Паччагьлугъар-3 12

Рехувуамдиз къаршуди удубчӀвуб

1Рехувуам Шехем шагьриз гъушнийи, гьаз гъапиш дина, дугъкан паччагь апӀбан бадали, вари израилар уч духьнайи. 2Наватдин бай Яравамдиз дидин гьякьнаан гъеебхьиган, думу Египетдиан кьяляхъ гъафнийи. Думугандиз думу, Сулейман паччагьдихьан гьергну, гьеле Египетдиъ имийи. 3Израилари Яравамдиз дих апӀуз гьаънийи, ва думу дурарихъди Рехувуамдихьна гъафнийи. Дурари Рехувуамдиз гъапнийи:

4– Яв адашди учу гизаф гъагъи юрккгъикк ккитнийи. Дугъу учʼин илирчу ич гуж дудрубкьру зегьмет ва гизаф гъагъи юрккагъ уву гьамус пчӀу апӀин. Гьадмуган учу увуз гъуллугъ апӀидича.

5Рехувуамди жаваб тувнийи:

– Гьамушвхьан гъарахай, хъа шубуд йигълан узухьна кьяляхъ гъачай.

Ва халкь гъубшнийи. 6Хъасин Рехувуамди паччагь гьеле думу чӀивиди имиди чан адашдиз гъуллугъ апӀури гъахьи яшлуйирихьан насигьят саягъниинди гьерхуз хъюгънийи.

– Гьаму халкьдиз узу фициб жаваб тувуз насигьят туврачва? – гьерхнийи дугъу.

7Дурари жаваб тувнийи:

– Эгер уву гъи гьаму халкьдин гъараваш гъахьиш, дурариз гъуллугъ гъапӀиш ва ужуб жаваб тувиш, дурар гьарган яв гъаравашар хьиди.

8Амма Рехувуамди яшлуйири туву насигьят кьабул гъапӀундайи. Дугъу чахъди аьхю гъахьи ва чаз гъуллугъ апӀурайи жигьиларихьан насигьят гъадабгъуз хъюгънийи. 9Дугъу дурарихьан гьерхнийи:

– Ичв насигьят фициб хьибди? Узуз «яв адашди учʼин илипнайи юркквагъ пчӀу апӀин» кӀурайи халкьдиз фициб жаваб тувза?

10Дугъахъди сатӀиди аьхю гъахьи жигьилари жаваб тувнийи:

– Увуз «яв адашди учу гизаф гъагъи юрккгъикк ккитнийи, хъа уву гьамус думу пчӀу апӀин» гъапи гьаму халкьдиз йип: «Йиз хлин бицӀи тӀуб йиз адашдин агъартӀан ацӀуди вуйиз. 11Йиз адашди учвʼин гизаф гъагъи юркквагъ илипну, хъа узу думу хъана гъагъи апӀидиза. Йиз адашди учвуз гъирмажариинди жаза тувуйи, хъа йиз жаза аькьрабарин кӀаламсиб хьибди».

12Шубудпи йигъан Яравам ва вари халкь, паччагьди, «шубудпи йигъан узухьна кьяляхъ гъачай» дупну, амур гъапӀганси, Рехувуамдихьна кьяляхъ гъафнийи. 13Паччагьди халкьдиз ижмиди жаваб тувнийи, яшлуйири чаз туву насигьят кьабул дарапӀди. 14Думу жигьиларин насигьятдихъ хъпехънийи, ва дугъу гъапнийи:

– Йиз адашди учвʼин гизаф гъагъи юркквагъ илипну, хъа узу думу хъана гъагъи апӀидиза. Йиз адашди учвуз гъирмажариинди жаза тувуйи, хъа йиз жаза аькьрабарин кӀаламсиб хьибди.

15Гьаци паччагь халкьдихъ хъпехъундар. Гьаз гъапиш думу ляхин, Шилойиан вуйи Ахияйин кюмекниинди Наватдин бай Яравамдиз РАББИЙИ гъапи гаф тамам хьпан бадали, РАББИЙИХЬАН гъафиб вуйи. 16Вари израилариз паччагь чпихъ хъпепехърувал гъябкънийи, ва паччагьдиз жаваб тувнийи:

– Давуддик ич фу пай ка,

Ессейин балик фу пай ка?

Ичв чадрариккна алдабгъ, Израил!

Гъит, Давуддин наслари чпин тухумдиин паччагьвал апӀри!

Ва израилар чпин хулариз алдагънийи. 17Рехувуамди анжагъ Ягьуда вилаятдиъ яшамиш шулайидариин паччагьвал апӀурайи.

18Рехувуам паччагьди Адунирам мажбури вуди лихурайидарихьна гюзчивал гъабхуз гьаънийи, амма израилари дугъʼин гъван уьлюбхну, думу гъакӀнийи. Хъа Рехувуам паччагь гьяйвнар ккитӀнайи дявдин фургъниъ эънийи ва Ерусалимдиз гьергнийи. 19Гьаддихъанмина гъийин йигъаз Израил Давуддин тухмиз къаршуди дийибгъна.

Яравам Израилин паччагь хьуб

20Яравам кьяляхъ гъюваликан израилариз гъеебхьиган, дурари дугъаз дих апӀуз гьаънийи. Дугъаз мешʼверайиз дих гъапӀнийи ва думу вари Израилиин паччагь гъапӀнийи. Анжагъ Ягьудайин тухум Давуддин наслариз вафалуди гъубзнийи.

21Сулеймандин бай Рехувуамди, Ерусалимдиз гъафиган, Израилин тухумдихъди дяви апӀбан ва чахьна паччагьлугъ кьяляхъ апӀбан бадали, Ягьудайин ва Вениаминдин тухмариан – варжна миржцӀур агъзур ужударсдар эскрар уч гъапӀнийи. 22Амма Заанурин инсан вуйи Шемаяйиз Заанурихьан гьамциб гаф ашкар гъабхьнийи:

23– Сулеймандин бай Рехувуамдиз, Ягьудайин паччагьдиз, Ягьудайин ва Вениаминдин тухмариз ва имбу халкьдиз йип: 24«РАББИЙИ гьамци кӀура: ичв чвйир вуйи израиларихъди дяви апӀуз мягъянай. Вари ичв хулариз алдагъай, гьаз гъапиш думу ляхин Йиз амриинди дубхьна».

Дурар РАББИЙИН гафнахъ хъпехънийи ва Дугъан гафниинди хулариз кьяляхъ хътаркнийи.

Яравамди бутариз ибадат апӀуб

25Яравамди Ефраим тухумдин тепйириин Шехем шагьур мюгькам гъапӀнийи, ва думу душваъ яшамиш гъахьнийи. Душвʼан удучӀвну, дугъу Пениэл цӀийикӀултӀан тикмиш гъапӀнийи.

26Яравамди фикир апӀуйи: «Паччагьлугъ Давуддин насларихьна кьяляхъ гъюз мумкин ву. 27Эгер халкьди гъурбнар Ерусалимдиъ РАББИЙИН Хулаз гъахури гъахьиш, дурарин юкӀвар чпин агъайихьна, Ягьудайин паччагь Рехувуамдихьна, илтӀикӀиди. Хъасин дурари узу йивну йикӀиди, ва дурар Ягьудайин паччагь Рехувуамдихьна кьяляхъ гъягъиди». 28Ва, насигьят гъадабгъну, паччагьди кьюб гъизилин бутар-жердкьар гъапӀнийи ва халкьдиз гъапнийи:

– Учву Ерусалимдиз гъягъюб чӀяаьн ву. Магьа, Израил, уву Египетдиан адау яв заанурар.

29Думу жердкьарикан саб дугъу Бет-Эл шагьриъ дивнийи, тмунуб – Дан шагьриъ. 30Думу ляхни гунгьихъна гъахнийи, гьаз гъапиш халкь думу жердкьарихьна гъягъюз хъюгънийи, гьятта Дандизра.

31Яравамди тепйириин гъурбан апӀрушвар айи хулар тикмиш гъапӀнийи ва гъуллугъчйирди халкьдиан вуйидар, Леви тухумдиан дарудар, дерккнийи. 32Дугъу миржибпи вазлин йицӀихьудпи йигъ, Ягьудайиъ къайд апӀурайибси, машквар вуди тяйин гъапӀнийи.#12:32 Муса пайгъамбрин Къанундиз асас, Израилин халкьди, 7-пи вазлин 15-пи йигълан хъюгъну, Пажарин машквар къайд дапӀну ккундийи. Яравамди дици халкь Ерусалимдиз гьадму машквриз дурубшбан бадали гъапӀнийи. Гьацира Бет-Элиъ гъурбан апӀрушвариъ чав гъапӀу жердкьариз гъурбнар апӀуйи. Гьадушваъ тепйириин чав тикмиш гъапӀу гъурбан апӀрушвариъ гъуллугъчйир дерккнийи.

Ягьудайиан вуйи пайгъамбар

33Израилариз машквар тяйин дапӀну, чав чан хушниинди ктабгъу миржибпи вазлин йицӀихьудпи йигъан Яравам чав Бет-Элиъ тикмиш гъапӀу гъурбан апӀрушвахьна гъафнийи. Дугъу иццидар ниар апӀбан гъурбан гъапӀнийи.

Currently Selected:

Паччагьлугъар-3 12: ТабГК

Highlight

Copy