Коринф-1 6

Хъугърударин арайиъ айи гъярхьбарикан

1Хъана, учвхьан, ичв гьюжатар, Аллагьдин гирами халкьди гьял апӀуз гъидритди, хътругъру адмийирин судди гьял апӀри кӀури, гъитуз фици шулчвухьан? 2Аллагьдин гирами халкьди дюнʼяйин суд апӀруб аьгъданчвуз дарш? Учвʼин вари дюнʼяйин суд апӀувал алабхъруган, гьаму бицӀи гъярхьбар гьял апӀуз шуладанчвухьан дарш? 3Малайикаринна кмиди ухьу суд апӀурахьа гьа. Дуланажагъдин аьдати ляхнаринкьан ухьхьан суд апӀуз шуладарин? 4Гьамциб дюшюшназ ичв арайиан важиблу дару касар ичв судйирди ктагъурачва. 5Нач дубхьну ккунду! Ичв арайиъ хъугърударин месэлйир гьял апӀуз шлу саркьан аькьюллу адми адарин? 6Хъа учву гъардши гъардшилан суддиз аьрза туврачва, ва хътругърудари ичв суд апӀура! 7Учву беябур хьуз, чиб-чпилан суддиз аьрза тувувал чӀяаьн ву! Гьаци апӀайиз, жвув гьякь вушра, асккан духьну гъузуб ужу даршулин? Жвувануб тувну гъузуб ужу даршулин? 8Хъа учву ичв гъардшар асккан апӀурачва ва дураринуб бисурачва.

9Учвуз чӀур гъахьи касариз Аллагьдин Паччагьлугъ ирсди дурубкьруваликан аьгъдарди анчвуз дарш? Лигай гьа, учву ичв учвуз кучӀлар апӀрубси дарибшри! Кьяппйириз, идолариз икрам апӀрудариз, дугъри дару жиларизна хпариз, жилир жилирихъди гъярудариз, 10тӀафлариз, тямягькрариз, пиянисккйириз, футна дабгърудариз, кучӀляхяриз Аллагьдин Паччагьлугъ ирсди рубкьидар. 11Учвкан саб кьадар ари гьацдар вуйчва, аммаки ихь Аллагьдин Рюгьну ва Агъа Иса Месигьди ухьуз гъапӀубди учву марцц, гирами ва гьякь гъапӀунчву.

Гъит ичв жанар Агъайин гъуллугънаъ ишри

12Учву кӀурачва: «Узуз вари апӀуз ихтияр азуз!» Аммаки вариб хайирназ дар! «Узуз вари апӀуз ихтияр азуз», хъа гьич сабдира йиз зиин агъавал апӀуз гъитну ккундар! 13Учву гьацира, «ипӀруб – фуниз, фун – ипӀрубдиз», кӀурачва! Ав, дюз кӀурачва, хъа мура, тмура Аллагьди терг апӀрубра дюз ву. Аммаки беден кьяппавализ вуйиб дар, хъа – Агъайиз. Агъара – бедендиз. 14Аллагьди Агъа Чан кьувватниинди чӀиви гъапӀну ва ухьура чӀиви апӀиди. 15Учвуз, ичв жанар Месигьдин жандин паяр вуйиб, аьгъданчвуз? Гьаци вуйиган, узхьан Месигьдин пай гъадабгъну, кьяппавализ фици тувуз шулу? Аллагьди уьрхри! 16Учвуз, кьяппайик ктикьур, гьадгъахъди саб беден шлубдикан аьгъданчвуз дарш? Фицики дибикӀна:

«кьюрикан саб беден хьибди».

17Хъа фуж Агъайик ктикьиш, думу Гьадгъахъди рюгьниинди сатӀи шула. 18Кьяппавалихьан гьергай! Адмийи, кьяппавал ктарди, фу гунагь гъапӀишра, думу гунгьин дугъан бедендихъди фукӀара дар, хъа кьяппавал апӀурайири, чан бедендиз къаршуди гунагь апӀура! 19Учвуз ичв беден Аллагьдихьан учвуъна дуфнайи Гирами Рюгь яшамиш шулайи хал вуйибдикан хабар адарди анчвуз дарш? Сарун учву ичвдар дарчва, 20гьаз гъапиш учву зурба кьиматнахъ гъадагънайидар вучва. Гьаддиз, ичв жанариинди Аллагь за апӀинай!

Currently Selected:

Коринф-1 6: ТабГК

Highlight

Copy