Паччагьлугъар-3 11

Сулейман Раббийихьан гьидицуб

1Хъа, фяряуьндин риштӀан савайи, Сулейман паччагьдиз жара уьлкйириан вуйи гизаф жара дишагьлийирра ккундийи – муав, аммун, эдум, сидон ва хетт дишагьлийир. 2Дурар чибкан РАББИЙИ израилариз гьамци гъапи халкьарикан вуйи: «Дурарихъди нюкгьиъ багахьлу махьанай, гьаз гъапиш дурари ичв юкӀвар мумкинсузди чпин бутарихьинди илтӀикӀиди». Хъа Сулейман дурарихьинди зигуйи. 3Дугъаз паччгьарин тухмариан ургудварж хпир, хъа гьацира шубуд варж ашна айи, ва хпари дугъан юкӀв гьякьикьи рякъʼлан алдапӀнийи. 4Сулейман кьаби гъахьиган, хпари дугъан юкӀв бутарихьинди илтӀибкӀнийи, ва дугъан юкӀв РАББИЙИЗ, чан Заануриз, чан адаш Давуддин юкӀв гъабхьиганси, тамамди вафалуди имдайи. 5Думу сидонянарин хпи бут Астартайихъ ва аммунарин хяви бут Милхумдихъ хъахънийи.

6Дугъу РАББИЙИН уларикк писвал апӀурайи, думу РАББИЙИХЪДИ тамамди, чан адаш Давудси, гъягъюрадайи. 7Ерусалимдин ригъ гьудубчӀвру терефнаъ тепейиин Сулейманди муаварин хяви бут Кемушдиз ва аммунарин хяви бут Мулехдиз диндин ляхнар апӀрушв тикмиш гъапӀнийи. 8Гьациб ляхин жара уьлкйириан вуйи вари хпаризра гъапӀнийи, дурари чпин бутариз иццидар ниар ккауйи ва гъурбнар апӀуйи.

9РАББИЙИЗ Сулеймандикан хъял гъафнийи, гьаз гъапиш дугъан юкӀв РАББИЙИХЬАН, Израилин Заанурихьан, чаз кьюбан ашкар гъахьирихьан, гьибицнийи. 10Бутарихъди гъягъюб Сулеймандиз Дугъу гъадагъа апӀувализ дилигди, Сулейманди РАББИЙИН амрар тамам гъапӀундайи. 11Ва РАББИЙИ Сулеймандиз гъапнийи:

– Уву гьацир вуйиган ва Узу увуз тамам апӀуз амур гъапӀу Йиз йикьрар ва Йиз тяйинвалар дюрюрхган, Узу увхьан паччагьлугъ якьинди тадабгъидиза ва яв гъаравашарикан сариз тувидиза. 12Амма яв адаш Давуддин гьюрматназ думу ляхин уву чӀивиди имиди апӀидарза. Узу паччагьлугъ яв балин хилариан тадабгъидиза. 13Амма вари паччагьлугъ тадабгъидарза – Узу дугъаз Йиз лукӀ Давуддин гьюрматназ ва Узу ктабгъу Ерусалимдин гьюрматназ саб тухум гъибтдиза.

Сулеймандин душмнар

14РАББИЙИ Сулеймандиз душман арайиз адаънийи – Эдумдин паччагьдин хизандиан вуйи Гьадад. 15Улихьна вахтари, Давуд Эдумдиз гъушиган, кьушмарин аьхюр Юав дявдиъ гъийихдар накьварик кивуз гъафнийи, ва дугъу Эдумдиъ вари жилар йивну гъакӀнийи. 16Юав ва вари израилар душваъ йирхьуб вазли, чпи Эдумдиъ вари жилар йивну йикӀайизкьан гъузнийи. 17Хъа думуган гьеле бицӀир вуйи Гьадад чан адашдин бязи гъаравашарихъди Египетдиз гьергнийи. 18Дурар Мидʼян уьлкейиан тина рякъюъ учӀвнийи ва Паран кӀуру буш чюлиз гъафнийи. Парандиан инсанар чпихъди гъадагъну, дурар Египетдиз, Египетдин паччагь вуйи фяряуьндихьна гъафнийи. Фяряуьнди Гьададдиз хал-йишв, ипӀруб ва жил тувнийи.

19Фяряуьндиз Гьадад гьадмукьан кьабулди вуйики, дугъу Гьададдиз чан хпир Тахпенесдин чи хпирди тувнийи. 20Тахпенесдин чуччу Гьададдиз Генуват кӀуру бай гъахнийи, Тахпенесди думу паччагьдин гъалайиъ гъюрхнийи. Генуват фяряуьндин бицӀидарихъди яшамиш шуйи.

21Египетдиъ ади, Гьададдиз Давуд чан архйирихъди фаракьат хьуваликан ва кьушмин аьхюр вуйи Юавра кечмиш хьуваликан гъеебхьнийи. Думуган Гьададди фяряуьндиз гъапнийи:

– Узу йиз уьлкейиз деет.

22– Яв уьлкейиз кьяляхъ хътаркуз гьамкьан ккунди хьуз, узухь увуз фу-вуш гьубкӀрадаринвуз? – гьерхнийи фяряуьнди.

– Ваъ, – жаваб тувнийи Гьададди, – хъа фици-вушра узу деет.

23Заанури Сулеймандиз жара душманра арайиз адагънийи – Элиадайин бай, чан агъа Цувайин паччагь Ададезерихьан гьергу Резон. 24Давудди Цувайин кьушмар дагъитмиш апӀбахъан, Резонди чан гъвалахъ инсанар уч гъапӀнийи ва дурарин башчи гъахьнийи. Дурар Дамаскдиз гъафнийи. Душваъ бина гъивнийи, ва Резондикан Дамаскдин паччагь гъапӀнийи. 25Сулейман чӀивиди имбукьан гагьди, Гьададдиси, писвал артухъ апӀури, Резон вари вахтна Израилин душман гъахьнийи. Дугъу Арам уьлкейиъ паччагьвал апӀуйи ва Израил саймиш апӀурдайи.

Паччагьлугъ пай шлуваликан пайгъамбрин вахт ккимиди пуб

26Наватдин бай Яравамди инсанар паччагьдиз къаршуди гъитӀирккнийи. Думу Сулейманди чаз багахь дапӀнайидарикан, Цереда шагьриан вуйи Ефраимдин тухумдиан вуйи, хъа дугъан дада – Церуа кӀуру ачӀни хпир.

27Дугъу паччагьдиз къаршуди инсанар фици гъитӀирккнуш, магьа гьаддикан вакьиа: Сулейманди Милло дазу тикмиш гъапӀнийи ва чан адаш Давуддин Шагьриъ цал гьадабхънайишв дюз алапӀнийи. 28Яравам гизаф бажаранлу кас вуйи, ва Сулеймандиз, думу жигьили чан ляхин фукьан ужуйи тамам апӀуруш, гъябкънийи, ва паччагьди думу Юсуфдин тухмиан мажбури вуди лихурайи варидарин аьхюрди дерккнийи.

29Гьадму вахтна Яравамдиз Ерусалимдиан удучӀвуб алабхънийи, ва рякъюъ дугъаз цӀийи палат алабхьнайи Шило шагьриан вуйи пайгъамбар Ахия алахънийи. ХутӀлиъ анжагъ дурар кьюртӀан адайи. 30Ахияйи чаин али цӀийи палат йицӀикьюб парчийиз гъячӀябгънийи.

31Хъасин дугъу Яравамдиз гъапнийи:

– ЙицӀуб парчи увуз гъадагъ, гьаз гъапиш РАББИЙИ, Израилин Заанури, гьамци кӀура: «Магьа, Узу Сулеймандин хилариан паччагьлугъ тадабгъураза ва увуз йицӀуб тухум тувраза. 32Хъа Йиз лукӀ Давуддин ва Израилин вари йишварикан Узу ктабгъу Ерусалим шагьрин гьюрматназ, Сулеймандихь саб тухум хьибди. 33Узу гьаму ляхин апӀидиза, гьаз гъапиш дурари Узу гъирагъдихь гъитну ва сидонарин бут Астартайиз, муаварин бут Кемушдиз ва аммунарин бут Милхумдиз ибадат гъапӀнийи, Йиз рякъяриъди гъушундайи, Йиз улариан дугъри вуйиб апӀурдайи, Сулеймандин адаш Давудди тамам апӀруганси, Йиз тяйинвалар ва амрар тамам апӀурдайи.

34Хъа Узу Сулеймандин хилариан вари паччагьлугъ тадабгъидарза. Дугъкан чан уьмрин вари йигъари Йиз лукӀ Давуддин гьюрматназ гьюкумдар апӀидиза. Давуд Узу паччагьди ктагъунза, ва дугъу Йиз амрар ва тяйинвалар тамам апӀури гъахьнийи. 35Узу дугъан балин, Сулеймандин, хилариан паччагьлугъ адабгъидиза ва увуз йицӀуб тухум тувидиза. 36Сулеймандин бализ, Йиз лукӀ Давуддин насларикан сар Йиз ччвур гьарган душваъ хьуз Узу ктабгъу шагьур вуйи Ерусалимдиъ тахтнийин хьпан бадали, саб тухум тувидиза. 37Хъа уву Узу ктагъураза. Уву яв кӀваз ккунибдиз варибдиз идара апӀидива, уву Израилин паччагь хьидива. 38Узу увуз амур гъапӀуб вари тамам апӀури, Йиз рякъяриъди гъягъюри ва, Йиз лукӀ Давуддиси, Йиз тяйинвалар ва амрар Йиз улариъ гьякь вуди тамам апӀури гъахьиш, Узу увухъди хьидиза. Узу увуз Давуддиз Узу яратмиш гъапӀубсиб мюгькам тухум яратмиш апӀидиза ва увуз Израил тувидиза. 39Узу Давуддин наслариз жаза тувидиза, амма гьаргандиз вуди ваъ».

40Сулейман Яравам йивну йикӀуз чалашмиш гъахьнийи, амма Яравам Египетдиз Шишак паччагьдихьна гьергнийи ва Сулейман кечмиш хьайизкьан душваъ гъузнийи.

Сулеймандин аьжал

41Сулеймандин уьмрин жара гьядисйирикан ва дугъан аьяндарваликан Сулеймандин ляхнарин китабдиъ дибикӀна. 42Сулейманди Ерусалимдиъ вари Израилиин ягъчӀвур йисан паччагьвал гъапӀну. 43Хъасин думу чан архйирихъди фаракьат гъахьну ва чан адаш Давуддин Шагьриъ накьвдик кивну. Хъа дугъан бай Рехувуам Сулеймандин ерина паччагь гъахьну.

Currently Selected:

Паччагьлугъар-3 11: ТабГК

Highlight

Copy