼин инсанарин кӀурбар ургиди».
3Гьадму йигъан Заанурин инсанди аьламат шлувал гъапнийи:
– РАББИЙИ гъапибдин гьякьнаан магьа учвуз аьламат: гьаму гъурбан апӀрушв тӀубкӀиди, хъа дидʼин али рюкъ рабгъиди.
4Заанурин инсанди Бет-Элин гъурбан апӀрушваз чӀигъниинди гъапиб деебхьну, Яравам паччагьди гъурбан апӀрушвхьан хил гьадабгънийи ва гъапнийи:
– Гьатму дисай!
Амма думу хил гъеебццнийи, ва дугъхьан думу рибшвуз гъабхьундайи. 5Хъа гъурбан апӀрушв гъутӀубкӀнийи ва дидʼин али рюкъ гъарабгънийи. Заанурин инсанди РАББИЙИН гафниинди гъапи аьламат гъабхьнийи.
6Думуган паччагьди Заанурин инсандиз гъапнийи:
– РАББИЙИЗ, яв Заануриз, рягьмат ккун апӀин ва, йиз хил сагъ хьпан бадали, узхъанди ккараг.
Заанурин инсанди РАББИЙИКАН рягьмат ккун гъапӀнийи, ва паччагьдин хил сагъ ва муганаз айибси гъабхьнийи. 7Паччагьди Заанурин инсандиз гъапнийи:
– Гъач йиз хулаз, уьл ипӀин, хъа узу увуз пешкешар тувидиза.
8Амма Заанурин инсанди жаваб тувнийи:
– Уву узуз яв мал-мутмуйин гьацӀ туврушра, узу увухъди гъягъидайза ва мушваъ я уьл ипӀидайза, я шид убхъидайза. 9Узуз РАББИЙИН гафниинди амур дапӀнайзуз аьхир: «Уьл мипӀан, шид мубхъан ва гъафи рякъюъди кьяляхъ махъадакан».
10Ва думу, Бет-Элиз гъафи рякъюъди кьяляхъ хъададакбан бадали, жара рякъюъди гъушнийи.
Пайгъамбар хъпебехъуб
11Бет-Элиъ сар кьаби пайгъамбар яшамиш шулайи. Дугъан баяр дугъахьна гъафнийи ва думу йигъан Заанурин инсанди гъапӀу ляхнарикан варидарикан кидибтнийи. Дурари адашдихьна дугъу паччагьдиз гъапибра гъурубкьнийи.
12Адашди дурарихьан гьерхнийи:
– Фуну рякъюъди гъушну думу?
Ва баяри адашдиз Ягьудайиан вуйи Заанурин инсан гъушу рякъ улупнийи.
13Дугъу чан баяриз гъапнийи:
– Узуз даждиин хъюрар иливай.
Дугъаз даждиин хъюрар иливиган, думу даждиин элеънийи. 14Думу Заанурин инсандин кьяляхъди гъушнийи. Кьаби пайгъамбриз думу мяхъюн гьарикк деънади гъидихънийи, ва дугъу гьерхнийи:
– Ягьудайиан гъафи Заанурин инсан уву вуйва?
– Узу, – жаваб тувнийи дугъу.
15Думуган пайгъамбри дугъаз гъапнийи:
– Гъач узухъди ич хулаз, уьл ипӀарва.
16Дугъу гъапнийи:
– Узхьан увухъди кьяляхъ хътаркуз шулдарзухьан ва мушваъ я уьл ипӀуз, я шид убхъуз шулдарзухьан. 17Узуз РАББИЙИН гафниинди дупназуз: «Душваъ уьл мипӀан, шид мубхъан ва душваз уву гъафи рякъюъди кьяляхъ махъадакан».
18Кьаби пайгъамбри жаваб тувнийи:
– Узура увуси пайгъамбар вуза. Малайикди узукна РАББИЙИН гафниинди гъапну: «Думу уьл ипӀуз ва шид убхъуз увухьна хулаз кьяляхъ хъади гъарах».
(Хъа думу кучӀал вуйи.)
19Ва Заанурин инсан дугъахъди кьяляхъ хътаркнийи, пайгъамбрин хулаъ уьл гъипӀнийи ва шид гъубхънийи. 20Дурар гьеле суфрайихъ деъну имиди, кьаби пайгъамбриз РАББИЙИН гаф ашкар гъабхьнийи. 21Дугъу Ягьудайиан дуфнайи Заанурин инсандиз ягъал сесниинди гъапнийи:
– Гьамци кӀура РАББИЙИ: «Уву РАББИЙИН гафнахъ хъпехъундарва ва РАББИЙИ, яв Заанури, туву амур чӀур гъапӀунва. 22Уву кьяляхъ хътаркунва ва Дугъу увуз уьл ипӀуз ва шид убхъуз гъадагъа дапӀнайишваъ уьл гъипӀунва ва шид гъубхъунва. Гьаддиз яв майит яв абйирин гюмбетдиъ кивидар».
23Заанурин инсанди уьл гъипӀган ва шид гъубхъган, думу кьяляхъ хътау пайгъамбри дугъаз даждиин хъюрар иливнийи. 24Заанурин инсан гъушнийи, амма рякъюъ дугъʼин аслан алабхьнийи ва думу гъячӀяргънийи. Дугъан майит рякъюъ дипнайи, хъа дидин багахь дажи ва аслан дийигънайи. 25Душвхьан тина гьудучӀвру инсанариз дабхънайи жандак ва жандкин багахь дийибгънайи аслан гъяркънийи. Дурар кьаби пайгъамбар яшамиш шулайи шагьриз гъафнийи ва дидкан кидибтнийи. 26Думу кьяляхъ хътау пайгъамбриз дидкан гъеебхьиган, дугъу гъапнийи:
– Му РАББИЙИН гафнахъ хъпебехъу Заанурин инсан ву. РАББИЙИ думу асландиз тувну. Диди, РАББИЙИ дугъаз чан гафнаъ дупнайиганси, думу гъячӀяргъну.
27Пайгъамбри чан баяриз гъапнийи:
– Узуз даждиин хъюрар иливай.
Ва дурари думу ляхин гъапӀнийи.
28Кьаби пайгъамбар гъушнийи, дугъаз рякъюъ дабхънайи ва чан багахь дажи ва аслан дийигънайи майит гъибихънийи. Хъа асланди жандак дипӀнадайи ва дажи дячӀябгънадайи. 29Пайгъамбри Заанурин инсандин жандак за гъапӀнийи, даждиин иливнийи. Майтихъ ишлар апӀбан ва накьвдик кивбан бадали, шагьриз кьяляхъ гъубхнийи. 30Дугъу майит чан гюмбетдиъ дивнийи. Дурари ишури ва «Жан, йиз чве!» кӀуру гьарйир гъапӀнийи.
31Думу накьвдик кивну, кьаби пайгъамбри чан баяриз гъапнийи:
– Узу кечмиш гъахьиган, Заанурин инсан накьвдик кивнайи гюмбетдиъ накьвдик кивай. Йиз кӀурбар дугъан кӀурбарин багахь дивай. 32Дугъу РАББИЙИН гафниинди Бет-Элиъ айи гъурбан апӀрушваз ва Самарияйин шагьрариъ тепйириин али гъурбан апӀрушвар айи хулариз къаршуди гъапиб вари мумкинсузди тамам хьибди.
Яравамдин терсвал
33Амма гьаддин кьяляхъра Яравамди чан пис рякъ дигиш гъапӀундайи. Дугъу тепйириин али гирамишвариз диндин гъуллугъчйирди цӀийикӀултӀан халкьдин арайиан тяйин гъапӀнийи. Гирамишварин гъуллугъчиди дугъу шлиз ккундуш, фунур вушра дерккуйи. 34Гьациб гъабхьну Яравамдин тухумдин гунагь. Диди думу тухум ккадабхъувалихъна гъабхнийи ва жилилан терг гъапӀнийи.
Currently Selected:
Паччагьлугъар-3 13: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
