Паччагьлугъар-3 1
1
Давуд пайгъамбар кьабивалиъ
1Давуд паччагь кьаби гъахьнийи ва гизаф яшлу йисарихъна хъуркьнийи. Дугъʼин лэъфар илирчуйи, гьаци вушра дугъаз мани шулдайи. 2Думуган гъаравашари дугъаз гъапнийи:
– Гъит, ич агъа паччагьдиз, чаз хъайивал апӀбан ва дугъан гъайгъушнаъ хьпан бадали, жигьил риш агри. Думу риш увухъди дахъди ва увуз мани хьибди.
3Дурари вари Израилиъ уткан риш агуз хъюгънийи, Шунем гъулʼан вуйи Авишаг кӀуру риш гъидихънийи ва думу паччагьдихьна гъахнийи. 4Риш гизаф уччвур вуйи. Думу паччагьдин гъайгъушнаъ шуйи ва дугъаз хъайивал апӀуйи, амма паччагь дугъахъди сатӀи гъахьундайи.
Давуддин бай Адония паччагьдин тахт бадали гьюжатнаъ учӀвуб
5Чан дада Хаггит вуди гъахьи Адонияйи фурслуди кӀури гъахьнийи:
– Узу паччагь хьидиза.
Дугъу чаз гьяйвнар ккитӀнайи дявдин фургънар, атлуйир ва чан улихьди жаргъру хьуцӀур кас гъаравашар гьязур гъапӀнийи.
6(Дугъан адаш Давуд паччагьди, «Уву мици гьаз апӀурава?» кӀури, Адонияйиз саб вахтнара нач туври шулдайи. Адония Авессаломдин кьяляхъ бабкан гъахьир ва гизаф уччвур вуйи.)
7Адонияйи Церуяйин#1:7 Церуя: Давуд паччагьдин багахьлу дишагьли. бай Юавдихъди ва Заанурин гъуллугъчи Авиатарихъди жиниди гафар гъапӀнийи. Дурари дугъан тереф гъибиснийи. 8Амма Заанурин гъуллугъчи Цадукди, Югьудайин бай Бенаяйи, Натан пайгъамбри, Шимейи, Рейи ва Давуддин адлу эскрерари Адонияйин тереф гъибисундайи.
9Адонияйи Рогел булагъдин багахь хьайи Зохелет гъвандихъ чарвйир, йицар ва чагъ дапӀнайи кӀарар гъурбан гъапӀнийи ва чан вари чвйириз, паччагьдин баяриз, ва паччагьдин Ягьудайиъ айи вари гьякимариз дих гъапӀнийи. 10Амма я Натан пайгъамбриз, я Бенайиз, я паччагьдин адлу эскрариз, я чан чве Сулеймандиз дих гъапӀундайи.
Давудди паччагьдин тахт Сулеймандихьна тувуб
11Думуган Натан пайгъамбри Сулеймандин дада Батшевайихьан гьерхнийи:
– Хаггитдин бай Адония паччагь хьуваликан, хъа ихь агъа Давуддиз дидкан хабар адруваликан увуз яраб гъеебхьундарвуз? 12Гьаци вуйиган, яв уьмур ва яв бай Сулеймандин уьмур фици къутармиш апӀуруш#1:12 Къутармиш апӀуб: балайихьан уьрхюб., увуз насигьят тувуз узуз ихтияр тув. 13Гьамусяаьт Давуд паччагьдихьна гъарах ва дугъаз йип: «Йиз агъа паччагь, узуз, яв гъаравашдиз, йиз бай Сулейман яв кьяляхъ якьинди паччагь хьиди ва яв тахтниин деъди кӀури, ху гъапӀундайвахъа? Адония паччагь гьаз гъахьнухъа?» 14Уву паччагьдихъди гафар апӀури имиди, узу яв кьяляхъди гъидиза ва яв гафар тасдикь апӀидиза.
15Батшева паччагь айи хулаз гъушнийи. (Думуган яшлу паччагьдиз Шунем гъулʼан вуйи Авишагди гъуллугъ апӀурайи.) 16Батшевайи икрам гъапӀнийи, ва думу паччагьдин улихь ккадаркнийи.
– Фу ккундувуз? – гьерхнийи паччагьди.
17Батшевайи дугъаз гъапнийи:
– Йиз агъа, узуз, яв гъаравашдиз, уву чав, РАББИЙИИНДИ, яв Заануриинди, йиз бай Сулейман яв кьяляхъ паччагь хьиди ва яв тахтниин деъди кӀури, ху гъапӀнийва. 18Хъа магьа паччагь Адония гъахьну, хъа увуз, йиз агъа, дидкан аьгъдарвуз. 19Адонияйи гизаф кьадар йицар, чагъ дапӀнайи кӀарар ва чарвйир гъурбан гъапӀну. Дугъу паччагьдин вари баяриз, Заанурин гъуллугъчи Авиатариз ва кьушмин аьхюр вуйи Юавдиз дих гъапӀну, амма яв гъараваш Сулеймандиз дих гъапӀундар. 20Йиз агъа паччагь, йиз агъа паччагьдин кьяляхъ тахтниин фуж деъруш, вари Израил увухьинди либгура. 21Эгер уву, йиз агъа паччагьди, яв ху тамам дарапӀиш, уву яв архйирихъди архаин гъахьибси, узу ва йиз бай Сулейман тахсиркрарси гьисаб апӀиди.
22Батшевайи паччагьдихъди гафар апӀури имиди, хулазди Натан пайгъамбар гъафнийи. 23Паччагьдиз хабар тувнийи:
– Мушваъ Натан пайгъамбар а.
Думуган Натан пайгъамбар паччагьдихьна гъафнийи ва дугъу паччагьдиз жилиинакьан икрам гъапӀнийи.
24Натанди гъапнийи:
– Йиз агъа паччагь, яв кьяляхъ паччагь Адония хьиди ва яв тахтниин деъди кӀури, гъапнийвахъа? 25Гъи дугъу гизаф кьадар йицар, чагъ дапӀнайи кӀарар ва чарвйир гъурбан гъапӀну. Дугъу паччагьдин вари баяриз, кьушмарин аьхюдариз ва Заанурин гъуллугъчи Авиатариз дих гъапӀну. Гьамусяаьтна дурари Адонияйихъди ипӀура ва убхъура ва кӀура: «Яшамиш ишри Адония паччагь!» 26Амма яв гъараваш вуйи узуз, Заанурин гъуллугъчи Цадукдиз, Югьудайин бай Бенаяйиз ва яв гъараваш Сулеймандиз дих гъапӀундар. 27Йиз агъа паччагьдин амур гьациб вуйин? Уву, яв кьяляхъ тахтниин фуж деъруш, учуз, яв гъаравашариз, гьамусра гъапундарва.
28Думуган Давуд паччагьди гъапнийи:
– Узухьна Батшевайиз дих апӀинай.
Батшева паччагьдихьна гъафнийи ва дугъан улихь дийигънийи.
29Паччагьди ху гъапӀнийи:
– Узу гьарсаб балайихьан ярхла гъапӀу РАББИЙИИНДИ ху апӀурза, 30узу увуз РАББИЙИН, Израилин Заанурин, улихь ху гъапӀу ляхин гъи якьинди тамам апӀидиза: яв бай Сулейман йиз кьяляхъ паччагь хьиди ва йиз тахтниин йиз ерина деъди.
31Батшевайи, икрам гъапӀнийи ва, паччагьдин улихь ккадаркну, гъапнийи:
– Гъит, йиз агъа паччагь Давуд гьаргандиз яшамиш ишри!
32Давуд паччагьди гъапнийи:
– Узухьна Заанурин гъуллугъчи Цадукдиз, Натан пайгъамбриз ва Югьудайин бай Бенаяйиз дих апӀинай.
Дурар паччагьдихьна гъафиган, 33дугъу дурариз гъапнийи:
– Учвухъди йиз гъаравашар гъадагъай, йиз бай Сулейман йиз гъятириин илитай ва Гихон булагъдихъна гъайихай. 34Гъит, душвахь Заанурин гъуллугъчи Цадукди, Натан пайгъамбри дугъкан Израилин паччагь хьувалин зейтундин ччим кадатри#1:34 Зейтундин ччим кадатри: Лиг 1 Пачч. 9:16.. КӀарчариан сесер апӀинай ва гьарйир апӀинай: «Яшамиш ишри Сулейман паччагь!» 35Хъасин Сулейман кьяляхъ аькъинай, ва гъит думу йиз тахтниин деъри ва йиз ерина паччагьвал апӀри. Узу думу Израилин ва Ягьудайин гьюкумдарди дерккунза.
36Югьудайин бай Бенаяйи паччагьдиз жаваб тувнийи:
– Амин! РАББИЙИ, йиз агъа паччагьдин Заанури, гьаци апӀри. 37РАББИ йиз агъа паччагьдихъди фици гъахьнуш, гьаци Думу Сулеймандихъдира ишри, дугъан тахт йиз агъа вуйи Давуд паччагьдин тахттӀан артухъ за апӀбан бадали!
38Ва Заанурин гъуллугъчи Цадук, Натан пайгъамбар, Югьудайин бай Беная, керетар ва пелетар#1:38 Керетар ва пелетар: Давуд паччагьдин ихтибарлу эскрар. гъушнийи, Сулейман Давуд паччагьдин гъятириин илитнийи ва дурар Гихондихъна дугъахъди гъушнийи. 39Заанурин гъуллугъчи Цадукди РАББИЙИН Чадриккан#1:39 РАББИЙИН Чадур: Заанурин амриинди Муса пайгъамбри тикмиш гъапӀу ибадат апӀрушв. Сулейман паччагьди РАББИЙИН Хал тикмиш апӀайиз, думу чадурин улихь Заануриз гъурбнар апӀуйи. Анжагъ Заанурин гъуллугъчйиризтӀан думу чадрин айитӀ учӀвуз ихтияр адайи. ччим айи кӀарч гъабхнийи ва Сулеймандикан ччим ктатнийи. Дидин кьяляхъ дурари кӀарчариан сесер гъапӀнийи, ва вари халкьди чӀигъар гъапӀнийи:
– Яшамиш ишри Сулейман паччагь!
40Вари халкь дурарин кьяляхъди, гъугънаан жил тӀубчӀвруганси, швутӀрамар йивури ва гурлуди шаду чӀигъар апӀури, гъубшнийи.
Сулейманди Адонияйиз рягьим апӀуб
41Адонияйиз ва дугъахъди хъайи вари хялариз думу сесер демдин#1:41 Дем: ипӀруб-убхъруб гьивувал. аьхириъ гъеерхьнийи. КӀарчнаан йивурайи сесер деерхьну, Юавди гьерхнийи:
– Шагьриъ айи гьяракат ва сес гьапӀрудар ву?
42Дугъу гафар дупну ккудубкӀайиз, Заанурин гъуллугъчи Авиатарин бай Юнатан гъафнийи. Адонияйи гъапнийи:
– Багахьна гъач. Уву лайикьлу адми вува, ва, гьелбетда, ужудар хабрар хурва.
43– Ваъ, – жаваб тувнийи Юнатанди. – Ихь агъа Давуд паччагьди Сулеймандикан паччагь гъапӀну. 44Давуд паччагьди Сулейман Заанурин гъуллугъчи Цадукдихъди, Натан пайгъамбрихъди, Югьудайин бай Бенаяйихъди, керетарихъди ва пелетарихъди гьаъну, ва дурари думу Давуд паччагьдин гъятириин илитну. 45Хъа Заанурин гъуллугъчи Цадукди ва Натан пайгъамбри Гихондихъ дугъкан паччагь хьувалин ччим ктатну. Душвхьан дурар шадди гъушну, вари шагьур гьяракатназ гъафну. Гьадму сес ву учвуз ебхьурайиб. 46Дидланра савайи, Сулейман паччагьдин тахтниин деъну. 47Хъа паччагьдин гьякимар ихь агъа Давуд паччагь тебрик апӀуз гъафну. Дурари «гъит Заанури Сулеймандин ччвур яв ччвуртӀан артухъ адлу, дугъан тахт яв тахттӀан за апӀри!» кӀуйи. Паччагьди ахниъ икрам гъапӀнийи, 48ва дугъу гьамци гъапну: «Гъи узуз тахтниин йиз паччагьвал чахьна гъадабгърур рякъюз гъиту РАББИЙИЗ, Израилин Заануриз, шюкюр ибшри!»
49Думуган Адонияйин вари хялар, гучӀ хьпаан гукӀнивал кабхъну, ликри гъудужвнийи ва гьергнийи. 50Хъа Адония, Сулеймандихьан гучӀури, гъурбан апӀрушваз гъушнийи ва гъурбан апӀрушван кӀарчарихъан#1:50 Гъурбан апӀрушван кӀарчар: дурар йифрикан дапӀнайидар ва юкьуб мурччвахъ дивнайидар вуйи. Дурарихъан хъичӀихнайирик кучуз гъадагъа вуйи. хъичӀихнийи.
51Сулеймандиз хабар дебккнийи:
– Адонияйиз Сулейман паччагьдихьан гучӀура, ва дугъу гъурбан апӀрушван кӀарчар деетурадар. Дугъу кӀура: «Гъит, Сулейман паччагьди узу, чан гъараваш, туриз тутруврувалин гъи узуз ху апӀри».
52Сулейманди жаваб тувнийи:
– Эгер дугъу учв лайикьлу инсан вуди улупиш, дугъан кӀуллан жилиина саб чӀаркьан алдабхъидар, хъа эгер дугъаъ писвал ашкар гъабхьиш, думу йикӀиди.
53Сулейман паччагьди инсанар гьаънийи, ва дурари Адония гъурбан апӀрушвʼан хъади гъафнийи. Адония учӀвнийи, ва дугъу Сулейман паччагьдиз икрам гъапӀнийи. Сулейманди гъапнийи:
– Хулаз гъарах.
Currently Selected:
Паччагьлугъар-3 1: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
