Паччагьлугъар-3 2
2
Сулеймандиз Давуддин аьхиримжи насигьятар
1Давудди, учв кечмиш шлу вахт улубкьиган, чан бай Сулеймандиз насигьятар тувнийи:
2– Узу кечмиш шулаза. Ижми йихь, кьягьял йихь, 3РАББИЙИ, яв Заанури, тӀалаб апӀруб тамам апӀин, Дугъан рякъяриъди гъарах ва Дугъан шартӀар ва амрар, Дугъан къанунар ва улупбар, Муса пайгъамбрин Къанундиъ дидикӀнайиганси, тамам апӀин. Думуган, уву фу апӀури гъахьишра, наана гъягъюри гъахьишра, варишвариъ хъуркьувалар хьидивуз. 4Думуган РАББИЙИ Чав узкан гъапи «Эгер яв ирсчйир Заанурин рякъяриъди гъягъюри ва Йиз улихь марцци кӀваантӀан ва дугъривалиинди лицури гъахьиш, уву Израилин тахтниин яв ерина деърурихъ саб вахтнара мягьрум хьидарва» гаф тамам хьибди.
5Хъасин, Церуяйин бай Юавди узуз фу гъапӀнуш, Израилин кьушмарин кьюр аьхюриз – Нерин бай Авнериз ва Етерин бай Амасайиз фу гъапӀнуш, увуз аьгъявуз. Дугъу дурар ислягь вахтна хаинкарди йивну гъакӀну ва ифдихьди чан хилар кацӀну. 6Яв аьяндарвалиинди ляхин апӀин, амма кьаби духьнайи думу тму дюнʼяйиз ислягьвалиинди гъягъюз мигъитан.
7Галааддиан вуйи Барзиллайин баяриз вафалуди гъуз, ва гъит дурар яв суфрайихъ хураг ипӀрударин арайиъ ишри. Дурар узуз, узу яв чве Авессаломдихьан гьерграйиган, вафалуди гъузнийи.
8Увухъ хъана Бахуримдиан вуйи Вениаминдин тухумдиан вуйи Герайин бай Шимей хъавухъ. Узу Маханаимдиз гъягъру йигъан дугъу узуз пис агьрар гъапӀунзуз. Дявдин кьяляхъ, Ярдан нирихъна узу къаршуламиш апӀуз Шимей гъафиган, узу РАББИЙИН улихь думу турикк ккидритуз ху гъапӀунза. 9Хъа гьамус думу тахсир ктрур гьисаб мапӀан. Уву аьяндар кас вува, Шимейикан фу апӀуруш, гъавриъ ахъидива. Думу, чан цӀухи кӀул ифди алабцӀну, тму дюнʼяйиз гьаъ.
Давуддин аьжал
10Давуд чан архйирихъди архаин гъахьнийи ва Давуддин Шагьриъ накьвдик кивнийи. 11Давудди Израилиъ ягъчӀвур йисан паччагьвал гъапӀнийи – ургуд йисан Хеврундиъ ва сумчӀурна шубуд йисан Ерусалимдиъ. 12Чан адаш Давуддин тахтниин Сулейман деънийи, ва дугъан гьюкум гизаф мюгькам гъабхьнийи.
Адония йивну йикӀуб
13Хаггитайин бай Адония Сулеймандин дада Батшевайихьна гъафнийи. Батшевайи дугъхьан гьерхнийи:
– Ислягьвалиинди дуфнайир вуйва?
– Ислягьвалиинди, – жаваб тувнийи дугъу.
14Хъасин Адонияйи гьерхнийи:
– Узхьан увухъди гаф-чӀал апӀуз шулин?
– Йип, – жаваб тувнийи Батшевайи.
15– Увуз аьгъявуз, – гъапнийи дугъу, – паччагьлугъ йизуб вуйи, ва вари Израил узухьинди, паччагь шлурихьиндиси, либгуйи. Амма вари дигиш гъабхьну, ва паччагьлугъ йиз чвуччвухьна гъубшну – гьаз гъапиш паччагьлугъ дугъаз РАББИЙИХЬАН кьисмат вуди гъабхьну. 16Гьаддиз магьа узу увкан саб ляхин ккун апӀураза. Узуз ваъ макӀан.
– Йип, – гъапнийи Батшевайи.
17Дугъу гъапнийи:
– Ккун апӀурза увкан, Сулейман паччагьдихъди, дугъу Шунем гъулʼан вуйи Авишаг узуз хпирди тувбан бадали, гафар-чӀалар апӀин – паччагьди увуз ваъ пидар.
18– Ужуйи, – жаваб тувнийи Батшевайи. – Яв гьякьнаан узу паччагьдихъди гафар-чӀалар апӀарза.
19Батшева Адонияйин гьякьнаан гафар-чӀалар апӀуз Сулейман паччагьдихьна гъафиган, думу кьабул апӀуз паччагь гъудужвнийи, Батшевайиз икрам гъапӀнийи ва чан тахтниин деънийи. Сулейманди чан дадайиз тахт хуз амур гъапӀнийи, ва Батшева паччагьдихьан арчул терефнаъ деънийи.
20– Йиз увухьна бицӀи хаиш айиз, – гъапнийи Батшевайи. – Узуз ваъ макӀан.
Паччагьди гъапнийи:
– ТӀалаб апӀин, йиз дада; узу увуз ваъ пидарза.
21Ва дугъу гъапнийи:
– Гъит, Шунем гъулʼан вуйи Авишаг яв чве Адонияйиз хпирди туври.
22Сулейман паччагьди жаваб тувнийи:
– Шунем гъулʼан вуйи Авишаг, уву Адонияйиз гьаз тӀалаб апӀурава? Дугъаз паччагьлугъра тӀалаб апӀин#2:22 Дугъаз паччагьлугъра тӀалаб апӀин: Давуддин хпир гъахьи Авишаг хпирди гъадагъбиинди Адонияйиз паччагь хьуз ккундийи. – думу йиз аьхюну чве ву аьхир, дугъахъди Заанурин гъуллугъчи Авиатарра, Церуяйин бай Юавра хъа!
23Ва Сулейман паччагьди РАББИЙИИНДИ ху гъапӀнийи:
– Гъит, Заанури узуз ижми жаза туври, эгер Адония гьациб тӀалаб апӀбаз лигну уьмрихъ мягьрум дархьиш! 24Узу тасдикь гъапӀу ва йиз адаш Давуддин тахтниин диту, йиз тухум мюгькам гъапӀу РАББИЙИИНДИ ху апӀураза. Узу гаф тувганси, якьинди гъи Адония аьжлин хлиз тувди!
25Сулейман паччагьди Югьудайин бай Бенаяйиз амур гъапӀнийи, ва дугъу Адонияйиз гъивнийи, Адония гъакӀнийи.
Авиатариз жаза тувуб ва Юав йивну йикӀуб
26Хъа Заанурин гъуллугъчи Авиатариз паччагьди гъапнийи:
– Анатот шагьриз, яв хутӀлариина гъарах. Уву гардан йивувализ лайикь вува, амма узу гъи уву аьжлин хлиз тувидарза, гьаз гъапиш РАББИЙИН, Заанурин сундух#2:26 Заанурин сундух: израиларин асас гирами шейъ, гакӀвликан кадапӀнайи ва гъизилихъди дабалгнайи ишикӀ. Дидиъ Заанури, Израилин халкьдихъди йикьрар йибтӀруган, Синай дагъдиин Мусайиз туву 10 табшуругъ утӀурчнайи гъвандин кьюб шиб айи. Сундхин гъапгъиин гъизиликан кадаънайи хлинццар гьатӀарццнайи кьюб малайик-херувим алийи. йиз адашдин улихьди гъабхуйва ва йиз адашдихъди уьмрин вари гъагъивалар пай гъапӀнийва.
27Сулейманди Авиатар РАББИЙИН гъуллугъчивалихьан ярхла гъапӀнийи, гьаддиинди РАББИЙИ Шилойиъ Илийин тухумдикан гъапи гаф тамам гъапӀнийи#2:27 Лиг 1 Пачч. 2:27-36..
28ЦӀийи хабрар Юавдихьна гъурукьган (дугъу, Авессаломдин тереф гъибисундайишра, гьамус Адонияйин тереф гъибиснийи), Юав РАББИЙИН Чадриккинди гъажаргънийи ва гъурбан апӀрушван кӀарчарихъан хъичӀихнийи. 29Сулейман паччагьдиз Юав РАББИЙИН Чадриккна жаргъуваликан ва гъурбан апӀрушвахь хьайиваликан хабар дебккнийи. Думуган Сулейманди Югьудайин бай Бенаяйиз амур гъапӀнийи:
– Гъарах, думу йикӀ!
30Беная РАББИЙИН Чадриккна гъафнийи, ва дугъу Юавдиз гъапнийи:
– Гьамци кӀура паччагьди: «УдучӀв!»
Амма дугъу жаваб тувнийи:
– Ваъ, узу гьамушвахь йикӀидиза.
Бенаяйи паччагьдиз дидкан гъапнийи:
– Гьамци жаваб тувну узуз Юавди.
31Думуган паччагьди Бенаяйиз амур гъапӀнийи:
– Гьадгъу кӀуруганси апӀин. Думу йивну йикӀ ва накьвдик кив, гьаддиинди Юавди удубзу тахсир ктру ифдин тахсирнахьан узу ва йиз адашдин тухум марцц апӀин.#2:31 Муса пайгъамбрин Къанунди бязи дюшюшариъ, мисалназ, кьаст ади инсан йивну гъакӀиш, гъурбан апӀрушван кӀарчарихъан хъичӀихнайирра йивну йикӀуз ихтияр тувуйи. 32РАББИЙИ Юавдиз чав удубзу ифдин жаза тувиди, гьаз гъапиш думу йиз адашдиз хабар дарди кьюр касдиина алжагъну ва дурар турихъди йивну гъакӀну. Дурар кьюридра – Нерин бай Авнер, Израилин кьушмин аьхюр, ва Етерин бай Амаса, Ягьудайин кьушмин аьхюр – думутӀан артухъди гьякьлудар ва ужудар вуйи. 33Гъит, дурарин ифдин тахсир Юавдиин ва аьсрариъ дугъан тумриин ибшри. Хъа Давуддиин ва дугъан тумриин, тухумдиин ва тахтниин даимайиз РАББИЙИХЬАН ислягьвал ибшри.
34Югьудайин бай Беная гъушнийи, дугъу Юав йивну гъакӀнийи ва чюлиъ Юавдин йишваъ накьвдик кивнийи. 35Паччагьди Югьудайин бай Беная Юавдин ерина кьушмин аьхюр вуди дерккнийи ва Авиатарин йишвʼина Заанурин гъуллугъчи Цадук гъахнийи.
Шимей йивну йикӀуб
36Хъасин паччагьди Шимей хъади гъюз гьаъну ва дугъаз гъапну:
– Ерусалимдиъ увуз хулар тикмиш апӀин ва душваъ яшамиш йихь, хъа шагьриан сарун наанкӀа муудучӀван. 37Аьгъю йибхь, уву шагьриан удучӀву ва Кьидрун дере ккадапӀу йигъан чарасуз йикӀидива, ва уву йикӀбан тахсиркар уву хьидива.
38Шимейи паччагьдиз жаваб тувнийи:
– Ужуйи кӀурва. Узу, яв гъаравашди, йиз агъа паччагьди гъапиганси апӀидиза.
Ва Шимей Ерусалимдиъ гизаф вахтна гъузнийи. 39Амма шубуд йислан Шимейин кьюр лукӀ Гъатдин паччагь, Маахайин бай Ахишдихьна гьергнийи, ва Шимейиз дидкан хабар дебккнийи:
– Яв лукӀар Гъатдиъ а.
40Думуган Шимей даждиин элеънийи ва лукӀар агуз Ахишдихьна Гъатдиз гъушнийи. Гьаци Шимей шагьриан удучӀвнийи, ва дугъу чан лукӀар Гъатдиан кьяляхъ гъахнийи. 41Шимей Ерусалимдиан Гъатдиз гъягъюваликан ва кьяляхъ гъюваликан Сулеймандиз хабар дебккиган, 42паччагьди Шимейиз чахьна дих гъапӀнийи ва дугъаз гъапнийи:
– «Аьгъю йибхь, шагьриан уву наанкӀа гъушу йигъан чарасуз йикӀидива» кӀури, узу уву хабардар гъапӀундайин, ва узу уву РАББИЙИИНДИ ху апӀуз гъитундайин? Думуган уву узуз гъапнийва: «Ужуйи кӀурва. Узу хъпехъидиза». 43РАББИЙИИНДИ гъапӀу ху гьаз чӀур гъапӀунва, йиз амрихъ гьаз хъпехъундарва?
44Хъана паччагьди Шимейиз гъапнийи:
– Уву йиз адаш Давуддиз гъапӀу писвал увуз ужуйи аьгъявуз ва кӀваин илмияв. Гьамус РАББИЙИ увуз яв писвализ лигну тувиди. 45Хъа Сулейман паччагьдиз РАББИЙИХЬАН ужʼвал ва Давуддин тахт РАББИЙИН улихь гьаргандиз мюгькамуб ишри.
46Паччагьди Югьудайин бай Бенаяйиз амур гъапӀнийи, ва дугъу, удучӀвну, Шимей йивну гъакӀнийи.
Гьамци Сулеймандин гьюкмикк паччагьлугъ мюгькам гъабхьнийи.
Currently Selected:
Паччагьлугъар-3 2: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
